Sribi Jehovakwe käita juto tibätä

TI NÄMÄ NÜNE ÑO

Ti däreba kä 1934. Ti rün aune ti meye käi Suiza, akwa ja kwitaba kwetre Timmins, nemenkä Ontario (Canadá) juta känti mina dianka nämäne yekänti. Kä 1939 ye näire, ti meye jataba ñäke täräkwata La Atalaya yebätä aune jataba niken gätä nitre testiko Jehovakwe yebätä. Nämä niken ti aune ti etebatre ni ti ye ngwena siba jabe. Kä rikaba braibe ta ngwane ja ngökaba ñöte kwe.

Ti meyekwe ja töi mikaba dre nuainne ye ñan mataba kwin ti rünbätä, akwa ti meyekwe ja töi mikaba kwatibe Jehová mikakäre täte jankunu. Década 1940 ye näire sribi Ngöbökwe ñäkäibare kä Canadá yete akwa yebiti ta ti meyekwe ja ngwanbare metre Jehovai jankunu. Ti rün nämä kukwe tare krubäte niere ti meye ie akwa yebiti ta niara nämä tarere aune mike ütiäte jai. Ti meye kukwe kwin bämikani ti aune ti etebatre kräke ye käkwe nun töi mikani ja mike testiko. Kä rikaba ta ye bitikäre ti rünkwe ja töi kwitaba aune jataba nun tarere bäri.

TIKWE SRIBI KÖBÖ TÄTE JEHOVÁ KRÄKE KÖMIKABA

Kä 1950 ye näire ti rikaba gätä kri “Aumento de la Teocracia” kä Nueva York yekänti. Yete ja etebatre aune ja ngwaitre kä jökräbiti tibien rababa gare tie, aune ja mräkätre janamane Kwela Galaadbätä käkwe kukwe jabätä tänba ye käkwe ti töi mikaba krubäte sribire bäri Jehová kräke. Käne ti töi nämänena sribibätä köbö täte Jehová kräke, akwa ye ngwane ti töi rababa nuainbätä bäri. Ti rükabata gwi ngwane, bengwairebe tikwe solicitud prekursor regular kräke ye juanba. Sukursal Canadá käkwe kukwe tikaba tie aune tikwe ja ngökadre ñöte käne ye bäri kwin nieba kwetre tie. Aune ye erere tikwe nuainba 1 octubre kä 1950 ye ngwane. Kä rikaba sö kratibe ta ye bitikäre tikwe ja mikaba prekursor regular, aune ti juanba Kapuskasing, nun nämä nüne yekänti kä ye nemenkä mente.

Kä 1951 yete, sukursal käkwe ja mräkätre ie blita nämä gare francés ye töi mikaba niken Quebec, yete blita nämä kukwe yebiti aune nitre testiko nämä braibe kä yekänti. Blita nämä gare inglés aune francés tie, aisete tikwe ja töi mikaba niken aune ti juanba. Ja mräkätre ñaka nämä gare jire yete tie, tikwe nini kena erere ti töi nämä kwatibe kukwe keteiti nuainbätä. Akwa mrä mada ti rababa ja kete kwin Marcel ben aune kä kobokä te tikwe sribiba kä jutobiti kä Quebec känti, ye bitikäre ti kädekaba prekursor especial.

GALAAD BITIKÄRE TI NÄMÄ KUKWE NGÜBARE YE ÑAN RABABA BARE JÖTRÖ

Ti nämä Quebec ngwane ti nübaiba Kwela Galaad número 26 yebätä, ye rababa bare South Lansing (Nueva York) yete. 12 febrero kä 1956 ye ngwane ti graduaba, aune ti juanba Ghanab África Occidental yekänti. Kä rababa juto krubäte tibätä. Akwa ti jämi niken yete ye känenkri, ti rikabata Canadá täräkwata jakwe nänkäre Ghana ye ngübakäre. Ye nuadi bämän krati o krobu ti nämä nütüre.

