‘Üai Deme Ngöbökwe köböire, munkwe nünandre janknu keteitibe’

APÓSTOL Pablo niebare nitre kristiano Éfeso ie: “Mun itire itire abko töi ñakare ja kwrere, akwa munkwe ja ka ngäbti kwärikwäri amne munkwe ja tare kwärikwäri. Mdakäre abko, Ngöbö Üai Deme köböire munta ja mäke ni itibe kwrere, ye kwrere munkwe nünandre janknu, abkokäre munkwe nüna jäme jabe kwärikwäri” (Efes. 4:2, 3).

Nita keteitibe ye “Üai Deme” köböire niebare Pablokwe, kukwe madabiti abokän Ngöbö die gärätä. Akwa Pablo niebare nikwe ja di ngwandre nemen keteitibe ¿Nire tadre keteitibe niebare kwe? Metrere ni kristiano itire itire rabadre “Ngöbö Üai Deme köböire ja mäke ni itibe kwrere”.

Ni iti käkwe sobro mrä täräne bian ngwarbe mäi ye bämike ja töite. Nirekwe sobro ye ngübadre kwin ¿ni bianka mäi o mä? Nire ye garera nie. Sobro ye mäkwe ñan ngübai kwin, raba nemen niere aune niken jotro ngwarbe yebätä mäkwe ngite kitadre ni bianka mäi yebiti o mä ara ngite.

Ye erere arato Jehovakwe ni töi mikani nüne keteitibe, akwa ni itire itire käkwe ja di ngwandre kukwe ye mike täte. Aisete ni ñan tä kwin jäbätä ja ngwai o ja eteba iti ben ngwane ni rabadre kukwe ne ngwentari jai: “¿Tita ja di ngwen ne kwe üai deme köböire ni täi keteitibe? ¿Tita ja di ngwen kukwe ükete ja mräkätre ben?”.

JA DI NGWEN NEMEN KETEITIBE “NI ITIBE KWRERE”

Pablokwe niebare nikwe ja di ngwandre krubäte ne kwe ni tädre keteitibe üai deme köböire nibira gare nie. Ni iti ben kukwe tä nemen jabätä nikwe ye ngwane kukwe ne niebare Pablokwe ne tä nemen bare. Nita ja di ngwen nüne keteitibe. Akwa ni iti käkwe kukwe niedre o nuaindre ye matadre tare nibätä ngwane, ¿käre ni rikadre kukwe ükete ben? Ñakare. Bäri käin nikwe ngwandretari jai: “Tikwe ja töi mikai krubäte kukwe nemen jäbätä tikwe yebätä ngwane, ¿raba ja mräkätre dimike nüne keteitibe o ye köböire ja mräkätre raba ja ñäkebiti?”. Ruäre ngwane bäri käin nikwe ngite kitadre ta ja mräkätre yebiti o kukwe ye käi kwitadrekä jabiti (Prov. 19:11; Mar. 11:25).

Ja mräkä iti tä ja töi mike ngite kite tä ni madabiti ye üai. 1. Ja mräkä iti tä ngrente biti aune niara tä nemen kwekebe nünaninkä. 2. Ja mräkä iti käkwe kukwe nini ie o nunibätä yebätä tä töbike. 3. Tä ñake Bibliabätä aune tä töbiketari bätä. — “Tikwe ja töi mikai krubäte kukwe nemen jabätä tikwe yebätä ngwane, ¿raba ja mräkätre dimike nüne keteitibe o ye köböite ja mräkätre raba ja ñäkebiti?”

Pablo mäträbare krörö: “Mun itire itire abko töi ñakare ja kwrere, akwa munkwe ja ka ngäbti kwärikwäri amne munkwe ja tare kwärikwäri” (Efes. 4:2). Kukwe nebiti nemen gare nie “nitre ño, töi ño erere akwa kadre ngäbiti kwin” ye nüke ni töite (Comentario para exégesis y traducción. Carta a los Efesios, Mariano Ávila Arteaga). Kukwe ye ara nie raba krörö arato, ja mräkätre töi ngite ni erere yebätä ni rabadre kain ngäbiti. Bäkänä ni jökrä tä ja di ngwen “ja ngwen ni bitin kwrere Ngöbö tö namani ie ye ererebätä” (Efes. 4:23, 24). Akwa ni jire iti raba nuainne käin krubäte (Rom. 3:23). Kukwe ne rükai gare nie aune nikwe kai ngäbiti ngwane, rabai bäri nuäre ni töi ñakare ja kwrere, akwa nikwe ja kadre ngäbiti kwärikwäri aune ngite kitadre ta jabiti kwärikwäri ye köböire ni täi “ja mäke ni itibe kwrere” Ngöbö üai deme köböire.

Ruäre ngwane kukwe tä nemen jabätä nikwe ye nita ükete kaibe ja ben o ja brukwäte ye ngwane ‘ni täi nüne jäme jabe kwärikwäri’. Kukwe griegore “ja mäke” nieta Efesios 4:3 ye kwitata “mröka” Colosenses 2:19 yete, (NGT). Ni mröka ye köböire ni kroko kia kia tä niken ngätäi jai ye tä neketekä jabätä. Ye erere arato ja tare, kä jäme tä nikwe ja mräkätrekwe yebätä kukwe ñokwä tä nemen nikwe jabätä mräkätre ben yebiti ta nita keteitibe bentre.

Aisete ja mräkä ruäre tä kukwe niere nie ye tä mate tare nibätä, tä ni mike romon, ye ngwane nikwe ja töi mikadre mike tuin bobre jai aune ñaka kadriere blo (Col. 3:12). Metrere ni jökrä ngite yebätä nikwe ja mräkätre ruäre ie kukwe niebare abokän matani tarebätä. Kukwe ne ngwain törö jai ye köböire ‘Üai Deme Ngöbökwe köböire, nikwe nünandre janknu keteitibe’ yekrä dre nuaindre nikwe ye nikwe ja di ngwain nuainne.