“Munkwe töbika kuin ja käne amne munkwe mokre jabti au”

1. ¿“Kukweta ükaninte rabaira krüte” yebätä Jesukwe dre niebare nitre ja tötikaka kwe yei aune kukwe ñobiti mäträbare kwebätä?

KÖBÖ ruäre te Jesús krütadre ye känenkri nitre ja tötikaka nibokä kwe käkwe kukwe ne ngwanintari ie: ‘Niere nunye, ¿kukweta ükaninte rabaira krüte ye dre käkwe bämikai?’ (Mat. 24:3, TNM). Ñongwane Juta aune templo judío ye gaite ye nitre ja tötikaka tö namani mikai gare jai. Kukwe ne mikakäre gare ie Jesukwe ñan blitabare juta Jerusalén aune templo kwetre gaite ye aibebätä ñakare aune, “kukweta ükaninte rabaira krüte” yebätä blitabare kwe arato. Aune niebare kwe: “Köbö mdente amne ñänä okwä nuäi ti jatadreta ye abko gare ñakare jire chi ni mda mdaye, angele kä käinbti ie gare ñakare amne Ngöbö Odei ie gare ñakare arato, akwa Ngöbö ni Rün aibe ie tä gare kaibe”. Biti mäträbare kwe kukwe nebitibätä: “Nane batibe ti jatadreta ñongwane abko, ie mun kwan jäme ngwarbe, mden känenkri munkwe ti ngibia ngäbti käre” (Mar. 13:32-37).

2. ¿Nitre kristiano nämäne nüne Jerusalén ye ie ñobätä nämäne ja ngwandre mokre?

² Nitre kristiano judio siklo kena ye ie nämäne ja ngwandre mokre ñan ñobätä aune ye aibe köböire niaratre rabadrete nire. Juta Jerusalén aune templo kwetre gadrete ye ngwane dre rabai bare mikadre ñärärä kwetre ye Jesukwe mikani gare ietre. Aune niebare kwe krörö: “Nitre rükä raba tuen jökrä juta Jerusalén se bäre temen munye angwane abko, juta se juan kebera ngwarbe, ye rabara gare munye”. Ye ngwane, niaratre gitiadre mobe ngutuäbiti kwin niebare kwe ietre (Luc. 21:20, 21). Nitre romano jämi Jerusalén gainte ye känenkri nitre jökrä käkwe Jesús kukwei mikani täte aibe namanintre nire.

3. ¿Dre rabai gare nie kukwe ja tötikara nekänti?

³ Kä gobrainta Satanakwe juan köböra ngwarbe ye näire nita nüne. Ye medenbätä, nitre kristiano siklo kena ye erere töbikadre kwin ja käne aune ja ngwandre mokre. Kukweta nakainkä kä jökräbiti tibien ye ñobätä tä nemen bare gare nie. Akwa, nikwe töbikadre ño debe närebätä ye rabai gare nie kukwe ja tötikara nekänti. Arato, nikwe mokredre jabiti aune kä gobrainta Satanakwe gate kebera, yebätä nikwe dre nuaindre ñaka kä juankäre ngwarbe ta ye rabai gare nie arato.

KUKWETA NAKAINKÄ YEBÄTÄ TÖBIKADRE DEBE NÄRE

4. ¿Kukweta nakainkä käbiti tibien nikwe mikadre gare jai ye ñobätä ütiäte?

⁴ Kukwe tä nakainkä käbiti tibien ye tä profecía Bibliabätä mike nemen bare yebätä kukwe tärä nie ja töi mikakärebätä. Ñodre, kukwe keta kabre rabai bare kädekaninte Jesukwe ye tä ni dimike mike nüke gare jai kä gobrainta Satanakwe ne käne kä nebera chi juankäre ngwarbe (Mat. 24:3-14). Arato apóstol Pedrokwe kukwe niebare ni dimikakäre ja töi mike kwatibe profecía Bibliabätä tä nemen bare yebätä ye tä tödeka nikwe mike dite (2 Ped. 1:19-21). Aune tärä mrä tikani Bibliabätä ye kömikani krörö: “Kukwe mden mden rakadikä bä jötrö abko rabadre gare nie abko Ngöbökwe mikani Jesukristo kisete mikakäre gare sribikä kwekwe ie” (Apoc. 1:1). Aisete, kukweta nakainkä käbiti tibien ye tä profecía Bibliabätä mike nemen bare ño ye ni törbadre mikai gare jai ye ñaka blo. Aune ruäre ngwane ni tö raba nemen blitabätä ja mräkätre ben kukwe nebätä.

