“Nire nire tä Jehová känene yekwe ñaka jondron kwin täi nikai”

1. ¿Kukwe meden tare ben David nämene ja tuin?

REI dite Israelkwe Saúl, töi nämene kwatibe David kämikabätä, yebätä David nämene ngitie. Jondron ñaka namani ie kwetakäre yebätä namani juta Nob yekänti ngwane, pan krärike aibe käräbare kwe kwetakäre jai (1 Sam. 21:1, 3). Ye bitikäre niara aune nitre rükä kwe käkwe ja rükaninte jä mäkäre yete (1 Sam. 22:1). ¿Ñobätä David nämäne ja tuin kukwe ne ben?

2. ¿Dre köböite Saúl ja mikani kukwe kri te? (1 Samuel 23:16, 17).

² David jatani ütiäte aune gananbare kwe rü kabrebätä ye jutuabare Saúl ie ngwane, moto namani kwatibe David kräke. Niarakwe ñaka Jehová kukwe mikani täte yebätä Jehovakwe ñaka kani ngäbiti mada rei erere aune Jehovakwe David mikani gobrane niara täte Israel ye nämene gare ie arato (ñäkädre 1 Samuel 23:16, 17 yebätä).b Akwa Saúl nämene gobrane känime Israel yebätä nitre rükä kwati nämäne kwe aune nitre kwati nämäne niarakri. Aisete David ngitiani rabatekäre kwäre. Akwa, ¿kukwe meden niebare Jehovakwe Davidbätä ye rüere rei Saúl raba ja mike nämäne ruin Saúl ie? (Is. 55:11). Biblia ñaka niere akwa kukwe keteiti tä gare metre nie: Saúl nämäne ja mike kukwe kri te. Nireta ja mike Ngöbö rüere ngwane, käre tä nete.

3. ¿David nämäne ja tuin kukwe tare ben akwa yebiti ta ja nämäne ruin ño ie?

³ David ye töi bobre. Niarakwe ñaka ja mikani jite rabakäre reire, ñakare aune Jehovakwe dianinkä rabakäre reire (1 Sam. 16:1, 12, 13). Ye köböite, Saúl brukwä nämäne kwatibe kräke aune tö namani kämikabätä. Akwa kukwe tare ben David nämene ja tuin yebätä ñan ngite kitani kwe Jehovabiti. Mrö ñaka nämene krubäte kwe aune nämene ja üke jä mäkäre te yebätä ñan ngite kitani kwe Jehovabiti. Ñakare aune nämäne ja ükani jä mäkäre te ngwane, kansion bä nuäre ye sribebare kwe raba ruin nie aune texto ye dianinkä kukwe ja tötikara ne kräke: “Nire nire tä Jehová känene yekwe ñaka jondron kwin täi nikai jire” (Sal. 34:10).

4. ¿Kukwe meden ngwantarita ni bike mike gare jai aune ñobätä ütiäte?

⁴ Nitre kwati Jehová mikaka täte yekwe mrö ñaka krubäte aune jondron mada nünankäre ye ñaka kwetre.c Metrere kukwe ne nemen bare bren tare ne näire. Aune “ja tare nikai kri” ye kitera nüke ja ken yebätä kukwe kri jatai nakainkä bäri (Mat. 24:21). Ye medenbätä, ani kukwe ngwantarita ketabokä ye mike gare jai: ¿Davidkwe ñaka jondron kwin täi nikani jire ye ñobätä ni raba niere? ¿Ñobätä ni rabadre ja di ngwen jondron tä nikwe ye käi ngwen juto jabätä? ¿Jehovakwe ni ngübai ye ñobätä tädre gare metre nie? ¿Aune ni raba ja ükete ño gwäune kä ja känenkäre ye kräke?

“JONDRON JÖKRÄ TÄI TIKWE”

5, 6. ¿Nitre Jehová mikaka täte käkwe ñaka jondron kwin täi nikai ye Salmo 23:1-6 tä ni dimike ño mike nüke gare jai?

