Tö ngwanta ye mikadre dite jankunu

1. ¿Tödekara meden bianta Jehovakwe nie?

JA NIRE kärekäre Jehovata käbämike nie ye ie nita tö ngwen ye kukwe bäri kwin Jehovakwe biani nie. Nitre niara mikaka täte ruäre tä tö ngwen nüna kä kwinbiti ni üaire erere, abokän ñaka krütai jire chi (1 Cor. 15:50, 53). Nitre Jehová mikaka täte bäsi jökrä tä tö ngwen nüna kärekäre kä tibienbätä ye ie abokän känti nünain kä jutobiti kwe aune bren ñaka rabaira (Apoc. 21:3, 4). Nikwe nünain kä kwinbiti o kä tibienbätä yebätä nita tödeke ye nita mike ütiäte krubäte jai ja brukwä tätebiti.

2. ¿Ño köböire nita tö ngwen, aune ñobätä?

² Biblia tä blite tödekara yebätä ngwane, kukwe kwin rabai bare metre ye tä nüke ni töite. Nita tödeke ye rabai bare metre ye gare nie, ñobätä ñan aune kite Jehovakri (Rom. 15:13). Kukwe käbämikata kwe ye gare nie aune käre tä mike nemen bare ye gare nie arato (Núm. 23:19). Jehovata dre käbämike ye tö nuaindi aune raba nuaine ye gare metre nie. Aisete, nita tö ngwen ye ñan nita kukwe bämike ja töite, ñakare aune namani bare aune tä nemen bare metre.

3. ¿Dre rabai gare nie kukwe ja tötikara nekänti? (Salmo 27:14).

³ Ni Rün kä kwinbiti yekwe ni tare yebätä nikwe tö ngwandre ie niara tö (ñäkädre Salmo 27:14 yebätä).b Nita tö ngwen Jehovai ye tädre dite ngwane, ni rabai kä ngwen nüke jai kukwe tare ye näire aune kukwe käbämikata ja känenkäre yebätä nikwe ja töi mikai kä jutobiti. ¿Nita tö ngwen ye raba ni kriemike ño?, kukwe ye rabai gare nie kukwe ja tötikara nekänti. Käne, ni bike mike gare jai ñobätä tödekata ye bämikata hierro doboko kitata mrente rü ketatekäre aune casco ye kwrere. Biti, ni raba tödeka mike ño bäri dite yebätä ani ja tötike.

TÖDEKA NIKWE YE HIERRO DOBOKO RÜ KETATEKÄRE YE KWRERE

4. ¿Ñobätä nita tö ngwen ye abokän hierro doboko kitata mrente rü ketatekäre ye kwrere? (Hebreos 6:19).

⁴ Apóstol Pablo käkwe tärä tikabare nitre hebreo ie ye ngwane, tödeka ye bämikani kwe hierro doboko kitata mrente nguse rü ketatekäre ye kwrere (ñäkädre Hebreos 6:19 yebätä). Bäsi käre, Pablo nämäne niken mrente rü yete yebätä nämäne gare kwin ie hierro kitata mrente rü ketatekäre, ne kwe rü reketadrete aune tädre kwekebe ja täte yekäre. Bati mren namani rubun krubäte ye ngwane nitre rü ngwanka hierro doboko ye kitani mrente nguse ne kwe rü ñaka matadre jäte (Hech. 27:29, 39-41). Nita tödeke ye bämikata hierro doboko kitata mrente rü ketatekäre ye kwrere, tä ni dimike ne kwe ni tädre dite aune ni tädre Jehová ken kukwe tare ye näire. Nita tödeke ye tädre dite aune nikwe tö ngwain kukwe kwin tä ja känenkäre ei ye käkwe ni dimikai kukwe kri ben nikwe ja tuai ye ngwane. Jesús niebare ja mikadi ni rüere ye nikwe ngwandre törö jai (Juan 15:20). Nita töbiketari kukwe kwin Jehovata käbämike nie yebätä, ye tä ni dimike ja ngwankäre kwin ni kristiano ye erere.

5. ¿Jesús bäsi jatanina krüte ye ngwane, dre käkwe dimikani tö ngwen jankunu?

⁵ Jesús nämäne tödeke ye käkwe dimikani ño ja ngwen metre murie ketai tare nämäne gare ie yebitita. Köbö Pentecostés kä 33, apóstol Pedro käkwe profecía tä Salmos ye kädekaninte, yete kukwe bä nuäre mikani gare Jesubätä, känti Jesús töi nämäne jäme aune nämäne tö ngwen yebätä blitata: “Tita tödeke, ñobtä ñan angwane ti krüte angwane, makwe ñan ti ngätä tuadimetre ni krütani ngätäite dobote Ngöbö. Erere arato, ni Deme makwe, ye makwe ñan ngwäkä tuadimetre ngütekä […] ti rabadita ma ngwärekri amne makwe kä mikadita nuäre tibtä ma tuareta” (Hech. 2:25-28; Sal. 16:8-11). Jesús murie ketai ye nämäne gare ie, akwa Ngöbö niara gaikröta ye ie nämäne tödeke aune kä jutobiti nainta kä kwinbiti Rün kwe yebe ye nämäne gare metre ie (Heb. 12:2, 3, TNM).

