KUKWE JA TÖTIKARA 4
Ñobätä nita niken Conmemoración yebätä
“Munkwe ne nuain jankunu ti ngwankäre törö jai” (LUC. 22:19, TNM).
KANTIKO 20 Mäkwe Monso jakwe biani nun ütiäre
KUKWE NEBÄTÄ JA TÖTIKAIa
1, 2. a) ¿Ni mräkä tare nikwe tä krüte ye ñongwane metrere tä nüketa törö nie? b) ¿Köbö te deu Jesús murie ketadre ye känenkri kukwe meden ükaninte kwe?
NI MRÄKÄ tare nikwe tä krüte aune käita niken kabre ta, akwa käre tä nüke törö nie. Köbö te niara krütani ye käita nüke ngwane, yete bäri jire tä nüketa törö nie.
2 Kä kwatire kwatire te kä jökräbiti tibien nun kwati krubäte tä ja ükekrö ni iti tare nikwe krütani ye ngwankäreta törö jai ye abokän: Jesukristo (1 Ped. 1:8). Ni iti käkwe ja nire biani ngite nikwe ütiäre aune ni kökatarikäre gata yebätä ye ngwankäre törö jai nunta nuainne (Mat. 20:28). Jesús murie ketadre ye nitre ja tötikaka käkwe ngwandre törö jai ye ie Jesús tö namani. Deu köbö te Jesús murie keta jababare ye känenkri, mröbare kwe nitre ja tötikaka kwe ben kukwe ükatekäre bentre aune kukwe ne nuain mananbare kwe ietre: “Munkwe ne nuain jankunu ti ngwankäre törö jai” (Luc. 22:19, TNM).
3. ¿Nikwe dre mikai gare jai kukwe ja tötikara nekänti?
3 Kristo ja nire biani ye nitre kwati krubäte tä ngwenta törö jai. Niaratre ye ngätäite, nitre ruäre aibe kwe tödekara nünankäre kä kwinbiti, akwa nitre kwatikwe tödekara nünankäre kä tibienbätä. Ñöbätä niaratre tä niken Jesús ja nire biani ngwanta törö jai kä kwatire kwatire te yebätä nikwe mikai gare jai kukwe ja tötikara nekänti. Ni tädre yete siba ye ñobätä kwin ni kräke ye rabai gare nie arato. Akwa ye känenkri ñobätä nitre dianinkä nänkäre kä kwinbiti ye tä kwen köbö yete siba ye ani mike gare käne jai.
ÑÖBÄTÄ NITRE DIANINKÄ NÄNKÄRE KÄ KWINBITI YE TÄ KWEN KÖBÖ YETE
4. ¿Ñobätä nitre dianinkä nänkäre kä kwinbiti ye tä pan kwete aune vino ñain Conmemoración yete?
4 Kukwe keteitibätä nitre dianinkä nänkäre kä kwinbiti ye töta nemen rikai Jesús ja nire biani ye ngwanbätä törö jai ye abokän pan kwetakäre aune vino ñakäre. ¿Ñobätä niaratre raba nuainne? Kukwe ye mikakäre gare jai, köbö mrä te deu Jesús nämene kä tibienbätä ngwane dre nuainbare kwe ye ani ngwenta törö jai. Pascua käi ngwani juto kwe jabätä ye bitikäre, Däkien Mrö Biani Deu ye ükaninte kwe. Niarakwe pan aune vino biani nitre apóstol ja ngwanka metre 11 ie aune niaratre käkwe pan ye kwetadre aune vino ye ñadre niebare kwe ietre. Kukwe ketebu ükaninte kwe bentre ye abokän kukwe mrä ükaninte kwe aune kukwe ükaninte kwe Gobran Ngöbökwe yebätä (Luc. 22:19, 20, 28-30).b Kukwe ükaninte ye köböire nitre apóstol aune nitre kristiano ruäre raba nemen reire aune sacerdote erere kä kwinbiti (Apoc. 5:10, TNM; 14:1). Nitre braibe dianinkä nänkäre kä kwinbiti ye raba pan kwete aune vino ñain Jesús ja nire biani ye ngwane, ñobätä ñan aune niaratre tä kukwe ükaninte ketebu yete siba.
