Käre kukwe mrä mrä tä nemen gare tie

Ti däreba kä 1927 juta chi Chicago nemenkä (Illinois, Estados Unidos ye känti). Ti rüntre kwe monso namani nirike jire: Jetha, Don, ti, bitikäre Karl aune mrä Joy. Nu jökrä töi nämä sribibätä ja di tätebiti Jehová kräke. Ti ngwai Jetha ye janama kwela Galaad nuaima bobukäre yete, kä1943 ye ngwane. Aune Don kä 1944, Karl kä 1947 bätä Joy kä 1951 nubaiba Betel Brooklyn (Nueva York) kore niken jatäri. Ti etebantre aune ti rüntre käkwe kukwe kwin bämikaba ti käne ye käkwe ti töi mikaba sribire ye erere arato.

KUKWE METRE YE DRIEBA JEHOVAKWE TI MRÄKÄTRE IE

Ti rün aune ti meye nämä käre ñäke Bibliabätä aune Ngöbö nämä tare krubäte kwe, aisete nun töi mikaba ye kwrere kwe arato. Akwa rü kakaba kri kena ye ngwane ti rün janama kä Europa yete rüre, yete ja käne iglesia ye ñan rababare tuin ütiäte jire ti rün ie. Akwa ti rün janama rübätä akwa rükabata kwin gwi yebätä ti meye nämä debe bien krubäte yebätä niara nieba ie: “Karl, brän iglesiate, ni nämä niken käne ye erere”. Akwa ti rün nieba ie: “Ti raba niken mäbe akwa ti ñan näin gwä”. “¿Ñobätä?”, ngwantariba ti meyekwe ie. Niara nieba ie: “Ti janama rü kri yebätä ngwane, nitre ji ngwanka iglesiate ye nämä orare nitre rükä kwe kräke aune kürü ngwan nämä kwe yebätä, akwa niaratre ye nämäne näin iglesia ja erebe te. ¿¡Ño amarebiti Ngöbö abokän tädre nitre rükä nibu kiri!?”.

Ti meye nämä iglesiate ye ngwane, ti rün nämä gwi aune nitre testiko nibu nükani känti. Aune tärä volumen krobu kädeka nämä Luz, abokän nämä blite tärä Bibliabätä Apocalipsis yebätä, ye driebare kwetre ti rün ie. Ti rün ie tärä ye namani tuin ütiäte aune kani ngäbiti kwe. Ti meye ie tärä ye jutuabare angwane, namani tuin kwin ie arato aune ja töi mikani kwe ñäke bätä. Ye bitikäre, bati nire tö nämäne ja tötikai tärä Luz volumen krobu yebätä ye nübai nämä ja tötike, ye ti meye tuaba anuncio keteiti nämä periódicobätä yebätä aisete ja töi mikaba niken kwe. Nükani kä ye känti ngwane, meri umbre käkwe kani ngäbiti. Ti meye käkwe tärä krobu ye mikani tuare ie aune niebare kwe: “¿Nete ai ja tötikai tärä nebätä?”. Meri ye käkwe niebare ie: “Jän nete ara ri, näin gwä ti mräkä”. Ye bitikäre bämän ja känenkäre yete, ti meye rikaba ti aune ti etebantre jänrikaba kwe jabe. Yete ja käne nunkwe ñaka ja tötika ye juanba ja bäre.

Gätä nuain nämä ye ngwane, ja mräkä iti nämä gätä jie ngwen ye käkwe ñäkä mananba tie Salmo 144:15 yebätä yete nieta, nire tö Jehová mike täte yebätä kätä juto. ¡Texto ne mataba kwin tibätä!. Arato 1 Timoteo 1:11 ye rababa tuin kwin tie, yete nieta Jehová ye abokän Ngöbö kä juto bäkänkä aune texto Efesios 5:​1, ye tä ni töi mike ja ngwen Ngöbö ye erere ye rababa tuin kwin tie arato. Aisete ti nämä dre nuainne Ngöbö ti dätekä kräke ye ti tädre käi ngwen juto jabätä aune ti nämä niara mike täte yebätä ti rabadre debe bien krubäte ie ye rükaba gare tie. Kukwe ketebu ne käkwe ti dimikaba jankunu sribire Jehová kräke.