6. ¿Ja mräkä iti testiko käkwe dre niebare tö ngwanta yebätä?

⁶ Tö ngwanta ye köböire ja mräkätre kwati kä ngwanina nüke jai kukwe tare yebiti ta. Leonard Chinn, Jehová mikaka täte metre nünanka Inglaterra, kukwe kwin bämikani ye ani mike gare jai. Rübare kena ye ngwane, kitani ngite ñobätä ñan aune ñaka nikani rüre yebätä. Sö krabre te ñaka mikani blite kökräte aune sribi doboko biani nuaindre ie. Kä nikani ruäre ta ye bitikäre kukwe ne tikabare kwe: “Tö ngwandre ye ütiäte krubäte kä ngwankäre nüke jai rükaba gare tie kukwe rababa bare tibätä yebiti. Jesús, apóstol bätä profeta kukwe kwin bämikani aune kukwe käbämikata Bibliabätä, kä ja känenkäre kräke ye tä ni dimike kä ngwen nüke jai”. Tö ngwanta ye namani hierro doboko kitata mrente nguse rü ketabätäkäre ye kwrere Leonard kräke. Ye erere, tö ngwanta ye raba nemen ni kräke arato.

7. ¿Nita ja tuin kukwe tare ben ye ngwane, nita tö ngwen ye tä nemen ño bäri dite? (Romanos 5:3-5; Santiago 1:12, NGT).

⁷ Nita ja tuin kukwe tare yebe ngwane, nita tö ngwen ye tä nemen bäri dite aune Jehová tä ni dimike bätä tä ni kai ngäbiti ye nita tuin (ñäkädre Romanos 5:3-5; Santiago 1:12 yebätä).c Ye medenbätä, nita tö ngwen ye tä bäri dite kukwe metre jämi gare nie ye ngwane. Kukwe tare ben nita ja tuin yekwe ni mikadre di nekä ye ie Satana tö, akwa Jehová diebiti ni raba ja tuin kukwe tare jökrä yebe.

NITA TÖ NGWEN YE ABOKÄN CASCO KWRERE

8. ¿Ñobätä tö ngwanta ye abokän casco ye kwrere? (1 Tesalonicenses 5:8).

⁸ Tö ngwanta ye abokän casco kwrere nieta Bibliakwe (ñäkädre 1 Tesalonicenses 5:8 yebätä). Ni rükä tä niken rüre ye ngwane, tä niken casco ye ngwena ja dokwä kriemikakäre rüe yebätä. Erere arato, nita rüre ja üairebiti yebätä ni rabadre ja töi kriemike Satanás yebätä. Niara tä ni nuinte kärera niera kukwe ngwarbe raba ni töi juen ngwarbe yebiti. Casco tä ni rükä dokwä kriemike, ye erere arato nita tö ngwen ye tä ni töi kriemike, ne kwe nikwe ja ngwandre metre Jehovai.

9. ¿Nitre ñan tä tö ngwen kä ja känenkäre ie yebätä dreta nemen bare?

⁹ Nita tö ngwen ja nire kärekäre ie, ye käkwe ni dimikai kukwe kwin den jai. Akwa ni tö drei ja kräke ye aibebätä nita töbike ngwane, nita tö ngwen ye raba kite nete nikän. Nitre kristiano Corinto kirabätä kukwe namani bare yebätä ani töbike. Kukwe ütiäte Ngöbökwe käbämikani nitre gaikröta, yei niaratre nämäne tö ngwen, ye jatani nete kän.(1 Cor. 15:12). Nitre ñaka nämäne tö ngwen kukwe ja känenkäre ye ie ye abokän nämäne töbike kukwe nämäne nemen bare kä ye ngwane ye aibebätä ye Pablokwe niebare (1 Cor. 15:32). Kä nengwane, nitre kwati krubäte ñaka tö ngwen kukwe kwin Ngöböta käbämike ja känenkäre ye ie, ñakare aune dre raba nemen kwe kä nengwane ye aibe kä ngwankäre juto jabätä; ni abokän tä tö ngwen kukwe kwin Ngöböta käbämike ja känenkäre ye ie. Ni kristiano tä tö ngwen ye abokän casco ye kwrere abokän tä ni kriemike ni tö drei kä ngwankäre juto jabätä aune nita ja kete Jehovabe ye ñan juankäre ngwarbe (1 Cor. 15:33, 34).

