Mun ja ngwan nitre Ngöbö kukwei niekä erere: Nahúm
1. ¿Tärä Nahúm ye tä dre mike gare nie?
1 Nínive kirabe ganinte tuata ye tä mike gare, Nahúm niebare ye erere, Jehová ye nitre ja mikaka rüere ye gatekä. Nitre niara rüe bäri käme akwa ñaka raba di nüke ben jabätä (Nah. 1:2, 6). Nahúm kukwe niebare yebätä nikwe ja tötikai bäri kwin ngwane kukwe kwin mikai gare kwe nie kukwe driekäre.
2. ¿Ñobätä kukwe mikata gare nikwe ye kwin?
2 Nikwe nitre töi mikadre jäme aune mikadre tö ngwen kukwe kwin ie. Juta Nínive Asiria kirabe yekänti nitre nämene bike kri ye gadrete aibe tärä Nahúm tä mike gare raba tuin nie (Nah. 1:1; 3:7). Akwa, juta Jehovakwe abokän kräke kukwe kwin mikani gare. Nahúm, kä ye abokän “Ni ni Töi Mikaka Jäme” gärätä, niarakwe niebare nitre Judea mada yei niaratre rüe ye gwäune ñaka rabaira. Ne madakäre, “kukwe tare tä nemen bare [...] ye ngwane [Jehovata] ni dimike” niebare kwe ietre (Nah. 1:7). Nita kukwe driere ye ngwane, nita kukwe kwin mike gare arato aune nitre gitiadre Jehová kokwäre nita niere ietre (Nah. 1:15).
3. Nahúm ye erere, nita kukwe driere ye ngwane, ¿ño ni raba blite kukwe namani bare yebätä aune kukwe bämike?
3 Kukwe namani bare yebätä nikwe blitadre aune kukwe bämikadre. Juta Nínive yebätä dre rabadre bare ye bämikakäre, Jehovakwe Nahúm mikani blite Tebas (o No-amón) yebätä, Tebas ye abokän juta Egipto ganinte nitre Siriakwe (Nah. 3:8-10). Jondron kä nebätä gaite yebätä nikwe blitadre nitre ben angwane, kukwe namani bare kädrieta Bibliabätä yebätä nikwe blitadre ne kwe Jehová tä kukwe niere ye jökrä tä nemen bare ye mikakäre gare. Ñodre, kä 632 kä 1 känenkri yete nitre Babilonia aune nitre Media nikani nein nitre Nínive yei. Ñü nänkäni krubäte tibien yekwe ñö Tigris mikani nen tibien, aune ki kri juta yebiti ye ruäre nikani tibien. Ye köböite nitre yekwe Nínive ganinte, Jehovakwe niebare ye erere namani bare metre (Nah. 1:8; 2:6).
4. ¿Nita kukwe driere ye ngwane ni raba blite ño merebe aune kwin ne kwe rükadre gare nitrei?
4 Nikwe blitadre merebe aune kukwe rükadre gare nuäre niedre. Nahúm kukwe niebare ye tikani kwe metre, nuäre aune merebe (Nah. 1:14; 3:1). Ye erere arato, nikwe blitadre kwin ni madabe ne kwe rükadre gare nuäre ietre (1 Cor. 14:9). Ni rikadre kena nitre känti ye ngwane, ñobätä ni nikani känti ye nikwe mikadre gare metre ietre. Aune nitre ja tötikaka Bibliabätä ye nikwe dimikadre tödeke Jehovai aune Kukwe kwe yei bätä kukwe mikata gare kwetre jai ye raba dimike ño ye nikwe mikadre nüke gare ietre (Rom. 10:14).
5. ¿Nahúm kukwe niebare ye tä dre mike gare metre nie?
5 Jehovata kukwe niere ye jökrä tä nemen bare metre yei Nahúm nämene tö ngwen, tärä Bibliabätä kädekata niara käbiti yebätä mikata gare metre. Jondron Satanakwe mikai krüte köböi ye tä nökrö bäri ja ken, akwa Jehová tä ni töi mike jäme kukwe käbämikata kwe nebiti: “Kukwe tare ye ñaka rabaita bare bobukäre” (Nah. 1:9).