Ni ja tötikaka ye dimike ja mike kukwe metre yekri

1, 2. a) ¿Dre raba nitre ja tötikaka ketebätä rabakäre testiko Jehovakwe? b) ¿Dre raba gare nie kukwe ja tötikara nekänti?

NI TÖ namani ja mikai testiko Jehovakwe ngwane, kukwe ruäre namani ni mike töbike. Nane ni mräkätre o ja ketamuko nikwe ja mikadre ni rüere o Ngöböta dre ribere ye erere ñan rabai nemen bare nie nütü namani yebätä. Kukwe ne namani bare mäbätä ngwane, kukwe ye erere tä nemen bare ja tötikaka mäkwe bätä, niara kräke ñan nuäre ja mikakäre biarebe testiko Jehovakwe ye töi rükai gare mäi.

² Kukwe ne raba nitre ja tötikaka ye ketebätä ririakäre kukwe ja üairebiti ye nämene gare Jesús ie (Mat. 13:​20-22). Akwa nitre ye ñaka rabai ja tötikaka kwe ye ñan nütübare kwe. Jesukwe kukwe bämikani ni käne erere nikwe nuaindi ngwane, ni rabai ni ja tötikaka nikwe dimike kukwe ne känti 1) dre tä niara ketebätä ririakäre ja üairebiti yebätä dimikadre, 2) dimike Jehová tarere bäri, 3) kukwe meden bäri ütiäte rabadre nuainne yebätä nikwe töi mikadre 4) ja mikadre rüere ngwane raba dre nuainne yebätä dimikadre. Jesús erere ¿ni ja tötikaka nikwe ye dimika raba ño nemen testiko Jehovakwe tärä Mä raba nüne kä jutobiti kärekäre yebiti? Ye rabai gare nie.

DRETA NI JA TÖTIKAKA YE KETEBÄTÄ RIRIAKÄRE JA ÜAIREBITI YEBÄTÄ DIMIKE

3. ¿Dre namani Nicodemo ketebätä ja mikakäre ja tötikaka Jesube?

³ Nicodemo abokän ni ji ngwanka ütiäte nitre judío ngätäite aune kukwe ruäre nämene niara ketebätä rabakäre ja tötikaka Jesukwe. Jesús nükani kä tibienbätä ngwane sö ruäre te kukwe driebare kwe ngwane niara Mesías namanina gare Nicodemo ie (Juan 3:​1, 2). Akwa yebiti ta ja töi mikani kwe blite gore Jesube ñobätä ñan aune nitre judío jürä namani bätä yebätä (Juan 7:13; 12:42). Ja mikai ja tötikaka Jesube kwe ngwane kukwe ruäre riaite kän namani nütüre ruin nie.a

4. ¿Jehová nämäne dre ribere Nicodemobätä yebätä Jesukwe dimikani mike nüke gare ño jai?

⁴ Ley Moisekwe nämäne gare kwin Nicodemo ie akwa dre nuaindre kwe Jehová nämäne ribere bätä ye driedre ie nämä ribere jai ngwane ¿Jesukwe dimikani ño? kä dianinkä kwe kräke jai, nämäne juto rikakäre känti deu aune dre nuaindre kwe ja mikakäre ja tötikaka, ye Jesukwe driebare kwin ie. Nämäne ja mike ngite yebätä ja töi kwitadre kwe, ja ngökadre ñöte kwe aune nämäne tödeke Ngöbö monsoi biti bämikadre kwe ye mikani gare kwe ie (Juan 3:​5, 14-21).

5. ¿Dre ta ja tötikaka mäkwe ketebätä ye mikakäre gare jai mäkwe dre nuaindre?

⁵ Ja tötikaka nibe ie kukwe drieta Bibliakwe ye nüke gare kwin akwa dre tä ketebätä ne kwe ririadre ja üairebiti ye niedre ie ye ribere raba ruin nie. Tä sribire krubäte yebätä o mräkä kwe ñan tö tuai nemen testiko erere yebätä akwa ¿ni raba ja ngwen ño Jesús erere? Ja tötikaka kräke kä diandrekä jai ñodre nübai raba cabe ñain chi jabe, ni rikadre basare ben, ye ngwane ja rabai ruin kwin jäme ie aune dre tä ketebätä ja mikakäre testiko ye rabai nuäre niekäre ie. Ne madakäre dre nuain raba kwe kukwe ruäre ükatekäre yebätä mä raba dimike. Jehová tare kwe yebätä ja di ngwain kwe kukwe ruäre nuainne aune ñan mä ai köböire ye mä ngwanta törö ie.

