Nikwe ja ngökabarera ñöte, akwa nikwe ja ngwan bitin ye ngwandre käre jabätä

1. ¿Nita ja ngwen ño ye metrere dre köböire tä nemen bare?

BITINKÄ nikwe ja ngökabare ñöte o kä nikanina kwati ta, akwa yebiti ta ni tö ja ngwain kwin Jehová töi ño ye erere. Rabadre bare nie yekäre nikwe ja töi gobraindre. ¿Ñobätä? Ñobätä ñan aune ni töi ño ye ererebätä nita ja ngwen. Ni ngätä tö dre ie krubäte yebätä nikwe töbikaitari käre ngwane, kukwe käme yebätä nikwe blitai aune nikwe nuaindi (Efes. 4:17-19). Akwa käre nikwe kukwe kwin ye mikadi ja töite ngwane, kukwe meden tuin kwin Jehovai ye rabadi bäri nuäre blitakäre aune nuainkäre nie (Gál. 5:16).

2. ¿Kukwe meden ngwantarita ni bike mike gare jai kukwe ja tötikara nekänti?

² Kukwe ja tötikara känebätä rababa gare nie erere, kukwe käme raba nüke ni töite ye ni ñaka raba ketebätä. Akwa nikwe ñaka nuaindre ye tä gare nie. Blita aune ja ngwan tuin käme Jehovai ye ni rabadre tuenmetre ja ngökadre ñöte ye känenkri. Kukwe ye nuaindre ye abokän kena aune ütiäte krubäte dän ngututure tikatekäre jabätä. Akwa kä mikakäre juto krubäte Jehovabätä, yekäre ni rabadre kukwe ne mike täte arato: “Ja ngwan bitin ye munkwe kita jabätä” (Col. 3:10, TNM). ¿‘Ja ngwan bitin kitata jabätä’ ye abokän ño? ¿Kitadre aune käre ngwandre jabätä ye abokän nuaindre ño? Ye rabai gare nie kukwe ja tötikara nekänti.

¿‘JA NGWAN BITIN KITADRE JABÄTÄ’ YE ABOKÄN ÑO?

3. ¿Ja ngwan bitin ye abokän ño aune kitadre ño jabätä? (Gálatas 5:22, 23).

³ ‘Ja ngwan bitin kitadre jabätä’ ye abokän nikwe töbikadre aune ja ngwandre Jehová tö ño ye erere. ¿Aune kita raba ño jabätä? Üai deme tä ni töi mike kwin ye nikwe tuadremetre ja dimike nita töbike ño, ja ngwen ño aune ja ruin ño nie yebätä (ñäkädre Gálatas 5:22, 23 yebätä). Ñodre, nire tä ja ngwan bitin kite jabätä ye abokän tä Jehová tarere aune ja mräkätre kukwebätä arato (Mat. 22:36-39). Tä ja tuin kukwe tare ben akwa yebiti ta käre kätä jutobätä (Sant. 1:2-4). Tä nitre mada töi mike nüne jäme (Mat. 5:9). Tä ni mada ngübare bätärekä aune tä ni mada tarere (Col. 3:13). Tä kukwe kwin tarere aune tä nuainne (Luc. 6:35). Tä tödeke krubäte Rün kä kwinbiti ie ye tä bämike kukwe nuainta kwe yebiti (Sant. 2:18). Kukwe nieta brukwä mikakäre rubun ngwane tä ja töi mike jäme (Tito 3:2). Aune kukwe käme tä nuente ngwane tä ja gobraine (1 Cor. 9:25, 27).

