Watchtower TÄRÄ JÖKRÄ INTERNETE
Watchtower
TÄRÄ JÖKRÄ INTERNETE
ngäbere
Ü
  • Ä
  • ä
  • Ö
  • ö
  • Ü
  • ü
  • Ñ
  • ñ
  • BIBLIA
  • TÄRÄ
  • GÄTÄ
  • w23 febrero págs. 26-30
  • Nitre tödekaka ye kukwe ñaka ketebätä jire ye tuanina tikwe

Video ñaka kukwe ne kräke.

Video ne mika ñaka raba ñärärä gwäune.

  • Nitre tödekaka ye kukwe ñaka ketebätä jire ye tuanina tikwe
  • Ni Mikaka Mokre tä Gobran Jehovakwe mike gare (ja tötikara) 2023
  • Subtítulo
  • Kukwe ja erebe
  • IRLANDA NGWITÄRIKRI, “BOMBA AUNE KÜRÜKWÄ KÄI”
  • SIERRA LEONA: JONDRON MEDEI NIKATA YE ÑAKA NITRE TÖDEKAKA YE KETEBÄTÄ
  • NIGERIA: NITRE NÄMÄ JA NGWEN JENE
  • KENIA: JA MRÄKÄTRE TI NGÜBABA BÄTÄREKÄ
  • ESTADOS UNIDOS: NÜNAN KWIN YE ÑAKA TÖDEKA JA MRÄKÄTREKWE YE KETEBÄTÄ
  • Nitre “ma kukwei nuaka” ye rabai dianintari
    Ni Mikaka Mokre tä Gobran Jehovakwe mike gare (ja tötikara) 2019
  • Jehovata dre nuainmana nie ye nita nuainne ngwane, erametre tä kukwe kwin mike nemen bare ni kräke
    Ni Mikaka Mokre tä Gobran Jehovakwe mike gare (ja tötikara) 2017
Ni Mikaka Mokre tä Gobran Jehovakwe mike gare (ja tötikara) 2023
w23 febrero págs. 26-30
Robert Landis.

KUKWE KWE MIKATA GARE

Nitre tödekaka ye kukwe ñaka ketebätä jire ye tuanina tikwe

ROBERT LANDIS TÄ MIKE GARE

NITA blite kukwe keteitibätä nitre ben ye ñaka käi nikwitekä nibiti ye erere tä nemen bare ni jökräbätä. Kä nikanina 50 ta ti nämä Kenia nunkwe blitaba jabe ye törö kwekebe tie. Sö kabre te tikwe dikakaba yebätä ti nämä näin nainte krubäte. Aune ti nämä täkäni ñukwäbätä ja ketamuko iti ben aune ti nämä blite película kukwe ngwarbe yebätä. Ye ngwane, ja ketamuko ye käkwe nieba: “Biblia ñan blite jire chi kukwe yebätä”.

Tikwe kötaiba. Ja ketamuko tikwe ye ti ñan nämä mike tuin jai ni kukwebätä ye kwrere, ti ñan nämä bämike jire ja töite. Tikwe ngwantariba ie: “¿Dre gare mäi Bibliabätä?”. Rababa kwekebe. Akwa ye bitikäre meye kwe testiko käkwe kukwe ruäre mikani gare ie ye nieba kwe tie. Kukwe nieba kwe tie ye rababa ti töi nike yebätä kukwe mikadre gare bäri kwe tie tikwe ribeba ie.

Nun blitaba raire deu. Satana tä kä tibien ne gobraine ye ja ketamuko tikwe käkwe mikaba gare tie (Juan 14:30). Kukwe ne tärä gare mäi o ño akwa kukwe ne mrä ti kräke ye ti töi mikaba niä. Ngöbö töi kwin aune kukwe ükete kwin ye nämä kä tibien ne gobraine ye ti nämä kukwe nuin käre. Akwa ye erere ñaka nämä nemen bare ti nämä kukwe tuin yebiti. Kä nämä krire 26 tibiti, akwa kukwe keta kabre ye nämä köbö gainkä tie.

