Jehová aune Jesús töita ño yebätä ja kitadre

1, 2. a) ¿Jehová taredre ye dre gärätä? b) ¿Jesús nämäne Jehová tarere ye bämikani ño kwe?

KUKWE biani ja jie ngwankäre Moisés ie ye meden bäri ütiäte ye Jesukwe mikani gare mrebe kukwe ne niebare kwe ngwane: “Amne ni Dänkien Ngöbö aibe tare ja üai ngöi jökrä, ja töi ngöi jökrä amne ja di ngö jökrä” (Mar. 12:30). Nikwe Jehová taredre dre tä nikwe ye jökräbiti aune ja brukwä tätebiti. Ye abokän ni tö dre ie, ja ruin ño nie aune ni di nuäi yebiti. Ne madakäre, ni töi yebiti ye abokän nita töbike drebätä ye gärätä. Nita Jehová tarere yebätä nita ja ngwen niara erere. Akwa metrere, Jehová töi ño ñan rükai gare metre ta nie. Akwa nikwe ja kitai “Jesús töi nämäne ño” yebätä ngwane rükai gare nie ñobätä ñan aune, Rün nämäne töbike ño ye erere ja ngwani kwe (1 Cor. 2:16 nota de estudio “nosotros sí tenemos la mente de Cristo”).

² Jesús nämäne Jehová tarere ja töi tätebiti. Ngöbö töi nämäne ño niara kräke nämäne gare ie yebätä töi nämäne kwatibe mikabätä täte ja tare nikai kwe yebiti ta. Rünkwe kadre ngäbiti yebätä ja töi mikani kwatibe kwe, ye medenbätä ñaka ja tuanimetre kwe ja töi gainte kukwe mada mada yei.

3. ¿Dre namani gare Jesubätä apóstol Pedro ie aune nitre kristiano töi mikani dre nuainne kwe? (1 Pedro 4:1).

³ Jesús töi nämäne ño ye namani gare bäri kwin Pedro aune nitre ja tötikaka mada Jesukwe ye ie ñobätä ñan aune niaratre ye nämäne Jesube. Pedro käkwe tärä tikabare kena üai deme köböire ye ngwane, nitre kristiano ye töi mikani kwe ja mike juto Jesús töi nämäne ño ye erere (ñäkädre 1 Pedro 4:1 yebätä). “Munkwe ja mika biare” juto niebare Pedrokwe ngwane blitabare kwe ni rükä ye kwere. Yebiti mikani gare kwe ja töi mikai Jesús ye erere ngwane, Jesús ye rabai jondron rükäre dite abokän biti ni raba ja kriemike aune rabakäre dite jabätä rükäre jondron blo ie ni tö yebätä aune kä gobrainta Satanakwe nete yebätä (2 Cor. 10:​3-5; Efes. 6:12).

4. ¿Kukwe ja tötikara nekänti dre rabai gare nie?

⁴ Kukwe ja tötikara nekänti blitai Jesús töita ño yebätä. Kena ni raba 1) ja töi mike ño Jehová erere 2) ja ngwen bobre aune 3) töbike kwin käne.

JEHOVÁ TÄ TÖBIKE ÑO YEBÄTÄ JAKITADRE

5. Ñongwane Pedro ñan töbikabare Jehová erere ye mä raba mike gare.

⁵ Bati Pedro ye ñaka nämäne töbike Jehová nämäne töbike ye erere ye bämikani kwe ye ani mike gare jai. Jesús niebare nitre ja tötikaka kwe yei niara näin Jerusalén ngwane, nitre kukwe madabätä käkwe niara kai ngite, nuaindi tare bätä murie ketai (Mat. 16:21). Jesús ye abokän Mesías aune niara käkwe juta Ngöbökwe ye mikai kwäre käbämikani ye nämäne gare kwin Pedro ie akwa Jesús murie ketadre ye Jehovakwe ñaka tuainmetre nemen bare ye ñan namani nuäre ka ngäbitikäre Pedro ie (Mat. 16:16). Ye medenbätä Jesús jänikani jenena kwe aune niebare kwe ie: “¡Däkien, ja tarereta akwle! Kukwe ye ñan rabai bare jire mäbätä” (Mat. 16:22). Pedro ñaka ja töi mikani Jehová nämäne töbike ño ye erere ye medenbätä kukwe niebare kwe ye ngwane, ñan nämäne töbike ja erebe Jesús ben.

6. ¿Jesús töi nämäne Jehová erere ye bämikani ño kwe?

