Ngöbö ye töbätä, ni tarekä aune kukwe ngübare bätärekä bämikata kwe nitre gaikröta kwe yebiti

1. ¿Ñobätä Jehovakwe ni nire aune jondron nire ye sribebare?

KÄ KWATI krubäte te Jehová nämäne kaibe, akwa ja ñan namani ruin kaibe jire ie. Niara ñaka nämäne ni mada ribere jai ne kwe kä tädre jutobätä. Akwa tö namani ni mada tuai nire aune kä ngwen juto jabätä. Aisete ja tare ye käkwe niara töi mikani jondron jökrä sribere (Sal. 36:9; 1 Juan 4:19).

2. ¿Jehovakwe jondron mada sribebare ngwane ja namani ruin ño Jesús aune angeletre ie?

² Kena, Jehovakwe Monso kwe Jesús ye sribebare. Biti, Jesús ye köböire jondron mada namani sribebare, ye ngätäite angeletre sribebare arato (Col. 1:16). Jesukwe sribibare Rün kwebe ye käi namani jutobätä (Prov. 8:30). Aune angeletre yebätä kä namani juto arato, ñobätä ñan aune niaratre okwäbiti Jehová aune Jesús kä kwinta aune Kä tibien ye sribebare. ¿Kä namani juto bätätre ye bämikani ño kwetre? Kä tibien sribebare ngwane Ngöbö käikitaninkä kwetre aune namanintre Ngöbö käikitekä jankunu jondron mada mada sribebare kwe yebätä, metrere ni nire sribebare ngwane kä namani juto bätätre (Job 38:7; Prov. 8:31). Jehová ye ni tarekä aune töbätä ye bämikata jondron jökrä sribebare kwe yebätä (Sal. 104:24; Rom. 1:20).

3. 1 Corintios 15:21, 22 tä niere erere, ¿Jesús ja nire biani ni kökatarikäre ye köböire dre raba nemen nikwe?

³ Jehovakwe planeta bä nuäre sribebare yete tö namani ni kä tibienbätä tuai nüne kärekäre te. Akwa Adán aune Eva ja mikani Ngöbö ni tarekä ye rüere ngwane, ngite aune gata namani käbiti tibien (Rom. 5:12). ¿Jehovakwe ñobare? Dre nuaindi kwe ni kä tibienbätä kökatarikäre ye mikani gare kwe bengwairebe (Gén. 3:15). Ja töi mikani kwe Monso kwe bien Adán aune Eva ngäbriänkätre kökatarikäre ngite aune gata yebätä. Ye köböire, nire käkwe ja töi mikadre niara mike täte yei ja nire käre biandre kwe (Juan 3:16; Rom. 6:23; ñäkädre 1 Corintios 15:21, 22 yebätä).

4. ¿Kukwe meden meden ngwantarita nibike mike gare jai kukwe ja tötikara nekänti?

⁴ Jehovakwe nitre krütanina ye mikaita nire käbämikani kwe yebätä nita nemen kukwe keta kabre ngwentari jai. Ñodre, ¿nitre gaikröta ño? ¿Ni mräkä krütani nikän ye rükaita gare nie? ¿Nitre gaikröta ye ñobätä kä mikai juto nibätä? ¿Aune Ngöbökwe nitre gaikröta ye tä dre driere nie niarata ni tarere, töbätä aune tä ni ngübare bätärekä yebätä? Ani mike gare jai.

¿NITRE GAIKRÖTA YE NUAINDI ÑO RABA RUIN NIE?

5. ¿Nitre ñaka gaikröta ja näirebe ye ñobätä raba ruin nie?

