Mun ja ngwan nitre Ngöbö kukwei niekä erere: Miqueas
1. ¿Miqueas ni Ngöbö kukwei niekä nämene kukwe mike gare ye ngwane kukwe meden ngwanintari kwe jai raba ruin nie, aune ñobätä ni raba niere ñaka kukwe driebare ngwarbe kwe?
1 Nita nüne kä blo te ye ñongwane mikai krüte abokän ni tärä ngwentari jai. Jehovakwe nitre Israel aune nitre Judá gaite ye Miqueas ni Ngöbö kukwei niekä nämene mike gare ietre ye ngwane kukwe ye erere ngwanintari kwe jai ni raba niere. Akwa ñaka kukwe driebare ngwarbe kwe. Kä 740 kä 1 känenkri yete, Miqueas nämene nire ye ngwane, Jehovakwe juta Samaria ganinte niebare ye erere (Miq. 1:6, 7). Ye bitikäre, kä 607 yete Jerusalén ganinte (Miq. 3:12). Aune kä blo te nita nüne ye Jehovakwe mikai krüte abokän ngübata nikwe ye ngwane, ¿nikwe ja ngwandre ño Miqueas erere?
2. ¿Ñobätä nikwe köbö Jehovakwe ngübadrebätä bätärekä, aune dre nuaindre?
2 Nikwe ngübadrebätä bätärekä. Miqueas tikabare: “Ti abokän, käkwe ja ngwain mokre Jehovakwe dre nuaindi yebätä. Erametre tikwe Ngöbö ti diantarikä ye ngübai ngäbiti” (Miq. 7:7). Miqueas namani kwekebe kise mikani ja teta ngübare ngäbiti ye ñan ai gärätä. Ñakare aune, kädekani Ngöbö kukwei niekä ye erere nuainbare metre kwe. Ye erere arato, nita köbö Jehovakwe ngübare ngäbiti ye ngwane, nikwe “nünand[re] ño, aune [ni] raba[dre] ño kwin deme” yekäre nikwe sribidre bäri (2 Ped. 3:11, 12, Ngöbö Täräe, tärä okwä ükaninte). Ngöbö tä nitre ngübarebätä bätärekä ye köböire nitre raba ja töi kwiteta ye nikwe ngwandre törö jai (2 Ped. 3:9). Yebätä, Biblia tä niere nie ye erere, nikwe nitre ngübadrebätä bätärekä nitre Ngöbö kukwei niekä nuainbare ye erere (Sant. 5:10).
3. ¿Ñobätä nikwe üai deme Jehovakwe ye kärädre käre ie?
3 Jehovakwe ni dimikai yei nikwe tö ngwandre. Sribi ñaka nuäre mikani Miqueas kisete, yebätä ja di käräbare kwe Jehovai ne kwe rabadre dite sribi ye nuainkäre (Miq. 3:8). Jehovakwe ni dimikadre arato nita ribere jai ye gare ie, aune nikwe kärädre ie orasionte nieta Bibliakwe nie. Ni rabai nainte angwane, sribi Ngöbökwe meden meden tä ni kisete yebätä ni dimikai kwe ne kwe rabadre nuainbare nie (Sal. 84:5, 7; Is. 40:28-31). Ni jatani Jehová mike täte ye ngwane ni dimikanina kwe ye gare metre nie. Ye medenbätä, käre nikwe üai deme kärädre ie (Luc. 11:13).
4. ¿Miqueas kukwe meden kwin bämikani ni käne?
4 Jehová töi nämene dre nuainbätä ye namani bäri ütiäte Miqueas kräke. Nitre nünanka niara näire nämene ja ngwen käme, akwa niara töi nämene kwatibe ja ngwanbätä metre. Nikwe ñaka ja ngwandre metre yekäre ni nuateta kukwe keta kabrebiti mantre jetebe. Yebätä, nikwe ja töi mikadre kwatibe “nän[bätä] käre aune kärekäre Jehová Ngöbö nikwe ye käbiti” (Miq. 4:5).