⁶ Jesús ye nämäne töbike Rün ye erere. Yebätä kukwe ne niebare kwe Pedro ie: “¡Näinte ti trökri, Satana! Mä abokän tä ti ngoto ngwen ritete ñobätä ñan aune Ngöböta töbike ño ye erere mä ñan töbike, ñakare aune mäta töbike ni kä nebätä erere” (Mat. 16:23). Jesukwe Jehová töi nuaindre ye ngwane, ja tare nikadi kri kwe bätä krütai ye nämäne gare kwin ie. Yebätä Pedrokwe mäträbare bätä ye ngwane, ñan kukwe nuani kwe akwa Pedro käkwe mäträbare töi bökänbiti bätä raba ruin nie. Akwa, ye köböire Pedro ye ñaka nämäne töbike Jehová töi ño ye erere ye nükani gare kwin ie. Metrere. ¡Kukwe kwin ja töi kräke ni kräke arato!

7. ¿Pedro nämäne ja di ngwen ja töi mikakäre Jehová erere ye bämikani ño kwe? (Üai mikadre ñärärä).

⁷ Kä nikani ta ye bitikäre, Pedro ye nämäne ja di ngwen ja töi mikakäre Jehová ye erere ye bämikani kwe. Jehovakwe ja töi mikani nitre ñaka judío ye kain ngäbiti juta kwe yete. Ye ngwane Pedro ye rikadre kukwe driere Cornelio ye ie ribebare kwe, Cornelio ye rabai ni kristiano kena ñaka judío ye erere. Metrere, nitre judío ye ñaka nämäne ja kete jire nitre juta madate yebe yebätä, Pedro kräke ña rabai nuäre sribi ye ka ngäbitikäre. Akwa Jehová töi nämäne ño mikani gare ie ngwane, ja töi kwitani kwe. Cornelio Pedro käräba ja gwirete ye ngwane, Pedro ‘ñan namani kwekebe’ (Hech. 10:​28, 29). Gwi yete kukwe driebare kwe Cornelio aune nitre nämäne nüne ben yei aune ja ngökani ñöte kwetre (Hech. 10:​21-23, 34, 35, 44-48).

8. ¿Nita töbike Jehová erere ye ni raba bämike ño? (1 Pedro 3:8 ).

⁸ Kä nikani kwatí ta ye bitikäre, Pedrokwe mäträbare ne kwrere nitre kristiano bätä: “munkwe töbika ja erebe” (ñäkädre 1 Pedro 3:8 yebätä). Nitre testiko töi rabadre ja erebe yekäre, Jehová töita ño ye erere rabadre töbike, kukwe kwe yebätä raba kwen nie. Ñodre, Jesús käkwe nitre ja tötikaka ben ye töi mikani Gobran Ngöbökwe mike nuaindre käne jai (Mat. 6:33). Ani kukwe bämike keteiti ja töite. Ja mräkä konkrekasionte iti käkwe sribi köbö täte ye diandre nuaindre jai ye ngwane, ¿Pedro käkwe kukwe niebare Jesús ie ye erere nikwe niedi ie? Ñakare. Ja mräkä ye käkwe sribi köbö täte diani jai yebätä nikwe kukwe kwin niedre ie aune ni ja töi mikai dimike.

JA TÖI MIKADRE BOBRE

9, 10. ¿Ja töi mikadre bobre ye Jesús bämikani ño?

⁹ Jesús murie keta jämi ye känenkri, ni raba ja ngwen ño bobre ye driebare kwe Pedro aune nitre ja tötikaka mada kwe yei. Pedro aune Juan ye rabadre niken kä ükete aune mrö sribere ye Jesukwe ribebare ietre murie keta jämi ye känenkri. Akwa siä kri tädrera biarebe ükaninte ñö ngwäre aune dänkwä tädrera ja ngoto rötakäre yebätä ja töi mikani kwetre ne kwe nitre rükadre mröre ye ngoto bätädrete. Akwa ¿Nirekwe sribi ñan ütiäte ne nuainbare?