4. Töi kwin keta kabre nieta Gálatas 5:22, 23 yete, ¿ñobätä ni raba bämike jökrä?

⁴ Ja ngwan bitin kitadre jabätä, yekäre töi kwin keta kabre mikata gare Gálatas 5:22, 23 ye mikadre täte aune mada mada mikata gare texto keta kabrebätä ye mikadre täte arato.b Töi kwin ne abokän ñakare nita dän bätäkä ngwarbe kite jabätä ötöitire ötöitire ye kwrere. Ñakare aune töi kwin keta kabre ne abokän jökrä bäsi ja erebe. Ñodre, nita nitre tarere bökän ngwane nita ngübare bätärekä aune ja töi mike kwin kräketre. Nita ja töi mike kwin ni mada kräke ngwane, ni rabadre ja töi mike jäme aune ja gobraine.

¿“JA NGWAN BITIN” YE KITA RABA ÑO JABÄTÄ?

5. ¿Ja töi mikadre Kristo erere ye abokän ño aune nikwe ja tötikadre niarakwe ja ngwani ño yebätä ye ñobätä ütiäte? (1 Corintios 2:16).

⁵ (Ñäkädre 1 Corintios 2:16 yebätä). Ja ngwä bitin kitadre jabätä, yekäre ja töi mikadre Kristo erere, ye abokän Kristo tä töbike ño ye erere nikwe mikadre gare jai aune nuaindre. Jehová töi kwin keta kabre ye Jesukwe bämikani metre ta. Ñuai okwä kwin kwrere, Jehová töi kwin keta kabre ye Jesús tä bämike kwin krubäte (Heb. 1:3). Jesús tä töbike ño ye erere ni jatai töbike bäri kwin ngwane, niara tä ja ngwen ño ye erere ni jatai ja ngwen bäri kwin aune niara töi kwin ye erere ni jatai bämike bäri kwin (Filip. 2:5).

6. Nita ja di ngwen ja ngwan bitin kite jabätä ye ngwane, ¿nikwe dre ngwandre törö jai?

⁶ ¿Jesukwe ja ngwani kwin ye erere ni raba ja ngwen metre? “Niara abokän ja ngwanka metre. ¡Ye erere ni ñaka raba ja ngwen!” ni raba nütüre. Mätä töbike kore ngwane, kukwe ketamä ne ngwen törö jai. Kena, mä sribebare Jehová aune Jesús erere. Aisete mä raba ja töi mike ja ngwen niaratre erere aune raba nemen bare mäi debe näre (Gén. 1:26). Ketebu, üai deme Ngöbökwe ye abokän di kri krubäte. Kukwe meden ñan raba nemen bare kaibe mäi, ye üai deme käkwe mä dimikai mike nemen bare. Ketamä, üai deme tä ni töi mike kwin ye erere nikwe nuaindre metre ta Jehová ñaka ribere nuaindre nie. Nitre käkwe nünain kä tibienbätä, ye ie Jehovakwe kä biain mil krati rabakäre töi metre yebätä töbike (Apoc. 20:1-3). Nikwe ja di ngwandre aune Jehovakwe ni dimikai ie tö ngwandre ye ie niara tö.

7. ¿Ni bike dre mike gare jai mada?

⁷ ¿Kukwe meden känti metrere ni raba ja ngwen Jesús erere? Üai deme tä ni töi mike kwin keta kabre ye ketabokä ani mike ñärärä. Töi kwin keta kabre ye Jesukwe bämikani ño kwin keteitire keteitire aune ye tä dre driere nie ja töi kräke ye rabai gare nie. Kukwe ruäre täbe nuaindre nie ja ngwan bitin ye ükatekäre jabätä o ño, yebätä kukwe ngwantarita ruäre käkwe ni dimikai ja trä tuin ye nikwe mikai gare jai arato.

8. ¿Jesukwe ja tare ye bämikani ño?

⁸ Jesukwe Jehová tarebare krubäte yebätä kukwe ñan nuäre nuainbare kwe Jehová aune ni kräke arato (Juan 14:31; 15:13, TNM). Nitre nämene tare kwe bämikani kwe nünanbare ño kwe kä tibienbätä yebiti. Käre nämene nitre tarere aune mikani tuin bobre kwe jai, nitre ruäre käkwe ja mikani rüere yebiti ta. Gobran Ngöbökwebätä blitabare kwe yebiti nämäne nitre tarere bämikani metrere kwe (Luc. 4:43, 44, TNM). Nämene juto biarebe ja tare nikakäre aune ja nire aune ja bien murie ketakäre nitre ngite kisete, yebiti Ngöbö aune nitre tare krubäte kwe bämikani kwe. Aisete kukwe nuainbare kwe yebiti ja nire käre ye raba nemen ni jökräkwe.