5. ¿Profecía Bibliabätä yebätä nita blite ngwane, drebätä nikwe ja ngübadrebiti aune dre nuaindre? (Üai mikadre ñärärä arato).

⁵ Kukweta nakainkä käbiti tibien ye tä profecía Bibliabätä mike nemen bare ño yebätä nikwe blitadre ngwane, töbikadre kwin käne. ¿Ñobätä? Ñan ñobätä aune ni ñan töbikai kwin käne ngwane, nita dre niere yebiti ni raba konkrekasion ñäkebiti. Ñodre, nitre gobranka kä jökräbiti tibien tä blite kukweta nakainkä käbiti tibien yebätä aune raba ükete ño ne kwe kä titibe aune kä jäme rabadre bare yebätä ngwane, yebiti profecía tä 1 Tesalonicenses 5:3 yete ye mike nemen bare o ño yebätä nikwe ñan töbikadre. Ñakare aune bäri kwin juta Ngöbökwe tä kukwe mrä mike gare ye ererebätä nikwe blitadre.Ye köböire nikwe konkrekasion dimikai nemen keteitibe aune kukwe jökrä rükaibti ni jökrä ie (1 Cor. 1:10; 4:6).

6. ¿2 Pedro 3:11-13 yebätä dre nemen gare nie?

⁶ (Ñäkädre 2 Pedro 3:11-13 yebätä). Apóstol Pedro kukwe niebare ye tä ni dimike töbike debe näre nita ñäke profecía Bibliabätä yebätä ngwane. Aune tä ni dimike Ngöbö köböi ‘ngibiare ngäbiti’ kisere. ¿Ñobätä nita nuainne? “Köbö mdente amne ñänä okwä nuäi” Armagedón rükai ye ñan ai ni tö mikai gare jai. Ñakare aune, kä nebera braibe nie yebätä ni tö nünain bäri deme ni Dänkien aibe kräke (Mat. 24:36; Luc. 12:40). Kukwe jökrä nuainta nikwe yebiti ni tö ja ngwain kwin aune kukwe jökrä ye nita nuainne, ñan ñobätä aune Jehová tare nikwe. Akwa yekäre ni rabadre ja ngübarebiti.

¿NIKWE JA NGIBIADREBITI YE DRE GÄRÄTÄ?

7. ¿Nikwe ja ngibiadrebiti au yekäre dre nuaindre? (Lucas 21:34).

⁷ Kukwe tä nemen bare käbiti tibien ye ñan aibebätä nitre ja tötikaka Jesukwe käkwe ja töi mikadre. Ñakare aune, niaratre käkwe ja ngibiadrebiti au niebare ie Jesukwe. Kukwe nieta ne metre nemen gare nie Lucas 21:34 tä mäträre nibätä yebiti (ñäkädrebätä). “Munkwe ja ngibia au” niebare Jesukwe yebätä töbike. ¿Ja ngibiadre au ye dre gärätä? Kukwe meden meden raba ja keta Jehovabe juen ngwarbe nikän ye jökräbätä nikwe ja ngibiadrebiti aune ja töi mikadre ñaka nuainne. Ye köböire, käre ni tädi Ngöbö tarere (Prov. 22:3; Jud. 20, 21).

8. ¿Pablokwe dre niebare mäträkäre nitre kristianobätä?

⁸ Nitre kristiano rabadre ja ngibiarebiti mikani gare apóstol Pablokwe. Ñodre, kukwe tikani krörö kwe nitre kristiano Éfeso ie: “Munkwe töbika kuin ja käne, käkwe ja ngibia. Erere arato, munkwe ñan nüna ni diän diän töi ñakare kwrere, akwa munkwe nüna ni töbtä kwrere” (Efes. 5:15, 16). Satana tä ja di ngwen kukwe jökräbiti ni nitakäre tibien kukwe ja üairebiti. Ye medenbätä, Biblia tä mäträre nibätä krörö: “Ngöbö tö mun tuai nüne ño” nieta kwe ye erere nikwe nünandre, ye köböire Satana tä ja mike ni rüere yebätä kä rükai nie (Efes. 5:17).