¹⁰ Sribi ne abokän ni klabore yekwe metrere. Akwa nete Jesús käkwe ja töi mikani nitre ye ngoto bätete kä jutobiti. Jesús käkwe dänkwä mäkätebare ja mrökarabätä biti nikani nitre ja tötikaka kwe ye ngoto bätete ye ngwane, nitre ja tötikaka kwe ye namani ¡kada ngianinkä!, ñobätä ñan aune ñan Jesús ye aikwe sribi ye nuaindi ngüba nämäne kwetre, ye bämike ja töite (Juan 13:​4, 5). Jesukwe nitre 12 jire ngoto bätäninte ngätäite Judas nämäne. ¿Sribi ne krütani kä nuai Jesús ie? yebätä mä tärä töbike, akwa bitikäre Judas yekwe Jesús kitani ngise. ¡Metrere Jesús käkwe ja ngwani bobre! Akwa ñobätä Jesús ja ngwanbare kore, ye mikani gare kwe töi jämebiti nitre ja tötikaka kwe yei, niebare kwe: “¿Ñobtä tikwe mun ngoto bätrite ye nü gare munye ya? Ti abko Dirikä amne ti mun Dänkien munta niere tie, ye abko kukwe era erere munta niere, ñobtä ñan angwane ti abko Dirikä amne ti mun Dänkien bkänä. Ti Dirikä amne ti mun Dänkien käkwe mun ngoto bätrite jökrä ni klabore, ye kwrere munkwe ja mika bobre ni klabore kwrere, käkwe ja ngoto bätädrete jae kwärikwäri, tikwe nuni ye kwrere” (Juan 13:​12-14).

11. ¿Ja töi mikadre bobre ye namani gare Pedro ie ye bämikani ño kwe? (1 Pedro 5:5; üai mikadre ñärärä).

¹¹ Ja töi mikadre ño bobre ye namani gare Jesubätä Pedro ie. Jesús nikaninanta kä kwinbiti ye ngwane, Pedro kukwe ñan tuabare nuainbare ye abokän ni iti därebare nankwente ye Pedrokwe mikaninta räre (Hech. 1:​8, 9; 3:​2, 6-8). Gare metre nie erere Pedrokwe kukwe ñan tuabare nuainbare ye käkwe nitre kwati töi mikani niä (Hech. 3:11). Akwa, ¿Pedro käkwe dre nuainbare? Pedro därebare yekänti nitre nämäne kukwe ñan tuabare nuainne mikadre ütiäte nie nämäne, ye ngwandre törö jai. ¿Yebätä Pedro kukwe nuainbare ye aibätä käikitadrekä ngübabare kwe? Ñakare, ja töi mikani bobre kwe aune Jehová bätä Jesús ye käikitaninkä kwe. Kukwe ne niebare kwe Jesubätä: “Jesús kä, ne käkwe ni ne mikani dite, aisete nun tä tödeke niara käbiti” (Hech. 3:​12-16). Kä nikani ta ye bitikäre ñobätä ütiäte ja töi mikadre bobre ye Pedro käkwe tikabare nitre kristiano ie. Kukwe kädekaninte kwe ye nüke törö nie Jesús nitre ngoto bätäninte aune dänkwä mäkäni ja mrökarabätä kwe ye tä nüketa törö nie (ñäkädre 1 Pedro 5:5 yebätä aune nota ketebukäre ye mikadre ñärärä).

12. Pedro erere ¿ni raba ja töi mike ño bobre?

¹² Ni raba ja töi mike bobre nuainbare Pedrokwe erere. Kukwe keteiti käkwe ni dimikai nuainkäre, ye abokän ja töi mikadre bobre ye kite ni töite aune ni brukwäte, ñan nita kukwe niere jerekäbe aibe, ye nikwe ngwandre törö jai. Kukwe ye arabebätä blitabare 1 Pedro 5:5 ja “töi mikadre bobre” niebare ye ngwane. Nita jondron mada nuainne ni mada kräke Jehová tare nikwe yebätä o ja mräkätre tare nikwe yebätä, akwa ni käikitadrekä ye ñan aibätä nita nuainne. Jehová mikadi täte kä jutobiti aune sribidi ja mräkätre kräke ye ngwane, ni mada tädre ni mike ñärärä ye ñan ngüba täi jire ye ngwane ni töi bobre ye nikwe bämikadi (Mat. 6:​1-4).

“TÖBIKADRE KWIN” JA KÄNE

13. ¿‘Töbikai kwin’ ngwane dre nuaindi?

¹³ ¿“Töbikakäre kwin” dre nuaindre? (1 Ped. 4:7). Ye abokän nita kukwe meden meden den nuaindre jai yebiti nita töbike Jehová erere ye bämikai. Arato nita ja kete Jehovabe ye bäri ütiäte jondron mada yebiti ta ni kräke. Töbika täi kwin ja käne ye ngwane, jondron garera jökrä nie ye erere nikwe ñaka ja bämikai. Ne madakäre, nikwe ja di kärädre Jehovai töi bobrebiti ne kwe ni jie ngwandre kwe.a

14. Ñongwane Pedrokwe ñaka ja jie ngwamana Jehovai ye mä raba niere.

