Nitre tä kukwe ngwentari

Jesús därebare Belén ngwane, ¿ñobätä José aune María namani yete aune ñaka nikaninta Nazaret?

Metrere kukwe ye mika ñan gare metre ta Bibliabätä, akwa kukwe ruäre namani bare kädekateta Bibliabätä abokänbätä namani yete raba ruin nie.

María rabai murore aune monso rabai kwe niebare angel itikwe ie ngwane, niara aune José nämäne nüne Nazaret kä Galilea (Luc. 1:26-31; 2:4). Bitikäre kä nikani ta ngwane kä mikaninkä kwe Egipto aune nikaninta Nazaret. Jesús ririabare kä yekänti yebätä niara nazarebo nie raba (Mat. 2:19-23). Yebätä nita blite kä Nazaretbätä ngwane, José, María aune Jesús tä nüke ni töite.

Kukwe ütiäte gare nie Mariabätä. Niara ie kä judá ye nämäne gare kwin. ¿Ñokänti gare nie? Ñobätä ñan aune niara mräkätre nämäne nüne kä yekänti. Elisabet, sacerdote Zacarías muko, Juan Ni Ngökaka Ñöte meye ye nämäne nüne kä yekänti, yebätä nie raba (Luc. 1:5, 9, 13, 36). María jananbare Elisabet känti, namani yete sö krämä biti jataninta Nazaret (Luc. 1:39, 40, 56).

Ye bitikäre nitre jökrä rabadre ja registrare ye mikani gare kä Nazaret, yekäre José nämäne yete nikani Belén, juta David. Kä yekänti Mesías däredi niebare (Luc. 2:3, 4; 1 Sam. 17:15; 20:6; Miq. 5:2). Jesús därebare yete. Ye medenbätä, María rabadre kiteta monso chi därebe ben kä Nazaret, José ñaka ribebare ie. Namanintre Belén ye nemenkä 9 kilómetros Jerusalén ie ken. Namani kwin kräketre, ñobätä ñan aune jondron kukwadre niebare leibätä erere niaratre rabadre nuainne, templo nämäne känime yebätä (Lev. 12:2, 6-8; Luc. 2:22-24).

María monsoi rabai gobrane “kürä Davidkwe” yete niebare angelkwe María ie ye ngwandre törö jai. Kukwe niebare ietre ye käkwe niaratre töi mikani ñan krütare yebätä namanintre juta David yete raba ruin nie (Luc. 1:32, 33; 2:11, 17). Niaratre namani yete aune Ngöbökwe kukwe mikadre gare bäri ietre ye namani ngübare raba ruin nie.

Niaratre namanina nüne kä Belén yete kwrere bä namani. Ñaka gare metre ta nie, akwa nitre astrólogo jananbare känti ngwane, Jesús namanina balente aune niaratrekwe ju namanina jeñe yete (Mat. 2:11). Aisete rikadreta Nazaret yete näre, namani nüne Belén kä ruäre te.

Ngäbäkre kia därebe nemebe kä kubu ie namani nüne Belén aune Belén kenta temen abokän Herodekwe kä mikamana jökrä (Mat. 2:16). Kukwe tare rabai bare mikani gare angelkwe José ie, yebätä niaratre ngitiani Jesube Egipto. Yete namani nüne nememe Herodes krütani. Biti nikaninta mräkätre ngwena Nazaret. Niaratre ñaka nikaninta Belén. Ñobätä ñan aune Arquelao, Herodes ngobo, ni käme krubäte nämäne gobrane Judea. Ne madakäre, angelkwe José mikanina mokre. Nazaret yete Jesús tädre kwin aune rabadre nirien kwin ja üairebiti yekäre (Mat. 2:19-22; 13:55; Luc. 2:39, 52).

Jesús ja nire biani ne kwe nire käkwe niara mikadre täte ruäre rabadre niken kä kwinbiti ye känenkri José krütanina bä raba. Gaikröta kä tibienbätä ngwane, José gaikröta kä tibienbätä. Ye ngwane, ni raba ngwentari ie ñobätä niarakwe ja töi mikani nemen Belén Jesús därebare yebitikäre.