Mäkwe diri bäri kwin: tärä ‘Munkwe Ngöbö taredre jankunu’ yebiti mäkwe kukwe mika nemen nitre brukwäte

ÑOBÄTÄ ÜTIÄTE. Jehovata dre dre ribere nie ye nitre rabadre mike gare jai aune ye erere rabadre nuainne ne kwe Jehová mikadre täte kwetre ye rabadre debe Jehová kräke (Isa 2:3, 4). Tärä kubukäre nitre tötikakäre Bibliabätä nie ye abokän tärä “Ngöbö taredre”, tärä ye tä nitre dimike ja jie ngwen kukwe Ngöbökwe ye ererebätä mantre jetebe (Heb 5:14). Nikwe ja di ngwandre kukwe mikakäre nemen nitre ja tötikaka nibe ye brukwäte, ne kwe jatadre ja töi kwite ye ngwane nuaindre töi bökänbiti kwetre (Ro 6:17).

NUAINDRE ÑO:

• Mäkwe ja tötika kwin. Kukwe meden meden raba ni ja tötikaka dimike ye mäkwe ngwan törö jai. Kukwebätä tä ja tötike ye tuin ño ie mäkwe ngwantari ie, töita ño aune ja ruin ño ie rabadre gare mäi yekäre (Pr 20:5; be-S pág. 259).

• Kukwe nieta Bibliabätä ja jie ngwankäre ye mikadre täte ye kwin krubäte mäkwe drie ni ja tötikaka mäbe yei recuadro yebiti.

• Ni töita ño ye ererebätä jondron ruäre nuainta ye mäkwe mika nüke gare ni ja tötikaka mäbe yei, akwa dre nuaindre kwe ye ñaka nie ie (Gál 6:5).

• Ni ja tötikaka rabadre kukwe nieta Bibliabätä ja jie ngwankäre ye nuainne kukwe ruäre känti o ñakare ye mäkwe mika nüke gare jai. Jehová tare kwe yebätä ja töi kwitadre kwe mäkwe nie töi kwinbiti ie (Pr 27:11; Jn 14:31).