⁵ Jehovakwe Monso kwe köböire nitre kwati krubäte gaikröta. Akwa nitre ye ñaka rükaita nire ja näirebe raba ruin nie. ¿Ñobätä raba ruin nie? Ñobätä ñan aune, nitre kwati ye mikadreta nire ja näirebe ngwane ñan rabai nuäre nünankäre. Aune kukwe ñaka tä ükaninte kwin ye ñaka tuin kwin Jehovai. Yebätä kä tädre jäme yekäre kukwe ükadrete kwin jatäri gare ie (1 Cor. 14:33). Jehová nikani kä tibien ükete bätärekä bätärekä Jesube nünankäre nie, yebiti niara abokän töbätä aune kukwe ngübare bätärekä bämikani kwe. Ye erere Jesukwe nuaindi gobrandi kwe kä mil te ye näire. Nire nire rabaite nire Armagedón yebätä ye dimikai kwe kä tibien ükete nitre krütanina ye ka ngäbitikäre.

6. ¿Hechos 24:15 tä niere erere nire nire gaikröta?

⁶ Akwa nitre rabaite nire Armagedón yebätä ye rabadre Gobran Ngöbökwe aune kukwe nuain mananta Ngöbökwe ye driere nitre gaikröta yei ye sribi bäri ütiäte rabai kisete. ¿Ñobätä nitre ye tötikai kukwe yebätä? Ñobätä ñan aune nitre gaikröta ye bäsi jökrä ñaka kukwe metre nuainkä mikata gare Bibliabätä (ñäkädre Hechos 24:15 yebätä).b Kristo ni kökanintari ye köböire kukwe kwin rabadre nitre gaikröta yekwe yekäre rabadre ja töi kwite kukwe keta kabrebätä. Erametre, nitre kwati ie Ngöbö ñaka gare ye tötikadre ye sribi kri rabai ni kisete. ¿Nita nitre tötike nengwane erere nikwe nitre gaikröta ye tötikai? ¿Ja ükadrekrö kwetre konkrekasionte ribedi ietre aune diridi ietre nitre mada gaikröta niaratre ye bitikäre tötikakäre? Ni täi yete ye ngwane batibe rabai gare nie. Akwa Kristo gobraindi kä mil te ye rabaira krüte ngwane kukwe Jehovakwe ye rabaira kä jökräbiti tibien yebrä gare nie (Is. 11:9). Erametre nikwe sribi ütiäte nuaindi kä mil te.

7. ¿Ñobätä nitre Jehová mikaka täte käkwe nitre rükaita nire ye mikai tuin bobre jai tötikakäre?

⁷ Kä mil te ye näire, ni Jehová mikaka täte ye rabadre ja töi kwite jankunu kä mikakäre jutobätä. Yebätä, nitre Jehová mikaka täte käkwe nitre rükaita nire ye mikai tuin bobre jai niaratre dimikakäre ja töi kwite kukwe käme yebätä aune nüne Jehová tö ie ye erere (1 Ped. 3:8). Erametre, nitre Jehová mikaka täte ye töi bobre aune tä ja di ngwen ja töi kwitakäre kä mikakäre juto Jehovabätä ye jutuai nitre gaikröta yei ngwane tö rabai mikai täte siba (Filip. 2:12).

¿NI MRÄKÄ YE RÜKAITA GARE NIE?

8. ¿Ni mräkä o ja ketamuko gaikröta ngwane rükaita gare nie ye ñobätä ni raba niere?

⁸ Kukwe keta kabrebätä nitre gaikröta ye rükaita gare mräkätre kwe ie raba ruin nie. Ñodre, nitre ganinkröta ño nieta Bibliabätä erere, nitre bä ño, nämäne blite ño aune nämäne töbike ño krütadre ye känenkri ye erere Jehovakwe mikaita nire. Ne madakäre, nita krüte ye Jesukwe bämikani nita niken kübien ye kwrere aune ni gaikröta ye bämikani kwe ni kübiani tä nüketa ngwäte ye erere (Mat. 9:18, 24; Juan 11:10-13). Ni ño nikani ja düke ye erere nita nüke ngwäte, ni bä, ni kukwei aune nita töbike ño ye tä ja erebe. Ani töbike Lázaro krütani yebätä. Köbö te Jesukwe ganinkröta ngwane, doboi mikanina köböbokära, aisete jatanina ngütüete. Akwa ngwaitre ie niara nükani gare bengwairebe aune niara ie ngwaitre nämäne törö känime (Juan 11:38-44; 12:1, 2).