6. ¿Kukwe nemen gare ni ja tötikaka ie Bibliabätä aune mikadre täte kwe yekäre dimikadre ño? (1 Corintios 16:13).

⁶ Ni ja tötikaka ie dre nemen gare Bibliabätä erere rabadre nuainne yekäre Jehovakwe niara dimikai kukwe ja jie ngwankäre ye mike täte ye tädre gare ie (Ñäkädre 1 Corintios 16:13 yebätä). ¿Mä raba dimike ño?. Mä nämä niken kwelate ngwane, ¿maestro töi ño ben ja nämä ruin kwin mäi? Metrere maestro nämä mä ngübare bätärekä aune mä raba dre nuainne ye nämä mä dimike nuainne. Maestro töi kwin ye erere ja ngwen, dre drieta Ngöbökwe erere mäkwe drie jökrä ie. Kukwe ruäre bätä rabadre ja töi kwite yebätä Ngöbökwe dimikai ye mä ngwan törö ie aune ¿Mä raba ja tötikaka dimike ño mada?

JA TÖTIKAKA MÄKWE YE DIMIKE JEHOVA TARERE BÄRI

7. ¿Nitre nämäne Jesús kukwe nuin, ye Jesukwe dimikani ño Ngöbö tarere bäri?

⁷ Nireta Jehová tare ye kräke rabadi bäri nuäre mikakäre täte ye nämäne gare Jesús ie yebätä, Jesús nämene käre blite kukwe kwin Ngöbökwebätä ne kwe nitre ye dimikadre kwe Jehová tarere. Ñodre ni rün iti tä jondron kwin bien monso kwe ie yebätä bämikani (Mat. 7:​9-11). Nitre nämäne Jesús kukwe nuin ye ruäre ie ni rünta ni tarere ye ño ye ñaka nämäne gare yebätä ja namani ruin ño ietre ye bämike ja töite, monso käkwe ja ngwani blo ye ngwane rünkwe mikaninta tuin bobre jai aune kani ngäbitita kwe kä jutobiti yebätä kukwe bämikani kwe. Monso yekwe ja töi kwitani kukwe blo nuainbare kwe yebätä. Kukwe niebare kwe nebiti Jehovata nitre kä tibienbätä ye tare krubäte ye namani gare ietre (Luc. 15:​20-24).

8. ¿Mä raba ja tötikaka Bibliabätä mä ben ye dimike ño Jehová tarere bäri?

⁸ Jehová töi kwin keta kabre ye mäkwe kädekaite ja tötikaka mäkwe ie ngwane, mäkwe dimikai Jehová tarere bäri. Kukwe tä nüke gare ie Jehová köböire aune niara tare Jehovakwe ye mäkwe drie ie. Jesús ja nire biani ni ütiäre ye regalo ütiäte biani niarai ye mäkwe drie ie (Rom. 5:8; 1 Juan 4:10). Ngöbökwe ni ja tötika ye tare krubäte ye rükai gare ie ngwane tö rabai Jehová taredi bäri (Gál. 2:20).

9. ¿Dre käkwe Michael dimikani ja töi kwite?

⁹ Michael, kai Indonesia yebätä ye ani kukwe mike gare jai. Kukwe metre ye namani gare ie nämäne chi ye ngwane, akwa ñaka ja ngökani ñöte kwe. Kä nämäne 18 biti ngwane nikani juta madate sribikäre camion ngwankäre, kä nikani ruäre ta ye ngwane nükaninta Indonesia yete ja mäkätebare kwe, monso merire nämäni kwe. Akwa sribibare jankunu kwe juta madate, ye näire ngängän aune muko kwe jatani ja tötike Bibliabätä aune ja töi kwitani kwetre. Michael meye krütani yebätä jataninta ja käite rün kwe ngübakäre ye ngwane, ja tötika Bibliabätä ye kani ngäbiti kwe tärä Mä raba nüne kä jutobiti kärekäre kukwe ja tötikara 27, seccion “Ja tötike bäri nguseta” ye matani brukwäte. Jesús ja tare nikani ye namani tare Jehovai ye nükani gare ie ngwane muabare kwe. Kukwe yekwe mikani ja töi kwite aune ja ngoko ñöte.

