Ño tö ngwandre bäri kä bä nuäre käbämikata yei

1, 2. Nita kä bä nuäre ngübare ngäbiti ye ngwane, ¿nikwe dre nuaindre?

KÄ KÄME te nita nüne ne Jehová köböra kwite kä bä nuäre ye erere, känti kukwe ükaite metre, yebätä nita debe bien krubäte (2 Ped. 3:13). Kä bä nuäre käbämikata ne rabai bare ñongwane ye ñan gare metre nie. Akwa kukweta nemen bare käbiti tibien ye tä mike gare metre nie ye köböra nemen bare (Mat. 24:32-34, 36; Hech. 1:7).

² Ni niena kirabe kukwebätä, akwa ni jökrä rabadre tödeka nikwe ye mike dite. ¿Ñobätä? Ñobätä ñan aune nirekwe tödeka tä dite, akwa raba di nekä. Ye medenbätä, tödeka ñaka dite nikwe ngwane, kukwe ne raba nemen bare niebare apóstol Pablokwe: ‘Kukwe kämekäme Ngöbö rüere te nita nibrente jötrö ngwarbe’ (Heb. 12:1). Ne erere ñan rabadre bare nibätä yekäre nikwe kä mrä köböra nüke ye kukwe meden meden tä mike gare yebätä ja kitadre jankunu ne kwe tödeka nikwe tädre dite (Heb. 11:1).

3. ¿Dre rabai gare nie kukwe ja tötikara nekänti?

³ Kukwe ja tötikara nekänti kukwe ketamäbätä ni bike ja tötike abokän käkwe ni dimikai tö ngwen bäri kä bä nuäre käbämikata ye ie: 1) töbikadretari ni kökanintari yebätä, 2) töbikadre Jehová die yebätä aune 3) ja töi mikadre kwatibe kukwe ja üaire nuainbätä. Biti, Jehovakwe kukwe niebare Habacuc ie abokän tä tödeka nikwe mike dite ye nikwe mikai gare jai. Akwa kena, ñobätä tödeka nikwe tädre dite kä bä nuäre käbämikata ja känenkäre Jehovakwe yebätä, ani mike gare jai.

¿TÖDEKA NIKWE TÄDRE DITE YE ÑOBÄTÄ NITA RIBERE?

4. ¿Kukwe meden dianta nuaindre jai abokän känti tödeka nikwe tädre dite nita ribere?

⁴ Köbö kwatire kwatire känti nita kukwe den nuaindre jai abokän känti tödeka nikwe tädre dite ye nita ribere jai. Kukwe ruäre känti nita kukwe den jai ye abokän ja ketamuko yebätä, ja näkwitata drebätä, ja tötika kwela krite, ja mikata gure yebätä, monsotrebätä aune sribibätä. Kukwe ne erere ngwandretari jai: “¿Tita kukwe den jai ye tä dre bämike tibätä? ¿Kä käme te nita nüne ne jötrö ngwarbe aune Jehová köböra kwite kä bä nuäre ye erere tuin tie o nita nüne ño kä nengwane ye aibe nitre kwati tä nütüre ye erere ti töita?” (Mat. 6:19, 20; Luc. 12:16-21). Kukwe käbämikata ja känenkäre ye ie nita tö ngwen yebätä nikwe tödeka nikwe mikai dite jankunu ye ngwane nikwe kukwe kwin diain nuaindre jai.

5, 6. ¿Kukwe tare ben nita ja tuin ye ngwane tödeka nikwe tädre dite ye ñobätä nita ribere jai? Mä raba bämike ño keteiti

⁵ Kukwe ruäre känti ni nuateta abokän känti tödeka nikwe tädre dite ye nita ribere jai. Ñodre, ja mikata ni rüere, bren tare tä nemen nibätä o kukwe mada tare abokän tä ni mike ene ja kisete yebätä. Kenanbe, ni töita kwatibe ja ngwanbätä metre. Akwa kä näin ta ngwane kukwe ben nita ja tuin ye nuadi raire, tä nemen bare erere, tödeka nikwe ye raba kite di nekä. Ye ngwane, bärira jire tödeka nikwe tädre dite ja tuakäre kukwe tare yebe aune sribikäre jankunu kä jutobiti Jehová kräke ye nita ribere (Rom. 12:12; 1 Ped. 1:6, 7).

