Nikwe ja töi mikadre mantiame ‘jondron kwin’ ye biankäre nitre mada ie (Mat. 12:35a)

‘Jondron kwin’ tä nikwe ye ni tö biain nitre mada ie, ñobätä ñan aune ye kwrere nita “ja mik[e] mantiame” (Rom. 12:13, Ngöbö Täräe, tärä okwä ükaninte). Nitre tä nüke kukwe kädriere nitre jökrä kräke konkrekasionte ye kräke nitre umbre rabadre kukwe ükete bukakäre aune ngwian bien ietre ja ütiä biankäre ye ribeta ietre. Akwa, ja mräkätre ruäre ñaka töta nemen ja mräkätre nübai ja gwirete ñobätä ñan aune jondron ñaka krubäte kwetre nementre nütüre o tätre nemen töbike krubäte ni mada ka ngäbitikäre yebätä. Ye erere tä nakainkä mäbätä angwane, Jesukwe kukwe niebare Marta ie yebätä mäkwe töbika (Luc. 10:39-42). Ni mada tä nüke nikänti ye ngwane mrö kwin sribedre kräke o jondron keta kabre nuaindre ye ñan ai bäri ütiäte niebare Jesukwe, ñakare aune ja mräkätre tä nüke nikänti ye tä ni dimike ye abokän bäri ütiäte niebare kwe. Nikwe kukwe ye mikadre täte yekwe ni töi mikai ‘jondron kwin’ tä nikwe ye bien nitre mada ie, nieta nie Kukwe Ngöbökwe yebätä ye erere (3 Juan 5-8).