9. ¿Jesukwe ja tare bämikani ye erere ni raba bämike ño?

⁹ Nita ja denkä mento aune ja ngökö ñöte, yebiti Jehová tare nikwe nita bämike. Aisete Jesús erere, nikwe ja tare ye bämikadre nitre ie. Apóstol Juan käkwe tikabare: “Niara mräkä tuen ie abko nuäre taredre, akwa tä tarere ñakare, ¿se abko Ngöbö tuen ñakare ie abko tareta era kwe ya? ¡Ñakare jire chi!” (1 Juan 4:20). Nikwe kukwe ne ngwandretari jai: “¿Tita nitre tarere krubäte? ¿Tita nitre mike tuin bobre jai? Nitre ye ñaka ja ngwen kwin tibe, ¿akwa yebiti ta tita mike tuen bobre jai? ¿Jondron tikwe yebiti aune tita kä denkä jai blitakäre Jehovabätä niaratre ben tare tikwe yebätä? ¿Nitre mada ñaka kukwe ye mike ütiäte jai aune ja mikata ti rüere yebiti ta tita nuainne? ¿Ti raba kä denkä jai kukwe driekäre bäri?” (Efes. 5:15, 16).

10. ¿Jesús nämäne dre nuainne nitre mikakäre nüne jäme jabe?

¹⁰ Jesús nämäne ja ngwen jäme nitre madabe. Kukwe käme nuain nämänebätä ye ngwane, ñaka nämäne kukwe käme nuainenta ja dokwäre. Akwa nämäne kukwe mada nuainne arato. Nitre nämäne ja rüere ngwane, niarakwe dimikani töi mike ja mäketa aune nitre töi mikaninta kwe kukwe nämäne jabätä kwetre ye ükete jabe. Ñodre, nitre nämäne ngüdrekä jabe ye töi mikani kwe kukwe ükete jabe ja mäkäkäreta, nämäne Jehová mike täte ye Jehovakwe kadre ngäbiti yekäre, Jesukwe driebare ietre (Mat. 5:9, 23, 24). Nitre ja tötikaka nämäne ja kwete nire abokän bäri ütiätebätä, kukwe yebätä Jesukwe kwe töi mikani ñakare ja kwete bärebäre (Luc. 9:46-48; 22:24-27).

11. ¿Ni raba nitre mada töi mike nüne ño jäme jabe?

¹¹ Nikwe ja töi mikadre nüne jäme jabe aune ñaka ngüdrarekä ni madabe ye ñan ngöräbebätä nikwe ja ngibiadrebiti. Ñakare aune ja töi mikadre ja mäketa ni madabe aune ja mräkätre dimikadre kukweta jabätä kwetre ye üketeta (Filip. 4:2, 3, TNM; Sant. 3:17, 18). Nikwe kukwe ne ngwandretari jai: “¿Tita juto biare dre dre nuainkäre ja mäkäkäreta ni madabe? ¿Ni mada tä kukwe tare niere tie yebätä tita nemen romon jankunu kräke? ¿Ni mada ye ara käkwe ja töi mikadre käne kukwe ükete ye tita ngibiare? Ni mada ye abokän ngite ruen tie, ¿akwa yebiti ta tita ja töi mike käne kukwe üketeta ben? Raba ngwane, ¿nitrekwe kukweta jabätä ye tita töi mike ja mäketa?”.

12. ¿Jesukwe ja töi mikani kwin ni mada kräke ye bämikani ño kwe?

