Kukwe meden rabadre tuin kwin nitre ie ye ükadrete jai blita kömikakäre
1. ¿Ñobätä ütiäte krubäte nikwe kukwe kwin ükadrete jai blita kömikakäre?
1 Ni mada tä ni kärere mröre jakänti yekänti nita niken ye ngwane, tä mrö sribere kwin ne kwe ni törbadre kwetai. Ye erere arato, kukwe Bibliabätä rabadre tuin kwin nitre ie yekäre, ni rabadre kä denkä jai aune ja di ngwen kukwe kwin ükete jai blita kömikakäre (Prov. 15:28). Kukwe ükadrete blita kömikakäre yekwe nuadre nuäi o dre niedre ye ñan aibe köböire rabai tuin ütiäte ni madai. Yebätä, ¿ni tädre kukwe ükete jai blita kömikakäre ye ngwane dre ngwandre törö jai?
2. ¿Kukwe rabadre tuin kwin nitre ie ye ni raba ükete ño jai blita kömikakäre?
2 Kukwe nemen tuin kwin nitre ie. Nikwe kukwe niedre blita kömikakäre ye ñaka rabadre tuin kwin ni madai angwane, ñaka blitai jankunu kwe nibe. Yebätä nita kukwe driere yekänti kukwe meden raba nemen tuin kwin nitre ie yebätä töbikadre käne. ¿Gobran kwin rabadre yei niaratre tö? ¿Tötre nünain kä jutobiti mräkätre ben? ¿Rü ñaka rabadrera yei niaratre tö? Nitre kwati tä töbike ño ye töta nemen niei, yebätä ni raba kukwe ngwentari ietre ne kwe rabadre blite. Täräkwata Sribi Nikwe Ngöbökrä yebätä kukwe nieta dirikäre yebiti ni raba blite. Ja tötikadre ni Mräkätre ben ye ngwane blita kömikadre ño ni madabe ye kräke ni raba ja kite.
3. ¿Nitre nüne ño aune tätre kukwe meden mike täte ye ererebätä ni raba blita kömike ño bentre?
3 Nitre nüne ño aune tätre kukwe meden mike täte. Kä ruäre känti nita niken drekäre ye nitre töta nemen ni tuai niere biare jai. Akwa, kä madakänti abokän nikwe kukwe ruäre niedre käne nitre ie, ñodre, tä tua ño ye ngwandretari ie aune blitadre chi ben. Nitre tä Biblia mike tuin ütiäte jai yekänti ni rikadre angwane, bengwairebe nikwe blitadrebätä bentre (Hech. 2:14-17). Akwa nitre kukwebätä ñaka blite Bibliabiti o nitre ñaka kukwebätä yekänti ni rikadre angwane, bäri kwin nikwe blitadre Bibliabätä bentre köbö mada ngwane (Hech. 17:22-31).
4. ¿Nikwe kukwe niedre kena ye ngwane dre ngwandre törö jai?
4 Kukwe niedre kena. Nikwe kukwe meden niedre kena yebätä nikwe töbikadre kwin käne. Kukwe braibe aune nuäre niedre ye bäri kwin. Nikwe dre niedre ye ñaka aibebätä ni rabadre töbike, ñakare aune niedre ño yebätä töbikadre arato. Nikwe blitadre kä jutobiti aune kukwe kwin niedre. Töi bökänbiti kä mikadre kötare ja ngwärebätä ye köböire nitre töi raba nemen jäme ni kukwe nuakäre ye ngwandre törö jai. Kukwe nieta ne erere nikwe nuaindi angwane yekwe ni dimikai kukwe kwin ükete jai blita kömikakäre ne kwe dreta “mesa Jehovakwe” yebiti yei nitre törbadre (1 Cor. 10:21, TNM).