⁶ Ni nuateta kukwe tare yebiti ngwane, kä bä nuäre käbämikata ye Jehová ñaka mikai nemen bare ye ni raba kite nütüre. ¿Nita töbike kore ye tä bämike tödeka nikwe ñaka dite? Ñakare. Ani bämike keteiti. Kä ñüre tibo tä nuin raire ye ngwane, kä moren ye ñaka jatai ni raba kite nütüre. Akwa käre käta nementa moren. Ye erere, nita di nekä ngwane kä bä nuäre käbämikata ye ñaka mikai nemen bare nita kite nemen nütüre. Akwa, tödeka nikwe tädre dite ngwane, Jehovata kukwe käbämike ye mikai nemen bare kwe ye gare metre nie (Sal. 94:3, 14, 15; Heb. 6:17-19). Nita tö ngwen ye käkwe ni dimikai käre Jehová mike täte.

7. ¿Nitre tä töbike ño abokänbätä nikwe ja ngübadrebiti?

⁷ Nita kukwe driere ye ngwane tödeka nikwe tädre dite ye nita ribere jai. Kä bä nuärebätä nita blite nitre ben ye ngwane, kukwe ne bä nuäre krubäte ñan raba nemen bare tätre nütüre (Mat. 24:14; Ezeq. 33:32). Akwa, nitre ñaka kukwe ne mike era jai ye erere ni ñaka tö ja töi mikai. Ne ñan rabadre bare nibätä yekäre käre nikwe tödeka nikwe ye mikadre dite jankunu. Kukwe ketamä raba ni dimike ye ani mike gare jai.

TÖBIKADRETARI NI KÖKANINTARI YEBÄTÄ

8, 9. ¿Nita töbiketari ni kökanintari yebätä ngwane, ñobätä tä tödeka nikwe mike bäri dite?

⁸ Kukwe keteitibiti nikwe tödeka nikwe mikadre bäri dite ye abokän nikwe töbikadretari ni kökanintari yebätä. Kukwe käbämikani Jehovakwe ye mikai nemen bare kwe ni kökanintari yebiti bämikani kwe. Dre nuainbare ni kökatarikäre aune ñobätä Jehová nuainbare yebätä töbikadretari ye ütiäte krubäte. Ne köböire, tödeka nikwe jatai nirien jankunu aune kä ne kwitai bä nuäre, känti nikwe nünain kärekäre ye ie tö ngwain. ¿Ñobätä nita ne niere?

⁹ Ni kökatarikäre Jehovakwe dre nuainbare yebätä ani töbike. Jehová nämäne juto monso mubai nämäne ja kete kwin ben ye juen kä tibienbätä därere ni kä tibienbätä erere akwa töi metre. Jesús nämäne kä tibienbätä ngwane, ja tare nikabare krubäte kwe aune murie ketani tare krubäte. Gare metre nie, Jehovakwe kukwe ñan nuäre nuainbare ni kökatarikäre. Niara ye ni tarekä krubäte. Nikwe nünandre jötrö ngwarbe ye ñan aikäre monso kwe ye tuanimetre ja tare nike kwe (Juan 3:16 TNM; 1 Ped. 1:18, 19, TNM). Nikwe nünandre kärekäre kä bä nuäre yete yekäre Jehovakwe kukwe ñan nuäre nuainbare ni kökatarikäre.

TÖBIKADRE NGÖBÖ DIE KRI YEBÄTÄ

10. ¿Jehová raba dre nuainne mikata gare Efesios 3:20 yekwe?

¹⁰ Kukwe madabiti ni raba tödeka nikwe mike dite ye abokän nikwe töbikadre Jehová dite krubäte yebätä. Metrere, Jehová die tärä dre dre käbämikata kwe ye mikakäre nemen bare. Nikwe nünandre käre kä bä nuäre te ye ñan raba nemen bare ye nitre kä tibienbätä raba nemen nütüre. Akwa käre Jehovata kukwe käbämike ye ñan rabai bare ye tä nemen ruin nie. Metrere, Jehová dite krubäte (Job 42:2; Mar. 10:27). Ye medenbätä, Jehovakwe kukwe ñan tuabare nuaindi, ¿ñan ererea? (Ñäkädre Efesios 3:20 yebätä).

11. Kukwe ñan tuabare nuainbare Jehovakwe ye mä raba mike gare keteiti (recuadro “Kukwe ñan tuabare käbämikani Jehovakwe ye mikani nemen bare kwe” ye mikadre ñärärä).