DRE BÄRI ÜTIÄTE YE MÄKWE JA TÖTIKAKA MABEN DIMIKA MIKE NÜKE GARE JAI

10. ¿Kukwe bäri ütiäte mikadre nuaindre käne jai yebätä Jesukwe nitre ja tötikaka kwe dimikani ño? (Lucas 5:​5-11; üai mikadre ñärärä).

¹⁰ Nitre ja tötikaka Jesukwe känekäne yei Jesús ye abokän Mesías nämäne gare, akwa kukwe drie ye bäri ütiäte ye rabadre nüke gare ietre. Pedro aune Andrés nämäne ja tötikaka Jesube ye ngwane, sribi nämäne kwetre ye tuadremetre kwe aune rabadre kukwe driere köbö täte ye Jesukwe ribebare ie (Mat. 4:​18, 19). Santiago aune Juan nämäne gwa rürübäine ye nämäne niaratre dimike (Mar. 1:​16-20). Pedro aune Andrés “krade tuanimetre aune nikanintre”, Jesús jiebiti akwa kukwe ruäre ükaninte kwe nekwe jondron tädrera mräkätre kwe yekwe. ¿Drekwe dimikani kukwe bäri ütiäte mikakäre nuaindre jai? Lucas niebare Jesukwe kukwe ñan tuabare nuainbare ye niaratre dimikani dre ribe nämäne kwetre ye Jehová bian ietre yei tö ngwani kwatibe kwetre (ñäkädre Lucas 5:​5-11 yebätä).

11. ¿Tödeka ja tötikaka nikwe ye rabadre bäri dite yekäre dre nuaindre?

¹¹ Jesús erere ni ñan raba kukwe ñan tuabare nuainne akwa nire tä Jehová mike käne ye niarakwe dimikai yebrä ni raba mike gare ja tötikaka nikwe ie. Ñodre mä jatani ja ükekrö gätäbätä ye ngwane ¿Jehovakwe mä dimikani ño ye törö mäi? mäkwe blitabare jefe mäkwe ben raba ruin nunye, ñan sribikäre ora biti bäri ñan gätä ye juankäre ja bäre. Mäkwe kukwe ne mikai gare ja tötikaka mäkwe ie ye ngwane, mäkwe kukwe ruäre ükaninte jai rikakäre gätäbätä ye köböire Jehovakwe mä dimikani aune ye käkwe tödeka mäkwe mikani bäri dite mäkwe nie ja tötikaka mäkwe ie.

12. a) ¿Ja mräkätre ja tuani kukwe jene jene ben ye mäkwe nübaidre ja tötikaka mäkwe känti ye ñobätä käin? b) ¿Ja tötikaka mäkwe rabadre Jehová mike käne jai yekäre mä raba dimike ño? Mä raba mike gare.

¹² Ja mräkätre käkwe kukwe ruäre nuainbare Jehová mikakäre käne jai ye täindre ie ye raba ja tötikaka mäkwe dimike. Yebätä, ¿ñobätä mä ñan niken ja mräkätre käkwe ja tuani kukwe jene jene ben Jehová mikakäre käne ye ngwena känti? Aune jatani ja ükekrö ye ngwane dre nuainbare kwe, Jehová namani gare ño ie aune dre nuainbare kwe kukwe bäri ütiäte ye mikakäre käne jai, niedre kwe ja tötikaka mäkwe ie ye mäkwe ribe ie. Ne madakäre mä raba kä denkä jai töbikakäre video tä tärä Mä raba nüne kä jutobiti kärekäre yebätä seccion “Ja tötike bäri nguseta” yebätä arato “Kukwe mike gare bäri jai”, yebätä. Ñodre mätä kukwe ja tötikara 37 yete ngwane, video kädekata Nita dre ribere jai ye Jehovakwe biain nie yete kukwe ütiäte tä yebätä blite ja tötikaka mäkwe ben.

JA TÖTIKAKA MÄKWE DIMIKE JA TUAKARE KUKWE TARE BEN

13. ¿Jesukwe ja tötikaka kwe ye dimikani ño ja tuakäre ja mikadre rüere ye ngwane?

