Kukwe drieta yekänti ni tädre mokre
1. ¿Ñobätä nikwe mokredre jabiti kukwe drieta yekänti?
1 Kä nengwane, “nitre moto kämekäme amne diän diän ngätäite” nitre Ngöbö mikaka täte tätre kukwe driere aune “ni mda mda abko krübäte lobo kwrere [...] ngätäite [niaratre tä] obeja kwrere” (Mat. 10:16; Fili. 2:15, Kukwe Kuin Ngöbökwe [WBT]). Nitre ñaka gobrantre mike täte, nitre kwati tä ji dike kukwe tare känänkäre akwle ja kräke, nitre goita ngwankäre mentokwäre, kukwe ye tä nakainkä kä jökräbiti tibien aune ye kätä bämike nitre tä “kukwe nuene bäri kämekäme” (2 Tim. 3:13, WBT). ¿Kukwe meden nieta Bibliabätä ja jie ngwankäre abokän raba ni dimike “mokrere jabti” kukwe drieta yekänti? (Mat. 10:16, WBT).
2. ¿Ñongwane bäri kwin ni rikadre kukwe driere kä madakänti?
2 Ja ngwandre töbätä. Proverbios 22:3 tä mike gare nita ja ngwen töbätä angwane ni ñaka ja mike kukwe kri tä nakainkä yete. Aisete, ni tädre käre mokre jabiti. Kä ruäre känti nitre tä nüne jäme, yete kukwe kri raba nakainkä drekebe ngwarbe arato. Ñodre, guardiatre o nitre kwati jatadre ja ükökrö jite. Nitre nünanka kä yekänti käkwe niedre nie nikwe kä mikadrekä, ye ngwane ni ñaka rabadre nünaninkä kwekebe mrüsaire, ñakare aune ni rikadre kukwe driere kä madakänti (Pro. 17:14; Juan 8:59; 1 Tes. 4:11).
3. ¿Kukwe nieta Eclesiastés 4:9 ye raba ni dimike ño kukwe drieta yekänti?
3 Ni ñaka rikadre kaibe. Eclesiastés 4:9 tä niere: “Ni nibu ye bäri kwin ni iti ye kräke”. Nita kukwe driere yekänti nita niken kukwe driere jäme kaibe akwa, ¿ye erere nuain raba jankunu? Kä ruäre känti ni raba niken kukwe driere jäme, akwa ye erere ñaka raba nemen bare kä madakänti, ye medenbätä ja ngwai o ja mräkä bati ñan raba niken kukwe driere ju ju te kaibe deu. Kukwe keta kabre tä mike gare ni rikadre ni madabe kukwe driere aune tädre mokre ye bäri kwin (Ecl. 4:10, 12). Nitre nibe tädre kukwe driere ye ñaka käi kwitadrekä jabiti aune ñongwane ni rikadre mento ye nikwe ja di ngwandre mike gare ni madai.
4. ¿Ni jökrä käkwe dre nuaindre ja ngübabitikäre kukwe drieta yekänti?
4 Nitre umbre konkrekasionte “niaratre käre tä [...] [ni jökrä] ngibiarebti”, ye medenbätä, nikwe dre nuaindre ye niaratre mikadre gare nie (Heb. 13:17, WBT). Nikwe ja töi mikai bobre aune sribidi gwairebe kwärikwäri ye ngwane Jehovakwe kukwe kwin mikai nemen bare ni kräke (Miq. 6:8; 1 Cor. 10:12). Ni Ngöbö mikaka täte käkwe kukwe driedre, akwa käre ja ngübadrebiti nuainkäre.