Ja töi mikata nitre madabätä köböire kukwe kwin tä nemen bare

Ti rün nämä Iglesia Unida Canadá jie ngwen. Yebätä käre bämänte nämä ti aune ti ngwai juen monsotre kia tötika nämä Bibliabätä yekänti. Bitikäre ti nämä niken ti rün ben ora oncebätä nitre ji ngwanka nämä kukwe nuainne nitre mada iglesiate kräke yebätä, derekri mada ti nämä niken ti meye ben Ju Ja Ükarakrö nitre testiko Jehovakwe yete. Kukwe ketebu ne ñaka ja erebe rababa tuin tie.

Dre namani gare ti meye ie ye mikaba gare kwe Bob Hutcheson aune muko kwe Marion, ja ketamuko kwin kwe ye ie, bitikäre niaratre ja mikani testiko. Kä 1958 ye ngwane, Bob aune Marion rikaba monso nimä kwe aune ti ngwena Gätä Kri Internacional “Voluntad Divina”, nuainba Nueva York, käkwe nuaba köbö kwä jire yebätä. Niaratre kukwe keta kabre nuainbare ne kwe rabadre niken ti ngwena ye nüke gare tie, yebätä tita debe bien krubäte, ñan ñobätä aune köbö ye namani ütiäte krubäte tikrä.

KUKWE KETA KABRE IE TI TÖ NÄMÄ YEKWE TI TÖI KWITABA

Kä känti mädä, nibi aune jondron mada ngüba nämä ye ngätäite nun nämä nüne, ti nämä bati ye ngwane, yebätä ti töi nämä ngübabätä. Aisete, ti törbaba ja kitai veterinario yebätä. Ti meye blitaba ni umbre ji ngwanka konkrekasionte iti ben, ti tö nämä dre nuainbätä ye mikaba gare kwe ie. Ni umbre ye käkwe töi jämebiti blitaba tibe aune “kä krüte näire” nita nüne ngwanba törö kwe tie. Aisete ti rikadre universidate ngwane ti nämä ja kete Jehovabe yebätä dre rabadre bare ngwantariba kwe tie (2 Tim. 3:1). Kukwe nieba kwe yebätä tikwe töbikaba aune tikwe ja töi mikaba ñaka niken.

Ti gediainkä colegiote ngwane, tikwe dre nuain ñan nämä gare tie. Käre bämän krutebätä ti nämä kukwe driere akwa ti nämä nuainne krenbiti ta, prekursor ye ñan ti kräke ti nämä niere. Ti grü aune ti rün, ñan Testiko nämä ti nübaire sribire köbö täte empresa kri seguro bianka Toronto yete, tikwe sribidre köbö täte yete ie tö nämä. Ti grü kisete sribi ütiäte nämä empresa yete, yebätä tikwe sribi ye ka ngäbitiba.

Yete, ti nämä sribire bäsi käre orabiti bäri aune köbö kwatire kwatire ti nämä nitre ñan testiko ye ngätäite. Ye köböire, kukwe ja üaire ye ti ñan jatabara nuainne krubäte. Kä ye ngwane, ti ruai ñan Testiko yebe ti nämä nüne, akwa biti niara krütaba yebätä ti rikaba nüne kä madakänti.

Bob aune Marion, ja mräkätre ne janama ti ngwena gätä kribätä kä 1958, niaratre ye rababa tuin ja rün kwrere tie. Ti nübaiba kwetre nüne jabe ye köböire ti ririaba bäri ja üairebiti. Kä 1960 ye ngwane, niara ngobo iti kädekata John yebe gwairebe tikwe ja ngökaba ñöte. Ye bitikäre, John ja mikaba prekursor, ye käkwe ti töi mikaba kukwe driere bäri. Ti jataba nirien ja üairebiti ye jutuaba ja mräkätre ji ngwanka konkrekasionte ie. Ja känenkäre ti kädekaba sribikäre Kwela Sribi Ngöbökwe kräke yete.a

TI MUKO KWIN AUNE SRIBI MRÄ KÖMIKABA

Kä 1966 ye ngwane, tikwe ja mäkäteba Randi Berge yebe, niara sribikä prekursora kwin krubäte aune töi nämä sribibätä nitre kukwe driekä ribe nämä yekänti. Ni circuito tuabitikä käkwe nun dimikaba ja töi mike niken sribire konkrekasion Orillia (Ontario) yekänti. ¡Nunkwe ja tribe ükaba jökrä ngwäte biti nun rikaba!

