¿Ñobätä nitre kristiano ñaka niken rübätä nitre israelita erere?

RÜBARE kri bobukäre ngwane ni rükä iti nazi käkwe ngratebare krörö nitre testiko ruärebiti: “Mun iti ñaka ja mikadi rükäre nitre Francia aune Inglaterra rüere ngwane, ¡mun jökrä murie ketai!”. Nitre rükä SS ye nämäne kürü ngwen kabre jabätä akwa yebiti ta ja mräkätre ye käkwe ñaka ja kukwei kwitani. ¡Niaratre ja ngwani dite krubäte! Ni testiko tä ja töi mike ño rü yebätä ye bä mikani metre kukwe namani bare nebiti: ni ñaka niken jire chi rübätä. Aune nitre tä rüre jabe yete ni ñaka ja mrite, gätäbiti ni rä ötata yebitita.

1. NITRE NGÖBÖ MIKAKA TÄTE NÄMÄNE KITE JUTA KETEITI YEKRI

Kirabe sete, Jehovakwe juta keteiti diani jai ne kwe rabadre juta jen kwe, ye abokän Israel. Niebare kwe erametre mun abokän “juta jeñe tikwe nitre jökrä juta madate yebitita” (Éx. 19:5). Aune kä keteitibe ye Jehovakwe biani ietre. Aisete nämäne rüre juta madabe ngwane, nitre Ngöbö mikaka täte mada ye niaratre ñaka nämäne nuainne tare o murie kete.a

Kä nengwane, “Ni bätäkä ngwarbe amne ni kukwe bätäkä ngwarbe [...], erere arato ni nünanka juta bätäkä ngwarbe” te ye tä Jehová mike täte (Apoc. 7:9). Niaratre rikadre rübätä akräke etebatre o ngwaitre kwetre ja üairebiti ye niaratre raba nuainne tare aune murie kete .

2. JEHOVÁ NÄMÄNE NITRE ISRAELITA JUEN RÜBÄTÄ

Kirabe sete, ñongwane aune ñobätä nitre israelita rabadre niken rüre ye Jehová nämäne niere ietre. Ñodre nitre cananeos nämäne chokali mike Ngöböre jai, nämäne nemen käme käme jabe aune nämäne monsotre murie kete ye mikadre ja ngie nuin ye niebare Jehovakwe. Aune niaratre gadrete kä käbämikani yete ye Jehovakwe niebare nitre israelita ie, ne kwe niaratre ñaka jatadre ja ngwen niaratre ye erere (Lev. 18:24, 25). Nitre israelita nämänena kä käbämikani yete ngwane bä kabre niaratre raba rüre nitre ja mikaka rüere käme yebe niebare Jehovakwe ietre (2 Sam. 5:17-25). Akwa Jehovakwe ñaka niaratre tuanimentre ja töi mike niken jire akwle rübätä. Aune niaratre nämäne ja töi mike akwle ye nuainne ngwane bä kabre kukwe tare nämäne nemen bare bätätre (Núm. 14:41-45; 2 Crón. 35:20-24).

Kä nengwane, nitre kä tibienbätä rikadre rübätä ye Jehová ñaka tä nuainmana ietre. Juta ruäre tä rüre jabe ñobätä ñan aune tö ja töi mikai nemen bare aune ñaka Ngöbö töi ai nuainbätä. Juta tä niken rübätä ñobätä ñan aune töta nemen kä tuai bäri jakwe, ngwian tuai bäri jakwe, politica o niaratre töi rabadre nemen bare yekäre tätre rü nuainne. Akwa ?Ngöbö käbiti nitre ruäre tä rüre ne kwe kukwe meden mikata täte kwetre ye rabadre krie mikani o Ngöbö rüe ye gadrete kwetre tä niere yebätä dre nie raba? Niaratre tä kukwe nuainne ye Ngöbö ñaka kain ngäbiti. Jehovakwe nitre niara mikaka täte kriemikai aune nitre tä ja mike rüere ye gaite kwe ja känenkäre rü Armagedón yete, ye mikata gare kwe (Apoc. 16:14, 16). Rü yete angeletre käkwe rüdi aune juta kwe kä tibienbätä ye ñan ai käkwe rüdi (Apoc. 19:11-15).

3. NIRE NÄMÄNE TÖDEKE JEHOVAI YE NITRE ISRAELITA ÑAKA NÄMÄNE MURIE KETE

Kirabe sete, nire nämäne tödeke Jehovai ye nitre israelita nämäne mike tuin bobre jai, akwa nire murie ketadre niebare Jehovakwe ye erere niaratre käkwe murie ketani. Kukwe ye erere namani bare ye ani mike gare ketebu jai. Juta Jericó gadrete niebare Jehovakwe akwa nitre israelita käkwe Rahab aune mräkätre kwe tuanimetre nire, ñobätä ñan aune Rahab nämäne tödeke yebätä (Jos. 2:9-16; 6:16, 17). Yebitikäre, nitre Gabaón ye jökrä tuanimetre nire ñobätä ñan aune niaratre nämäne Ngöbö mike ütiäte jai bämikani kwetre yebätä (Jos. 9:3-9, 17-19).