⁵ Nitre Jehová mikaka täte yekwe jondron kwin ñaka täi nikai jire niebare Davidkwe ngwane, ¿dre gäräbare kwe? Kukwe bäsi ja erebe niebare kwe Salmo 23 yekänti, nikwe ja tötikadrebätä ye käkwe ni dimikai kukwe ye mike gare jai (ñäkädre Salmo 23:1-6 yebätä).d Davidkwe Salmo ne kömikani krörö: “Jehová abokän ti ngübaka oveja erere. Jondron jökrä täi tikwe”. Salmo mada nekänti kukwe meden bäri ütiäte kädekaninte Davidkwe: Jehová ye abokän niara ngübaka yebätä kukwe kwin keta kabre ja üairebiti nämäne kwe. Jehová nämene “jie ngwen ji metre yebiti” aune Jehovakwe dimikani kukwe kwin aune kukwe tare näire. David nämene “kä kiare” Jehovakwe yekänti yebätä kukwe ñan rabai kisete ye ñan ai gäräbare kwe. Ruäre ngwane nämene nemen di nekä nänta “kä kiare iko bedare” ye kwrere ja nämene nemen ruen ie aune nitre käkwe ja mikai rüere niebare kwe. Akwa, Jehová niara ngübaka yebätä Davidkwe niebare: “Kukwe käme ye tikwe ñaka jürä ngwain jabätä”.

⁶ Ye medenbätä, ¿jondron kwin ñaka täi nikani jire Davidkwe ye ñobätä nie raba? Kukwe ja üairebiti jondron jökrä nämäne kwe. Jondron kä nebätä ye ñan nämene kä mike jutobätä. Jehová nämäne dre bien ie ye nämäne debe kräke. Jehová nämäne kukwe kwin mike nemen bare David kräke aune kriemike ye nämäne bäri ütiäte David kräke.

7. Lucas 21:20-24 tä niere erere, ¿kukwe meden tare ben nitre kristiano siklo kena nünanka Judea käkwe ja tuani?

⁷ Jondron kä nebätä ye mikadre tuin ño jai ye nemen gare metre nie kukwe niebare Davidkwe yebiti. Jondron kä nebätä tä nikwe ye ni raba käi ngwen juto jabätä bäkänä, akwa ye ñaka mikadre nuaindre käne jai. Kukwe ye metre nükani gare nitre kristiano siklo kena nünanka Judea ye ie (ñäkädre Lucas 21:20-24 yebätä). Nitre rükä käkwe ja ükaikrö Jerusalén bäre ye köböi rükai niebare Jesukwe. Ye rabadre bare ngwane, niaratre gitiadre kä tokwäte. Ye erere nuaindi kwetre ngwane rabaite kwäre, akwa yekäre rabadre jondron keta kabre tuenmetre. Täräkwata La Atalaya käkwe niebare: “Ju aune tire kwetre ye tuanimetre kwetre aune jondron gwita ye ñaka ükaninkrö kwetre jai. Jehovakwe kriemikai aune dimikai yei tö ngwani kwetre, Jehová mikadre täte ye mikani bäri ütiäte kwetre jai jondron mada mada ütiäte yebiti ta”.

8. Nitre kristiano siklo kena nünanka Judea käkwe ja tuani kukwe tare ben, ¿ye tä kukwe ütiäte meden driere ja töi kräke nie?

⁸ Nitre kristiano siklo kena nünanka Judea käkwe ja tuani kukwe tare ben, ¿ye tä kukwe ütiäte meden driere ja töi kräke nie? Täräkwata La Atalaya kädrite párrafo käne yekänti käkwe mikani gare arato: “Nita jondron kä nebätä mike tuin ño jai yebiti ni nuate raba ja känenkäre. ¿Jondron ye rabai bäri ütiäte ni kräke o nire nire tä Ngöbökri mikai kwäre kwe ye rabai bäri ütiäte ni kräke? Metrere, ni gitiadre ye köböite nikwe ja tuai kukwe ruäre tare ben aune kukwe ruäre ni ñaka rabadre nuainne. Akwa nitre kristiano siklo kena ngitiani Judea yebätä erere, ni tädre juto biare kukwe meden erere nuainkäre”.e

9. ¿Apóstol Pablo kukwe niebare nitre kristiano hebreo ie ye tä mä dimike ño?

