Ngöbö kukwei kwitani tä mate ni brukwäte
“Ngöbö Kukwei abko nire.” (HEBREOS 4:12)
1. a) ¿Jehovakwe sribi meden biani Adán ie? b) ¿Ni mikani blite yebiti ni Ngöbö mikaka täte tä dre nuainne?
JEHOVÁ ni sribebare ne kwe nikwe blitadre jabe. Kä Bä Nuäre yete niebare kwe Adán ie niara rabadre jondron nire ye jökrä kädeke. Aune Adán mikani blite yebiti jondron nire ye meden ererebätä kädekani kwe (Génesis 2:19, 20). Yete ja känenkäre, ni mikani blite yebiti ni Ngöbö mikaka täte tä Jehová käikitekä aune tä blite niarabätä nitre madabe. Kä nengwane ni mikani blite yebiti nita Biblia kwite aune nita nitre mada dimike Jehová mike gare jai.
2. a) ¿Ja mräkätre ja töi mikani kwatibe dre nuainne nämenentre Biblia Traducción del Nuevo Mundo sribere ye ngwane? b) ¿Drebätä nibike ja tötike kukwe ja tötikara nekänti?
2 Biblia ye kwitanina mil kwati krubäte, aune ruäre kwitani metre ta mada mada ye ngwä. Ja mräkätre käkwe Biblia Traducción del Nuevo Mundo sribebare ye ngwane tö namani kwitai metre ta. Ye medenbätä ja töi mikani kwatibe kwetre kukwe ketamä nuainne. Kena, ja töi mikani kwetre Ngöbö kä ye mike ütiäte jai aune nämene bäbe tikani kukwe hebreo yebiti ye erere ja töi mikani tike kwetre (ñäkädre Mateo 6:9 yebätä). Ketebukäre, ja töi mikani kwetre raba nemen nuainbare angwane, kukwe kwatire kwatire ye jökrä kwite. Ñaka rabadre nuäre kwitadre ye erere ngwane, dre dre nüke gare ye ererebätä ja töi mikani kwite kwetre. Aune ketamäkäre, ja töi mikani kwetre kukwe nuäre ñäkädrebätä aune nuäre nükadre gare ye tikea (ñäkädre Nehemías 8:8, 12 yebätä).b Nun testiko Jehovakwe tä kukwe ketamä ye erere nuainne Biblia kwitakäre kukwe 130 jene jene biti bäri. Biblia Traducción del Nuevo Mundo inglere ükaninteta mrä kä 2013 yete, ye sribekäre nikwe kukwe ketamä ye erere nuainbare ño ye kukwe ja tötikara nekänti nibike mike gare jai. Aune nitre kukwe kwitaka kukwe mada jene jenebiti tä nuainne ño ye erere ye nibike mike gare jai arato.
BIBLIA TÄ NGÖBÖ KÄ YE MIKE ÜTIÄTE JAI
3, 4. a) ¿Kukwe hebreo yebiti Ngöbö kä tikani ye tä tikani medente? b) ¿Biblia keta kabre kwitanina yekänti dre nuainbarera Ngöbö kä yebätä?
3 Kukwe hebreo yebiti, Ngöbö kä tä tikani tärä okwä ketabokä yebiti. Kukwe tikani kirabe keta kabre hebreore yebätä Ngöbö kä ye tä tikani, ñodre, tä tikani Rollos del mar Muerto yebätä. Kä 200 nikani ta Kristo känenkri aune kä 100 nikani ta Kristo bitikäre ye ngrabare Septuaginta kwitani ye ruärebätä Ngöbö kä tä tikani arato. Kukwe tikabare kirabe yekänti Ngöbö kä ye tä tikani krubäte yebätä nitre kwati töita nemen ñan krütare.
Kukwe tikabare kirabe yekänti Ngöbö kä ye tä tikani krubäte yebätä nitre kwati töita nemen ñan krütare
4 Erametre Ngöbö kä ye tädre tikani Bibliabätä. Akwa yebiti ta Biblia keta kabre kwitanina yebätä niara kä ye dianinkä. Ñodre, kä 1901 yete Biblia American Standard Version ye döräibare. Biblia yebätä Ngöbö kä nämene tikani. Kä 1950 yete Biblia Traducción del Nuevo Mundo de las Escrituras Griegas Cristianas inglere ye döräibare, Biblia yebätä Ngöbö kä nämene tikani arato. Kä 1952 yete Biblia American Standard Version tuaninteta mrä ye döräibare. Biblia yebätä Ngöbö kä ñaka namanina tikani. ¿Ñobätä? Ñobätä ñan aune Ngöbö kä tikadre ye ñaka namani tuin kwin nitre kukwe kwitaka yei. Biblia keta kabre kwitani inglere aune kwitani kukwe jene jenebiti yebätä Ngöbö kä ye dianinkä arato.
5. ¿Ñobätä ütiäte krubäte Ngöbö kä ye tädre tikani Bibliabätä?