10. ¿Tö ngwanta ye tä ni dimike ño, ñaka kukwe ngwarbe nieta ye mikakäre era jai?

¹⁰ Kukwe ngwarbe ñaka ütiäte köböite ni ñan raba mate kwin Jehovabätä yebätä tödeka nikwe casco kwrere ye raba ni kriemike. Ñodre, nitre ruäre raba nütüre: “Ja nire kärekäre ye ñaka raba nemen jire tikwe. Aune Jehovata dre ribere ni niara mikaka täte yebätä ye erere ñaka raba nemen bare tie”. Elifaz, ja ketamuko ngwarbe Jobkwe käkwe, bäsi kukwe ne erere niebare ye ani ni ngwenta törö jai niebare kwe: “¿Ño ni kä tibienbätä tä krüte ne raba nemen deme […]?” Arato niebare kwe “Mike ñärärä, Ngöbö ñaka tö ngwen nitre deme ie aune kä kwinta ye ñan jire deme niara okwäkänti” (Job 15:14, 15). ¡Kukwe ye ngwarbe! Satanás ye ni ngökö, nikwe töbikadre ye erere ie niara tö. Nikwe kukwe ye ngwainta törö jai ngwane, nita tö ngwen ye raba kite nete nikän ye gare ie. Ye medenbätä, nikwe ja di ngwandre kukwe ngwarbe ye ganaine aune Jehovata dre käbämike ja känenkäre yebätä nikwe ja töi mikadre kwatibe. Jehová tö nitre niara mikaka täte tuai nüne kärekäre ye ñaka metre ye ni ñaka nütüdre, niarakwe ni dimikai ne kwe ja nire käre ye rabadre nikwe (1 Tim. 2:3, 4).

TÖ NGWANTA YE MIKADRE ÑO BÄRI DITE

11. ¿Kukwe ie nita tö ngwen rabai bare metre ye ñobätä nikwe ngübadre bätärekä?

¹¹ Ruäre ngwane, nita tö ngwen ye ñan tä nemen nuäre ni kräke mikakäre dite. Akwa ruäre ngwane Jehovata dre käbämike ye ñan tä nuainne ngwane, ni töta nemen tuai nemen bare jötrö. Jehová ye abokän kärekäre, kä tuin ño ie ye erere kä ñaka tuin nie (2 Ped. 3:8, 9). Jehovata dre käbämike ye mikai nemen bare metre kwe, ñan nuaindi bengwairebe kwe nita ngübare ye erere. ¿Akwa dre ni dimikai nita tö ngwen ye mikakäre bäri dite aune Jehovata kukwe käbämike ye ngübare bätärekä? (Sant. 5:7, 8).

12. Hebreos 11:1, 6, tä mike gare erere, ¿tö ngwanta aune tödeka ye ñobätä bäsi ja erebe?

¹² Ni täi Jehová ken ngwane nita tö ngwen ye rabai bäri dite, kukwe ye mikai nemen bare kwe ye niara ara tä niere. Arato Biblia tä tö ngwan ye kete tödeka yebätä aune Jehová ye metre aune tä käbämike “nita niara känene abko ütiä biandi kwe nie” (ñäkädre Hebreos 11:1, 6 yebätä). Jehová ye jatai tuin bäri metre nie ye ngwane kukwe käbämikata kwe ye mikai nemen bare kwe yei nikwe tö ngwain bäri. Ani mike ñärärä, ni raba ja kete ño bäri Jehovabe aune tö ngwan ye mike bäri dite.

13. ¿Ño ni raba nemen ja ketamuko Ngöbökwe?

¹³ Nikwe oradre aune ñäkädre Kukwe Jehovakwe yebätä. Bäkänä, Jehová ye ñaka tuin nie, akwa ni raba nemen ja ketamuko kwe. Orasion yebiti nikwe blitadre ben aune niarakwe ni kukwe nuai ye tädre gare metre nie (Jer. 29:11, 12). Nita ñäke Kukwe Jehovakwe yebätä aune töbiketari ngwane nita niara kukwe nuin. Nitre kwati kirabe ja ngwanka metre ye ngübabare ño kwe yebätä nita ñäke ngwane tä tödeka nikwe mike bäri dite. Kukwe jökrä tä Kukwe Ngöbökwe yebätä ye “tikani ni töi tikakrä amne kukwe tikani kira, ye abko btä nikwe nünandrekä dite käre amne tä kä mike nuäre nibtä, ye köböire ni rabadre tödeke kärekäre Ngöböbti” (Rom. 15:4).

14. ¿Jehovata kukwe nuainne ni mada kräke yebätä nikwe töbikadre ye ñobätä kwin krubäte?