¹¹ Kukwe ñan raba nemen bare kwrere Jehovakwe käbämikani nitre kira ie yebätä ani töbike. Abrahán aune Sara namanina umbre niaratre monsoi rabadi ye Jehovakwe käbämikani ie (Gén. 17:15-17). Aune Jehovakwe niebare Abrahán ie niara mräkätre ye ie niarakwe kä Canaán ye biain. Akwa kä kwati te Abrahán mräkätre, nitre israelita, nämäne klabore Egipto. Ye medenbätä, kukwe ye ñan rabai bare namani ruin ietre, akwa namani bare. Ye bitikäre, kä nikani kwati ta, Elisabet namanina umbre ye monsoi rabai ye Jehová käbämikani ie. Aune María nämäne kaibe ye käkwe Monso Ngöbökwe ngübadi ye käbämikani ie. kä nikani kabre ta kukwe käbämikani kwe jardín Edente ye mikakäre nemen bare (Gén. 3:15).

12. ¿Josué 23:14 aune Isaías 55:10, 11 ye tä dre mike gare nie Jehová die yebätä?

¹² Jehovakwe kukwe käbämikani ye mikani nemen täte kwe aune nuainbare ño kwe yebätä nikwe töbikadre ngwane, niara dite krubäte tä nemen gare nie. Kukwe jökrä ne käkwe tödeka nikwe mikadi bäri dite aune tö ngwen kwatibe kä mrä käbämikata ie (ñäkädre Josué 23:14 b; Isaías 55:10, 11 yebätä).c Ye köböire, rabai bäri nuäre ni kräke nitre mada dimikakäre kä bä nuäre käbämikata Jehovakwe ye ñaka bämikata jerekäbe ja töite ye mike gare ietre. Ye medenbätä, kä kwinta mrä aune kä tibien mrä yebätä Jehovakwe kukwe ne niebare: “Kukwe ne abko kukwe era metre, abtä ni jökrä rabadre tödeke bti” (Apoc. 21:1, 5).

JA TÖI MIKADRE KWATIBE KUKWE JA ÜAIRE NUAINBÄTÄ

13. ¿Gätä ye tä tödeka nikwe mike ño bäri dite?

¹³ Kukwe mada raba tödeka nikwe mike dite ye abokän ja töi mikadre kwatibe kukwe ja üaire yebätä. Ñodre, gätä ye tä ni dimike krubäte yebätä ani töbike. Anna,d tä sribire köbö täte Jehová kräke tä niere: “Jä doboko kitata mrente ru ketatekäre ye kwrere gätä ye tä tödeka tikwe mike dite. Ni kukwe kädriekä ye ñan dirikä kwin o ñan kukwe mrä niere yebiti ta, käre kukwe mrä tä nemen gare tie abokän tä ti dimike kukwe metre ruäre ye mike nüke gare bäri kwin jai. Ye köböire, tödeka tikwe tä nemen bäri dite”. Blitata gätäte ye tä tödeka nikwe mike dite arato (Rom. 1:11, 12; 10:17).

14. ¿Kukwe drie yebiti tödeka nikwe tä nemen ño dite?

¹⁴ Kukwe drie yebiti tödeka nikwe tä nemen dite (Heb. 10:23). Barbara, biti kä niena 70 ni testiko Jehovakwe erere, tä niere: “Kukwe drie ye käre tä tödeka tikwe mike dite. Tita blite bäri Jehová aune kukwe käbämikata kwe yebätä ngwane, tödeka tikwe tä nemen bäri dite gare tie”.

15. ¿Nita ja tötike kaibe ye tä tödeka nikwe mike ño dite? (Üai mikadre ñärärä).

¹⁵ Kukwe mada raba tödeka nikwe mike dite ye abokän ja tötika kaibe. Susan tä kukwe ükete jai käta dimike krubäte. Niara tä niere: “Bämänte tita ja tötike Ni Mikaka Mokre bätä, gätä ja känenkäre ye kräke. Luninte bätä martete tita ja tötike gätä bämän ngrabare ye kräke. Köbö mada tä nemen yete tita ja kite proyecto ja tötika kaibe yebätä”. Susan käkwe kukwe ükaninte jai ne mikata täte kwe ye köböire tödeka kwe tä bäri dite. Irene tä sribire kä kabre te central mundial, ye tä ja tötike profecía Bibliakwebätä ye tä tödeka kwe mike bäri dite. Niara tä niere: “Profecía keteitire keteitire tä nemen bare metre ye tä ti töi mike ñan krütare”.e

“RABAI BARE METRE”

16. ¿Jehovakwe kukwe niebare Habacuc ie ye ni kräke arato ye ñobätä gare nie? (Hebreos 10:36, 37).