Ru nitre rükä Estados Unidokwe ye ti rün nämä ngwen. Aisete ti nämä chi ye ngwane nitre rä öta nämä bombabiti ye raba nemen bare nämä gare tie. Nitre rükä nämä, jerekäbe kise nitakäre botonbiti. Ti nämä universidad California ye ngwane, tikwe ja tare nikaba krubäte Vietnamkwe rükakaba yebätä. Nun ja tötikaka nämä niken ji dike, policia nämä nun kaintari krimana otobiti aune nun nämä murie nötökä gas lacrimógeno kisete aune kä ñan nämä nemen tuin kwin nunye, yebätä nun nämä ngitie. Kä ye ngwane, kukwe tare aibe nämä nemen bare aune nitre nämä rüre krubäte. Policia murie keta nämäne, ji dika nämäne aune nitre nämä ngadain jabätä. Nitre nämä ja ñäkäninbiti kukwe keta kabre nie nämä yebätä aune tikwe dre nuaindre ye ñan nämä nüke gare tie.

Robert tä nünaninkä moto kwe ye ken aune medente näin ye tä mike tuare mapabätä.

Londres ti rikaba África central kokwäre

Kä 1970 ye ngwane, ti rikaba sribire Alaska ngwitärikri, tikwe ngwian ganainba krubäte jai. Ye bitikäre ti rikaba Londres (Inglaterra), tikwe moto kökaba jai aune ti rikaba motorikwäre akwa meden ti rabai ñan nämä gare tie. Sö rikaba ruäre ta ye bitikäre ti rababa África. Tikwe dikakaba ye ngwane, nitre kwati rababa gare tie aune niaratre tö nämä gitiai kukwe tare nämä nakainkä käbiti tibien yebätä aune tö nämä nünain jäme ti erere.

Kukwe tare nämä nakainkä ti nämä tuin aune kukwe nuin yebätä ni üaire käme tä gobrane kä tibienbiti Bibliata mike gare ye metre rükaba gare tie. Akwa kukwe jökrä nebätä Ngöbö nämä medente ye ti tö rababa mikai gare jai.

Sö rikaba ruäre ta ngwane, kukwe ye rababa gare tie. Kä rikaba ruäre ta ngwane, ja mräkätre ja ngwanka metre Jehovai kukwe jökräbiti ta ye rababa gare tie aune rababa tare tikwe.

IRLANDA NGWITÄRIKRI, “BOMBA AUNE KÜRÜKWÄ KÄI”

Ti rükabata Londres ngwane, tikwe blitaba ja ketamuko tikwe meyeben niarakwe Biblia bianba krati tie. Kä rikaba ruäre ta ngwane, ti rikaba Ámsterdam (Países Bajos). Bäti ti nämä ñäke Bibliabätä ñotra mikani ji ngrabare ye täni. Ye ngwane, ja mräkä iti jataba yere aune raba kukwe mike gare bäri tie nieba kwe tie. Biti, ti nämä Dublín (Irlanda) ye ngwane, ti janama sukursal nitre testiko Jehovakwe yekänti. Tikwe jukwe metaba ti mikaba näin gwä, yete Arthur Matthews rababa gare tie, niara ye abokän ie kukwe gare krubäte. Ti tö rababa ja tötikai Bibliabätä tikwe nieba ie ngwane raba ti tötike nieba kwe tie.

Kukwe nämä nemen gare tie ye käi nämä nemen juto tibätä, nitre testiko Jehovakwe nämäne tärä aune täräkwata sribere ye jökräbätä ti nämä ñäke kä jutobiti. Aune, ti nämä ñäke Bibliabätä arato. Ti janama gätäbätä ye ngwane, ti töi rababa niä, ñobätä ñan aune nitre ie kukwe gare krubäte tä kukwe keta kabre ngwentari jai aune ñan nüke gare ie, akwa monsotre kia nämä blite kukwe yebätä gätäte ye ti töi mikaba niä. Ñodre, ñobätä nita ja tare nike, nire abokän Ngöbö, nita krüte ye bitikäre dre tä nemen bare. Ja ketamuko jökrä tikwe ye testiko, nitre mada kä yekänti ñan nämä gare tie yebätä rababa nuäre ti kräke. Niaratre nämä ti dimike sribire Jehová kräke aune Jehová tarere ja brukwä tätebiti.