5. ¿Tödekara tä nitre dianinkä nänkäre kä kwinbiti yekwe yebätä dre gare ietre?
5 Kukwe madabätä nitre dianinkä nänkäre kä kwinbiti ye töta nemen rikai Jesús ja niere biani ye ngwanbätä törö jai ye abokän tödekara tä kwetre yebätä niaratre raba töbiketari. Jehovakwe tödekara kwin krubäte biani ietre ye abokän: ja nire kärekäre aune ñaka raba nente jire kän ye Jehová tä bien ietre kä kwinbiti, Jesukristo mikani Reire aune nitre dianinkä nänkäre kä kwinbiti 144.000 ye ben gwairebe niaratre raba sribire aune bäri ütiäte, niaratre raba nemen Jehová ye ngwärekri (1 Cor. 15:51-53; 1 Juan 3:2). Kukwe ütiäte ne rabadre nitre dianinkä nänkäre kä kwinbiti yekwe, yekäre niaratre nübaibare ye gare ietre. Akwa niaratre rabadre ja ngwen metre nememe niaratre krütadre ye ngwane ne kwe rabadre nüne kä kwinbiti (2 Tim. 4:7, 8). Tödekara tä kwetre yebätä tätre töbiketari ngwane käita nemen juto krubäte bätätre (Tito 2:13, TNM). ¿Aune dre nie raba “obeja mda mda” yebätä? (Juan 10:16). ¿Ñobätä tä niken Jesús ja nire biani ngwanta törö jai yebätä? Kukwe ruärebätä tätre nuainne ye ani mike gare jai.
ÑOBÄTÄ OVEJA MADA MADA YE TÄ NIKEN KÖBÖ YETE
6. ¿Ñobätä oveja mada ye tä niken Jesús ja nire biani ngwanta törö jai kä kwatire kwatire te yebätä?
6 Kukwe madabätä oveja mada mada ye tä niken Jesús ja niere biani ye ngwanbätä törö jai arato, ye abokän mrüsen aune ñaka pan kwetakäre aune vino ñakäre. Kä 1938 yete nitre käkwe nünain kä tibienbätä ye nübaibare kena köbö ye ngwen törö jai. Täräkwata La Torre del Vigía kä abril 1938 yebätä käkwe mikani gare oveja mada mada “ye rabadre niken gätä yebätä aune dre nuainta yete ye mrüsen siba ye kwin krubäte”. Aune kukwe mada ne niebare kwe arato: “Köbö ye käi ngwandre juto jabätä aune niaratre rabadre käi ngwan juto jabätä arato”. Ja mikata gurebätä nitre nübaita ye ngwane nitre ye tä kä ngwen juto jabätä, ye erere arato oveja mada mada tä niken Jesús ja nire biani ngwanta törö jai ye mrusaire ye käita nemen juto krubätebätä arato.
7. ¿Kukwe kädrieta Conmemoración kräke ye ñobätä oveja mada mada töta nemen kukwe nuai?
7 Oveja mada ye tä töbiketari tödekara tä kwetre yebätä arato. Jesús ja nire biani ngwanta törö jai yete kukwe kädrieta ye niaratre töta nemen kukwe nuai ñobätä ñan aune Kristo aune nitre 144.000 käkwe gobrandi kä mil te ye ngwane, dre nuaindi kwe nitre ja ngwanka metre ye kräke ye mikata gare metrere kukwe kädrieta yebätä. Rei Jesukristo käkwe gobrantre kä kwinbiti jie ngwain, ye köböire niaratre käkwe kä tibien ye kwitai bä nuäre aune nitre ja ngwanka metre käbiti tibien ye dimikai kwetre nemen töi metre. Kukwe käbämikata Isaías 35:5, 6; 65:21-23 aune Apocalipsis 21:3, 4 yete, ye rabai bare ye nitre kwati tä niken Conmemoración yebätä tä bämike ja okwäte ngwane käita nemen juto krubäte bätätre. Niaratre tädi kä mrä yete mräkätre tare kwe ye ben ye tä tödeka kwetre mike dite kukwe käbämikata yei aune töita nemen kwatibe sribibätä bäri aune jankunu Jehová kräke (Mat. 24:13; Gál. 6:9).