Metrere sö krä kükü te ti rababa Toronto ti nämä täräkwata jakwe ngübare ye ngwane. Ye ngwane ti rababa nüne ken ja mräkätre Cripps känti. Niaratrekwe ngängän nämäne iti kädeka nämä Sheila, aune ja rababa tuin kwin nunye. Ja mäkädrete kwe tibe ye ti jababara ribere ie ngwane, visa tikwe rükaba. Ti aune Sheila nunkwe oraba krubäte Jehovai aune nunkwe kukwe keteiti dianba nuaindre jai ye abokän ti rikadre Toronto, akwa nunkwe ja töi mikaba kukwe tike jankunu jai ne kwe ja känenkäre nun rabadre ja mäkete. Erametre kukwe ye ñan rababa nuäre jire chi nun kräke, akwa kä rikaba ta ye bitikäre nunkwe kukwe bäri kwin nuainba ye rükaba gare nunye.

Tikwe nänba sö krati näre trente, barcote aune rute ye bitikäre mrä mada ti rababa Accra, juta Ghana ye känti. Ti kädekaba superintendente distrito, ti rabadre dikekä kä jökrä Ghana, Costa Marfil aune Togolandia (Togo nengwane). Sukursal käkwe carro bianba tie yebiti ti rababa dikekä kwäräkwärä. Bäsi käre ti nämäne niken kaibe, aune ti nämä nitre tuinbiti ye käi nämäne nemen juto tibätä.

Bämän krütebätä gätä kri circuito ye kräke sribi nämä ere nun kisete. Ju gätä kri kräke ye ñaka, yebätä ja mräkätre nämä cañaza sribere jure aune nämä krikä ketebiti ta ngwana trä kriere. Aune refrigeradora ñaka, yebätä jondron nire nämä biarebe kämikakäre ja mräkätre nämä gätä kribätä ye bukakäre.

Ruäre ngwane gätä kri näire kukwe nuäre nämä nakainkä. Bati, misionero kädeka nämä Herb Jenningsc nämä kukwe kädriere ngwane, batibe toro jataba betekä gwita ja mräkätre ngätäite ta. Toro ye rababa nikren be kwräkwrä kä rababa ulire Herbkwe. Bitikäre, ja mräkätre dite nibokä ie toro ye rakaba jänrikaba kwe ngwane nitre jökrä rababa kise mete.

Bämän ngrabare te kä ruäre yekänti película La Sociedad del Nuevo Mundo en acción mika nämäne tuare. Sábana ngwen mäkäte nämäne kribätä yebätä película ye trä mika nämänente. Nitre ruäre ñaka película tuabarera jire aisete ¡kä nämäne juto krubäte bätätre! Aune nitre nämäne ja ngökö ñöte üai mata nämä nüke ngwane niaratre nämäne kise mete kräke. Película ye köböire ja mräkätre tä kä jökräbiti tibien ye rababa gare ietre.

Kä kubu ti nämä África ye bitikäre, ti nübaiba gätä kri internacional 1958 nuainba Nueva York yete. ¡Tikwe ja tuabata Sheila ben ye käi rababa juto krubäte tibätä! Nun nämä kukwe tike jai aune niara nämä sribire prekursora especial erere kä Quebec känti aune niara yete jatani gätä kri yebätä arato. Aune yete ngwane nun namaninta gwairebe jabe, ye bengwairebe niara raba ja mäkete tibe ye ti ngwantariba ie, aune niarakwe jän nieba tie. Ye bitikäre tikwe kukwe tikaba eteba Knorrd ie Sheila raba niken Galaad aune juan raba África ye ti ngwantariba ie, aune rababa tuin debe ie. Sheila rükaba Ghana ngwane, nunkwe ja mäkäteba kä Acraa 3 octubre kä 1959 ye ngwane. Nunkwe sribi Jehovakwe mikaba nuaindre käne jai yebätä Jehovakwe kukwe kwin mikaba bare nun kräke rükaba gare nunye.