9. ¿Nikwe nünandre ño ie Jehová tö ye ñokänti raba nemen gare nie?

⁹ Kukwe meden meden raba ja keta nikwe Jehovabe juen ngwarbe nikän ye ñaka tä niebare metre ta jatäri Bibliabätä. Käre kukwe tä nemen diandre jai nie, akwa kukwe yebätä kukwe mika ñaka gare metre ta Bibliabätä. Kukwe diankäre nuaindre kwin jai, Ngöbö tö ni tuai nüne ño ye nikwe mikadre gare jai. ¿Rabadre bare nie yekäre dre nuaindre? Ja tötikadre aune töbikadretari käre Ngöbö Kukwei yebätä. Jehová töita ño ni kräke ye rabai gare bäri nie aune nikwe ja di ngwain ja ngwen Kristo töita ño ye erere ngwane, ni jatai ja ngwen bäri töbätä. Kukwe keteitibätä dre nuaindre mika ñaka gare metre ta Bibliabätä ye ngwane, nikwe dre nuain ye rabaira gare nie (1 Cor. 2:14-16). Kukwe ruäre käme ye abokän ni raba gain jötrö ngwarbe gare nie, akwa mada abokän ga ñaka raba jötrö.

10. ¿Kukwe meden medenbätä ni rabadre ja ngübarebiti?

¹⁰ Kukwe käme ñaka nuaindre abokän ne: nitre mada ie kukwe mane mane niedre töi mikakäre jabätä, jondron kwetradre o ñadre krubäte, ñäkädre tare nitre madai, jadaka känti ni nuainta tare aune ni üai bütiere ye ñaka tuadre (Sal. 101:3). Nita ja kete Jehovabe ye Satana tä kukwe ño erere nuainne juankäre ngwarbe (1 Ped. 5:8). Nikwe ñaka ja ngübadrebiti ngwane, kukwe käme ne erere raba kite nirien ni töite aune ni brukwäte. Ñodre, ni töi raba kite jondron ni madakwe ye tuai jakwe, ñaka ja ngwen kwin aune ni töta nemen jondron tuai krubäte jakwe, arato bätä ngwen, bike kri aune ni brukwä tädre käre ni mada kräke (Gál. 5:19-21, TNM). Kukwe ne ererebätä ni ñan ja ngübadrebiti ngwane, kenanbe ne ñan raba ni töi mike käme raba ruin nie. Akwa nikwe ñaka diandrekä o ja ngübadrebiti biarebebätä ngwane, raba nirien jankunu kri mu käme aune jondron kämikata kwe ye erere ni brukwäte (Sant. 1:14, 15).

11. ¿Kukwe käme meden ga ñan raba aune ñobätä nikwe ja ngübadrebitibätä?

¹¹ Kukwe käme ni ñan raba gain jötrö ngwarbe ye ani töbike: Ja ketata ni ja ngwanka käme ben. Ni iti sribikä nibe ñaka testiko yekwe töbikadre kwin nitre testikobätä yekäre nita ja töi mike kwin kräke aune dimike ruäre. Ni raba nübaire mröre jabe ruäre ngwane biti ni töi raba kite nuainbätä käre. Ye ngwane, ni sribikä nibe ye tädre blite kukwe käme ye aibebätä ni okwäbiti. Kenanbe, ni ñan töta nemen kukwe nuabätä aune tä nemen tuin blo nie. Akwa, ni tädre kukwe nuin jankunu ngwane, kukwe blo ye ñaka jataira tuin käme nie. Aune köböiti ni sribikä ne ni nübaidre mröre jabe sribi bitikäre. Bätärekä ni jatai ja töi mike niara erere. ¿Kä näin nuäi ta ja ngwankäre niara erere? Ni testiko tö ja ngwain kwin ni jökrä ben, akwa nita ja kete nirebe ye erere ni jatai ja ngwen ye nikwe ngwandre törö jai (1 Cor. 15:33). Nikwe ja ngübadrebiti au niebare Jesukwe ye nikwe mikadi täte ngwane, nitre ñaka Kukwe Ngöbökwe aune Jehová mike ütiäte jai yebe nikwe ñaka kä diandrekä krubäte jai ja ketakäre ben (2 Cor. 6:15). Aune ye köböire kukwe blo ye jutuadi nie aune nikwe ja ngübaibitibätä.

