Kukwe driekäre

Sabado kena agosto yebätä ja tötika Bibliabätä kömikadre ño

“Ni jökrä bäsi käkwe orabarera Ngöböi ruäre ngwane. Nitre ñaka mike era jai, akwa kukwe tare tä nakainkä bätätre ye ngwane tätre orare ie arato. ¿Orasion nuainta ie ye jökrä tä kukwe nuin raba ruin mäi?” Ni gwi blitadre ye bitikäre, kukwe tä mikani täräkwata Ni Mikaka Mokre 1 agosto página mrä yebätä ye mäkwe mika tuadre ie aune mäkwe ja tötika kukwe ngwantarita kena yebätä ben aune texto keteitibätä mäkwe ñäkä. Mäkwe täräkwata ye drie ie aune mäkwe köbö ükate jai kukwe mada ngwantarita ye kädriekäre ben.

Kukwe nieta: 3 agosto yete gätä nuaindi kukwe driekäre ye ngwane kukwe ne bämikadre.

Ni Mikaka Mokre 1 Agosto

“Ni üai butiere mikata tuare kä jökräbiti tibien ye tä nitre kwati ngwen töbike. Akwa, jondron yebiti kä ngwandre juto jabätä ye ñaka käme nitre ruäre tä nütüre. ¿Nire tä töbike metre ye rabadre gare ño nie? [Mäkwe tuanmetre blite.] Kukwe meden kwin aune meden käme rabadre gare nie, yekäre kukwe ye köböite dre raba nemen bare yebätä töbikadre niebare Jesukwe [mäkwe ñäkä Mateo 7:17 yebätä]. Ni üai butiere tuata ye köböite dre dre tä nemen bare ye mikata gare täräkwata nebätä. Nire nire ñaka törba ni üai butiere tuai mada yekwe dre nuaindre ye mikata garebätä arato.”

¡Despertad! Agosto

“Ni jökrä bäsi törba nünain raire. ¿Nitre ja tötikaka jondron sribebare yebätä ye köböire ni raba nüne kärekäre raba ruin mäi? [Mäkwe tuanmetre blite.] Kukwe kwin krubäte käbämikata ne mike ñärärä [mäkwe ñäkä 1 Corintios 15:26 yebätä]. Akwa ¿Ngöbökwe mikai krüte ño? ¿Nitre ja tötikaka jondron sribebare yebätä köböire nuaindi kwe, o kukwe mada köböire? Ne madakäre, ¿ñobätä nita kite umbre aune nita krüte? Kukwe ngwantarita ne jökrä Biblia tä mike gare ye kwain mäi täräkwata nebätä.”