¹⁴ Jehovata kukwe käbämike ye mikanina nemen bare ño kwe yebätä töbikadre. Jehovakwe kukwe käbämikani Abrahán aune Sara ie yebätä ani töbike. Niaratre namanina umbre aune monso rabadre kwetre ye käi nikanina ta bititre, akwa monso rabai iti kwetre käbämikani Jehovakwe ie (Gén. 18:10). ¿Abrahán käkwe kukwe ye kani ngäbiti ño? Biblia tä niere: “Juta keta kabre Abrahán rabai rüne ye ie tödekani kwe aune mikani era kwe jai” (Rom. 4:18). Ni kä nebätä kräke kukwe ye ñaka raba nemen bare raba tuin nie, akwa Jehovakwe dre käbämikani ye erere nuaindi kwe ye ie Abrahán nämäne tö ngwen kwatibe. Aune kukwe ye erere namani bare (Rom. 4:19-21). Kukwe ye kwrere ñaka raba nemen bare raba ruin ni kä nebätä ie, akwa kukwe meden käbämikata Jehovakwe ye käre mikai nemen bare kwe ye nemen gare metre nie nita ñäke kukwe ne kwrerebätä ngwane.

15. ¿Jehovakwe dre nuainbarera ni kräke yebätä nikwe töbikadretari ye ñobätä ütiäte krubäte?

¹⁵ Kukwe keta kabre Jehovakwe nuainbarera ni kräke yebätä nikwe töbikadre. ¿Kukwe keta kabre käbämikata Jehovakwe nie Bibliabätä ye meden mikanina nemen bare kwe ni kräke yebätä ni tärä töbike? Ñodre, nita dre ribere jai nünankäre ye Jehovakwe biandi nie ye Jesukwe niebare (Mat. 6:32, 33). Aune nikwe üai deme käräi Jehovai ngwane, Jehovakwe biandi nie ye Jesukwe niebare arato (Luc. 11:13). Kukwe keta kabre käbämikani nie Jehovakwe ye mikanina nemen bare kwe. Aune kukwe mada mada keta kabre käbämikanina kwe abokän mikanina nemen bare kwe, ye raba nüke ni töite ni raba niere, ñodre, tä ngite kite ta nibiti, tä ni töi mike jäme aune mrö ja üaire bien nie (Mat. 6:14; 24:45; 2 Cor. 1:3). Kukwe keta kabre käbämikani Jehovakwe aune mikanina nemen bare kwe ni kräke yebätä nikwe töbikaitari ngwane, kukwe meden käbämikata kwe ja känenkäre ye ie ni rabai tö ngwen bäri.

TÖ NGWAN KUKWE KWIN IE YE MUNKWE KÄI NGWAN JUTO JABÄTÄ

16. ¿Nita tö ngwen ye ñobätä regalo ütiäte krubäte?

¹⁶ Ni raba nüne kärekäre ja känenkäre ye ie nita tö ngwen ye kukwe kwin krubäte bianta Jehovakwe nie. Kukwe ye rabadre bare ye nita ngübare ngäbiti aune rabai bare ye gare metre nie. Kukwe kwin ie nita tö ngwen ye abokän hierro doboko kitata mrente rü ketatekäre ye kwrere, ñobätä ñan aune tä ni dimike ja tuin kukwe tare ben, gata aune ja mikata ni rüere yebe. Ye casco erere ni kräke arato, ñobätä ñan aune tä ni töi kriemike aune tä ni dimike ñaka kukwe käme ye kaingäbiti bätä tä ni dimike ja töi mike kwatibe kukwe kwin yebätä. Kukwe kwin ie ni raba tö ngwen ye tä ni mike nökrö bäri Jehová ken aune Jehová tä ni tarere ye bämikata kwe nie kukwe yebiti. Nita tö ngwan jakwe mike dite ye kwin krubäte ni kräke.

17. ¿Nita tö ngwen ye ñobätä käita nemen juto nibätä?

¹⁷ Apóstol Pablo kukwe tikabare nitre kristiano Roma ie ngwane, niebare kwe: “Jändrän kuin nuendi munkrä, ye abko munkwe käi ngwiandre nuäre jabtä” (Rom. 12:12). Pablokwe ja ngwain metre Jehovai ngwane nünain kärekäre kä kwinbiti kwe, ye käi nämäne jutobätä. Ye erere arato, nita tö ngwen kukwe käbämikata Jehovakwe ye ie ye rabai bare metre ye nikwe käi ngwandre juto jabätä. Ni iti salmista käkwe niebare: “Kä juto […] nire tä tö ngwen Ngöbö Jehová ie, […] käre tä ja ngwen metre” Jehovai yebätä (Sal. 146:5, 6).