Nigel, Denis aune ti

Kä 1972 ye ngwane tikwe ja ngökaba ñöte. Kä rikaba kwati ta ngwane, tikwe ja mikaba prekursor aune tikwe ja kwitaba konkrekasion chi Newry (Irlanda del Norte) yete. Ju järe kä kaibe te kotäkwäte ye ti nämä alquilare. Nibi nämä yekänti ti nämä niken ja kite kukwe kädriedre tikwe yebätä. Nibi nämä jäme mikä kwete tibienta aune ñan nämä kukwe mikekä ti kore akwa ye nämä ti dimike krubäte nitre nämä ti mike ñärärä ye kwrere bämike ja töite. Kä 1974 yete ti kädekani prekursor especial; eteba Nigel Pitt yebe, abokän ben ti täbe ja kete kwin.

Irlanda ngwitärikri yete rü aibe tua nämäne köbö kwatire kwatire. Nitre ruäre nämäne kä ye kädeke “bomba aune kürükwä käi”. Nitre nämäne ngädain jabätä ji ngrabare, nitre ie kürü kita gare, nitre nämäne ja täke aune bombabiti carro jutra mikaka nämäne ye aibe tua nämäne köbö kwatire kwatire. Nitre kukwe ngwarbe mikaka täte aune nitre político ye köböite kukwe jökrä ne nämäne nakainkä. Akwa ni testiko ñaka ja mrite kukwe gobrankwe yete nämä gare kwin nitre católico aune nitre ji dikaka yei, ye medenbätä bäri rababa nuäre nun kräke kukwe driekäre nitre jökrä ie aune nun nuain ñan nämä tare. Nun nämä kukwe driere nitre ie ye ngwane, bäsi käre kukwe tare rabai bare aune hora nuäi te, kä medenkänti ye nämä niere nunye ne kwe nun ñan rikadre kä yekänti.

Akwa yebiti ta, ruäre ngwane nun nämä ja tuin kukwe ñaka näre yebe. Bati, ti rikaba kukwe driere juta chi nemenkä nokä yekänti Dennis Carrigan yebe, niara prekursor arato. Kä yekänti ni testiko ñaka nämä jire iti aune nun janama batibe yete. Nun ñaka kukwe nämä ngitiekä nitre irlandés erere yebätä meri iti käkwe nun kita ngiseba raba ruin nunye.aune nun abokän ni rükä británico nämä näin gore nieba kwe nunbätä Ye ngwane kä jürä rababa krubäte nunbätä. Nunkwe blitadre töi jämebiti nitre rükä yebe ngwane, raba nun murie kete o nun täkädre kwe ngudokwäte ye jürä rababa nunbätä. Dennis aune ti nun nämä bu ngübare, ni mada ñaka nämä jire yete aune kä rababa tibo krubäte. Ye ngwane, karo jataba krati rikaba café rürübäin nämä yekänti. Meri iti käkwe nun kita ngiseba ye rikaba blite ja mräkä nibu yebe aune nämä blite nunbätä ben aune ngwä ngwä rababa kise kite nunbätä ie. Ye bitikäre, nitre ye rikaba bätärekä bätärekä karote nun kokwäre, rababa ngwentari nunye ora nuäi te bus tä nüke yete. Bu rükaba ngwane, bu ngwanka yebe rikaba blite akwa kukwe ñaka rababa ruin nunye. Nun aibe nämä näin yebätä niaratre tö rababa nun diainkä kä yekänti aune kukwe tare nuain nunbätä kä kaibe te rababa tuin metre nunye. Akwa kukwe ye erere ñaka rababa bare. Nun rikaba yekänti, nun rükabara ngwane ti rankwaba timo aune tikwe ngwantariba bu ngwanka yei: “¿Nitre ye tö nibi drei?”. “Mun ñan töbika”, nieba kwe tie. “Mun abokän nire tikwe mirira gare ietre. Aisete kukwe tare ñan rabai bare munbätä. Mun ñan ja töibika” nieba kwe tie.