⁹ Nitre kristiano yekwe jondron jökrä nämäne ye tuanimetre kwetre aune nikani nüne kä mada känti ye namani tare kräketre, ¿ye ni raba bämike ja okwäte? Nämänentre dre ribere jai ye Jehovakwe biain ietre yekäre namanintre tödeka ribere jai. Akwa kä kwärike nitre romano Jerusalén ketadrekä jai ye känenkri, apóstol Pablo käkwe kukwe ruäre niebare nitre hebreo ie ye käkwe niaratre dimikani krubäte. Niebare kwe: “Mdakäre abko, munkwe ñan ngwian tare dikaro amne jondron ño ño tä munkwe, ye abko käi ngwian nuäre jabätä munkwe, ñobtä ñan angwane Ngöbökwe niebare krörö: ʻTikwe ñan mä mikadrete jire chi kaibe amne, tikwe ñan kä mikadrekä jire chi mabtäʼ, niebare Ngöbökwe. Ye mden kisete, nikwe tödekadre kwatibe Ngöböbiti, käkwe niedre krörö: ʻTi Dänkien Ngöbö abko ti die mikaka, aisete nire nire tö raba kukwe nuein blo ti rüere abko jurä ñakare tibtäʼ, ni rabadre niere” (Heb. 13:5, 6). Nitre romano käkwe Jerusalén diandre jai ye känenkri kukwe niebare Pablokwe ye nitre kristiano käkwe mikani täte, ¿nitre kristiano ye namani ño jabätä? Ñan namani tare kräketre nünankäre jondron braibebiti kä madakänti. Nämänentre dre ribere jai ye Jehovakwe biain ietre ye ie tö ngwani metre kwetre. Kukwe ye kwrere ben nikwe ja tuai ngwane, ye erere ni raba tö ngwen arato nemen gare metre nie kukwe niebare Pablokwe yebiti.

“JONDRON KÄI RABADRE NUÄRE NIBÄTÄ”

10. ¿Kukwe meden nämäne gare metre Pablo ie ye mikaninte kwe ja töi kräke nie?

¹⁰ Pablokwe kukwe ye kwrere niebare Timoteo ie aune ye raba ni dimike krubäte. Tikabare kwe: “Ne mden aisete, mrö tärä kwetadre nie amne dän amne ju tärä nikwe, ye abko käi rabadre nuäre nibtä” (1 Tim. 6:8). Nikwe mrö bänänte kwetadre, kä kwin te nikwe nünandre o dän kwin nikwe kökadre jai ruäre ngwane, ¿ye käi ngwandre juto jabätä ye blo ya? Ye ñan ai gäräbare Pablokwe. Jondron meden tä nikwe gwä ngwane ye ni rabadre käi ngwen juto jabätä ye meden gäräbare kwe (Filip. 4:12). Kukwe ye nämene gare metre Pablo ie. Ja keta Jehovabe ye abokän jondron bäri ütiäte tä nikwe, ñaka jondron kä nebätä (Hab. 3:17, 18).

11. ¿Moisekwe dre niebare nitre israelita ie ye tä dre driere nie ja töi kräke?