Kä Chicago ye nemenkä 32 kilómetros (20 millas) aisete konkrekasion ye aibe nämä nemen bäri känime nun kräke. Akwa yebiti ta nun nämä niken käre gätäbätä aune bätärekä bätärekä kukwe Bibliabätä jataba nüke gare bäri tie. Bati Jetha käkwe blitaba gätäte. Aune ye juruaba tie aisete ti nütüba: “Kukwe ye täni gare tie arato. ¿Ñobätä ti ñan kise karikä kwin?”. Yebätä yete ja käne ti jataba ja tötike kaibe gätä kräke aune ti jataba blite ja töi jeñe biti. Akwa ti jataba nirien bäri ja üairebiti ti etebantre ye erere. Aune kä 1941 ye ngwane, tikwe ja ngökaba ñöte.

JEHOVÁ NEMEN GARE BÄRI TIE GÄTÄ KRI YEBÄTÄ

Nun janama gätä kri yebätä kä 1942 Cleveland (Ohio) ye ngwane kukwe keteite ütiäte törö tie. Ja mräkätre aune ja ngwaitre käkwe gätä kukwe nuaba teléfono yete juta keteitire keteitire kä 50 jire Estados Unidos känti. Ti mräkätre aune ja mräkätre mada kwati rababa tienda de campaña yete kä gätä kri nuainkäre ye ken. Rübare Kri Ketebu ye nämä nakainkä kä ye näire aisete, ja mräkätre testiko ye rüere ja mike jataba bäri. Ye medenbätä deu, ja mräkätre nämä carro kwe ye mike nikren ji ngrabare jubärekri, campamento yebätä. Ja mräkätre itire itire tädre carro keteitire keteitire yete kä ngübarebiti dibire ta. Ja mräkätre ye ie kukwe ño jutuadre ye ngwane, tädrera juto biare carro ye kukwe mikakäre aune ñotra trä mikakäre aune carro okwä mikakäre aune ja mräkätre mada tädrera biarebe ja dimikakäre. Ye ngwane ti nütüba: “Juta Jehovakwe tä juto biare kukwe ñokwä rakadrekä ye kräke”. Kukwe blo ñan rababa bare aisete ja rababa ruin kwäre tie aune ti ja dukaba töi jäme biti.

Kä rikaba kabre ta ye bitikäre asamblea yebätä ti nämä töbike ngwane, rükabata törö tie ti meye ye abokän ñaka ja töibikaba jire aune ñaka kä jürä ngwanba jire jabätä kwe. Metrere niara nämä tö ngwen kwatibe Jehovai aune juta kwe yei. Niara kukwe kwin bämikaba ti käne ye ti ñan käi kitekä jire jabiti

Gätä kri ye känenkri, ti meye precursora regular ye kömikabara. Aisete, sribita köbö täte yebätä blitaba gätä krite ye ngwane, niara olo ketateba kwekebe ie. Nun jatabarata gwo ye ngwane, niara nieba nunye: “Ti tö ja sribidi precursora erere jankunu. Akwa ¿ño ti raba sribire köbö täte aune sribi keta kabre tä ti kisete ye nuainne gwairebe?”. Nun raba niara dimikeya ngwantariba kwe nunye aune nunkwe jän nieba ie. Nun jämi mröre dekä ye känenkri nun itire itire rabadre cuarto krobu ye mike mrebe ribeba kwe nunye. Nun nämänä niken kwelate ngwane, niara nämä niken cuarto nämä kwin ükaninte jökräya ye nämä niken mike ñärärä ye bitikäre niara nämä niken kukwe driere. Ti meye ye metrere sribikä krubäte akwa käre nämä nun ngübare kwin. Kwela ye bitikäre nun nämä nüketa gwi ngwane, niara nämä käre nunbe yete mrökäre gwairebe. Nun nämä nüketa kwelate ye bitikäre nun nämä niken kukwe driere ben aune ye köböire sribita ño köbö täte Jehová kräke ye rükaba gare kwin nunye.

TIKWE SRIBI KÖBÖ TÄTE YE KÖMIKABA

Kä nämä 16 tibiti ye ngwane, ti ja mikaba precursor. Ti rün ye jämi ja mike testiko, ti nämä niken ño kukwe driebätä aune nitre nämä ti kukwe kain ngäbiti o ñakare ye tö nämä gai. Aisete, bati deu ti nieba ie, ti nämä ja di ngwen krubäte nitre tötikakäre Bibliabätä akwa ñan nämä kwen tie. Ye ngwane, rababa kwekebe aune tikwe ngwantariba ie: “¿Mä tö ja tötikai tibe?”. Töbikaba chi kwe biti nieba kwe tie: “Se ñobätä tikwe ñakare niedre mäi”. Aisete ti rün ye rababa ni ja tötika kena Bibliabätä tikwe. Aune ye kukwe bäri kwin rababa bare tibätä.