Robert aune Pauline ja mäkäninte kwe ngwane.

Marzo 1977 nunkwe ja mäkäteba ngwane.

Kä 1976 yete gätä kri distritoa nuainba Dublín ye ngwane, Pauline Lomax rababa gare tie, niara ye abokän prekursora especial kä Inglaterra känti nämä basare yete. Niara ye ja ngwai kwin ja üairebiti, töi bobre aune bä nuäre. Niara aune ngwai kwe Ray ie kukwe metre namani gare nämäne chi ngwane. Kä rikaba kwati ta ye bitikäre tikwe ja mäkäteba Pauline ben, biti nun nämä sribire jankunu prekursor especial erere Ballymena (Irlanda ngwitärikri).

Kä ruäre ngwane, tikwe sribiba ni circuito tuabitikä erere Belfast, Londonderry aune kä ruäre känti nitre nämä ja ngwen käme krubäte yete. Ja mräkätre nämä tödeke krubäte Jehovai ye nämä nun töi mike niä, ñan ñobätä aune kukwe ngwarbe nämäne mike täte käne ye tuanimetre kwetre, ñodre brukwä nämäne ni mada kräke aune nämäne ni mada kitete, nämäne ja di ngwen kukwe ye tuanmetrekäre sribikäre Jehová kräke yebätä, Jehová nämä kukwe kwin mike nemen bare kräke aune nämä kriemike ye nämä nüke gare nunye.

Tikwe nuaba kä kräjätä Irlanda yete. Kä 1981 ye ngwane, nun nübaiba Kwela Galaad clase 72 yete. Kwela krütaba ye bitikäre nun juanba Sierra Leona (África Occidental).

SIERRA LEONA: JONDRON MEDEI NIKATA YE ÑAKA NITRE TÖDEKAKA YE KETEBÄTÄ

Ju kwatibe te nun misionero 11 nämä nüne. Estufa kwatibe, inodoro krämä, jübakäin krobu, celular krati, lavadora krati aune dän rötara kratibe ye aibe nämä nunkwe. Bätuakäre gwägwä ñotra nämä niken. Ju dokwäte kwin tukwe nämä kabre nüne aune icha cobra ye nämä nunentubu kabre nun bäre.

Robert aune nitre mada tä moto ye ken, tä näin kri sribabare botere yete ñöbiti.

Nun rikaba ñöte ta gätä kri nuainba juta känime nun ken Guinea ye känti.

Nun ñan nämä nüne kwin krubäte akwa nun nämä kukwe driere ye nämä kä mike juto krubäte nunbätä. Nitre kä yekänti nämä Biblia mike tuin ütiäte jai aune nämä nun kukwe nuin kwin. Nitre kwati jataba ja tötike Bibliabätä aune ja mikaba testiko kwetre. Nitre kä yekänti jataba ti kädeke “Señor Robert” aune ti muko Pauline ie nämä, “Señora Robert” niere. Akwa ye bitikäre, ti jataba sribire bäri sukursalbe yebätä ti ñan nämä kukwe driere krubäte. Yebätä ti muko Pauline ie “Señora Pauline” nie jataba aune tie, “Señor Pauline” nie nämä. Nun kä kwitaba ye käi rababa juto krubäte ti mukobätä.

Robert aune Pauline carro kwe yebe

Nun rikabara jibiti campaña nuainba kukwe driekäre Sierra Leona ye kokwäre.

Ja mräkätre kwati nämä yete, ye bobre akwa nämä dre dre ribere jai ye käre Jehová nämä bien ietre, ruäre ngwane kukwe ngüba ñaka nämä kwetre yebiti (Mat. 6:33). Törö tie, ja ngwai iti kwe ngwian nämä chi mrö kökakäre jakrä aune ngäbriänkä kwe ye kräke köbö ye aibe kräke. Akwa ngwian ye bianba jökrä kwe ja eteba iti nämä bren krubäte malaria kisete aune ngwian ñaka kwe kräkä kökakäre jai yei. Köbö ye arabe te meri iti janama ja ngwai yekänti ja dokwä sökamana ie aune ütiä bianba kwe ie. Kukwe ye kwrere nämä nemen bare bäsi käre.