¹⁶ Kä mrä rükadre ye nitre Jehová mikaka täte tä ngübare mekerabe. Akwa tä ngrötöte raba nemen ruin nie. Nitre Jehová mikaka täte ye ie ja ruin ño ye nüke gare ie. Ye medenbätä, kukwe ne niebare kwe Habacuc ie: “Ñobätä ñan aune kukwe ye tä kä kitani ye kräke aune tä nökrö jötrö ngwarbe ja ken aune kukwe ye ñaka ngwarbe. Rabadre ngrötöte akwa, ¡mäkwe ngüba jankunu! Ñobätä ñan aune ye rabai bare metre. ¡Ñaka rükai kä raire te!” (Hab. 2:3). ¿Kukwe niebare Habacuc ie ye niara aibe kräke o tä ni dimike kä nengwane? Jehovakwe apóstol Pablo töi mikani kukwe ne niere nitre kristiano tä kä bä nuäre ngübare ngäbiti ye ie (ñäkädre Hebreos 10:36, 37 yebätä). Jehovata kukwe käbämike yebätä niarata ngrötöte ruin nie ngwane, nikwe kukwe ne ngwandre törö jai: kukwe käbämikata kwe ye “rabai bare metre. ¡Ñaka rükai kä raire te!”.

17. ¿Jehovakwe mäträbare Habacucbätä ye meri testiko iti käkwe mikani ño täte?

¹⁷ Kukwe ngübadre niebare Jehovakwe ye nitre kristiano kwati tä ngübare kä kwati te. Ñodre, meri testiko kädekata Louise, käkwe sribi Jehovakrä kömikani kä 1939 tä niere: “Kä ñan rükai 18 tibiti ñobätä ñan aune Armagedón ye rükai ye ti nämä nütüre. Akwa, kukwe ye erere ñaka namani bare. Nitre kädekata tikwe kukwe ngübaka bätärekä, yebätä tita ñäke ye tä tödeka tikwe mike dite. Ñodre, Noé, Abrahán, José aune nitre mada ie kukwe käbämikani ye ngübabare bätärekä kwetre köböire kukwe käbämikani ietre ye namani kwetre yebätä tita ñäke. Ye tä ti dimike krubäte. Kukwe ngübadre bätärekä ye tä ti aune nitre mada dimike kä bä nuäre nebera ja ken ye ngübare ngäbiti bätärekä”. Nitre kwati tä sribire mekerabe Jehová kräke ye tä töbike ne erere ye gare metre nie.

18. ¿Jondron sribebare Jehovakwe ye tä ni dimike tö ngwen ño bäri kä bä nuäre käbämikata Jehovakwe yei?

¹⁸ Kä mrä ye jämi nüke, akwa nikwe töbikadre kukwe ruäre tuin nie yebätä. Ñodre, muke, jondron nire, kri, ni nire yebätä. Jondron ne ñan nämäne kenanbe, akwa ni ñaka raba niere jondron ne ñan metre. Ñakare aune, jondron ne metre ñobätä ñan aune Jehovakwe sribebare (Gén. 1:1, 26, 27). Jehová kä mrä sribedi ye tä käbämike nie. Kukwe käbämikata kwe ye käre tä mike nemen bare. Ye mikadi nemen bare kwe ngwane, nikwe nünandi kwin aune kärekäre. Kä mrä käbämikata Jehovakwe nie ye rükai ngwane, rabai metre ni kräke jondron tuin nie ja bäre kä nengwane ye erere (Is. 65:17; Apoc. 21:3, 4).

19. ¿Ni raba tödeka jakwe mike ño dite?

¹⁹ Kä bä nuäre jämi nüke ye känenkri nikwe ja di ngwandre tödeka jakwe mike dite. Ni kökanintari yebätä nikwe töbikadretari aune debe biandre. Jehová dite krubäte yebätä nikwe töbikadre aune ja töi mikadre kwatibe kukwe ja üaire nuainbätä. Ye erere nuaindi nikwe ngwane, “ni mda mda käta tödeke kwatibe Ngöböbti, käta jändrän köböi mikani ie Ngöbökwe ye ngibiare bätärekä jae abti tä nüke kisete, ye kwrere” rabai nikwe (Heb. 6:11, 12; Rom. 5:5).