Ja mikani “ngite kira, ye ñakare töbikaibare kwe”

Jesús ja nire biani ni ütiäre ye aibebiti ngite kita raba ta nibiti (Efes. 1:7). Yebiti ta Biblia tä kukwe ne mike gare “niarakwe bikabare bobre krubäte nibätä, aisete ngite kira, ye ñakare töbikaibare kwe” (Rom. 3:25). Jesús jämi ja nire bien ni ütiäre ye känenkri Jehová nämänena ngite kite ta nibiti nüke gare nie. ¿Kukwe ükateta kwin kwe yebiti ta raba kukwe ne nuainne ño?

Ni iti “monsoikri” ni ngite ye rabai ütiä bianbare, ne kwe nirekwe tödekadre Jehovabiti rabadre kwäre käbämikani kwe ye ngwane, ngite nikwe ütiä bianina kwe ye kwrere nämäne mike tuin jai (Gén. 3:15; 22:18). Kä rükai ngwane, Jesús täi juto biare ja nire biankäre ni kökatarikäre, ye nämäne gare Jehovai (Gál. 4:4; Heb. 10:​7-10). Jesús nämäne kä tibienbätä ngwane, rün ye abokän ño ye bämikani kwin kwe, ye ngwane nitre ngite akwa nämäne tö ngwen yebiti nämäne ngite kite ta. Jämi ngite nikwe ütiä bien akwa nämänena ngite kite tä nibiti, ñobätä ñan aune ni kökaitari kwe nämäne gare ie (Mat. 9:​2-6).