Ja taredre bäri

1. ¿Mä nämäne ja tötike Bibliabätä ngwane dre namani gare mäi?

¿KUKWE namani gare krubäte Bibliabätä mäi ñan ererea? Ngöbö kä Jehová namani gare mäi, kukwe ne käkwe mä töi mikani niä ñan ererea. Arato kä ñukwäre te Jehovata ni ngwen ja tare nike nieta ye ñaka metre namani gare mäi raba ruin nunye. Ne madakäre, ja mräkätre krütanina rükaita nire aune nünain kwe kä bä nuäre yete namani gare mäi. Yekwe mä töi mikani jäme, ¿ñan ererea?

2. ¿Kukwe namani gare Bibliabätä mäi aune mä nämä nirien jankunu ye mäkwe bämikani ño? (Efesios 5:1, 2).

² Mä nämäne ja tötike Ngöbö kukweta ngwane, mä jatani niara tarere bäri aune mä namani niara tarere ye köböire kukwe nämäne nemen gare mäi ye mä nämäne mike täte. Mä nämene kukwe den nuaindre jai ngwane mä nämene ja jie ngwamana kukwe Bibliabätä ie. Ne madakäre, Jehovata töbike ño ye erere mä namani kukwe mike tuin jai. Monso kia tä ja kite rünbätä ye erere mä jatani ja ngwen ni ruin ni tarekä Jehová ye erere (ñäkädre Efesios 5:1, 2; yebätä).b

3. ¿Dre ngwandretari jai?

³ Ni raba kukwe ne ngwentari jai: “¿Tikwe ja ngökaba ñöte nükebe nengwane tita Jehová tarere bäri? ¿Nita kukwe nuainne aune töbike yebiti Jehová töi erere nita ja ngwen?”. Ni ñan ja mräkätre tarere käne erere ngwane, ñaka ja di ngwandre nekä. Kukwe ye erere namani bare nitre kristiano siklo kena bätä. Akwa niaratre ñaka raba ja töi kwite Jesús ñan nütübare jire ye erere ni mikai tuin kwe jai arato. (Apoc. 2:4, 7). Kukwe metre namani gare nie ngwane nikwe tarebare ye medenbätä ni raba tarereta ye gare ie.

4. ¿Dre rabai gare nie kukwe ja tötikara nekänti?

⁴ Jehová aune ja mräkätre taredre bäri yekäre dre nuaindre ye rabadi gare nie kukwe ja tötikara ne känti. Ketebu kukwe kwin nuaindre ye köböire kukwe kwin rabai bare ni kräke aune ja mräkätre mada kräke ye rabadi gare nie.

JA DI NGWANDRE JEHOVÁ TARERE BÄRI

5, 6. a) ¿Dre ben Pablo ja tuani kukwe driebätä? b) ¿Dre niara töi mikani Jehová mike täte jankunu?

⁵ Apóstol Pablo nämäne kukwe driere ye käi ngwani juto kwe jabätä, akwa ja tuani kukwe keta kabre ben kwe. Bä kabre, dikakabare kwe mente aune ji ñaka kwinbiti. Nämäne dikekä ye ngwane ‘ñö krikri jite käkwe niara rötökäbäre bäre bäre aune nitre gokä käkwe niara rätäninkä bäre bäre ji ngrabare’. Ne madakäre nitre nämäne ja mike niara rüere yekwe nuainbare tare (2 Cor. 11:23-27). Bätuakäre, niara namani nitre kristiano mada dimike ye ñaka mika nämäne ütiäte kwetre jai (2 Cor. 10:10; Filip. 4:15).

⁶ ¿Dre Pablo dimikani Jehová mike täte jankunu? Jehová töi kwin keta kabre namani gare Pablo ie Ngöbö kukwei yebätä. Aune nämäne nüne ño yebiti niara nämäne tare krubäte Jehovakwe ye nämäne gare ie (Rom. 8:38, 39; Efes. 2:4, 5). Pablo jatani Jehová tarere bäri bämikani kwe nämäne ‘ni jen Ngöbökwe die mike aune nämäne nuainne jankunu yebiti’ (Heb. 6:10).

7. ¿Jehová tarekäre bäri dre ni dimikai?