9. Nitre krütani gaikröta ngwane, ¿ñobätä ñaka gaikröta ngrabare kwin aune töi metrebiti bengwairebe?

⁹ Kristo gobrandi ye näire ni ñaka käkwe niedi, “tita bren” käbämikata Jehovakwe (Is. 33:24; Rom. 6:7). Ye tä mike gare, Jehovakwe nitre gaikröta ngwane, ngrabare kwin biain kwe ietre, akwa niaratre ñaka rabai töi metre bengwairebe. Jehovakwe nuaindre akräke, niaratre ñaka rükadre gare mräkätre kwetre ie. Kristo gobrandi kä mil te ye näire, bätärekä bätärekä ni kä tibienbätä töi jatai nemen metre. Kä mil ye krütai ngwane, Jesukwe gobran ye biainta Rün kwe ie. Kä ye näire, sribi jökrä rabaira täte gobran yei, ñodre, nitre kä tibienbätä mike töi metre (1 Cor. 15:24-28; Apoc. 20:1-3).

¿NITRE GAIKRÖTA YE ÑOBÄTÄ KÄ MIKAI JUTO NIBÄTÄ?

10. ¿Nitre gaikröta yebätä ja rabai ruin ño nie?

¹⁰ Ni ja tuaita ni mräkä krütani nikän yebe ngwane ja rabai ruin ño nie ye bämike ja töite. ¿Nikwe kötai? ¿Kä rabai juto nibätä yebätä nikwe muadi? ¿Ja rabai ruin kwin nie yebätä nikwe kantadi Jehovai käikitakakäre? Erametre nitre krütani mikaita nire yebätä ni Rün ni tarekä aune Monso kwe ni tarebare ye rabai bäri tare nikwe yebrä gare nie.

11. Jesús kukwe niebare Juan 5:28, 29 ye erere, ¿nitre gaikröta käkwe Jehová mikai täte yekwe dre rabai?

¹¹ Nitre gaikröta bätärekä jatäri jatai ja töi kwite Ngöbö mikakäre täte. Yebätä ja rabai ruin kwin ietre ye bämike ja töite. Nire nire käkwe ja töi kwitai “ye gaikröta nünankäre”, akwa nire käkwe ja mikai Ngöbö rüere ye ñaka tuainmetre kwe nüne kärekäre kä bä nuäre yete (ñäkädre Juan 5:28, 29 yebätä;c Is. 65:20).

12. ¿Jehovakwe kukwe meden kwin mikai nemen bare nitre kä tibienbätä kräke?

¹² Gobran Ngöbökwe rabai gobrane ngwane, Proverbios 10:22 tä dre niere ye ni Ngöbö mikaka täte käkwe tuai nemen bare. Yete nieta: “Jehovata kukwe kwin bien ye köböire jondron tä nemen ere nikwe, aune yebiti ñaka ni mike ja tare nike”. Üai deme Jehovakwe käkwe niaratre dimikai, ye köböire jondron rabai ere kwetre ja üairebiti, ye abokän, jatai ja ngwen bäri Kristo erere nememe niaratre töi rabai metre ngwane (Juan 13:15-17; Efes. 4:23, 24). Köbö kwatire kwatire jatai ja ngwen bäri kwin aune ngrabare rabai bäri dite. Kä rabai juto krubäte bätätre (Job 33:25). ¿Akwa nitre mikaita nire yebätä nikwe töbikadretari ye tä ni dimike ño nengwane?