8. ¿Kukwe meden madabätä oveja mada mada ye tä niken Jesús ja nire biani ngwanta törö jai yebätä?
8 Oveja mada mada ye töta nemen rikai Jesús ja nire biani ngwanta törö jai yebätä ñobätä ñan aune niaratre tä nitre braibe dianinkä nänkäre kä kwinbiti ye tarere aune dimikai ye tö bämikai. Nitre braibe dianinkä nänkäre kä kwinbiti aune nitre nünandi kä tibienbätä ye käkwe sribidi gwairebe mikata gare kukwe Ngöbökwe yebätä. Profecía ruäre tä kukwe ye mike gare ye ani mike gare jai.
9. Kukwe nieta Zacarías 8:23 yebätä erere, ¿oveja mada mada tä ja töi mike ño nitre dianinkä nänkäre kä kwinbiti yebätä?
9 (Ñäkädre Zacarías 8:23 yebätä).c Oveja mada töita ño nitre dianinkä nänkäre kä kwinbiti yebätä, ye bämikata kukwe bä nuärebiti profecía nekänti. “Ni judío iti” aune “mun” nieta nete ye abokän blitata nitre arabebätä ye abokän: nitre dianinkä nänkäre kä kwinbiti täbe kä tibienbätä (Rom. 2:28, 29). “Nitre brare ni jätä blite kukwe jene jenebiti” ye abokän oveja mada mada ye bämikata. Niaratre ye tä ja ketete dime nitre dianinkä nänkäre kä kwinbiti yebätä, ye abokän tätre ja ngwen metre niaratre ben aune tätre Jehová mike täte metre niaratre bengwairebe. Ye medenbätä, köbö te deu Jesús ja nire biani ngwanta törö jai yete niaratre tä niken gwairebe nitre dianinkä nänkäre kä kwinbiti yebe tätre keteitibe ye bämikakäre.
10. ¿Jehovakwe dre nuainbarera ne kwe profecía tä Ezequiel 37:15-19, 24, 25 ye mikakäre nemen bare?
10 (Ñäkädre Ezequiel 37:15-19, 24, 25 yebätä).d Nitre dianinkä nänkäre kä kwinbiti aune oveja mada ye Jehovata mike sribire gwairebe ye köböire tä profecía ne mike nemen bare. Profecía yebätä blitata krito krububätä. Nire kräke tödekara nünankäre kä kwinbiti tä ye abokän “krito Judá” kräke ye kwrere (niaratre yekri nitre dianka nämäne rabakäre reire Israel). Aune nire kräke tödekara tä nünankäre kä tibienbätä ye abokän “krito Efraín”e kräke ye kwrere. Jehovakwe niaratre mikai sribire gwairebe ne kwe rabadre “krito kratibe” ye kwrere. Ye abokän Rei itibe, Jesukristo, käkwe gobrandi niaratrebiti aune niaratre rabadi sribire keteitibe meden gärätä. Nitre dianinkä nänkäre kä kwinbiti aune oveja mada mada ye tä niken Jesús ja nire biani ngwanta törö jai kä kwatire kwatire yebätä ngwane, ñaka tä niken ni jene jene ye kwrere, ñakare aune oveja tä niken keteitibe jabe ni oveja ngübaka itibe tä jie ngwen ye kwrere (Juan 10:16).
11. Ovejabätä blitata Mateo 25:31-36, 40 yebätä, ¿ye tä Jesús etebatre ye dimike ño?
11 (Ñäkädre Mateo 25:31-36, 40 yebätä).f Ovejabätä blitata kukwe bämikani nekänti ye abokän nitre ja ngwanka metre kä krüte ne näire aune tödekara nünankäre kä tibienbätä tä kwetre yebätä blitata, ye abokän oveja mada mada. Niaratre ye tä ja ngwen metre aune tätre Kristo etebatre ye dimike sribi kri krubäte ye nuainne: ye abokän kukwe driedre aune nitre tötikadre kä jökräbiti tibien (Mat. 24:14, TNM; 28:19, 20).
12, 13. ¿Kukwe meden madabiti oveja mada ye tä Jesús etebatre ye dimike?