NIKWE ÑAKA KÄ JUANDRE NGWARBE TA

12. ¿Kä krüte jämi nüke ye känenkri nitre ja tötikaka Jesukwe käkwe dre nuaindre?

¹² ¿Nitre ja tötikaka Jesukwe ye rabai kwekebe nememe kä krütai ye rükai ngwane? Ñakare, ñobätä ñan aune sribi kri mikani kisete. Ye abokän, rabadre kukwe kwin Gobran Ngöbökwe ye mike gare Jerusalente, Judeate, kä Samariate aune kä jökräbiti tibien (Hech. 1:6-8). Sribi kri mikani kisete, yebätä niaratrekwe nuaindre ja di tätebiti aune töi kwatibebiti. Yekäre ñaka kä juandre ngwarbe ta kwetre.

13. ¿Dre nuaindre ñaka kä juankäre ngwarbe ta? (Colosenses 4:5).

¹³ (Ñäkädre Colosenses 4:5 yebätä). ¿Ja ngübadrebiti au yekäre dre nuaindre? Nita kä juen ngwarbe ta o ño ye mikadre gare jai. Eclesiastés 9:11 tä niere erere “kukwe ngüba ñaka jire ye tä nakainkä ni jökräbätä”. Aune jötrö ngwarbe ja nire raba nete nikän.

14, 15. ¿Ni raba dre ütiäte nuainne ñaka kä juankäre ngwarbe ta? (Hebreos 6:11, 12). (Üai mikadre ñärärä arato).

¹⁴ Nikwe ñaka kä gadrete ngwarbe, nikwe Jehová töi nuaindre aune ja di ngwandre ja kete bäri kwin ben (Juan 14:21). Kukwebiti Biblia tä mäträre nibätä ne nikwe mikadre täte. Tä niere: “Munkwe nünanka dite jabtä käre köbö kwatirekwatire. Mdakäre abko, sribi ni Dänkienkwe, yebtä munkwe ja kita ja di ngöibti” (1 Cor. 15:58). Nikwe ne erere nuaindi ye köböire ni krütai o kä gobrainta Satanakwe ne juain ngwarbe ngwane, nikwe sribidre bäri Jehová kräke näre akwa nikwe ñaka nuainbare ye nikwe ñaka nütüdi jire (Mat. 24:13; Rom. 14:8).

¹⁵ Jesukwe käbämikani erere, täbe ni ja tötikaka kwe ye jie ngwen kukwe drie yebätä kä jökräbiti tibien. Tä nuainne juta Jehovakwe yebiti aune kukwe kwin Gobran Ngöbökwebätä driedre ño ye tä driere nie aune nita dre ribere jai ye tä bien nie arato (Mat. 28:18-20). Akwa kukwe drie aune nitre tötikadre ye nikwe mikadre nuaindre käne jai aune ni rabadre ja ngwen mokre nememe Jehovakwe kukwe käme kä nebätä ye ngwain krüte ngwane. Kukwe nieta Hebreos 6:11, 12 ne erere nikwe nuaindi ngwane, tödekara nikwe ye täi dite nememe kä mrä ngwane (ñäkädrebätä).

16. ¿Ni töita kwatibe dre nuainbätä?

¹⁶ Ñongwane Jehovakwe kä gobrainta Satanakwe ne gaite ye niena gare ie. Köbö ye rükai ngwane profecía tä mikani Bibliabätä ye mikai nemen bare kwe. Kä gobrainta satanakwe juain ngwarbe tä nemen tuin ngrötöte nie ruäre ngwane, akwa “¡ñaka rükai kä raire te!” (Hab. 2:3). Akwa, köbö ye rükadre känenkri ni tö ja töi mikai kwatibe kukwe nieta Miqueas 7:7 ye mikai täte: “Akwa ti abokän käre täi juto Jehovakwe dre nuaindi yebätä. Ngöbö ti diantarikä ye tikwe ngübai ngäbiti”.