Nikwe kukwe driedre jw.org yebiti

Internet käi nikwe ye kwin krubäte kukwe kwin ye mikakäre gare “kä jökräbti temen” (Hech. 1:8, Kukwe Kuin Ngöbökwe). Akwa, nitre jökrä bäsi ie ñaka gare; ni kukwe driekä tä blitebätä bentre o tä mike tuare ietre ye ngwane batibe tä nemen gare ietre.

Ni konkrekasion tuabitikä tä video ¿Ñobätä ja tötikadre Bibliabätä? ye mike celularte jai aune tä mike tuare nitre ie. Ñodre, tä kukwe driere ju ju te ye ngwane, tä niere: “Tiki jötrö mäkänti kukwe ütiäte ngwantarita ketamä ne mikata gare ño ye mikakäre gare mäi: ¿Ñobätä kukwe käme tä nakainkä bäri krubäte? ¿Ngöbökwe ükaite ño? aune ¿Ükate jämi känenkri nikwe dre nuaindre? Video oto chi ne tä kukwe ye mike gare”. Tä video ye mike tuare ietre aune rabai tuin ño ietre ye nemen ngübare bätätre. Video ye kwin krubäte yebätä nitre jökrä nemen okwä kwekebebätä nememe tä krüte ye ngwane. Biti, ja mräkä ye tä niere: “Mäkwe kukwe nuri ye erere, mä raba ja tötika Bibliabätä ribere jai Internet käi jw.org/jw-ngb yete. Akwa ti nüra nete yebätä, ja tötikata ño ye ti raba driere mäi”. Tä nemen tuin kwin ni gwi yei angwane, ja tötikata ño Bibliabätä ye ja mräkä ye tä driere ie täräkwata Kukwe kwin yebiti. Kä ñaka ni gwi yei blitakäre angwane, ja mräkä ye tä nikenta köbö mada ngwane känti ja tötikata ño ye driekäre. Tä niken kabe rürübäinta ye käi känti angwane, nitre tä nemen ken yebe tä niken blite töi jämebiti aune tä kukwe ye erere niere ie. ¿Aune ni? ¿Nita kukwe driere jw.org yebiti?