12 Kä kwatire kwatire te bämä ruäre Conmemoración nuaindre ye känenkri oveja mada mada ye tä Jesús etebatre dimike ye bämikata kwetre. ¿Nuainta ño kwetre? Kukwe ükateta ne kwe nire tö näin gätä yebätä ye nübaikäre yebätä tä kwen siba ngwane (recuadro “¿Mäta kukwe ükete jai Conmemoración ye kräke?” ye mikadre ñärärä). Nitre dianinkä nänkäre kä kwinbiti ye ñaka tä konkrekasion kwetre te, akwa kä jökräbiti tibien niaratre tä ja di ngwen Jesús ja nire biani ye ngwankäre törö jai. Oveja mada mada ye tä Jesús etebatre dimike ye erere ye käita nemen juto krubäte bätätre. Kukwe meden nuainta nitre dianinkä nänkäre kä kwinbiti ye kräke ye abokän nuainta Jesús kräke ye kwrere tuin Jesús ie ye gare ietre (Mat. 25:37-40).
13 Tödekara meden erere tä nikwe, ¿akwa yebiti ta kukwe meden tärä nie rikakäre Jesús ja nire biani ye ngwankäre törö jai?
ÑOBÄTÄ NI JÖKRÄ TÄ KWEN KÖBÖ YETE
14. ¿Jehová aune Jesús tä ni tarere krubäte ye bämikanina kwe kukwe medenbiti nie?
14 Ñobätä ñan aune Jehová aune Jesús tä ni tarere yebätä nita debe bien. Jehová tä ni tarere ye bämikanina kwe kukwe keta kabrebiti nie. Akwa monso itibe kwe juani kwe ja tare nikakäre aune ja nire biankäre ni ütiäre ye kukwe bäri kri nuainbare kwe ni kräke (Juan 3:16, TNM). Jesús nämäne juto biare ja nire kwe biankäre ni ütiäre yebiti niara tä ni tarere ye bämikani kwe (Juan 15:13, TNM). Bäkänä, niaratre tä ni tarere yebätä kukwe keta kabre nuainbarera kwe ni kräke ye ni ñaka raba ütiä bien jire ietre, akwa nita nüne ño yebiti nita debe bien ietre ye ni raba bämike (Col. 3:15). Jesús ja nire biani yebätä nita kwen ngwane, niaratre tä ni tarere yebätä nita debe bien aune nita niaratre tarere ye nita bämike.
15. Nitre braibe dianinkä nänkäre kä kwinbiti aune oveja mada mada, ¿ye ñobätä tä debe bien krubäte ni kökanintari yebätä?
15 Ñobätä ñan aune ni kökanintari yebätä debe bianta krubäte (Mat. 20:28). Ni kökanintari ye ütiäte krubäte nitre dianinkä nänkäre kä kwinbiti ye kräke ñobätä ñan aune dre ie tö ngwanta kwetre raba nemen bare ye köböire. Aune niaratre tä tödeke Kristo ja nire biani ye ie ye köböire Jehová raba mike tuin jai ni ja ngwanka metre erere aune kain ngäbiti monso jakwe ye kwrere (Rom. 5:1; 8:15-17, 23). Aune ni kökanintari ye ütiäte krubäte oveja mada mada ye kräke ñobätä ñan aune Kristo ja däri ianinte ye köböire Jehová raba kain ngäbiti, raba sribire Jehová kräke aune raba nemente kwäre ‘ja tare nika kri’ ye ngwane (Apoc. 7:13-15). Niaratre tä gwairebe Jesús ja nire biani ye ngwenta törö jai kä kwatire kwatire te ngwane, ni kökanintari yebätä debe bianta kwetre ye bämikata kwetre.
16. ¿Kukwe meden madabätä nita niken Jesús ja nire biani ye ngwenta törö jai?
16 Ñobätä ñan aune ni tö Jesús kukwei mikai täte. Tödekara meden tä nikwe, akwa deu Jesukwe kukwe ükaninte ne kwe Conmemoración kwe nuaindre ye ni tö mikabätä täte. Niebare kwe: “Munkwe kukwe ne nuain jankunu ti ngwankäre törö jai” (1 Cor. 11:23, 24, TNM).