Kä nengwane, nitre juta keteiti tä niken rübätä ye ñaka tä nitre Ngöbö mikaka täte ye mike tuin bobre jai aune ruäre ngwane, nitre ñaka ngite ye tätre murie kete.

4. RÜDRE ÑO NIEBARE JEHOVAKWE YE ERERE NITRE ISRAELITA NÄMÄNE NUAINNE

Kirabe sete, nitre israelita nämäne nike rübätä ye ie Jehová nämäne kukwe bien nuainkäre. Ñodre, niaratre rabadre kukwe ükete juta nämäne ja mike niaratre rüere ye ben ja mäkäkäre jäme bentre ye ribe nämäne ietre (Deut. 20:10). Nitre rükä aune nitre nünanka juta yete ye rabadre ja ngwen kwin ja ngrabarebiti aune ja ngwan nämäne ño kwetre yebiti ye Jehová nämäne ribere ietre arato (Deut. 23:9-14). Juta niaratre bäre nämäne kukwe nuainne ye erere niaratre ñaka rabadre nuainne. Ñodre niaratrekwe juta ruäre diandre jai ngwane, niaratre ñaka rabadre meritre juta yete ye mike ja dibiti jabe Jehová nämäne niere ietre. Ne madakäre, niaratre tö rabadre ja mäkäite meritre yebe ngwane rabadre kämike niken sö krati ta biti ja mäkädrete kwe ben ye nie nämäne Jehovakwe ietre (Deut. 21:10-13).

Kä nengwane, juta keta kabre känti nitre tä kukwe ükete jai rü yebätä. Kukwe ükateta yebiti nitre nünanka juta yete ye krie mika tö akwa bä kabre ñaka kukwe ye mikata ütiäte.

5. NGÖBÖ NÄMÄNE RÜRE JUTA KWE KRÄKE

Kirabe sete, Jehovakwe rübare juta kwe kräke aune bä kabre kukwe ñan tuabare nuainbare kwe, ne kwe juta Israel käkwe juta mada ye diandre jai .ñodre juta Israel dimikani kwe juta Jericó den jai .kukwe niebare Jehovakwe ye erere nitre israelita nuainbare “ngwänänkäbare kri kwe”, aune “ki nämäne juta Jericó kriemike ye ngidianinte” ye köböire Jehovakwe kä tuanimetre ngwarbe nitre Israelita ie ne kwe juta Jerico diandre kwe jai (Jos. 6:20). Ye köböire kä nikani ta ye bitikäre juta Amorreo nämäne ja mike niaratre rüere ye diani kwetre jai arato. ¿Nuainbare ño kwetre? “Jehovakwe ñü järe mikani näkäin tibien [...], ñü järe ye käkwe nitre murie ketani bäri ngitra israelitakwe ye kräke” (Jos. 10:6-11).

NI KRISTIANO ERAMETRE YE TÄ KÄ JÄME KÄNENE

Kukwe tä nemen bare kä nengwane ye ñaka ja erebe kukwe nämäne nemen bare juta Israel näire yebätä nibira gare nie. Akwa kukwe ye ñan aibe bätä ni ñan tä niken rübätä, kukwe mada tärä. Ñodre kä krüte ngwane nire Ngöbö mikaka täte ñaka rabai ngitra rükäre den jai aune “bärira jire niken rübätä” niebare Ngöbökwe (Is. 2:2-4). Ne madakäre, nitre Ngöbö mikaka täte yekwe ñaka ja mikai kukwe kä nebätä yekri aune kukwebätä nitre tä rüre jabe yete niaratre ñaka ja mrite niebare Jesukwe (Juan 15:19).

Aune Jesukwe kukwe mada ribebare nitre ja tötikaka kwe ie niaratre ñaka brukwä rabadre nemen nitre mada kräke, ñaka rabadre nemen rubun aune ñaka raba niken rübätä ye niebare kwe ietre (Mat. 5:21, 22, TNM). Aune niaratre rabadre nitre ja mikaka niaratre rüere ye tarere aune kä jäme känene ye mikani gare kwe ietre (Mat. 5:9, 44).

¿Kukwe ne tä dre mike gare ni itire itire kräke? ¿Ni ñaka tö rikai rübätä akwa kukwe ñaka kwin tärä ni brukwäte abokän raba ja mräkätre ñäkebiti aune mike rüre jabe konkrekasionte? Nikwe ja di ngwandre jankunu kukwe ye erere diankakäre ngätri ngöi ja brukwäte (Sant. 4:1, 11).

Kukwebätä juta tä ngadain jabätä yekri ni kristiano ñaka ja mike, nitre kristiano ye tä ja tarere aune nüne jäme jabe (Juan 13:34, 35). Jehovakwe rü ye diankä kärekäre ye nita ngübare ngäbiti ngwane, gwä ngwane nikwe ja töi mikadre kwatibe ja ngwen neutral (Sal. 46:9).