Randi nämä kukwe driere kä jutobiti yebätä nitre mada töi nämä nemen kukwe driebätä. Ye medenbätä, krire ti rababa kä kädekata Orillia ye ngwane, tikwe ja mikaba prekursor aune ja töi mikaba nitre tötikaka kwin krubäte. Ti nämä kukwe driere Bibliabiti aune nitre dimike kukwe metre mike nüke gare jai yekwe kä mikaba juto krubäte tibätä. Kä kädekata Orillia yete tikwe nitre ja mäkäninte iti dimikani ja töi kwite aune ja denkä mento Jehová kräke ye kukwe kwin krubäte rababa bare ti kräke.

KUKWE MADA AUNE NITRE TÖBIKE JENE

Bati ti rikaba Toronto ngwane, Arnold MacNamara nämä sribire betelte ye rababa gare tie. Nun kädekadre prekursor especial ye nunkwe kadre ngäbiti ya, ye ngwantariba kwe tie. Tikwe ñan töbikaba bati bobu aune : “Jän, akwa nun ñan tö näin Quebec” tikwe nieba. Ñobätä ñan aune, yete nitre Canadá nämä blite kukwe inglerebiti ye nämäntre nitre canadá nünanka Quebec ye kötaire, nämä blite kukwe francebiti yebätä. Kä rikaba ruäre ta ngwane, nitre nämä ja ükekrö ne kwe rabadre ja ñäkebiti yekäre.

Arnold nieba tie: “Nitre sukursal tä nitre prekursor especial aibe juen Quebec”. Tikwe ñan töbikaba krubäte ka ngäbitikäre. Randi tö nämä näin kä Quebec ye rababara gare tie. Kä rikaba ta ngwane, nun rikaba ye abokän kukwe bäri kwin nunkwe diani jai rükaba gare tie.

Bämän rikaba krärike ta nun tötikaba kukwe francebiti ye bitikäre ti, Randi aune nitre gure mada juanba Rimouski, Montreal, ye nemenkä 540 kilómetros (336 millas) ngwitärikwäre. Akwa ti ñan nämä blite kwin kukwe francebiti ye rababa gare, ñobätä ñan aune ti nämä ñäke anunciobätä ngwane, tikwe “nitre nübaibare austriaco” rükai niedre näre, kukwe bäsi kwrere nie nämä kukwe francerebiti ye tikwe nieba ye abokän “nukwä krikri nübaibare” rükai tikwe nieba.

Nitre gure mada ye ñan aibe ben nün nämä nüne Rimouski, ñakare aune nitre prekursor nibokä aune nitre ja mräkäre Huberdeau arato. Ju ye nämä ñäkäninbiti keta kükü. Yete nun jökrä nämä nüne aune ütiä bien gwaire. Nun nämä ju ye kädeke “Ju Ngwen” ñobätä ñan aune bä ngwen yebätä. Nun 12 o 14 nämä nüne keteitibe yete. Randi aune ti nun abokän nämä prekursor especial yebätä dekä nememe kä de nun nämä kukwe driere. Käre ni iti rikadre nunbe kä tibote aune raire deu yebätä nun nämä debe bien krubäte

Prekursortre baliente krubäte yebe nun nämä ja kete kwin yebätä nun jataba ja tarere krubäte. Nun nämä ñukwä bukete jubäre biti nun nämä empanada pierogis sribere kwetadre jai. Nun tö nämä dre dre kwetai ye erere nun nämä mike empanada yete. Bäsi käre sabadote deu, ja mräkä iti nämä musika täke ye ngwane nun nämä kantare aune bailare.

Kä Rimouski yekänti kukwe kwin krubäte jataba nemen bare. Kä rikaba krärike ta yete nitre kwati ja tötikaka Bibliabätä ja ngökaba ñöte yekwe kä mikaba juto nunbätä. Konkrekasion yete nitre jataba bäri kwati, nitre kukwe driekä rababa 35.

Nun juani kä Quebec ye köböire kukwe keta kabre namani gare nunye ja töikrä. Nun dimikani kwe nemen ni kukwe driekä bäri kwin. Aune nun nämä kukwe driere kä yekänti ye ngwane käre Jehovakwe nun dimikaba ye nunkwe tuani. Nun nämä dre ribere jai köbö kwatire kwatire kräke ye erere biani kwe nunye. Ne madakäre, nitre nämä blite kukwe francebiti ye rababa gare bäri kwin nunye aune nun jataba niaratre kukwei aune nämä ja ngwen ño ye tarere. Ye köböire nun ñan nämä töbike käne erere ñakare aune nitre blite kukwe madabiti aune jene ye nun jataba tarere arato (2 Cor. 6:13).