5 Nitre ruäre tä tärä kwite ye ngwane, ni tärä sribekä ye tö drei ye rabadre mike gare jai aune ye ererebätä rabadre kukwe kwite. Ni Biblia Sribekä ye abokän Jehová. Bersikulo keta kabre tä mike gare metre niara kä ye ütiäte krubäte niara kräke aune niara kä ye rabadre gare nitre ie bätä rabadre mike ütiäte jai yei niara tö (Éxodo 3:15; Salmo 83:18; 148:13; Isaías 42:8; 43:10; Juan 17:6, 26; Hechos 15:14). Ye medenbätä, ütiäte krubäte Ngöbö kä ye tädre tikani Biblia keta kabre kwitata yebätä. Jehovakwe nitre mikani ja kä ye tike mil bä kabre kukwe tikabare kirabe yebätä (ñäkädre Ezequiel 38:23 yebätä).c Aisete nitre kukwe kwitaka tä Ngöbö kä denkä Bibliabätä ye ngwane, ñaka tä Jehová mike ütiäte jai.
6. ¿Ñobätä Ngöbö kä ye tä tikani bäri bäti jire Biblia tuaninteta mrä inglere kä 2013 yebätä?
6 Kä nengwane Ngöbö kä ye tädre tikani Bibliabätä ye kukwe keta kabre tä mike gare bäri nie. Biblia mrä Traducción del Nuevo Mundo inglere kä 2013 yete, yebätä Ngöbö kä tä tikani 7,216, ye abokän, bä ti jire tä tikanibätä nämene tikani Biblia käne yebätä yebiti ta. Rollos del mar Muerto yebätä bitinkä Ngöbö kä kwani abokän mikani gare yebätä tikani bäti ye bärike tä tikani 1 Samuel yete.d (Ñäkädre nota kena yebätä.) Ngöbö kä tikani ketatikäre ye tä tikani tärä Jueces yebätä, ye mikani ja tötikakäre Ngöbö kukwei tikani kirabe abokän ie tö ngwan raba yebätä. Kukwe tikani kirabe ye keta kabrebätä ja tötikabare nguseta ye bitikäre Ngöbö kä ye tikani.e (Ñäkädre nota ketebukäre yebätä.)
7, 8. ¿Jehová kä ye dre gärätä?
7 Ngöbö kä ye dre gärätä mikadre nüke gare kwin jai ye ütiäte krubäte ni kristiano metre kräke. Ngöbö kä ye abokän “Ti Tö Dre Nuain Ye Erere Tikwe Nuain” meden gärätä.f (Ñäkädre nota ketamäkäre yebätä.) Éxodo 3:14 ye ererebätä tärä aune täräkwata nikwe ye nämene Ngöbö kä ye dre gärätä ye mike gare käne, ye Biblia con referencias yebätä nota tä mikani ngösöri tä niere: “Ti Tö Dre Nuain Ye Erere Tikwe Nuain”. Kä 1984 yete Biblia Traducción del Nuevo Mundo sribebare inglere ye käkwe mikani gare, Jehová tö dre dre ie ye tä nuainne ja töi mikakäre nemen bare.g Akwa Biblia tuaninteta kä 2013 yete ye tä mike gare: “Niara kä Jehová yebiti [...] raba ja töi mike dre nuainkäre ye ñan aibe gärätä. Niarakwe jondron sribebare yekwe dre nuaindre ne kwe niara töita dre nuainbätä ye rabadre bare ye abokän kräke tä dre nuainne ye gärätä arato”. (Tärä ni jie ngwankäre ja tötike Kukwe Ngöbökwe yebätä página 5 mikadre ñärärä arato.)
8 ¿Jehová tä dre nuainne ne kwe ni sribebare kwe yekwe niara töita dre nuainbätä ye mikadre nemen bare? Ñodre, Ngöbökwe Noé mikani arka sribere aune Bezalel abokän mikani kwe ni ie jondron sribe gare ye erere. Gedeón abokän mikani kwe ni rükä kri ye erere aune Pablo mikani kwe ni misionero ñaka kä jürä ngwen jabätä ye erere. Ngöbö kä ye dre gärätä ye ütiäte krubäte ni niara mikaka täte ye kräke. Ye medenbätä, ja mräkätre Biblia Traducción del Nuevo Mundo sribebare yekwe Ngöbö kä ye mikani medente tikadre ye erere känti.
9. ¿Ñobätä Nitre Braibe Konkrekasion Jökrä Ngübabitikä ye tö Biblia ye kwitamana kukwe keta kabre jene jenebiti?
9 Biblia keta kabrebätä Ngöbö kä ye diankata bäri. Ngöbö kä ye diankata täte “Däkien” o nitre tä ngöbö meden mike täte ye erere kä tikata kwetre. Yebätä Nitre Braibe Konkrekasion Jökrä Ngübabitikä ye tö Biblia tä Ngöbö kä ye mike ütiäte jai ye tuai nitre jökrä blite kukwe jene jenebiti yekwe (ñäkädre Malaquías 3:16 yebätä).h Nüke kä nengwane, Biblia Traducción del Nuevo Mundo tä Ngöbö kä ye mike ütiäte jai kukwe 130 jene jene biti bäri.
