Nitre Ngöbö kukwei niekä kukwe kwin bämikani yebätä mäkwe blita: Jonás
1. ¿Jonás töi meden meden kwin?
1 ¿Jonás ni Ngöbö kukwei niekä yebätä nita töbike angwane dre tä nüke ni töite? Nitre ruäre tä niere niarakwe kä jürä ngwani jabätä o töi ñaka nämene ni mada yebätä. Akwa, niara ja ngwani töi bobre, ñaka kä jürä ngwani kwe jabätä aune ja nire mikani kwe kukwe tare te. ¿Niara kukwe kwin bämikani ye erere ni raba ja ngwen ño? (Sant. 5:10.)
2. ¿Ni raba ja töi mike ño bobre Jonás erere?
2 Töi bobre. Sribi biani nuaindre Jonás ie ye ngwane, niara ngitiani kä madakänti. Aune nitre Asiria ye nämene nitre nuainne tare krubäte nämene gare kwin nitre juta madate ie. Ne madakäre, juta Nínive kädekani “juta ni kämikaka” (Nah. 3:1-3). Akwa Jehová mäträbare Jonás yebätä aune niara kä bianinta bobukäre ie ne kwe rabadre mike täte, ye erere niarakwe töi bobrebiti kukwe ye kani ngäbiti (Prov. 24:32; Jon. 3:1-3). Niara ñaka tö namani sribi ye kai ngäbiti kena, akwa mrä mada sribi Ngöbökwe ye nuainbare kwe (Mat. 21:28-31). Aune ni, ¿mäträbare nibätä o kukwe drieta nikwe ye nitre ñaka tä kai ngäbiti akwa yebiti ta nita juto biare kukwe driekäre jankunu?
3. ¿Ñobätä nikwe ñaka kä jürä ngwandre jabätä aune ni tädre juto biare ja di ngwankäre kukwe driere?
3 Ñaka kä jürä ngwani kwe jabätä aune ja nire mikani kwe kukwe tare te. Jonás ngitiani ye köböite nitre nänkä rute ben ye namani kukwe tare te nükani gare ie angwane, niara nämene juto biare ja nire kwe mikakäre kukwe tare te (Jon. 1:3, 4, 12). Ye bitikäre, niara nämene sribi biani ie ye nuainne Nínive angwane, nikani gürere nememe juta ye te ruäre, ne kwe rabadre kä debe näre känene jai kukwe tare ñäkäbare Jehovakwe nitre käme kräke ye mikakäre gare. Ni kä jürä ngwen jabätä ñaka raba kukwe ye erere nuainne, ñakare aune kä jürä ñaka jire nibätä käkwe kukwe ye nuaindre (Jon. 3:3, 4). ¿Tä dre driere ja töi kräke nie? Ni rabadre ja di kärere Ngöböi ne kwe ni rabadre niara kukwei ye mike gare jankunu nitre käme ye ngätäite (Hech. 4:29, 31). Aune ñaka rabadre nuäre nuaindre ni kräke akwa ni tädre juto biare ja di ngwankäre kä denkä jai aune jondron nikwe yebiti kukwe driere (Hech. 20:24).
4. ¿Nitre Ngöbö kukwei niekä käkwe kukwe kwin bämikani ni kräke ye ñobätä ni rabadre töbiketaribätä?
4 Nitre Ngöbö kukwei niekä yebätä kukwe mikata gare abokänbätä ni tädre ñäke batire batire ye ngwane, ja nämene nemen ruin ño ietre ye erere ja rabadre ruin nie. Nikwe ngwandretari jai: “¿Tikwe dre nuaindre? ¿Ti raba ja ngwen ño niaratre ye erere?” (Heb. 6:11, 12). Ja känenkäre Sribi Nikwe Ngöbökrä yebätä nitre mada Ngöbö kukwei niekä ye tä dre driere ja töi kräke nie abokänbätä nikwe ja tötikai.