Kä rikaba braibe ta ngwane, nun raba niken kä Tracadie ye ngwantariba sukursalkwe nunye. Juta chi ye nämä nemenkä mren kräbäre nedonkwäre Nueva Brunswick. Nun nämä jäme kukwe ngwantariba nunye. Kä ye ngwane krire nunkwe contrato firmaba ju alquilakäre aune ti nämä sribire kä ruäre te maestrore kwelate. Nitre kabre ja tötikaka Bibliabätä ye kätekaba ni kukwe driekä jämi ja ngökö ñöte, aune kä ye ngwane arato ju ja ükarakrö ye sribe nämä. Nunkwe dre nuaindi ye ñan rababa nuäre nun kräke diankäre jai.

Bämän ye krütebätä nunkwe oraba krubäte kukwe yebätä. Nun rikaba Tracadie aune kä ye ñaka jire ja erebe kä Rimouski yebe nunkwe tuaba. Jehovata ni juen aisete ni näin nunkwe nieba. Nunkwe Jehová tuametreba ja jie ngwen aune niara nämä nun jie ngwen ño, ye nunkwe tuaba (Mal. 3:10). Randi nämä dite kukwe ja üairebiti, nämä ja di ngwen krubäte kukwe ñan nuärebiti ta. Käre kä nämä jutobätä, ye köböire kukwe nämä nemen bare kwin. Ye erere nuainba kwe nunkwe ja kwitaba ye ngwane.

Kä Tracadie yekänti ni umbre ji ngwanka konkrekasionte nämä itibe ye abokän Robert Ross. Niara aune muko kwe, Linda, nikani yete sribire prekursor erere. Monso namani iti kwe ye ngwane, ja töi mikani kwe nemen nüne yete. Robert Ross nämäne sribire krubäte monso kwe ngübakäre, akwa niara nämäne ja töi mike kwin ni mada kräke, kukwe ngübare bätärekä, aune nämäne kukwe driere kä jutobiti, yekwe nun dimikaba krubäte.

NUN NÄMÄ KÄ NGWEN JUTO JABÄTÄ NUN RIBE NÄMÄ YEKÄNTI

Kä krobu te nunkwe sribiba Tracadie prekursor erere. Kukwe mada nun ñan nämä ngübare rababa bare. Nun nübaiba sribire ni circuito tuabitikä erere, kä keta kükü te nunkwe nitre blite kukwe inglerebiti ye tuabitiba. Biti nun juanba sribire ni circuito tuabitikä erere Quebec, nitre nämä blite kukwe francerebiti yekänti. Ye ngwane ni distrito tuabitikä kädekata Léonce Crépeault, nämä käre kukwe kwin niere tie ti nämä kukwe kädriere ye ngwane.b Akwa bitikäre, ti raba dre nuainne kukwe kädriekäre bäri kwin nämä ngwentari tie. Niarakwe ja töi mikaba krubäte ti dimikabätä ye köböire ti nämä kukwe kädriere ngwane, ti jataba kukwe kädriere bäri nuäre rükakäre gare aune kwin.

Gätä Kri Internacional kädekaba “Fe Victoriosa” nuainba Montreal kä 1978. Kä ye näire tikwe sribiba Departamento mrö Ükakrö nämä yete. Nitre 80.000 rükai ye nun nämä ngübare. Akwa kukwe ükateba jene nitre bukakäre. Máquina mrä mikaba mrö sribekäre aune kukwe ükateba jene mrö riakäre. Camión 20 jire yete mrö ükaba ne kwe ñan rikadre ngwarbe. Ruäre ngwane jondron mikakäre tibo ye ñan nämä sribire kwin. Bätuakäre nun ñan rababa kä täbiti estadio yete kä ükatekäre, ñobätä ñan aune köbö ye känenkri jadakabare yete. Kukwe ye nämänena ükaninte. Kä ruäre deu nun rikaba gwä. Aune ¡horno tädre okwä bukaninkä mrö sribekäre dekä! Nun nämä nainte krubäte. Ja mräkätre nämä sribire kä jutobiti aune kukwe nämä gare krubäte ie, nämä sribire kä juto biti yebätä kukwe kwin rababa gare tie. Kukwe rababa bare ye nun dimikaba nemen bäri keteitibe ja mräkätrebe. Aune ja ketamuko rababa nunkwe yebe nun täbe ja kete kwin krubäte. Gätä Kri Internacional nuainba Quebec ye rababa ütiäte krubäte nun kräke. Kä ye arabe känti kä 1940 aune 1950 ye ngwane ja mikani krubäte nun rüere.

Gätä kri nuainba Montreal yete, kukwe rababa gare krubäte tie nitre circuito tuabitikä mada mada yebätä. Bati, David Splane, gätä kri jie ngwanba. Nengwane niara tä sribire Nitre Braibe Konkrekasion Jökrä Ngübabitikä yebe. Gätä kri nuainba ye bitikäre gätä mada nuainba ye tikwe jie ngwanba. David ti dimikaba krubäte ye ngwane.

