¿Ne gare mäi?
Jehovakwe nitre israelita tuanimetre ütü bökän aune tórtola ye bien kukwadre, ¿ye ñobätä namani kwin krubäte kräketre?
ÜTÜ bökän aune tórtola ye Jehovakwe nitre israelita tuanimetre bien jai mikata gare kukwe biani Moisés ie yete. Jehovakwe kukwe ükaninte jondron kukwakäre ie yekänti käre nukwä ketebu ne kädekateta gwairebe. Aisete nitre israelita nämäne ütü bökän o tórtola bien (Lev. 1:14; 12:8; 14:30). Tórtola ne ñaka nämäne nuäre kwandre nitre israelita ie, yebätä namani kwin kräketre. Ñobätä ye ani mike gare jai.
Tórtola
Tórtola ye abokän tä näin kä jene jene känti aune tä nüketa Israel kä ngire ye näire. Sö octubre (otoño) Israel ngwane, nukwä ne tä nikenkä kä ngire kokwäre mötörikwäre biti tä kiteta primavera ye ngwane kä Israel yete (Cant. 2:11, 12; Jer. 8:7). Ye medenbätä, kä tibo näire ñan nämäne nemen nuäre nitre israelita kräke tórtola ne biankäre kukwadre.
Ütü
Akwa ütü ye abokän ñaka niken kä mada känti, aisete käre nämene Israel yete. Ne madakäre, ütü ne ngüba nämene gwi (Juan 2:14, 16 ye mikadre ñärärä). Kä keta kabre känti “nitre ye nämäne ütü ye ngübare gwi. Ju jökräbätä kä mäkä mikate nämäne ne kwe ütü rabadre nüne te” ye kukwe ruäre tä mike gare (Isaías 60:8 ye mikadre ñärärä).
Ütü tä kä mäkäte
¿Ye ta dre driere Jehovabätä nie? Niara ni tarekä aune ni töi mikaka nüke gare jai ye nemen gare metre nie, ñobätä ñan aune nukwä ño raba kwen ñongwane ye erere Jehová nämäne nitre israelita tuenmetre bien.