JEHOVATA NI TARERE YE MIKADRE ÜTIÄTE JAI

13. Salmo 139:1-4 tä niere erere, ¿Jehovakwe ni krütanina mikaita nire yebiti ni gare kwin ie ye bämikata ño kwe nie?

¹³ Nibira gare nie ye erere, Jehovakwe nitre gaikröta ngwane, töi aune nämäne ja ngwen ño krütadre ye känenkri ye erere mikaita nire kwe. Ñobätä ye rabai bare yebätä ani töbike. Jehová tä ni itire itire tarere, yebätä nita töbike ño, ja ruin ño nie, nita dre niere aune nita dre nuainne ye gare kwin ie. Aisete niarakwe nitre gaikröta ngwane rabai nuäre kräke, ni töi, nita ja ngwen ño aune nita töbike ño ye biankäreta nie. Ni itire itire gare kwin Jehovai ye nämäne gare rei David ie (ñäkädre Salmo 139:1-4 yebätä).d ¿Niara töita krubäte nibätä ye nüke gare nie ngwane jata nemen ruin ño nie?

14. ¿Ni gare kwin Jehovai yebätä nita töbike ngwane ja raba nemen ruin ño nie?

¹⁴ Ni gare kwin Jehovai yebätä nikwe töbikadre ngwane ni ñaka rabadre ja töibikaire krubäte. ¿Ñobätä nita ye niere? Ñobätä ñan aune niara tä ni tarere krubäte aune ni itire itire ye ütiäte niara kräke. Ne madakäre, nita töbike ño, ja ruin ño nie, nita dre niere aune nita dre nuainne ye gare kwin ie. ¿Kukwe ye nemen gare nie ye tä ni töi mike jäme krubäte ñan ererea? Yebätä ja ñaka rabadre ruin kaibe nie, ñobätä ñan aune Jehová tä käre ni ken juto biare ni dimikakäre (2 Crón. 16:9).

JEHOVÁ TÖBÄTÄ YE NIKWE MIKADRE ÜTIÄTE JAI

15. ¿Jehová töbätä ye bämikai ño kwe nitre gaikröta kwe yebiti?

¹⁵ Gata jürä ngwanta jabätä, yebiti nitre gobrainta Satanakwe tä kä jürä mike nitrebätä ne kwe trö kwitadre kwetre ja ketamuko ie o ñaka rabadre jankunu ja ngwen kwin yekäre. Akwa ye erere ñaka tä nemen bare nibätä. Ñobätä ñan aune, ni rüe käkwe ni kämikadre ngwane, Jehovakwe ni mikaita nire ye gare nie (Apoc. 2:10). Kukwe ñokwä nuaindi kwetre ni diankakäre mento Jehovabätä akwa ye ñaka rabai bare ietre ye gare metre nie (Rom. 8:35-39). Jehovakwe nitre gaikröta käbämikata kwe nie yebiti niara ye töbätä krubäte bämikata kwe nie. Yebätä nitre gobrainta Satanakwe tä ni rätekä gata yebiti, akwa ni ñaka kukwe ye töibikaire. Ne madakäre, kukwe kwin käbämikata Jehovakwe ye tä ni brukwä mike kwekebe jai ja ngwankäre metre Jehovai.

16. ¿Kukwe meden meden ni raba ngwentari jai aune ye käkwe dre mikai gare?

¹⁶ Nitre ja mikaka Jehová rüere käkwe mä kämikai niedre kwe mäi ngwane, ¿Jehovakwe mä gaikröta ie mäkwe tö ngwain? Rabadre gare mäi yekäre, mä raba ngwentari jai: “¿Kukwe kiakia tita den nuaindre jai köbö kwatire kwatire yebiti tita tö ngwen Jehovai tita bämike?” (Luc. 16:10). “Nire nire käkwe Gobran Ngöbökwe mikai käne ngwane Jehovakwe ngübai käbämikata kwe, ¿tita nüne ño yebiti tita tö ngwen kukwe ye ie tita bämike?” (Mat. 6:31-33). Nikwe jän niedi ngwane, kukwe yei nita tö ngwen ye käkwe ni dimikai ja tuakäre kukwe ñokwä ben (Prov. 3:5, 6).

JEHOVATA NI NGÜBARE BÄTÄREKÄ YE MIKADRE ÜTIÄTE JAI

17. a) Jehovata kä bäri kwin ngübare nitre krütani gakrökäreta, ¿ye ñobätä tä bämike niara ye kukwe ngübaka bätärekä? b) ¿Jehovata kukwe ngübare bätärekä yebätä nita debe bien ye ni raba bämike ño?

