Mun ja ngwan nitre Ngöbö kukwei niekä erere: Habacuc
1. ¿Habacuc ni Ngöbö kukwei niekä ie ja namani ruin ño ye ñobätä nüke gare kwin nie?
1 Kukwe käme nuainta bäri kä jökräbiti tibien ye nita tuin, yebätä ja raba nemen ruin Habacuc erere nie, ñobätä Jehová nämene kukwe käme tuenmetre nakainkä ngwanintari kwe ie (Hab. 1:3; 2 Tim. 3:1, 13). Habacuc kukwe niebare aune ja ngwani metre kwe yebätä nikwe töbikadretari angwane ye käkwe ni dimikai kä ngwen nüke jai nita köbö kukwe ükatekäre Jehovakwe ngübare ngäbiti ye ngwane (2 Ped. 3:7).
2. ¿Ni raba ja ngwen ño metre Habacuc erere?
2 Nikwe ja ngwandre metre. Habacuc ñaka ja töi mikani kukwe nämene nakainkä niarabätä yebätä, ñakare aune ja ngwani mokre kwe aune sribibare krubäte kwe ja üairebiti (Hab. 2:1). Jehová kukwe niebare ye rabai bare metre aune nitre ja ngwanka metre yekwe nünain jankunu käbämikani kwe Habacuc ie (Hab. 2:2-4). ¿Kukwe ne tä dre driere nitre kristiano nünanka kä krüte näire yei? Kä krütai rükai ye rabadre gare metre nie ye bäri ütiäte ñongwane rükai ye kräke. Nita tödeke ye tä ni mike ja ngwen mokre aune kukwe driedre ye nita mike nuaindre käne jai (Heb. 10:38, 39).
3. ¿Ñobätä nikwe jankunu Jehová mikadre täte kä jutobiti?
3 Jehová mikadre täte kä jutobiti. Gog Magog käkwe ja mikai juta Jehovakwe rüere ye ngwane tödeka nikwe ye nuaite (Ezeq. 38:2, 10-12). Rü nuainta ye ngwane, kukwe ñaka nuäre tä nemen bare, nitre tä ganane ye kräke ñaka nemen nuäre arato. Jondron tä nete nitre kän, mrö ñaka nemena krubäte aune nüna kite bobre. ¿Kukwe ye erere rabadre bare nibätä angwane ja töi mikadre ño? Habacuc yebätä kukwe kri rabai bare ye nämene ngübare, yebätä ja töi mikani kwatibe kwe Jehová mike täte kä jutobiti (Hab. 3:16-19). “Kä juto Jehovakwe” yekwe ni dimikai kä ngwen nüke jai kukwe kri rabai bare ye ngwane arato (Neh. 8:10; Heb. 12:2).
4. ¿Dre kwin raba nemen nikwe kä nengwane aune ja känenkäre?
4 Jehovakwe nitre kriemikai köbö kukwe ükatekäre näire ye tötikai jankunu kwe (Hab. 2:14). Nitre gaikröta yekwe kukwe mikai gare jai Jehovabätä arato. Kä nengwane nikwe ja töi mikadre kwatibe blite nitre jökrä ben Jehovabätä aune jondron sribebare kwe yebätä (Sal. 34:1; 71:17).