¹¹ Nita jondron meden ribere jai ruin nie akwa ye erere Jehovata töbike ñakare ruäre ngwane. Nitre israelita dikakabare kä 40 te kä nötare yekänti ye bitikäre, Moisekwe kukwe meden niebare ietre ani mike ñärärä: “Kukwe jökrä nuainbarera mäkwe ye Jehová Ngöbö mäkwe käkwe mikani nemen bare kwin. Mätä näin kä ngwarbe nötare nete ta ye gare kwin ie. Kä 40 te, Jehová Ngöbö mäkwe tä mäbe aune mätä dre ribere jai ye tä nemen mäkwe” (Deut. 2:7). Kä 40 te yete, Jehovakwe maná biani kwetadre nitre israelita ie. Dängutu meden te niaratre nikani Egipto yebätä mentokwäre ngwane, ye ñaka namani ngututure (Deut. 8:3, 4). Kukwe ye namani tuin ngwarbe nitre israelita ruäre ie, akwa nämänentre dre ribere jai ye jökrä biani Jehovakwe ietre ye Moisés ngwani törö ietre. Jondron meden tä nikwe ye nita käi ngwen juto jabätä, jondron chi bianta kwe nie ye nita mike ütiäte jai tä kukwe kwin mike nemen bare ni kräke ye kwrere nikwe mikai tuin jai aune nikwe debe biainbätä ngwane, nikwe kä mikai juto Jehovabätä.

JEHOVAKWE NI NGÜBAI YE TÄDRE GARE METRE NIE

12. David ñaka nämene tö ngwen jai ñakare aune nämene tö ngwen Jehovai, ¿ye ñokänti gare nie?

¹² Jehová tä ja ngwen metre aune nireta tarere yebätä töita krubäte nämäne gare David ie. David nämene ja tuin kukwe tare ben ngwane, Salmo 34 ye tikani kwe, akwa tödeka nämäne dite kwe yebätä ángel Jehovakwe nämäne nünentubu niara bäre namani ruin ie (Sal. 34:7). Ángel Jehovakwe ye nämäne nünentubu David bäre krakärebiti rüe yebätä ye erere bämikani kwe. David ye ni rükä balente aune rabai gobrane Jehovakwe käbämikani ie, akwa niarakwe ñaka tö ngwani jai jä kwati kitakäre o ngitra yebiti rüe ganainkäre (1 Sam. 16:13; 24:12). Ñakare aune, tö ngwani kwe Ngöböi aune nireta Ngöbö jürä ngwen jabätä ye ángel kwe tä mike kwäre ye nämene gare David ie. Bäkänä kukwe ñan tuabarebiti ni kriemikadre gwä ngwane ye ni ñaka tä ngübare. Akwa nire tä Ngöbö mike täte aune tä tö ngwen ie, ye ñaka mikai ja tare nike kärekäre ye gare nie.

13. Gog käi Magog rü gaikä ni rüere ngwane ni nuäre ganainkäre ye ñobätä rabai tuin ietre, ¿akwa ñobätä nikwe ñaka kä jürä ngwain jabätä? (Üai kena täräkwatabätä ye mikadre ñärärä).

¹³ Jehová raba ni kriemike yei nita tö ngwen o ñakare, ye nuate kebera ja känenkäre. Gog käi Magog, juta käbiti tibien käkwe ja ükaikrö ni rüere ngwane, niaratre käkwe ni ngwain krüte rabai nemen ruin nie. Akwa Jehová raba ni mike kwäre aune nuaindi kwe ye tädre gare metre nie. Ni oveja di ñakare kriemikaka ñaka ye kwrere rabai tuin nitre käbiti tibien ye ie (Ezeq. 38:10-12). Krü ñaka nikwe aune ni ñaka kitani rükäre yebätä ni nuäre ganainkäre rabai tuin nitre kä nebätä ie. Akwa angeletre kwati tä juto biare Juta Ngöbökwe kriemikakäre ye tuin nie nita tödeke yebätä, ye ñaka jutuai nitre ie. ¿Nitre käbiti tibien ñan tä tödeke Jehovai se ñokänti kukwe ye rabai jutuen ietre? ¡Nitre rükä kä kwinbiti jatai ni diantarikäre ye käkwe nitre käbiti tibien ye ngwain nikenkä! (Apoc. 19:11, 14, 15).

ANI JA MIKE JUTO BIARE KÄ JA KÄNENKÄRE KRÄKE

14. ¿Ni raba dre nuainne gwä ngwane ja mikakäre juto biare kä ja känenkäre kräke?

