Nitre tä kukwe ngwentari
“Ñan ti jatani ni jökrä mikakäre nüne jäme jabe kwärikwäri abko munkwe nütü” niebare Jesukwe, ¿yebiti dre gäräbare kwe?
Nikwe nünandre jäme ni jökrä ben driebare Jesukwe. Akwa bati Jesukwe kukwe ne erere niebare nitre apóstol kwe ie: “Ñan ti jatani ni jökrä mikakäre nüne jäme jabe kwärikwäri abko munkwe nütü; akwa ti jatani abtä ni kwati tädi rüre jabe kwärikwäri. Ne aisete ti dokwäre ngäbäkre rikwitaita rün kwe rüere amne ti dokwäre ngäbäkre merire rikwitaita meye kwe rüere. Erere arato, bosi rikwitaita bie rüere” (Mat. 10:34, 35). ¿Kukwe ne abokän dre gärätä?
Ni rakadrekä ni mräkätre rüere ye ie Jesús ñaka tö namani, akwa kukwe drie nämene kwe yebätä kukwe ye erere raba nemen bare ye nämene gare metre ie. Nire tö ja mikai ja tötikaka Jesukwe aune ja ngökäi ñöte ngwane, kukwe diani nuaindre kwe jai ye ñaka raba nemen tuen kwin mräkätre kwe ie ye tädre gare metre ie. Nitre ruäre rüere mräkätre kwetre o muko kwe tä ja mike ngwane, ñaka tä nemen nuäre kräketre ja ngwankäre Jesús erere.
“Munkwe ja die mikadre käre nünakäre jäme ni jökräbe” nieta Bibliabätä nitre kristiano kräke (Rom. 12:18). Jesukwe kukwe driebare ne raba nemen “ngitra” ye kwrere nitre ja mräkäre ruäre ye kräke. Kukwe driebare Jesukwe ne ni iti tä kain ngäbiti aune mräkätre ruäre kwe ñan tä kain ngäbiti o tä ja mike rüere ye ngwane, kukwe ne erere tä nemen bare. ‘Mräkätre kwe gwi arabe rikwitadita rüere’ ñobätä ñan aune tä ja tötike kukwe metre yebätä (Mat. 10:36).
Nitre ja tötikaka Kristokwe ye tä nüne mräkätre kwe tä kukwe mada mike täte yebe ngwane, ni ja tötikaka Kristokwe tä Jehová aune Jesús tarere ye nuadite ye niebare Jesukwe. Ñodre mräkätre kwe raba mike ja dibiti fiesta ruäre ñaka kwin ye käi ngwen juto jabätä. Ye erere rabadre bare ngwane niaratre nire mikadi täte ye rabadre den nuaindre jai. Jesukwe niebare: “Nire nire käta rün amne meye tarere bäri tikrä, ni ye abko ñan rabadre jire chi tikwe” (Mat. 10:37). Nikwe ñaka ni rün aune ni meye taredre ne kwe ni rabadre ja tötikaka Jesukwe ye ñan ai gärä nämene kwe. Ñakare aune dre bäri ütiäte ye tädre gare metre nie. Ni mräkätre tä ja mike ni rüere, akwa yebiti ta ni täbe tarere jankunu. Metrere Jehová taredre ye bäri ütiäte ni kräke ye gare metre nie.
Ni mräkätre tä ja mike ni rüere ye tare krubäte. Akwa ni ja tötikaka Jesukwe ye ie kukwe ne gare metre: “Nire nire ñaka tä kri ja tare nikakäre kwe ngwen aune näin ti jiebiti ngwane, ti ñan rabadre nemen bäkäne” (Mat. 10:38, TNM). Ni ja tötikaka Jesukwe ye rüere mräkätre kwe raba ja mike aune kukwe keta kabre taretare ben ja tuadi kwe ye tä gare metre ie. Akwa yebiti ta, gwä ngwane ni rabadre kukwe kwin bämike ni mräkätre käne ne kwe niaratre ja töi kwitadre aune kukwe metre Bibliabätä ye niaratre tö rabadre mikai gare jai (1 Ped. 3:1, 2).