Ngwian mününe ñaka ütiäte kitani kubu kwe

Sribi Ngöbökwe nuainta kä jökräbiti tibien ye dimikakäre ngwian biandre ja töi kwinbiti. Akwa ngwian ñaka krubäte nie angwane ¿nikwe dre nuaindre?

Bati, meri bobre, brare krütani ye Jesukwe tuani templo yekänti ngwian mününe kite ngwian ngwä yete. Jehová nämene tare kwe ye käkwe töi mikani “ngwian ngörä nünankrä kwe” ye bien (Mar. 12:41-44, WBT). Kukwe nuainbare kwe ye Jesukwe mikani ñärärä, ye tä mike gare Jehová kräke namani ütiäte arato. Nitre kristiano siklo kena käkwe kukwe kwin bämikani arato. Ngwian tädre kwetre o ñakare, akwa ngwian biandre ja töi jeñebiti ye nämene ütiäte kräketre. Nitre nünanka macedonia yebätä apóstol Pablo käkwe niebare nitre ye “bäri bobre bobre” akwa “ngwian bian[dre] abko rababa ribere kisere” (2 Cor. 8:1-4, WBT).

Nita ja töi jeñebiti ngwian chi bien angwane nikwe ngwandre törö jai ni mada tä nuainne ye erere ye köböire ngwian jökrä ye raba nemen ere. Nita ngwian bien ja brukwä kwinbiti angwane, kätä nemen juto ni Rün kä kwinbiti yebätä, ñobätä ñan aune “kä nuäre nibtä ngwian bien, ni ye abko Ngöböta tarere” (2 Cor. 9:7, WBT).