Ja mikadre juto ja tötikakäre

Nita ja tötike Bibliabätä ngwane, dreta nemen gare nie Jehovabätä yekwe ni töi ükadrete, ja ruin ño nie aune ni tö dre nuain yebätä ni dimikadre kwe ie ni tö. Esdras ja ngwani ño ye erere nikwe ja di ngwandre ja ngwen, niara “nämene ja brukwä ükete ja tötikakäre Jehová Kukweibätä” (Esd. 7:10). ¿Esdras erere mä raba nuainne ño?

Nikwe oradre. Mä jämi ja tötike ye känenkri, Jehovakwe mä dimikadre kukwe mike nüke gare jai aune mike täte ye mäkwe ribe ie (Sal. 119:​18, 34).

Nikwe ja töi mikadre bobre. Nire tä bike kri aune tö ngwen akwle jai ye ngäniene Jehovata kukwe metre ye üke (Luc. 10:21). Mäta kukwe känene ngwane, mäkwe ñan nuain ja dikaikäre. Mä tädre ñäke kukwe keteitibätä aune kukwe ruärebätä mä rabadre ja töi kwite rüka gare mäi ngwane, mäkwe ja töi mika bobre aune drebätä mä ja töi kwitadre ye erere mäkwe nuain.

Mäkwe kansion kukwe nua. Musika ye tä kä mike juto ni brukwäbätä. Ye medenbätä ja tötika Bibliabätä känenkri kansion kukwe nuadre ye tä ni dimike ja töi mike Jehovabätä aune dre tä nemen gare nie ye tä mate ni brukwäte.