Tikwe ti rün tötikaba tärä kädeka nämä “La verdad os hará libres” yebätä. Nun nämä ja tötika ye ngwane ti rün ye nämä ti dimike rabakäre ni tötikaka kwin Bibliabätä ye ti jataba gain jabätä. Ñodre bati deu nun nämä ja tötike ye ngwane ti rün ñäkäba párrafo keteitibätä ye bitikäre nieba kwe tie: “Tärä tä kukwe ne niere. Akwa ¿kukwe ne metre ñokänti gare mäi?”. Ye ngwane ti rababa kwekwebe, dre niedre tikwe ie ñan rababa gare tie, aisete tikwe nieba ie: “Ti ñan raba kukwe ye mike gare gwängwäne mäi, akwa nikwe ja tötikaita bobuta ye ngwane, tikwe mikai gare mäi”. ¡Aisete ye erere tikwe nuainba! Bersículo ruäre nämä blite kukwe yebätä ye tikwe kädrieba ben. Yete ja käne ti rabadre ja tötike bäri kwin ye rababa gare tie aune ye köböire ti tädre juto biarebe nitre tötikakäre kwin Bibliabätä. Kukwe jökrä ne käkwe ti aune ti rün dimikaba nirien ja üairebiti. Drebätä ti rün nämä ja kite ye erere nämä nuainne aune kä 1952 ye ngwane ja ngökaba ñöte kwe.

KUKWE MADA TI DIMIKABA NIRIEN JANKUNU

Kä nämä 17 tibiti ye ngwane, ti rikaba mentokwäre. Kä ye arabe näire, Jethaa ye kädekaba misionera erere aune Don nübaiba Betel. Niaratre nibu ye ie asignación ye nämene tuin kwin krubäte, aisete niaratre erere ti töi rababa mada. Ye medenbätä, tikwe solicitud juanba Betel kräke aune Escuela Galaad ye kräke aune ti kukwe ye mikateba jökrä Jehová kisete. Akwa ye bitikäre ¿Dre rababa bare? Kä 1946 ye ngwane ti nübaiba Betel.

Kä nikanina kwati ta nete asignación keta kabre mikanina ti kisete Betel. Ye köböire kukwe keta kabre mrä mrä namanina gare tie. Ñodre, tärä imprimidre ye namani gare tie, contabilidad yebätä sribi gare tie, bätä Betel tä jondron ribere jai ye tita kökö aune jondron ruäre juanta mentokwäre ye tita nuainne siba. Akwa, kä niena 75 nete köbö kwatire kwatire kukwe kädrieta adoración matutina yete ye bäri käi juto tibätä aune kukwe mada mada kädrieta Bibliabätä ye arato.

Ti eteba Karl, yebätä kukwe rababa gare krubäte tie arato, niara ye rükaba Betel kä 1947. Niara ye ni ja tötikaka kwin krubäte aune ni tötikaka kwin krubäte. Bati ti nämä ja kite kukwe kädriekäre ngwane, tikwe ja di ribeba ie. Ti nieba ie kukwe keta kabre ti känänbare kukwe kädriei tikwe ye kräke akwa ño ükadrete jatäri ye ñaka rababa nemen tie aune ti dokwä rababa tare krubäte ye ti nieba ie. Niara kukwe ngwantariba tie yebiti ti mikaba töbika kwe, nieba kwe: “Joel, ¿Drebätä metrere kukwe kädriedre ribeta?”. Dre nie tö nämä kwe tie ye bätärabe rükaba gare tie: drebätä kukwe kädrie tö nämä metrere yebätä tikwe ja töi mikadre aune kukwe känäma kabre tikwe ye ti rabadre denkä. Kukwe ütiäte drieba kwe tie ye ñan käi nikwitekä jire tibiti.