NIGERIA: NITRE NÄMÄ JA NGWEN JENE

Kä 9 te nun nämä Sierra Leona. Biti nun kwitaba Betel Nigeria yekänti, sukursal ye ñan chi. Sribi nuain nämä tikwe oficinante Sierra Leona ye arabe ti nämä nuainne yete akwa ti muko Pauline kräke ñan rababa nuäre sribi mrä ye nuainkäre aune nämä ja kitadre ie. Nämä kukwe driere ora 130 sö kratire kratire aune ja tötikaka kwin krubäte nämä kwe biti rababa sribire kuartote dän dikabätä köbö kwatire kwatire. Ñan rababa nuäre ti muko kräke sribi mrä ye nuainkäre, akwa ja mräkätre nämä debe bien krubäte sribi kwe yebätä ye rababa gare ie ngwane, ja töi mikaba kwe bäri nitre mada Betelte ye dimike.

Nitre Nigeria ye nämä ja ngwen jene aune kukwe mrä keta kabrebätä nämä ja kitadre nunye. Bati, eteba iti rikaba ja ngwai rükaba krire mrä Betelte ye ngwena ti känti ti mikakäre gare ie. Tikwe kise ngökaba ie ngwane, rababa ngukodokwäbiti. Ti rababa kwekebe, ñobätä nuainba kwe ñan rükaba gare tie ye bengwairebe kukwe nieta Hechos 10:25, 26 bätä Apocalipsis 19:10 ye rükaba törö tie. Yebätä “¿tikwe dre nuain?¿tikwe dre nie ie?”, tikwe ngwantariba jai. Akwa ye bitikäre: “Niara nübaibare Betelte ngwane, kukwe garera ie Bibliabätä” rükaba törö tie.

Yebätä ja ñan rababa ruin kwin tie, akwa tikwe ja mikaba jerekäbe blitakäre ben, ñobätä ja ngwai kukwe nuainba kore yebätä tikwe kukwe känänba. Juta yete kä keteiti känti nitre nämäne nemen ngukodokwäbiti ye erere niara nämäne nuainne. Nitre brare nämä nemen ngukodokwäbiti arato. Ñaka nitre mada mikakäre ngöböre jai, ñakare aune nämäne mike ütiäte jai yebätä. Aune kukwe ye erere mikata gare Bibliakwe arato (1 Sam. 24:8). ¡Ñobätä ja ngwaikwe kukwe nuainba kore yebätä tikwe ñaka krörö nieba ie ye bäri kwin! ñan ñobätä aune kukwe ñan nämä gare tie yebätä tikwe ñäkädre ie akräke niara rabadre ja gaire yebätä, bäri kwin ti rababa kwekebe.

Ja mräkätre rababa gare kwati krubäte nunye Nigeria käkwe tödekabare krubäte nämäne nire ye ngwane. Iti ye kädekata Isaiah Adagbona.b Kukwe metre namani gare ie nämäne bati ye ngwane, akwa biti lepra nämänebätä mikani gare ie. Yebätä juani nitrebätä lepra nämäne ükakrö nämäne yekänti, akwa niara aibe testiko. Ja mika nämäne nitre testiko rüere yebiti ta niarakwe nitre 30 bren lepra kisete dimikani nemen testiko ye köböire konkrekasion kömikani keteiti yete.

KENIA: JA MRÄKÄTRE TI NGÜBABA BÄTÄREKÄ

Rinoceronte namaninkä uli ye ben kä Kenia känti.

