Nitre tä kukwe ngwentari
Ni Proverbios 30:18, 19 tikaka tö namani dre mikai gare “ni brare bati aune meri bati tä ja ngwen ño” ¿ye ñan namani nüke gare ie niebare kwe ye ngwane?
Kukwe ne dre gärätä ye nitre kukwe mikaka gare jai Bibliabätä aune nitre kwati mada tä ngwentari jai. Traducción del Nuevo Mundo yete tä tikani krörö: “Kukwe ketamä abokän ñan nuäre rükakäre gare tie aune ketabokä abokän ñan nüke gare tie. Mü tä kwitekä ño kwinta, icha tä yorekä ño jä kwatabätä, rü tä näin ño mren romonbiti aune ni brare bati aune meri bati tä ja ngwen ño” (Prov. 30:18, 19).
Käne kukwe nieta “ni brare bati aune meri bati tä ja ngwen ño” ye nämäne nüke gare kukwe ñaka kwin erere. ¿Ñobätä? Ñobätä ñan aune ñaka blita nämäne kukwe kwin yebätä versiculo ne känenkri. Ñodre kukwe käme ñaka nemen debe ye kadekäteta (Prov. 30:15, 16). versículo 20 tä blite “meri ja mike gure bati bati” yebätä aune niara ñaka kukwe käme nuainne tä niere. Ye medenbätä nutu nämäne mü, icha, rü mrente aune ni brare nämäne kukwe nuainne abokän ga ñaka raba jire ye gärä nämäne. Yebätä töbika nämäne krörö “ni brare bati aune meri bati tä ja ngwen ño” nie nämäne ngwane, ni brare bati ie meri näkwita o ngökadre ño ye nämäne gare abokän meri ñan gain jabätä ye gärä nämäne.
Kukwe ruäre tärä abokän tä mike gare nie ñan blita nämäne kukwe blo yebätä ñakare aune kukwe kwin mika nämäne gare yete. Kukwe nämäne ni tärä tikaka ngwen nikenkä aune töi mike ñan krütare yebätä jerekäbe nämäne kukwe tike.
Kukwe tikani Proverbios 30:18 ye ta blite kukwe kwinbätä ye kukwe tikani hebreore tä mike gare metre tä. Diccionario kukwe Bibliabätä mikaka gare tä niere, kukwe hebreore kwitani “ñan nüke gare” versículo nebätä “ye abokän kukwe ñan tuabare, ñan raba nemen bare kwrere” ye gärätä (Theological Lexicon of the Old Testament, de Ernst Jenni y Claus Westermann).
Dirikä Crawford Howell Toy, kwela kri Harvard (Estados Unidos). Kukwe tikani ne ñan nämäne blite kukwe blo yebätä mikani gare kwe arato. Kukwe ñan raba bare kwrere nämäne tuin ni tärä tikaka ie ye mika nämäne gare metrere kwe, nükani gare dirikä ne ie.
Ye medenbätä ni raba niere metre kukwe nieta Proverbios 30:18, 19 tä blite kukwe ñan tuabare aune ñan nuäre rükakäre gare yebätä. Yebätä mü tä kwitekä ño kwinta, icha tä yorekä ño jä kwatabätä ngoto ñaka ie yebiti tä, ño rü kri aune doboko tä niken mren romon biti aune ño monso bati brare aune meri tä nemen ja kukwe mukore biti tä nemen nüne kä jutobiti jabe ye nämäne ni tärä Proverbios tikaka ye töi mike ñan krütare, ye erere tä nemen bare nibätä.