NUNKWE SRIBIBA GWAIREBE CAMERÚN

Kä 1961 nun juanba Camerún, sukursal mrä sribe jababa ye dimike. Sribi keta kabre nämä nuaindre tie aune ti kädekaba sribi sukursalkwe ye jie ngwanka, kukwe keta kabrebätä nämä ja kitadre tie. Kä 1965 ngwane ti muko Sheila nämä murore, ye rababa gare tie, aune nunkwe monso ngübadre ye ñan rababa nuäre nun kräke. Akwa nun jatabara bämike ja töite aune tarere yebätä nunkwe kukwe ükateba jai nänkäreta Canadá. Akwa kukwe tare rababa bare

Monso chi jämi därere ye ngwane krütani. Monso ye brare doctorekwe nieba nunye. Kukwe rakakaba ye käi nikanina 50 ta akwa kä ña ni kwitekä nunbiti jire. Nun nämä ulire krubäte, akwa sribi nämä nun kisete ye nunkwe ñan tuametreba ñobätä ñan aune sribi ye ütiäte nun kräke.

Ja mräkätre Camerún ñaka nämä ja mike política yete yebätä jabitibe ja mika nämäne rüere. Gobrantre dianka jataba ye ngwane bäri ja mikaba niaratre rüere. Kukwe jürä nämä bäri nunbätä ye rakakaba 13 mayo kä 1970 yete. Sukursal mrä bä nuäre sribeba yete krire sribiba sö krärike aibe ngwane diankaba nunkän. Kä rikaba bämän krati ta ngwane nun sribikä misionero erere ye juantariba mento juta yebätä. Ja mräkätre nämä tare krubäte nunkwe aisete ñan rababa nuäre nun kräke mikatekäre aune nane kukwe tare rabadre bare bätätre yebätä nun rababa töibikaire krubäte.

Nunkwe nünanba sö krä ti sukursal Francia yete nun nämä kukwe ñokwä nuainne ja mräkätre Camerún dimikakäre. Kä ye arabe ngrabare diciembre bätä nun juanba sukursal Nigeria, sukursal ye abokän nämä sribi nuain nämä Camerún ye tuinbiti. Ja mräkätre Nigeria käkwe nun ka ngäbitiba kä jutobiti nun nämä sribire yete ye käi nämä juto nunbätä.

KUKWE ÑAN NUÄRE DIANKÄRE NUAINDRE JAI

Kä 1973 ye ngwane nunkwe kukwe ñan nuäre dianba nuaindre jai. Kä ruäre te Sheila nämä bren. Nun nämä gätä kribätä Nueva York ngwane, niarakwe nieba tie muare kwärä: “Kä ñan kitra nüke tie, ti di nekä, käre ti bren”. África Occidental yete Sheila sribiba kä 14 te tibe ye käi nämä juto tibätä akwa nunkwe kukwe ruäre nuaindre rababa gare nunye. Nunkwe blitaba kukwe yebätä, nunkwe oraba krubäte Jehovai kukwe yebätä. Ye bitikäre nunkwe ja töi mikaba nikenta Canadá, yete Sheila kräkäi mika raba bäri kwin. Sribi köbö täte nunkwe tuanemetre ye ñan rababa nuäre nun kräke. Ye käkwe nun moto mikaba ulire krubäte.

Nun rababa Canadá ye bitikäre ja ketamuko kira tikwe kwe negocio nämä, känti nämä carro rürübäine, negocio ye nemenkä Toronto ngwitärikri, yekänti ti rababa sribire. Nunkwe apartamento alquilaba nunkwe jondron ñan mrä mrä kökaba mikakäre gwita nunkwe ja kwitaba aune nun ñan rürübän ütiä mikaba jabiti. Nun tö rababa sribi köbö täte ye nuaindi jankunu yebätä nunkwe sribi kia kia mikaba nuaindre jai. Akwa sribi ngüba nämä nunkwe rabai bare jötrö krubäte nun ñan nämä nütüre ye erere rababa bare.

Ju Gätä Kri kräke sribe nämä Norval (Ontario) yete ti jataba sribire sábado kratire kratire ja töi jeñebiti. Akwa kä rikaba ta ye bitikäre tikwe Ju Gätä Kri kräke ye jie ngwandre ribeba tie. Aune Sheila jatabarata räre yebätä nun raba sribi ye kain ngäbiti rababa ruin nunye. Aisete, junio kä 1974 ye ngwane, nun rikaba nüne cuarto nämä Ju Gätä Kri kräke yete. Nun rababata sribire köbö täte Jehová kräke ye käi rababa juto nunbätä.