¹⁷ Jehovakwe köbö aune ora kitanina nitre käme ye gatekäre (Mat. 24:36). Niara tö nitre krütanina ye gaikröta, akwa köbö kitani kwe ye ngübai bätärekä kwe aune ñaka nuaindi kwe känenkri (Job 14:14, 15). Kä bäri kwin ngübata kwe nuainkäre (Juan 5:28, TNM). Jehovata kukwe ngübare bätärekä yebätä kukwe tärä nie debe biankäre ie. Ñodre, Jehovata kukwe ngübare bätärekä ye köböire kä tärä nitre ie ja töi kwitakäre aune ye ngätäite nita arato (2 Ped. 3:9). Nitre kwati ye nünandre kärekäre ie Jehová tö. ¿Jehovata kukwe ngübare bätärekä yebätä nita debe bien ie ngwane nikwe dre nuaindre? ‘Nitre tö nünain kärekäre’ ye nikwe ja di ngwandre känene aune nikwe dimikadre Jehová tarere aune mike täte (Hech. 13:48, TNM). Ye köböire kukwe kwin rabai kwetre Jehovata ni ngübare bätärekä yebätä.

18. ¿Ñobätä nikwe nitre mada ngübadre bätärekä?

¹⁸ Ni töi rabadre metre, ye Jehovakwe ngübai bätärekä kä mil krati te. Aune tä juto biare ngite juankäre ta nibiti nememe kä ye näire. Yebätä, niara erere nitre mada töi kwin yebätä ja töi mikadre aune ngübadre bätärekä. Dre namani bare meri testiko itibätä yebätä ani blite. Muko kwe jatani ja töibikaire krubäte aune ñan namani nemen gätäbätä mada. Niara tä niere: “Kukwe ye rababa tare tikrä. Kukwe nämä nuaindre nunye ye jökrä rikaba tibien”. Akwa yebiti ta, meri ne käkwe muko kwe tarebare jankunu, ngübabare bätärekä, tö ngwani kwe Jehovai aune ñaka ja di ngwani nekä. Jehová erere, niara ñaka ja töi mikani kukwe nämäne nemen bare yebätä, ñakare aune muko kwe töi kwin yebätä ja töi mikani kwe. Meri ye tä niere: “Ti muko ye töi kwin keta kabre aune tä ja di ngwen krubäte rabakäreta kwin ja üairebiti”. Ni mräkätre o ja mräkätre konkrekasionte tä ja tuin kukwe ruäre ben ye nikwe ngübadre bätärekä ye ütiäte krubäte.

19. ¿Nikwe ja töi mikadre kwatibe dre nuainne?

¹⁹ Kä tibien sribebare ngwane kä namani juto Jesús aune angeletre yebätä. Nitre töi metre Jehová tarekä aune mikaka täte ye aibe täi kä tibienbätä ngwane, kä rabai juto bätätre ye bämike ja töite. Aune nitre gobrandi Kristobe yebätä kä rabai juto arato ñobätä ñan aune sribi nuaindi kwetre ye köböire kukwe kwin rabai nitre kä tibienbätä yekwe (Apoc. 4:4, 9-11; 5:9, 10). Ne madakäre, köbö te nikwe ñaka ja muaidi ja tare nikabätä, ñakare aune kä juto nibätä yebätä, ni ñaka rabaira bren, ja ñan rabai ruin ulire nie aune gata ñaka rabaira ngwane nikwe nünain ño ye bämike ja töite (Apoc. 21:4). Ye medenbätä, nikwe ja töi mikadre kwatibe ja tare bämike ni Rün kä kwinbiti erere, ja ngwen töbätä aune kukwe ngübare bätärekä niara erere nememe kä ye ngwane. Ye erere nikwe nuaindi ngwane, kä rabai juto nibätä dre dre rabadre bare nibätä yebiti ta (Sant. 1:2-4). Jehovakwe nitre gaikröta käbämikani kwe yebätä nita debe bien krubäte ie (Hech. 24:15, TNM).