⁷ Ngöbö tarekäre bäri nikwe ja kitadre bökän niara kukweibätä, nita ñäke Bibliabätä ngwane, kukwe ye tä dre driere Jehovabätä nie ye mikadre ñärärä. Kukwe ne kwrere ni raba ngwentari jai: “¿Ti tare Jehovakwe ye tä bämike ño tie versikulo nebiti? ¿Kukwe nemen gare tie ne tä ti dimike ño Jehová tarere bäri?”.

8. ¿Orasion ye tä dimike ño Ngöbö tarere bäri?

⁸ Jehová tarekäre bäri, kukwe keteiti raba ni dimike ye abokän ja driedre ie orasionte köbö kwatire kwatire (Sal. 25:4, 5). Ye erere nikwe nuaindi ngwane Jehovakwe orasion nikwe kukwe nuai aune mikai nemen bare kwe (1 Juan 3:21, 22). Khanh,c meri testiko nünanka Asia, tä kukwe ne niere: “Kenanbe kukwe nämä nemen gare tie Jehovabätä ye aibebätä ti nämä tarere. Akwa niara nämä orasion tikwe kukwe nuin ño ye nämä tuin tie ngwane ti jataba tarere bäri, ye köböire dre tuin kwin ie ye ti töi jataba nuainbätä bäri”.

JA DI NGWANDRE NITRE MADA TARERE BÄRI

9. ¿Timoteo jatani ja mräkätre tarere bäri ye bämikani ño kwe?

⁹ Pablo ja mikani kristiano ye käi nikani krire kwati ta ngwane Timoteo namani gare ie. Timoteo ye monso bati ja ngwen kwin krubäte, Jehová nämä tare krubäte kwe, aune nämäne nitre mada tarere. Kä nikani ruäre tä ngwane Pablo kukwe ne niebare niarabätä nitre Filipenses ie: “Tita mun tarere metre, ye kwrere Timoteo aibe käta mun tarere, aisete tikwe niara juandi mun känti mun die mikakäre” (Filip. 2:20). Timoteo namani kukwe ükete kwin, kukwe kä driere bängrabe ye ñan ai kädekaninte Pablokwe metrere niara nämene ja mräkätre tarere yebätä blitabare kwe. Ja mräkätre tö nämäne Timoteo tuabätä ye medenbätä ora nuäi ngökaka nämäne niken gwäkäre ngwane niara ka ngäbiti nämäne kä jutobiti (1 Cor. 4:17).

10. ¿Anna aune muko kwe nämäne ja mräkätre tarere bämikani ño kwetre?

¹⁰ Niara tä ja di ngwen ja mräkätre dimikakäre (Heb. 13:16). ¿Annabätä nikwe blitabare kwe ja tötikara käne bätä ye törö mäi? Murie matani ja dibiti ñü ben minimini ye bitikäre niaratre nikani ja mräkätre testiko tuinbiti ye ngwane ju dokwä ngidianinte bätä okwä namani. Ye medenbätä, dän bätäninte ñan namani kitadre jabätä ja mräkätre ie, Anna tä mike gare: “Nun rikaba dän kwetre gwena jai, nunkwe bätäteba, nunkwe planchaba biti nunkwe mritakaba bängrabe aune munkwe bianbata ietre. Nunkwe ñan kukwe kri nuainba kräketre akwa nunkwe niaratre dimikaba yebätä nengwane nunta ja kete kwin krubäte”. Anna aune muko kwe nämäne ja mräkätre tarere yekwe niaratre dimikani ja mräkätre ye dimike kukwe kia kia bätä (1 Juan 3:17, 18).

11. a) ¿Nita ni mada tarere nita bämike ye tä mate ño bätätre? b) ¿Nitre mada tare nikwe nita bämike ngwane tä mate ño Jehovabätä mikata gare Proverbios 19:17 yebätä?