NI TÄDRE YETE SIBA YE ÑOBÄTÄ KWIN KRUBÄTE NI JÖKRÄ KRÄKE
17. Nita niken Jesús ja nire biani ngwanta törö jai yebätä, ¿ye ñobätä tä ni mike nökrö bäri Jehová ken?
17 Ñobätä ñan aune nita nökrö bäri Jehová ken (Sant. 4:8). Nita niken Jesús ja nire biani ye ngwen törö jai yebätä, ye köböire kukwe käbämikata kwe nie aune ja tare kri bämikata kwe nie yebätä nita nemen töbiketari bäri ye nibira gare nie (Jer. 29:11; 1 Juan 4:8-10, TNM). Kukwe käbämikata kwe nie ye rabai bare aune niarakwe ni tarei jankunu ye gare metre nie. Nita töbiketari kukwe nebätä ngwane nita nemen Jehová tarere bäri aune nita nemen ja kete bäri kwin ben (Rom. 8:38, 39).
18. ¿Jesukwe kukwe kwin bämikani yebätä nita töbiketari ye tä ni töi mike ño?
18 Ñobätä ñan aune tä ni töi mike ja ngwen Jesús erere (1 Ped. 2:21). Conmemoración ye känenkri, bämä mrä te Jesús nämäne kä tibienbätä ngwane, murie ketani aune ganinkröta mikata gare Bibliabätä ye nita ngwenta törö jai. Biti, Jesús tä ni tarere ño ye ngwanta törö nie kukwe kädrieta deu Conmemoración näire yete (Efes. 5:2, TNM; 1 Juan 3:16). Jesús nämäne juto biare kukwe ñaka nuäre nuainkäre, yebätä nita ñäke aune töbiketaribätä ye tä ni töi mike “Jesukristo käkwe nünabare ño kä nebtä” ye erere ja ngwen (1 Juan 2:5, 6).
19. ¿Ni rabadre dre nuainne Ngöbö tarekäre jankunu?
19 Ñobätä ñan aune tä ni töi mike kwatibe Ngöbö tarekäre jankunu (Jud. 20, 21, TNM). Nita ja di ngwen niara mikakäre täte, kä kwe mikakäre deme aune kä mike juto niarabätä ngwane nikwe Ngöbö taredi jankunu (Prov. 27:11; Mat. 6:9; 1 Juan 5:3). Nita niken Jesús ja nire biani ngwanta törö jai yebätä ngwane: “¡Ti tö rabai ja ketamuko mäkwe kärekäre!” ye ni töita nemen kwatibe niebätä Jehovai kukwe nuainta nikwe köbö kwatire kwatire yebiti.
20. ¿Kukwe meden meden kwin tärä nie rikakäre Jesús ja nire biani ngwanta törö jai yebätä?
20 Tödekara nikwe nünankäre kä kwinbiti o kä tibienbätä, akwa kukwe keta kabre kwin tärä nie rikakäre Jesús ja nire biani ngwanta törö jai yebätä kä kwatire kwatire te ye gare nie. Nita ja ükekrö kukwe ye nuainkäre ngwane, ni iti tare nikwe krütani nikän ye nita ngwenta törö jai ye abokän, Jesukristo. Aune bäri ütiäte, Jehovakwe monso kwe juani ni kökatarikäre yebiti ni tare krubäte kwe bämikata kwe ye nita ngwen törö jai. Kä nete, Jesús ja nire biani ngwainta törö jai viernes 15 abril 2022 ye ngwane. Nita Jehová aune monso kwe tarere. Ye medenbätä, Jesús ja nire biani ngwainta törö jai yebätä ni tädre ye rabadre bäri ütiäte ni kräke.