Kä tädre juto Betelte nibätä yekäre, ni tädre kukwe driere. Ye köböire kukwe kwin keta kabre raba nemen bare nibätä. Ñodre, bati törö tie nun rikaba kukwe driere deu kä Bronx, Nueva York ye känti ngwane. Ti aune eteba iti ben ti rikaba meri iti nämä revista La Atalaya bätä ¡Despertad! kain ngäbiti, yekänti nun rikaba. Blita kömikakäre ben tikwe nieba ie: “Matare nunta blite nitre ben kukwe ütiäte Bibliabätä raba ni dimike yebätä”. Niara nieba tie: “Munta blite Bibliabätä angwane näin gwo”. Ye ngwane nunkwe ñäkäba aune töbikatariba texto tä blite Gobran Ngöbökwe yebätä aune kä mrä ja känenkäre kitra no yebätä. Meri ye ie kukwe ye rababa tuin kwin krubäte nunkwe gaba ñobätä ñan aune nun rikabata bämän madate ye ngwane, niarakwe ja ketamuko kwe aune nitre mada nübaibare ja gwirete kukwe Bibliabätä ye kukwe nuakäre. Kä rikaba ta ye bitikäre, niara aune muko kwe käkwe ja mikaba testiko Jehovakwe.

KUKWE KETA KABRE NEMEN GARE TIE TI MUKO YEBÄTÄ

Metrere tikwe ja töi mikaba ja mäkete akwa ti kukwe muko ñan kwanba jire tie, kä rikaba kwä jätä ye ngwane batibe ti kukwe muko kwanba tie. ¿Dre käkwe ti dimikaba ja muko kwin känene? Tikwe ja di käräba Jehovai aune ti nämä nemen ngwentari jai: “¿Tikwe ja mäkäite ye bitikäre ti tö dre nuaindi?”.

Gätä kri nuainba Estadio Yankees, kä 1953 yete ye bitikäre ja ngwai iti kädeka nämane Mary Aniol rababa gare tie. Niara ye janamane gwairebe ti ngwai ben Kwela Galaad nuainba bobukäre yete. Sribi misionera nuain nämä Marykwe bätä kä kabre te nitre kwati tötikanina kwe yebätä nämä blite kä juto biti tibe. Ja jataba nemen gare bäri nunye. Aune ja jataba tuin ja bä nunye, ye bitikäre nunkwe ja mäkäteba kä 1955 ye ngwane. Mary ye regalo ütiäte biani Jehovakwe tie aune niarakwe kukwe kwin bämikaba ti käne. Niara kukwe kwin bämikaba ti okwäbiti. Niara ye nämä kä juto biti käre asignación kwe ye nuainne, sribi ñäkwä mikadre kisete yebitita. Niara ye sribikä krubäte aune töi nämä metre nitrebätä, Gobran Ngöbökwe ye nämä mike nuaindre käne jai (Mat. 6:33). Nunkwe sribiba gwairebe kä komä jire te circuito yete aune kä 1958 nun nübaiba Betel sribire.

Kukwe rababa gare krubäte tie Mary yebätä. Ñodre, nunkwe krire ja mäkäteba ye ngwane, nunkwe ja töi mikaba ñäke Bibliabätä köbö kwatire kwatire versículo 15 jire bätä. Nun nämä ñäke texto yebätä, ye bitikäre texto ye raba nun dimike ño aune ño nun raba mike täte ño ye nun nämä kädriere jabe. Bä kabre, Mary ye ja nämene ño Galaad yete aune sribibare kwe misionera erere yebätä nämä niken blite tibe. Nämä blite tibe ye ti dimikaba krubäte, ja ngwen bäri töbätä aune kukwe kä driere bäri kwin gätäte bätä ja ngwaitre ye ti raba dimike ño bäri kwin ye rababa gare tie arato niara köböire (Prov. 25:11).

Kä 2013 ngwane ti muko tare tikwe Mary ye krütaba tikän. ¡Ti tö niara tuaita krubäte kä bä nuäre yete! Köbö ye rükadre känenkri ti täbe ja kite jankunu aune tö ngwen jankunu Jehovai ja brukwä täte biti (Prov. 3:​5, 6). Juta Ngöbökwe käkwe dre nuaindi kä bä nuäre yete, yebätä tita töbike ngwane, tita nementa dite aune käta nemen juto tibätä. Kä mrä ye ngwane, ni Tötikaka Bäri Kri ye käkwe kukwe mrä mrä driedi nie niara ye rabadi gare bäri kwin nie. Jehová ye käkwe kukwe keta kabre kwin driebarera tie aune kukwe ñaka näin bä ti kräke ye nuainbarera kwe ti kräke, tikwe debe biain bä kabre Jehovai akwa ja ütiä ñan rabai bianbare täte ie tie.