¹¹ Nita ja mräkätre tarere aune kukwe kwin nuainne kräke ngwane Jehová töi aune ja ngwen ño ye erere nita bämike. Ne madakäre nita kukwe nuainne ye ñan tä käi kwitekä jerekäbe. käre ja mräkätre tä debe bien krubäte dimikata yebätä ye ñan tä nemen gare jökrä nie. Khanhbätä, blitani párrafo 8 ye ni dimikani nämäne krubäte ja mräkätre kwe ye törö kwekebe ie nieta kwe “ti etebatre ja üairebiti nämä niken ti tuin aune ti ngwena mröre biti nämä nikenta ti mikekä gwi yebätä tita debe bien krubäte ietre. Ja mräkätre ja di ngwani krubäte ti dimikakäre akwa nuainbare kwe ja tare metre biti ye nüke gare tie”. Kukwe nuainta ni mada kräke yebätä ñan tä nemen debe biandre jökrä ietre. Khanh tä blite ja mräkätre niara dimikani yebätä. Tä kukwe ne niere: “Niaratrekwe ti dimikani krubäte ye ti tö ütiä bienta jökrä ietre akwa tätre nüne meden ñan gare tie. Jehová abrä ie gare medente tätre, Jehovakwe kukwe kwin mikadre nemen bare kräketre ye tita ribere ie”. Nita kukwe kia nuainne ni mada kräke akwa tä nemen ütiäte Jehovakrä. Jondron kri nuainta ni mada kräke ye kwrere tä mike tuin jai aune tä nemen ütiäte kräke yebätä töta nemen ütiä bianta (ñäkädre Proverbios 19:17 yebätä).d

12. ¿Ja mräkätre brare ja ngökanina ñöte tä konkrekasion tarere raba bämike ño? (Üai mikadre ñärärä).

¹² Mä ja mräkä ja ngökanina ñöte ngwane, ¿mätä konkrekasion tarere ye mä raba bämike? Mä tä juto biarebe ja dimikakäre yebiti. Jordan monso bati konkrekasionte tö namani ja mräkätre dimikabätä akwa nuaindre ño kwe ye ngwanintari kwe ni umbre iti ji ngwanka ie. Yebätä ja mräkä umbre ji ngwanka yekwe kwin krubäte niebare ie, nämäne nirien bäri yebätä aune kukwe ruäre raba nuainne ye kädekaninte kwe ie. Ñodre rabadre nemen kä täbiti gätäbätä, kise ngökö ja mräkätre ie blite gätäte aune kukwe driere bäri grupo kwe yebe, niara rabadre kukwe ruäre bätä ja mräkätre dimike ye niebare kwe ie. Sribi mada mikani Jordan kisete konkrekasionte Jordan nämäne kukwe mike täte ye köböire nämäne ja mräkätre tarere bäri. Ne madakäre, ja mräkätre kädekata siervo ministerial ye ñan ai ngwane tä niken ja mräkätre dimike ñakare aune tärä nuainne käne aune tädre nuainne jankunu nükani gare ie (1 Tim. 3:8-10, 13).

13. ¿Dre käkwe Christian dimikani nementa ni umbre konkrekasionte?

¹³ ¿Mä nämäne kädekani käne ni umbrere ji ngwanka konkrekasionte o siervo ministerial? Ye erere ngwane, mäkwe sribibare Jehová kräke ja tare metre biti ye ñaka käi kwitekä jabiti (1 Cor. 15:58). Mä tä ja mräkätre tarere jankunu ye tuin Jehovai. Ja mräkätre iti kädekata Christian ye ñan namanina ni umbre ji ngwanka ye ngwane namani ulire krubäte akwa ñaka ja ngwani di nekä kwe. Niara tä mike gare: “Ti ñan rababara kädekani ni umbrere akwa ti raba dre nuainne ye erere tikwe ja di ngwanba nuainkäre, Jehová nämä tare tikwe yebätä”. kä nikani ta yete niara kädeka jababare ni umbrere bobukäreta akwa “kadre ngäbiti kwe o ñakare yebätä namani töbike. “Jehová ni mikaka tuin bobre jai nämä ti nübaire sribireta ja mräkätre kräke yebätä tikwe ka ngäbitiba aune niara nämä tare tikwe bätä ja mräkätre nämä tare tikwe yebätä tikwe ka ngäbitiba”.

14. ¿Meri testiko nünanka Georgia käkwe kukwe niebare yebätä dre nemen gare nie?

