“Pablo [...] kuin niebare [...] amne ja rababa ruenta dite ie”

Pablo nikani Roma kokwäre ye namani gare ja mräkätre konkrekasion yete ie ngwane, niaratre ruäre nänbare kilómetro 64 näre Pablo ngäbiti. ¿Niaratre ja tare metre bämikani ye köböire ja namani ruin ño Pablo ie? Niaratre jutuabare ie ngwane, “kuin niebare kwe btätre Ngöböye amne ja rababa ruenta dite ie” (Hch 28:15). Käre Pablo nämäne ja mräkätre konkrekasionte dimike. Akwa nengwane, niara dimikadre ye ribe nämäne kwe jai ñan ñobätä aune nämäne ngite (2Co 13:10).

Kä nengwane, nitre circuito tuabitikä tä konkrekasion tuinbiti ja mräkätre dimikakäre. Ruäre ngwane, niaratre tä nemen nainte, töbika kukwei tä nemen kisete o tätre nemen di nekä arato tä nemen bare ni jökräbätä ye erere. Ni circuito tuabitikä aune muko kwe tä nüke ye ngwane, ¿ni raba dre nuainne ne kwe nikwe “ja die mikadre kwärikwäri”? (Ro 1:11, 12).

• 

  Ni rikadre gätä nuainta kukwe driekäre yebätä. Bämän ütiäte ye ngrabare nita ja di ngwen kukwe driekäre ngwane, jata nemen ruin dite ni circuito tuabitikä yei (1Te 1:2, 3; 2:20). Sö medenbätä ni circuito tuabitikä tä konkrekasion nikwe tuinbiti ye näire ni raba ja di ngwen sribi prekursor ausiliar ye nuainne. Ni raba kukwe ükete jai ne kwe ni circuito tuabitikä o muko kwe kukwe driedre nibe o rikadre nitre tötike nibe. Krire mätä kukwe driere o mä ñaka nuainne kwin ye mäkwe ñaka nütüdre. Niaratre töta nemen kukwe driei nitre kukwe driekä ye jökrä ben.

• 

  Nikwe ja töi mikadre mantiame. Ni raba niaratre kain ngäbiti ja gwirete bämän yebätä o ni raba nübaire mröre jakänti. Yebiti nikwe bämikai niaratre tare nikwe. Ne madakäre, nikwe mrö bätäkä ngwarbe sribedre o kä ükadrete bäre bäre ye niaratre ñaka ngübare nibätä (Lu 10:38-42).

• 

  Kukwe nieta kwe mäträkäre nibätä ye nikwe kukwe nuadre aune mikadre täte. Ni circuito tuabitikä tä ni dimike töi kwinbiti sribire bäri kwin Jehová kräke. Ruäre ngwane, niara raba mäträre ja dibiti nibätä (1Co 5:1-5). Nikwe ni circuito tuabitikä mikai täte aune nikwe ja tuainmetre jie ngwen ie ngwane, sribidi kä jutobiti kwe (Heb 13:17).

• 

  Nikwe debe biandre ietre. Ni circuito tuabitikä aune muko kwe käkwe mä dimikanina krubäte ye mä raba mike gare ietre. Mä raba niere ja kukweire ietre o mä raba tärä tike ietre (Col 3:15).