¹³ Ja tötikaka Jesukwe ye rüere nitre käkwe ja mikadi aune mräkätre kwetre ja mikadi rüere siba niebare Jesukwe ietre (Mat. 5:11; 10:​22, 36). Ja nire kwetre ye raba nemen kukwe tare te ye Jesukwe niebare ie jämi krüte ye känenkri (Mat. 24:9; Juan 15:20; 16:2). Akwa kukwe driere jankunu yekäre rabadre nain mokre, töbikadre kwin käne kwe aune ja mikadre rüere ngwane ñan rüdre kwe.

14. ¿Ja tötikaka mäkwe rüere ja mikadre ye känenkri mä raba dimike ño ja tuin ben? (2 Timoteo 3:12).

¹⁴ Jesús erere ni raba ja tötikaka nikwe dimike ja tuakäre ja mikadre rüere ye ngwane. Ñodre mräkätre, ja ketamuko kwe o sribikä ben ja mikadre rüere ngwane, dre niedre kwe o dre nuaindre kwe ye tädrera gare ie (ñäkädre 2 Timoteo 3:12 yebätä). Sribikä ben raba kötaire tä ja ngwen ño aune tä kukwe mike täte yebätä. Aisete mäkwe blitadre ja tötikaka mäkwe yeben ja mikadre rüere ye känenkri, kukwe ye rabadi barebätä ngwane dre nuaindre kwe o dre niedre kwe ye täi gare ie.

15. ¿Ja tötikaka mäkwe rüere mräkätre käkwe ja mikadre ngwane mä raba dimike?

¹⁵ Ni ja tötikaka nibe rüere ja mikadre mräkätrekwe ngwane, ñobätä ja mikata rüere yebätä mäkwe mika töbike. ¿Niara ngökata ruin mräkätre ie? o ¿rekäbe nitre testiko ye ñan tuin bä ietre yebätä? Jesubätä kukwe ye erere namani bare, ka ngwarbe dokwäbiti niebare mräkätrekwe ie (Mar. 3:21; Juan 7:5). Ja tötikaka mäkwe ye rabadre kukwe ngübare bätärekä, töbike kwin käne blitakäre ni jökrä ben aune mräkätre kwe ben ye ütiäte krubäte.

16. ¿Ni raba ja tötikaka ye dimike ño blitakäre kwin käne?

¹⁶ Ni ja tötikaka tä dre mike täte ye mräkätre tö mikai gare jai ngwane ¿dre nuaindre kwe? Rabadre blite kukwe nuäre aune braibebiti mräkätre kwe ben ribedre ni ja tötikaka ie, ye köböire mräkätre kwe ye tö rabai ja kitai bäri Bibliabätä (Col. 4:6). Arato sitio jw.org yebätä rabadre blite bentre. Mräkätre tö rabai kukwe mike gare bäri jai ni testiko Jehovakwe bätä ngwane raba niken sitio yete kukwe känene.

17. ¿Drebiti ni raba ja tötikaka nikwe dimike blitakäre bäri käin ni mada tä kukwe ngwentari ie ngwane? (Üai mikadre ñärärä).

¹⁷ Sección “Kukwe ngwantarita bäri nitre testiko Jehovakwe” yebätä tä jw.org yete yebiti mä raba ja tötikaka ye dimike, ne kwe rabadre blite kukwe nuäre aune braibebiti mräkätre kwe ben o sribikä ben(2 Tim. 2:​24, 25). Tärä Mä raba nüne kä jutobiti kärekäre kukwe ja tötikara keteitire keteitire ngwanta krüte, recuadro mrä kädekata “nitre ruäre tä kukwe ne niere” yebiti mä raba ja tötikaka kite nekwe rabadre blite ja kukweibiti aune tä ja di ribere ngwane mä raba dimike kukwe niere bäri mrebe ye köböire drei tä tö ngwen ye mikadi gare bäri kwin kwe.

18. ¿Mä raba dre nuainne ja tötikaka mäkwe dimikakäre kukwe driekäre konkrekasion ben? (Mateo 10:27).