¹⁴ Ni testiko Jehovakwe tä nitre ñaka testiko ye tarere (Mat. 22:37-39). Ñodre, Elena meri testiko nünanka República Georgia tä niere: “Kenanbe Jehová nämä tare tikwe ye aibe bätä ti nämä niken kukwe driere akwa niara jataba bäri tare tikwe ngwane nitre mada jataba tare tikwe arato, nitre nämä ja tuin kukwe ño ben yebätä ti nämä töbike biti drebätä törbadre blitai ye ti nämä bämike ja töite. Ti nämä töbike ño yebätä tikwe ja töi kwitaba ye köböire, ti tö jataba nitre dimikabätä bäri” (Rom. 10:13-15).

NI MADA TARETA NGWANE KUKWE KWIN TÄ NEMEN NIKWE

15, 16. Tä mikani üaibätä ye erere, ¿ni mada tareta köböire kukwe kwin meden tä nemen nikwe?

¹⁵ Ja mräkätre tareta ngwane kukwe kwin tä nemen ni madakwe. Paolo aune muko kwe ja mräkätre kwati dimikani ja kite celular aune tableta yebiti kukwe driere, bren tare COVID-19 ye näire, iti kräke ñan namani nuäre ja kitakäre akwa namani bare ie ye köböire ja mräkätre kwe nübaibare kwe Jesús ja nire biani ngwanta törö jai yebätä. Nitre 60 jire kwani Jesús ja nire biani ngwanta törö jai yebätä. Paolo aune muko kwe ja di ngwani krubäte ye köböire niaratre nibu ja mräkätre kitani aune ja mräkätre kwe ye kwani siba. Kukwe ne tikani Paolo ie: “Nun niena umbre akwa mäta nun tötike yebätä nunta debe niere krubäte mäi, Jehová töi nämäne krubäte nunbätä aune munkwe nun ngübabare bätärekä ye nun ñaka käi kwitekä jabiti”.

¹⁶ Kukwe namani bare Paolobätä ye köböire kukwe ütiäte namani gare ie. Ja taredre ye bäri ütiäte kukwe gare nie aune jondron nuain gare nie ye kräke. Paolo tä mike gare: “Kä ruäre te ti kädekaba circuito tuabitikä tikwe kukwe kädriebare ye ñan törö ja mräkätre ie, akwa tikwe kukwe ruäre nuainbare niaratre dimikakäre yebrä törö kwekebe ietre gare tie”.

17. ¿Ni mada tareta ngwane kukwe kwin tä nemen nire nire kwe?

¹⁷ Nita ja tare bämike ni mada ie ngwane ni ara kräke kukwe kwin tä nementa bare. Ye erere namani bare ja mräkä iti nünanka Nueva Zelanda bätä, bati prekursor iti nämäne kukwe driere kä ngire te ñänä ruäre sabadote tuani Jonathan ngwane, ja töi mikani kwe niken mukore dere dere. Ja töi mikani kwe kukwe kwin nuainne ja mräkä ne kräke, ye köböire kukwe kwin rabai bare niara kräke ñan nämäne gare ie. Jonathan tä niere: “Ti ñan tö nämä nemen kukwe driebätä krubäte akwa prekursor ne nämä kukwe driere kwin krubäte aune käre kukwe kwin nämä nemen bare kräke, yekwe ti töi mikaba kukwe driere bäri ye köböire nunta ja kete bäri kwin. Ja ketamuko ye tä ti dimike kukwe ja üairebiti kukwe drie tarere bäri aune ja kete bäri kwin Jehovabe”.

18. ¿Nikwe dre nuaindre ie Jehová tö?

¹⁸ Ni jatadre Jehová tarere bäri aune nitre mada tarere bäri ie niara tö. Nibi gare nie erere, Jehová taredre bäri, ñäkädre niara kukwebätä, töbikadretari ngusetabätä aune oradre köbö kwatire kwatire ie. Ja mräkätre tare nikwe ye bämikadre ietre, dimikadre kukwe krikri aune kukwe kia kia yebätä. Ja tare ye jatai nirien bäri ngwane ni jatai ja kete bäri kwin Jehovabe aune ni mräkätre ja üairebiti yebe. Ye erere nikwe nuaindi ngwane, ¡nikwe ja ketai kwin krubäte kärekäre!