¹⁴ Jesús murie keta jämi ye känenkri deu, kukwe ne niebare kwe nitre ja tötikaka kwe yei: “Matare deu, kukwe rabai bare tibätä ye käkwe mun jökrä ngwain ngoto ritete”. Pedro ñan töbikabare kukwe ne niekäre Jesús käre: “Kukwe rabai bare mäbätä ye käkwe nitre jökrä ngwain ngoto ritekä akwa, ¡ti ñan ngoto ritaite jire”. Köbö yete deu Jesukwe mäträbare ne kwrere bätätre: “Ngwätere aune orare jankunu” (Mat. 26:​31, 33, 41). Kukwe niebare Pedrokwe Jesuye ye mikadre täte kwe akräke kä jürä ñaka rabadre bätä, “Jesús gare tie” ye niekäre. Akwa, ñan kukwe ye mikani täte kwe ye köböite Jesús ñaka gare ie niebare kwe yebätä bitikäre, ¡ja muaibare krubäte kwe! (Mat. 26:​69-75).

15. ¿Dre käkwe Jesús dimikani töbike kwin käne murie keta jämi ye känenkri?

¹⁵ Käre Jesukwe ja jie ngwamana Jehovai. Metrere niara ye töi metre akwa orabare bä kabre kwe murie keta jämi ye känenkri. Ye köböire, kä jürä ñaka namani bätä Rün kwe ye töi nuainkäre (Mat. 26:​39, 42, 44; Juan 18:​4, 5). Jesús nämäne orare krubäte jutuabare Pedro ie ye nämäne kwekebe töite, ñaka käi kwitaninkä jire jabiti kwe raba ruin nie.

16. ¿Pedro namani töbike kwin ja käne ye bämikani ño kwe? (1 Pedro 4:7).

¹⁶ Ja di kärädre Jehovai orasionte ye ütiäte krubäte nükani gare Pedro ie. Jesús ganinkröta ye bitikäre Pedro aune nitre ja tötikaka mada ye ie üai deme biain kwe kukwe driekäre niebare kwe. Akwa kukwe ye ngübakäre niaratre rabadre kwekebe Jerusalén niebare kwe ietre (Luc. 24:49; Hech. 1:​4, 5). Pedro nämäne kukwe ye ngübare ye ngwane ¿dre nuainbare kwe? Niara aune nitre kristiano mada ye nämäne “ja ükekrö käre blitakäre Ngöböbe” nieta Bibliakwe (Hech. 1:​13, 14). Kä nikani ta ye bitikäre, Pedro tärä tikani kena yete nitre kristiano ye töi mikani kwe töbike kwin ja käne aune käre rabadre ja die kärere Jehovai orasion yete ye niebare kwe ietre (ñäkädre 1 Pedro 4:7 yebätä). Metrere Pedro ye namani ünä ja üairebiti aune käre nämäne ja di kärere Jehovai bätä namani üra dite ye kwrere konkrekasion kräke (Gál. 2:9).

17. ¿Dre nuaindre käre jondron nuain gare kwin nie yebiti ta? (Üai mikadre ñärärä).

¹⁷ Töbikakäre kwin ja käne yekäre oradre Jehovai. Ja jie ngwan manandre Jehová ye gare metre nie. Kukwe raba tuin nuäre nuainkäre nie akwa yebiti ta nikwe ja di kärädre ie. Bärira jire kukwe ütiäte nikwe dian nuaindre jai ye ngwane nikwe ja jie ngwamana ie ñobätä ñan aune dre bäri kwin ni kräke gare kwin Jehovai gare nie yebätä.

18. Pedro erere, ¿ni raba dre nuainne?

¹⁸ Jehová töi kwin keta kabre ye erere ni raba ja ngwen ñobätä ñan aune niarakwe ni sribebare ja bä kwrere yebätä. Yebätä nita debe bien ie (Gén. 1:26). Metrere Jehová tä töbike ño ye erere nikwe ñaka nuaindi metre ta ye gare nie (Is. 55:9). Akwa, Pedro erere, ni raba ja kite töbikakäre Jehová erere bätä ja ngwandre töi bobre aune töbikadre kwin ja käne.