¹⁸ Jesús nitre ja tötikaka töi mikani kukwe driere nitre jökrä ie (ñäkädre Mateo 10:27 yebätä). Erere arato ja tötikaka nikwe ye töi mikai kukwe driere bäri jötrö ngwane, rabai tö ngwen bäri Jehovai aune Jehovata dimike ño ye jutuai ie. Akwa ¿mä raba dimike ño kukwe driere konkrekasion yebe? Campaña nuainta kukwe driekäre ngwane dre ribeta rabakäre kukwe driekä ye mä raba kädriere ben ye ngwane rabai bäri nuäre niara kräke kukwe drie kömikakäre ye mäkwe nie ie. Arato mä raba töi mike ja kä tike kwela kukwe bämikakäre gätä nuainta bämän ngrabare kräke yete ye köböire, dre ie tä tö ngwen ye täi gare kwin ie aune mikadi gare bäri kwin kwe.

MÄTA TÖ NGWEN JA TÖTIKAKA MÄKWE IE YE MÄKWE BÄMIKA

19. ¿Jesús nämäne tö ngwen nitre ja tötika kwe ie ye bämikani ño kwe aune ni raba ja ngwen ño niara kwrere?

¹⁹ Jesús kebe krüte aune niken kä kwinbätä, ye ngwane niabare kwe ja tötikaka kwe ie niara täita bentre. Niaratre näin kä kwinbätä yebätä Jesús nämäne blite bentre ye kenanbe ñan nükani gare ietre akwa Jesús ñan ja töi mikani kukwe yebätä, nämäntre ja ngwen metre Ngöböi yebätä töbikabare kwe (Juan 14:​1-5, 8). Kukwe ruäre rükadre gare ietre yekäre nämäntre kä ribere jai ye nämäne gare Jesús ie ñodre, näintre kä kwinbätä ñan nüke gare kwin ietre (Juan 16:12). Nitre ja tötikaka nibe tö Jehová mikai täte aune nita tö ngwen ie nikwe bämikadre.

20. ¿Meri testiko nünanka Malaui nämäne tö ngwen ni ja tötika kwe ie ye bämikani ño kwe?

²⁰ Ja tötikaka ye tö kukwe kwin nuaindi ie nikwe tö ngwandre ye ütiäte krubäte. Chifundab käi Malaui käkwe ja tötika kömikani Bibliabätä Alinafe ben niara ye abokän catolica, niaratre ye nükani tärä Mä raba nüne kä jutobiti kärekäre kukwe ja tötikara 14 yebätä ngwane Chifunda ngwanintari Alinafe ie ¿jondron üai yebiti Ngöbö mika raba täte? ye ngwane Alinafe namani romon aune niebare: “¡Kukwe ye tä diandre jai ni itire itire ie!”. Yete namani chi Chifunda kräke ja tötika ye mikakäre krüte akwa ja di ngwani kwe Alinafe tötike jankunu nane ja känenkäre Alinafe ja töi kwitai kukwe yebätä ye ie nämäne tö ngwen. Sö nikani ruäre ta ja käne ngwane nükani kukwe ja tötikara 34 yebätä, kukwe ngwantarita yete ye ngwanintari Alinafe ie “¿mä jatani ja tötike Bibliabätä aune Jehová ye Ngöbö metre namani gare mäi ye käkwe mä dimikanina ño nükebe ne ngwane?” Chifunda tä niere: “Alinafe kukwe keta kabre kwin nieba ye ngätäite nieba kwe dre nieta Bibliakwe ye nitre testiko Jehovakwe tä nuainne” . Kä nikani braibe ta Alinafe ñan jatani Ngöbö mike täte jondron üai yebiti aune ja käne namani juto ja ngökakäre ñöte.

21. ¿Ni raba dre nuainne ja tötikaka nikwe töi mikakäre Jehová mike täte?

²¹ Metrere Jehová tä ni ja tötikaka ye mike nirien ja üairebiti gare nie akwa ni raba dimike Jehová mike täte arato (1 Cor. 3:7). Jehová tä dre ribere nuaindre ie ye ñan aibe nita driere ie ñakare aune rabadre Jehová tarere ja brukwä tätebiti ye nita driere ie. Ne madakäre kukwe bäri ütiäte rabadre mike nuaindre jai ye ngwane tä Jehová tarere bämikai kwe aune ja tuai kukwe tare ben kwe ngwane tö ngwandre kwe Jehovai ye nita driere ie. Nita tö ngwen ja tötikaka nikwe ie ye nikwe bämikai ngwane, yebiti nikwe niara dimikai ja ngwen metre Jehovai arato.