¹⁴ ¿Ni raba dre nuaindre gwä ngwane ja mikakäre juto biare kä ja känenkäre kräke? Kena, jondron kä nebätä mikadre tuin ño jai nieta Bibliabätä ye erere nikwe mikadre tuin jai aune jondron ye nikwe tuainmetre aune ni gitiai ye köböi rükai ye nikwe ngwandre törö jai. Ne ben arato, jondron tä nikwe ye nikwe käi ngwandre juto jabätä aune nita ja kete Jehovabe ye käi tädre juto nibätä arato. Ngöbö nikwe rabai gare bäri kwin nie ngwane, Gog käi Magog käkwe rü gaikä ni rüere ngwane niara raba ni kriemike ye täi gare metre nie.

15. ¿Kukwe medenkänti Jehovakwe David dimikani käne ye köböire Jehovakwe ñaka tuainmetre kaibe nämäne gare ie?

¹⁵ Kukwe mada käkwe David dimikani ja tuakäre kukwe tare ben ye ani mike ñärärä. Niebare kwe: “Jehová töi kwin ye gain aune mike ñärärä; nireta ja kriemikamana ie yebätä kätä juto” (Sal. 34:8). Jehová raba David dimike ye ñobätä nämäne gare ie ye nemen gare nie kukwe niebare kwe yebiti. Käre David nämäne ja dimikamana Jehovai aune käre Jehovakwe dimikani. David nämene bati ngwane, rübare kwe ni kri filisteo kädeka nämäne Goliat ben ye ngwane kukwe ne niebare kwe ie: “Köbö ne arabe te Jehovakwe mä mikai ti kisete” (1 Sam. 17:46). Ja känenkäre, David nämäne sribire Saúl kräke ngwane, bä kabre Saúl ja töi mikani kämike, akwa “Jehová nämäne David ben” (1 Sam. 18:12). Jehovakwe David dimikani ño käne ye tuani kwe aune Jehovakwe dimikai jankunu ye nämene gare ie. Kukwe ye raba ni dimike arato ja tuakäre kukwe tare ben ja känenkäre.

16. ¿Jehová töi kwin ye ni raba gain kukwe medenbiti?

¹⁶ Jehovakwe ni jie ngwandre ye nikwe känäin bäri gwä ngwane ngwane, Jehová raba ni dimike ja känenkäre yei nikwe tö ngwain bäri. Ñodre, patrón nikwe käkwe kä biandre ngwarbe nie rikakäre gätä kribätä o ora ükadrete kwe ni kräke ni rikadre gätä jökräbätä o kukwe driekäre bäri yekäre tödeka aune tö ngwan Jehovai ye nita ribere bäri jai. Nikwe dre kärädre patrón nikwe ie ye ñaka rükadrebiti ie aune ni kitadrekä kwe sribibätä ye ani bämike ja okwäte. Jehovakwe ñaka ni tuainmetre jire kaibe aune nita dre ribere jai ye biain kwe nie, ¿yei nita tö ngwen kwatibe? (Heb. 13:5). Etebatre aune ngwaitre kwati tä sribire köbö täte dimikadre ye nämäne ribere bäri jai ngwane, Jehovakwe dimikani ño ye niaratre raba mike gare nie. Jehová ye ta ja ngwen metre.

17. ¿Texto meden dianinkä kä 2022 kräke aune ñobätä ütiäte krubäte kä nete kräke?

¹⁷ Jehovata nibe ngwane, kukwe meden rabai bare ja känenkäre ye nikwe ñaka jürä ngwandre jabätä. Nikwe sribi Jehovakwe mikai käne ngwane, niarakwe ñaka ni tuainmetre kaibe. Kukwe tare kebera nemen bare ye kräke nikwe ja mikadre juto biare gwä ngwane aune Jehovakwe ñaka ni tuainmetre kaibe yei nikwe tö ngwandre, ye ngwankäre törö nie Nitre Konkrekasion Ngübabitikä käkwe Salmo 34:10 ye dianinkä kä 2022 kräke: “Nire nire tä Jehová känene yekwe ñaka jondron kwin täi nikai”.