¹² Jesukwe nitre tarebare (Mat. 11:28-30). Nämäne ni mada tarere aune ja töi mike kwin kräketre, kukwe ñan nuäre nämäne nemen bare yebiti ta. Ñodre, meri fenicia ngängän nämäne bren ye Jesukwe mikadreta kwinta ribebare kwe ie, kenanbe meri yekwe dre ribebare ie ye ñaka nuainbare kwe. Akwa ja tare bämikani kwe ie tödeka kwe tuani kwe ngwane ngängän ye mikaninta kwinta kwe (Mat. 15:22-28). Ñaka ja ketaninbätä kwe mäträkäre ni madabätä. Nitre nämäne tare kwe ye kräke nämä ja töi mike kwin, akwa kukwe nämäne kwatibe. Ñodre, Pedrokwe kukwe niebare ie ne kwe ñaka Jehová töi mikadre nemen bare kwe ye ngwane, niarakwe mäträbare Pedrobätä nitre ja tötikaka mada kwe ye okwäbiti (Mar. 8:32, 33). Ñaka nuainbare kwe Pedro mikakäre tuin ngwarbe jai, ñakare aune Pedro aune nitre ja tötikaka kwe ye rabadre niara dimike aune ñaka niara ketadrebätä Ngöbö töi nuainkäre yekäre nuainbare kwe. Pedro namani ja gaire, akwa ye namani kwin kräke raba ruin nie.

13. Ni mada tare bökän nikwe ngwane, ¿ruäre ngwane ni raba dre nuainne?

¹³ Ni mada tare bökän nikwe ngwane ni raba kukwe era erere niere ietre. Nikwe nuaindre ngwane nikwe ja töi mikai Jesús erere aune kukwe Bibliabätä ye ererebätä nikwe mäträdre ni madabätä. Nikwe ja töi mikadre kwin ni mada kräke. Niaratrekwe kukwe kwin nuaindi ye nikwe ngübaibätä, tä Jehová tarere aune ni tarere yebätä nita mäträrebätä töi kwinbiti ye kai ngäbiti kwe ye ie nikwe tö ngwandre. Ni raba ngwentari jai: “Ni iti tare tikwe ye tä kukwe käme nuainne ngwane, ¿ti ñan tä kä jürä ngwen jabätä blitakäre ben? ¿Tita nuainne ño? ¿Tita ja töi mike jäme o tita ñäke tare ie? ¿Ñobätä tita mäträre? ¿Tita romon kräke o kukwe kwin rabadre bare kräke ye ie ti tö yebätä?”.

14. ¿Jesukwe kukwe kwin nuainbare ye bämikani ño kwe?

¹⁴ Jesús ie kukwe kwin ye ñaka gare jerekäbe, ñakare aune tä nuainne. Jehová tare kwe yebätä käre tä kukwe metre nuainne aune tä nuainne töi kwinbiti. Nire tä ja töi mike kwin ye abokän tä ni mada dimike aune ja töi mike kwin kräke. Ja töi mikadre kwin ye ñaka rabadre gare jerekäbe nie, ñakare aune nikwe nuaindre aune nikwe ja töi mikadre nuainne töi kwinbiti. Ni iti raba ngwentari jai: “¿Kukwe kwin ye nuain raba töi kämebiti?” Jän nuain raba. Ñodre, Jesukwe blitabare nitre nämene jondron bien nitre bobre ie, biti kukwe ye rabadre gare ni jökrä ie ye ie töi nämene. Kukwe kwin nuainne nämäne bä kwrere, akwa ye ñan nämäne kä mike juto Jehovabätä (Mat. 6:1-4).

15. ¿Ni töi kwin ye nita bämike ño?

¹⁵ Nita töbike ni madabätä ye töire nita kukwe kwin nuainne aune ñakare töbike ja aibebätä ngwane, metrere ni töi kwin. Ni rabadre kukwe ne ngwentari jai: “Kukwe metre ye ñan gare jerekäbe tie, ¿ñakare aune tita nuainne ye ti raba niere? ¿Ñobätä tita kukwe kwin nuainne?”.