Kä 36 te nunkwe nuaba ni circuito tuabitikä erere. Biti kä 2011 ye ngwane, ti nübaiba instructor erere kwela nitre umbre kräke yebätä. Kä rikaba krobu ta nunkwe jadükaba cama 75 näre biti. Nunkwe sribiba ye ñan rababa nuäre nunkrä, akwa kukwe kwin rababa bare. Bämän krütaba ngwane, nitre umbre ji ngwanka yekwe debe dianba krubäte, ñobätä ñan aune niaratre nämäne ño ja üairebiti yebätä Nitre Braibe Konkrekasion Jökrä Ngübabitikä töi nämäne krubäte bätätre nükani gare ietre aune tuani kwetre.

Biti ti kädekaba nitre tötikaka o ji ngwanka Kwela Nitre Gobran Ngöbökwe Kukwei Driekä kräke yebätä. Nitre tötika nämä nunkwe ye bäsi käre nämä nemen nainte krubäte, ñobätä ñan aune hora 7 näre bämän kratire kratire nämä nemen nändre kwelate ie, hora krämä te nämä tarea sribere, aune bämän kratire kratire asignación bian nämä kräbäkä o krärike ietre. Jehová aibe köböire kukwe jökrä ye raba nemen bare ietre nun nämä niere ietre. Ja mräkätre nämä tö ngwen Jehovai aune ja di mikamana ie, ye köböire kukwe ñan raba nemen bare bä kwrere nämä nemen tuin, nuain nämä kwetre. Niaratre töi nämä nemen niä. Kukwe ye ñan käi nikwitekä jire tibiti.

KUKWE KWIN TÄ NEMEN BARE NI MADA DIMIKABÄTÄ

Ti meye nämä ja töi mike krubäte nitre ja tötikakabätä ye köböire niaratre niriani ja üairebiti aune ti rün ja töi kwitaba. Kä rikaba köbömä ta ti meye krütaba ye bitikäre ti rün ñaka kukwe nuainne jire ye nuainba kwe. Janama gätä kukwe kädrieta ni jökrä kräke ye kukwe nuakäre. Yete ja käne kä nikani 26 ta yete, niara ñaka gätä juani jire chi ja bäre. Ñaka ja ngökani ñöte kwe, akwa niara nämäne nemen käne gätäbätä nieba nitre umbre ji ngwankakwe tie.

Ti meye kukwe kwin bämikani ti ngwai nimä kräke aune tikrä. Niaratre aune muko kwe tätre ja ngwen metre Jehovai. Nibu tä Betel. Iti tä Portugal aune iti tä Haití.

Randi aune ti nunta sribire prekursor especial Hamilton, Ontario yete. Nun nämä circuito tuinbiti ngwane, nun tö nämä näin ja mräkätre mukore, nitre tuinbiti aune tötike Bibliabätä. Akwa nengwane, nitre ja tötikaka niena nunkwe ye käi ta juto krubäte nunbätä, ñan ñobätä aune nunta tuin nirien kukwe ja üairebiti. Ja mräkätre konkrekasionte itire itire ye tä nemen gare bäri kwin nunye. Ja mräkätre tä ja tuin kukwe tare ben o kukwe jökrä tä kwin ngwane, Jehovata niaratre dimike ño tä tuin nunye ye tä nun dimike.

Ja mräkätre nun dimikani krubäte yebätä nunta töbike ngwane, nunta debe bien krubäte. Akwa nun töita krubäte niaratrebätä ye nunta bämike ietre. Nunta niaratre dimike kukwe ja üairebiti aune raba sribire bäri ye nunta niere ietre (2 Cor. 7:6, 7). Ni meyere iti, ngängän, aune ngobo iti tä prekursor nuainne. Monsotre ye rün ie tikwe ngwantariba: “¿Ñobätä mä ñan ja töi mike prekursor nuainne?”. Tita nimä dimike prekursor nuainne nieba kwe tie. Yebätä tikwe ngwantariba ie “¿Jehovakwe ngübadre bäri kwin ye ñan ruin mäi?”. Tikwe niara dimikaba yebätä, sö rikaba krä ti ta ngwane ja mikaba kwe prekursor.

Randi aune ti nunkwe jankunu blitai “jondron kwin krubäte sribebare” Ngöbökwe yebätä “nitre jökrä jatai jatäri yei”, aune niaratre käkwe sribidre kä jutobiti Jehová kräke nun erere ye ie nun tö (Sal. 71:17, 18).