Kä 1996 nun juanba sribire Betel Kenia yete. Kukwe rababa bare tibätä ñaka käi nikwitekä tibiti tikwe miri gare kena ye erere ti rikaba mentokwäre ye ngwane ti ñaka nüketa juta nete nükebeta nengwane batibe. Nun nämä Betelte ye ngwane jondron nire keteiti käre nämä nun tuinbiti: Mono kädekata cercopiteco verde. Mono ye nämä kri ngwäkä goire ja ngwaitrekän. Bati, ventana namani tikani ja ngwai iti ie. Aune nikaninta gwäkäre ngwane, mono nämäne kabre gwi kri ngwäkä kwete ye jutuabare ie. Yebätä niara nikaninkän ngratebare kwe a une mono nikaninkä arato ngratebare kwe aune ngitiani ventanante ta.

Pauline aune ti nun nämä konkrekasion keteiti dimike känti blita nämä kukwe suajili yebiti. Kä rikaba braibe ta ngwane, ti mikaba Estudio de Libro de Congregación ye jie ngwen (kä nengwane kädekata Ja tötika Bibliabätä konkrekasionte). Akwa blita ñaka nämä gare suajili yebiti tie ti ñan nämä blite kwin. Yebätä ti nämä ja kite kwin ne kwe ti rabadre kukwe ngwentari kwin yekäre. Akwa ni iti nämä comentario bien ngwane, ñan nämä kukwe niere metre ye ñan nämäne nuke nüke gare tie. Yebätä ja nämä nemen ruin käme tie, ja nämä ruin blo krubäte ja mräkätrebätä tie. Akwa ja mräkätrekwe ti ngübaba bätärekä aune ja töi mikaba bobre kwe ye nämä ti töi mike ñan krütare.

ESTADOS UNIDOS: NÜNAN KWIN YE ÑAKA TÖDEKA JA MRÄKÄTREKWE YE KETEBÄTÄ

Nun ñaka nuaba kä kwati jire Kenia. Kä 1997 ye ngwane, nun juanba Betel Brooklyn (Nueva York). Juta yete nünanta kwin akwa ye raba tödeka nikwe nuinte arato (Prov. 30:8, 9). Akwa nete ja mräkätre tä tödeke arato. Niaratre ñan tö ja tuai jondron bökäne kä tärä ie aune jondron tärä kwe yebiti, ñakare aune yebiti tä sribi kwin ütiäte krubäte juta Jehovakwe tä nuainne ye dimike.

Kä nikanina ta yete kukwe jene jene ben ja mräkätre tä ja tuin yebiti ta tä tödeka bämike ye nun tuanina: Irlanda, ja nuainta tare yebiti ta; África, jondron medei nikata aune nitre tä nüne mäbe mentokwäre, Estados Unidos, nünanta kwin aune jondron tärä keta kabre yebiti ta. Nitre Jehová mikaka täte tä sribire kräke aune ja tare bämike ie kukwe keta kabre ben tä ja tuin yebiti ta ye käi jutobätä.

Pauline ben Betel Warwick yete

Kä nikani jötrö ta tikrä Job 7:6 tä niere erere, “ni dänkwä dikaka tä kö kite jötrö ta jai sekwäre nekwäre ye kwrere kä nikani ta”. Nengwane, nunta sribire central mundial, Warwick (Nueva York), nitre tä ja tarere metrere yebe nunta. Kä jutobiti nun töita sribire gwairebe Rey, Jesucristo yebe, niara kebera kukwe kwin mike nemen bare nitre jökrä ja ngwanka metre ye kräke (Mat. 25:34).

a Ye kwrere gätä kri regional kädeka nämäne käne.

b La Atalaya 1 abril kä 1998, página 22 nemen 27 yete kukwe mikata gare Isaiah Adagbonabätä. Kä 2010 ye ngwane, niara krütani.

    Tärä aune täräkwata ngäbere (2006-2025)
    Sesión dikadre
    Sesión kömikadre
    • ngäbere
    • Juandre
    • Mäkwe ükate jai
    • Copyright © 2025 Watch Tower Bible and Tract Society of Pennsylvania
    • Condiciones de uso
    • Política de privacidad
    • Configuración de privacidad
    • JW.ORG
    • Sesión kömikadre
    Juandre