“Munkwe nünandrekä dite bätärekä janknu”

ANDREA ja mikani testiko Jehovakwe ye ngwane, muko kwe namani rubun krubäte kräke.a (Nota mikadre ñärärä.) Andrea ñaka rikadre Ju Ja Ükarakrö yete aune ñaka Ngöbö kä ye kädekadrete kwe niebare kwe ie. Aune niara Jehová kä ye kädekaite olote angwane, rabai rubun krubäte niebare kwe ie.

Ne madakäre, Andrea ñaka kukwe driedre Jehová yebätä monsotre kwe yei aune ñaka rikadre ngwena jire gätäte niebare muko yekwe ie. Andrea kräke kukwe ye ñaka namani nuäre, ñobätä ñan aune niara rabadre kukwe driere Ngöbö yebätä monsotre kwe yei tiebe tiebe.

¿Kukwe ye erere namanina bare mäbätä? Mä testiko Jehovakwe yebätä mä mräkätre ruäre tä ja mike mä rüere raba ruin nunye. O mekerabe mätä ja tuin bren keteiti ben raba ruin nunye. O monso mäkwe o mä muko krütani mäkän raba ruin nunye. O mä mräkä ruäre ñaka niena Testiko raba ruin nunye. Ye erere ngwane, ¿mäkwe dre nuaindre ne kwe mäkwe Jehová mikadre täte metre jankunu?

Apóstol Pablo niebare: “Munkwe nünandrekä dite bätärekä janknu” (Hebreos 10:36). ¿Dre raba ni dimike kä ngwen nüke jai?

MÄKWE JA DI KÄRÄ JEHOVAI

Mäkwe ja tua kukwe kri ben ye ngwane, mäkwe ja di kärä Jehovai ne kwe mäkwe kä ngwandre nüke jai. Ye nuainkäre mä rabadre orare. Ye erere meri Testiko kädekata Ana käkwe nuainbare muko kwe krütani ye ngwane. Ja mäkäninte kwetre ye käi namanina 30 bititre. Niara tä niere: “Rikaba sribire ye bitikäre ñaka rükabata gwi. Kä nämä krire 52 biti”.

Ana namani ja töi mike sribire krubäte, akwa ye ñaka niara dimikani kukwe tare ye denkä ja töite. ¿Dre nuainbare kwe mada? Niara tä niere: “Ja nämä ruin ño tie ye ti nämä niere Jehovai aune niarakwe ja di biandre tie ye ti nämä ribere ie”. Jehovakwe Ana dimikani ye gare kwin ie, ñobätä ñan aune niarakwe orabare ye bitikäre töi namaninta jäme. Aune Jehovakwe niara muko gaikröta Kä Bä Nuäre yete ye tä niara töi mike jäme (Filipenses 4:6, 7).

Jehová tä mike gare metre nitre niara mikaka täte yei, orasion nuainta kwetre ye niara tä kukwe nuin käre (Salmo 65:2). Ne madakäre, dre dre ribeta kwe jai ye Jehová tä bien ie ne kwe rabadre mike täte jankunu. Aisete Jehová raba mä dimike arato ne kwe kukwe kri tädre mä kisete, akwa yebiti ta mä raba Jehová mike täte jankunu.

MÄ TÄDRE KÄRE JA MRÄKÄTRE YE KEN

Ja mräkätre konkrekasionte yebiti Jehová tä ni dimike kä ngwen nüke jai arato. Ja mräkätre juta Tesalónica kirabe yekänti käkwe ja ngwani ño yebätä töbike. Nitre ja mikani niaratre rüere ye ngwane kä ngwani nüke kwetre jai, aisete niaratre ja dimikani kwärikwäri ja ngwankäre metre Ngöböi (1 Tesalonicenses 2:14; 5:11). ¿Niaratre nämene nuainne ño? Niaratre nämene ja ükökrö gätäte aune ni ja keta muko kwin ye kwrere nämenentre ja ngübare kwärikwäri. ¿Nikwe dre nuaindre ja ngwankäre niaratre erere?

Nikwe ja ketadre kwin nitre konkrekasionte ben aune nikwe ja dimikadre kwärikwäri. Nikwe kukwe ye nuaindre ye ütiäte krubäte metrere kukwe kri tädre ni kisete ye ngwane (Romanos 14:19). Apóstol Pablo rüe nakaninkä aune kukwe mada kri namani kisete yebätä kä ngwani nüke kwe jai. Akwa ja mräkätre kristiano ye köböire Jehovakwe niara dimikani kä ngwen nüke jai. Ye medenbätä, Pablo niebare niaratre dimikani krubäte (Colosenses 4:10, 11). Yebiti bämikani kwetre niaratre nämene Pablo tarere. ¿Ja mräkätre konkrekasion munkwe yete käkwe kukwe niebare munye o jondron nuainbarera mun dimikakäre ye törö munye?