¿‘JA NGWAN BITIN KITADRE JABÄTÄ’ YE TÄDRE KWIN NIBÄTÄ YEKÄRE NIKWE DRE NUAINDRE?

16. ¿Ni rabadre dre nuainne köbö kwatire kwatire aune ñobätä?

¹⁶ Nita ja ngökö ñöte ye bitikäre nita ja ngwan bitin ye kite täte jabätä aune ni ñaka rabadre kukwe mada nuainne ye nikwe ñaka nütüdre. Ja ngwan bitin ye abokän nita dän ngübare kwin ja kräke ye erere. Yebätä köbö kwatire kwatire üai deme Ngöbökwe tä ni töi mike kwin keta kabre, ye ni rabadre ja di ngwen nuainne. ¿Ñobätä? Ñobätä ñan aune Ngöbö ye abokän ñakare kwekebe aune üai deme kwe ye die tä käre sribire (Gén. 1:2). Üai deme tä ni töi mike kwin keta kabre ye keteitire keteitire raba aune rabadre ni töi mike kukwe nuainne. Ñodre, ni ja tötikaka Santiago käkwe tikabare : “Ni ñakare sribi nuainne niara kräke ngwane, nebrä ngwarbe” (Sant. 2:26, NGT). Aune ye erere nie raba arato, töi kwin mada mada üai deme tä ni töi mike nuainne yebätä. Töi kwin ne nita bämike batire batire ngwane, üai deme Ngöbökwe tä sribire nibätä ye nita bämike.

17. Üai deme tä ni töi mike kwin ye erere ni ñaka ja töi mike ngwane, ¿ni raba dre nuainne?

¹⁷ Nitre ruäre käkwe ja ngökanina ñöte mekerabe, akwa üai deme tä ni töi mike kwin keta kabre, ye erere niaratre ñaka nuainne kwin ribeta erere. Akwa nikwe ñaka ja di ngwandre nekä ye ütiäte krubäte. Ñodre, ani bämike dän ötöiti tuin kwin nie ye rötadrete nikän ngwane, nikwe ñaka kitadrekä jötrö ngwarbe, ¿ñan ererea? Raba ngwane, nikwe gudikadreta jai raba ruin nie. Yete ja käne nikwe dän ye ngübai kwin. Ye erere arato, ruäre ngwane ni ñaka ja töi mike kwin ni mada kräke, ñaka ngübare bätärekä aune ja tare bämike ietre, akwa yebiti ta nikwe ñaka ja di ngwandre nekä. Ngite kitamana ta jabiti töi bökänbiti ni madai, ye raba kukwe ñan kwin nuainbare ye üketeta aune ye kukwe kena nuaindre ja mäkäkäreta kwinta ni madabe. Aune mada ngwane nikwe ja töi mikadre nuainne bäri kwin.

18. ¿Dre tädre gare metre nie?

¹⁸ ¡Jesukwe kukwe kwin bämikani yebätä nita debe bien krubäte! Nikwe ja di ngwain töbike bäri Jesús erere ngwane, rabai bäri nuäre ni kräke ja ngwankäre niara erere. Aune käre nita ja ngwan bitin kite jabätä, ye nikwe bämikadi bäri kwin. Üai deme tä ni töi mike kwin, ketabokä aibebätä nikwe ja tötiri kukwe ja tötikara nekänti. Üai deme tä ni töi mike keta kabre kwin, yebätä nikwe ja tötikadre bämikakäre bäri kwin ye nuaindre nikwe ye kwin. Tärä ni testiko Jehovakwe jie ngwankäre ja tötike yete kukwe kädekata: “Nitre kristiano tä dre dre nuainne” biti mä rika “Üai deme tä ni töi mike”, yete kukwe keta kabre kwin raba mä dimike kwain mäi. Nikwe ja ngwan bitin ne kitadre jabätä aune käre ngwain jabätä ngwane, Jehovakwe ni dimikai ye tädre gare metre nie.