KANTIKO 16 Gobran Ngöbökwe käikitekä
a Tödekara nikwe nünankäre kä kwinbiti o tödekara nikwe nünankäre kä tibienbätä, akwa ni jökrä tö kwanbätä Jesús ja nire biani ngwanta törö jai kä kwatire kwatire te yebätä. Kukwe keta kabrebätä ni rabadre niken Jesús ja nire biani ngwanta törö jai mikata gare Bibliabätä aune nikwe nuaindre ye tä ni dimike ño ye nikwe mikai gare jai kukwe ja tötikara nekänti.
b Kukwe ükaninte mrä aune kukwe ükaninte Gobran Ngöbökwe yebätä kukwe raba kwen bäri mäi täräkwata Ni Mikaka Mokre 15 octubre 2014 página 15 nemen 17 kukwe kädekata “Mun rabadi ‘Sacerdotere gobranka’” nieta yekänti.
c Zacarías 8:23: “Jehová nitre rükä jie ngwanka tä kukwe ne niere: ‘Köbö ye näire nitre brare ni jätä blite kukwe jene jenebiti ye ja ketaite, jän, ja ketaite dime kwetre dän ni judiokwe yebätä aune niedi kwetre: “Nun tö näin munbe, ñobätä ñan aune Ngöböta munbe kukwe nuani nunkwe”’”.
d Ezequiel 37:15-19, 24, 25: “Jehovakwe blitabata tibe. Nieba kwe tie: ‘Aune mä ni kä nebätä monsoi, krito den krati aune kukwe tikebätä: ‘Judá kräke aune juta Israel tä niaratre ben ye kräke’. Biti krito mada den aune kukwe tikebätä: ‘José kräke, krito Efrainkwe yebätä aune nitre jökrä tä ju Israelkwe yete ye kräke’. Krito krobu ye kete jabätä, krati krati ye ben, ne kwe rabadre krito kratibe ye kwrere mä kisete. ‘¿Kukwe ne dre gärätä ye mä ñan bike niere nunye?’ ye juta mäkwe ngwandretari mäi ngwane, mäkwe nie ietre ‘Däkien Jehová Gobran Kri käkwe nini: “Ti bike krito Josekwe tä Efraín aune tribu Israelkwe kisete ye den aune tikwe mikai krito Judakwe yebe. Tikwe mikai krito kratibe; rabai krito kratibe ti kisete’”’. David ni ti mikaka täte rabai reire niaratrebiti aune niaratre jökrä yekwe ni oveja ngibiaka itibe rabai. Tikwe kukwe ükaninte metre nuaindre yebiti niaratre rabai näin aune kukwe ükaninte tikwe ye mikai täte metre kwetre. Tikwe kä biani ni ti mikaka täte Jacob ie yekänti munkwe nünain, mun mräkätre känekäne nünanbare yekänti. Niaratre, monsotre kwetre aune monsotre ngänbriänkä nünain yete kärekäre; aune David ni ti mikaka täte ye rabai jefe kwetre kärekäre”.
e Profecía tä blite krito krububätä Ezequiel kapitulo 37 yekänti, yebätä kukwe raba kwen bäri mäi täräkwata Ni Mikaka Mokre Julio 2016, kukwe kädekata “Nitre tä kukwe ngwentari” yekänti.
f Mateo 25:31-36, 40, (NGT): “Ñongware Ni Brare Monsoe jatadi gobran kwrere angeletre ngätäite, rabai täkänintibe täkrä bä nuäre te. Angwane nitre judá jökrä te rükai keteitibe yete niara ngwärekri. Ño ni kraka obejabiti näin chibo, angwane obeja ükökrö jene jene, ye kwere nuaindi niarakwe nitre judatebätä. Niarakwe obeja mikai ja küde ruinkri, angwane chibo abokän mikadi kwe ja küde ngeberekri. Angwane Gobrankwe niedi nitre küde ruinkri ye ie: Mun abräbätä ti Rünkwe kä mikani nuäre. Kä tibien ne sribe ngämi känenkri, angwane juta sribebare mun kräke, ne mun jakwre den jae. Ñobätä ñakare angwane mrö rababa tie, munkwe mrö biama kwetadre tie. Tämana rababa tie; mukwe tämana biama tie ñadre. Ti nämä näin juta jenenante; nunkwe kä biama tie jadükakrä gwi. Dänkutu ñan rababa tie, munkwe dänkutu biama tie. Ti nämä bren; mun janama ti tuinbiti. Ti nämä ngite kä teri; mun rükaba ti tuinbiti. Gobrakwe nitre ne kukwe kain ngäbiti; käkwe niedi krörö ietre: Metre näre ti bike niere mun ie: Guiere guiere munkwe nuainbare ti etebankatre bäri kia ne kräke, ye brä munkwe nuainbare ti kräke”.