Kä rikaba krobu ta ye bitikäre ti nübaiba ni circuito tuabitikä erere, aune Sheila ie ja jataba ruin bäri kwin yebätä nunkwe sribi ye ka ngäbitiba. Nun nämä konkrekasion Manitoba ye tuinbiti, ye nemenkä provincia Canadá yekänti aune yete kä tibo krubäte. Akwa, ja mräkätre konkrekasion yete ye töi kwin krubäte yebätä ¡nun ñaka nämä kä tibo ye gain! Nita medente sribire Jehová kräke, akwa nikwe sribi nuaindre kwin Jehová kräke ye bäri ütiäte rükaba gare nunye.

KUKWE ÜTIÄTE JA TÖI KRÄKE TIE

Kä ruäre te nun nämä sribire ni circuito tuabitikä erere, aune kä 1978 ye ngwane nun nübaiba sribire Betel Canadá yekänti. Kä rikaba ruäre ta ye bitikäre kukwe ütiäte ja töi kräke rababa gare tie aune ñan rababa nuäre ti kräke. Tikwe kukwe kädriedre hora krati biti ötare te ribeba tie kukwe francebiti gätä ütiäte nuainba Montreal yekänti. Akwa, tikwe kukwe kädrieba ye ñan mataba nitre brukwäte yebätä ja mräkä iti sribikä Departamento de Servicio käkwe blitaba tibe. Ye ngwane ti ñan kukwe kädriere kwin ye ñan nämä gare jabätä tie. Akwa, ja mräkä käkwe kukwe nieba tie ye rikaba ngitie ngire ti ngrabare ti ñan mate kwin bätä. Aune tikwe kukwe kädrieba yebätä ngwarbe rikaba kukwe ñaka kwin niere tie rababa ruin tie. Ye medenbätä tikwe ñaka kukwe kwin nuainba ñobätä ñan aune nire nämä mäträre tibätä aune mäträba ño kwe tibätä yebätä tikwe ñaka ka ngäbitiba.

Köbö ruäre ye bitikäre, ja mräkä iti sribikä Comité Sukursal yete käkwe blitaba tibe. Tikwe ñaka ja ngwanba kwin aune ja rababa ruin käme tie ye tikwe mikaba gare ie. Ye bitikäre, ja mräkä käkwe mäträba tibätä ye ie ti rikaba ngite kitamana ta jabiti ie aune ka ngäbitiba töi kwinbiti kwe. Kukwe ye käkwe kukwe ütiäte krubäte drieba ja töi kräke tie, aune ñan käi nikwitekä jire chi tibätä ye abokän: ja töi mike bobre (Prov. 16:18). Tikwe kukwe käme krubäte nuainba yebätä bä kabre tita ja di kärere Jehovai, aune tikwe kukwe ñaka kwin nuainba yebätä tikwe bä kabre orabarera Jehovai aune ti ja töi mikanina kwatibe mäträita tibätä ngwane ti ñan ja ngwain ye erere.

Kä nikanina 40 ta tita Betel Canadá, aune kä 1985 yete ja käne tita sribire Comité Sukursal ye käi nuäre tibätä. Febrero 2021 ti muko Sheila tare tikwe krütaba, tita niara uliere krubäte. Ne madakäre, ja ñan kitra ruin kwin tie. Akwa sribita nuaindre krubäte Jehová kräke tie ye käi juto tibätä aune köbö kwatire kwatire niken ta ye ti ña gain jire (Ecl. 5:​20, nota). Bokänä kukwe tare tärä nemen bare akwa tita sribire Jehová kräke ye tä kä mike bäri juto tibätä. Tita niara mike käne aune tikwe sribibarera kä 70 näre te niara kräke ye tä nemen bare kwin. Monsotre bati bati rabadre sribire Jehová kräke ye tita ribere Jehovai ñobätä ñan aune ye aibe köböire niaratre raba sribire kä jutobiti ye gare metre tie.