MÄKWE JA DI KÄRÄ NITRE UMBRE JI NGWANKA KONKREKASIONTE YEI

Nitre umbre ji ngwanka konkrekasionte yebiti Jehová tä ni dimike arato. Niaratre tä Biblia yebiti ni dimike aune mäträre nibätä. Biblia tä niere: “Kä känti ja kriemikata murie dite yebätä, kä ja ükakäre ñü jobe ye ngänikaire, ñö nen tä kwen nie juta nötare yekänti aune jä känti ja kriata kä tibo känänkäre ye erere niaratre” (Isaías 32:2). Nitre umbre ji ngwanka tä nikwe ye tä ni töi mike jäme, ¿ñan ererea? Ye medenbätä, kukwe rabadre mä kisete ye ngwane, mäkwe blita bentre. Ja mräkätre ye mä dimikai Jehová mike täte jankunu.

Erametre, nitre umbre ji ngwanka konkrekasionte ye ngite arato (Hechos 14:15). Aisete niaratre ñaka raba kukwe tä ni kisete ye jökrä ükete ni kräke. Akwa niaratre raba orare nibe, aune ye köböire ja rabai ruin kwin nie (Santiago 5:14, 15). Juta Italia yekänti, ni brare Testiko tä bren krubäte mekerabe. Akwa tä kä ngwen nüke jai. ¿Ñobätä? Ja mräkätre tä käre niara tuinbiti aune tätre niara tarere ye köböire tä kä ngwen nüke jai nieta kwe. Ye medenbätä, kukwe kri tä ni kisete angwane, Jehová tä niere nie nikwe ja di kärädre nitre umbre ji ngwanka konkrekasionte ie.

MÄKWE SRIBI JANKUNU JEHOVÁ KRÄKE

Kukwe kri tä ni kisete yebiti ta, nikwe sribidi jankunu Jehová kräke angwane, niarakwe ni dimikai. Kukwe ye erere namani bare ni Testiko kädekata John yebätä. Kä namani 39 biti ye ngwane, bren cáncer kwanibätä. Kä nämene 39 niarabiti angwane jatani bren krubäte yebätä ñaka namani tuin kwin ie. Namani muko aune monso kwe kä komäbiti ye töibikare krubäte. Niara tä niere: “Ti muko ye ñaka rababara monso nunkwe ye aibe ngübare, ñakare aune rababa ti ngübare aune niken ti ngwena kräkäi mikadre doctor känti”. Niara kräkäi mika nämene bren cáncer yebätä ye nämene mike nainte aune mike yen. Akwa ye ñan aibe ngörä, rün kwe ye namani bren krubäte aune namanina krütadre yebätä namani ni ribere ja ngübakäre ye namani gare ie.

¿Dre käkwe John aune mräkä dimikani? Kä jökrä ngwane niara namani nainte krubäte, akwa mräkätre jökrä yekwe sribidre jankunu Jehová kräke ye nämene mike gare jai. Niara tä niere: “Ruäre ngwane ñaka nämä nemen nuäre nun kräke, akwa käre nun nämä niken gätäbätä aune kukwe driere bätä Ngöbö mika täte ni mräkäbe ye nuainne”. Ütiäte krubäte ja ketadre bäri kwin Ngöböbe ye namani gare ie. Kename niara namani nikenkä krubäte, akwa Jehovakwe töi mikani jäme aune ja di biani ie ye gani kwe. John tä niere Jehovakwe dimikani ye erere raba nitre mada niara mikaka täte yei ja di bien. Mätä töbike o kä jürä mäbätä yebätä Jehová raba mä dimike kä ngwen nüke jai arato.

Mäkwe ja tua kukwe kri ben ye ngwane, apóstol Pablo kukwe niebare ne mäkwe ngwan törö jai: “Munkwe nünandrekä dite bätärekä janknu”. Ye medenbätä, mäkwe orasion nuain Jehovai, mä tädre käre ja mräkätre ken, mäkwe ja di kärä nitre umbre ji ngwanka konkrekasionte yei aune mäkwe sribi jankunu Jehová kräke. Jehovakwe mä dimikai kukwe meden ben mätä ja tuin kä nengwane o ja känenkäre yebe.