KUKWE KWITANI TIKANI METRE TA AUNE NUÄRE RÜKADRE GARE
10, 11. Biblia Traducción del Nuevo Mundo inglere kwitata kukwe mada jene jenebiti ye ngwane, ¿kukwe meden meden abokän ñaka tä nemen nuäre kwitadre?
10 Biblia Traducción del Nuevo Mundo inglere kwitata kukwe madabiti ye ruäre ngwane ñaka tä nemen nuäre kwitadre. Ñodre, Eclesiastés 9:10 aune bersikulo mada mada yekänti, Biblia sribebare kä 1984 inglere yebätä kukwe hebreo yebiti Seol nie nämene. Biblia mada mada inglere yebätä kukwe ye nieta arato. Akwa kukwe keta kabre jene jenebiti, kukwe Seol ye ñaka tä mikani diccionario yete aune kukwe ye ñaka gare. Seol ye abokän kä metre ye kwrere nitre kwati tä nütüre. Kukwe jökrä yebätä, kukwe hebreo Seol aune kukwe grieko Hades ye kwitadre “Dobo” ye kwrere niebare. Kukwe kwitani ne tä tikani metre ta aune nuäre rükadre gare.
11 Kukwe hebreore aune griekore abokän kwitata suliare “alma” ye ñaka tä nemen nuäre kwitadre kukwe mada ruäre yebiti. Kukwe ruäre yebiti, alma nieta ye abokän nüke gare nita krüte ye ngwane jondron ni ngrabare ye tä niken mento o üai ye kwrere. Kukwe alma ye kwitadre, yekäre contexto ye ererebätä kwitadre jene jene niebare. Biblia con referencias yebätä apéndice 4A yekänti alma nieta Bibliabätä ye ngwane dre drebätä blitata ye mikata gare. Bersikulo keta kabre ye rükadre gare nuäre, yekäre kukwe hebreore aune griekore ye dre gärätä ye mikata gare nota yebiti página yebätä ngösöri Biblia tuaninteta mrä inglere yekänti.
Nitre Biblia kwitaka kä jökräbiti tibien käkwe kukwe ngwanintari mil keta kabre yebätä ja mräkätre Biblia tuaninteta yekwe ja tötikabare
12. ¿Biblia tuaninteta kä 2013 yebätä dre dre nuainbare?
12 Nitre Biblia kwitaka kukwe mada jene jenebiti nämene kukwe ngwentari ye käkwe mikani gare Biblia inglere yebätä kukwe keta kabre nämene ye raba nüke gare blo. Ye medenbätä, sö septiembre kä 2007 yete Nitre Braibe Konkrekasion Jökrä Ngübabitikä käkwe kukwe ükaninte ne kwe Biblia Traducción del Nuevo Mundo inglere ye tuadreteta. Nitre Biblia kwitaka kä jökräbiti tibien käkwe kukwe ngwanintari mil keta kabre yebätä ja mräkätre Biblia tuaninteta yekwe ja tötikabare. Kukwe kirabe nämene tikani ye kwitani kwetre kukwe mada mrä yebe. Ja di ngwani kwetre kukwe ye kwite metre ta akwa bäri nuäre rükadre gare. Nibira gare nie ye erere, nitre kukwe kwitaka kukwe mada jene jenebiti ye köböire bitinkä Biblia inglere ye ükaninteta bäri kwin (Proverbios 27:17).
JA MRÄKÄTRE AUNE JA NGWAITRE TÄ DEBE BIEN KRUBÄTE
13. ¿Nitre ñäkäkä Biblia inglere tuaninteta mrä kä 2013 yebätä ye tätre dre niere?
13 ¿Biblia inglere tuaninteta mrä kä 2013 yete namani ja mräkätre aune ja ngwaitre kisete yebätä tätre dre niere? Niaratre kwati käkwe tärä juanina debe biankäre central mundial tä Brooklyn (Nueva York) yekänti. Meri Testiko iti käkwe niebare Biblia ye abokän kaja te jä bä nuäre nuäre tä ye kwrere, abokän Ngöbö kukwei. Niara kräke Biblia tuaninteta mrä ye bäri nuäre ñäkädrebätä aune nüke gare nuäre. Niara tä ñäkebätä ye ngwane, tä jä bä nuäre nuäre tuinte ye kwrere tä nemen ruin ie aune ükaninte jene jene yebätä töi nemen ñan krütare, nüke gare merebe, bä nuäre aune kwin krubäte. Kukwe nuärebiti Biblia ye tä tikani ye niara dimikanina Ngöbö mike gare bäri kwin jai. Niara tä ñäkebätä ye ngwane, Jehová tä kise kite ngärä ni rüne ye kwrere aune tä blite töi jämebiti ben ye kwrere nemen ruin ie.
14, 15. ¿Ja mräkätre aune ja ngwaitre kukweibiti Biblia Traducción del Nuevo Mundo kwitani yebätä ja ruin ño ietre?
14 Ja mräkätre aune ja ngwaitre ñaka blite kukwe inglere yebiti ye tä debe bien krubäte Biblia Traducción del Nuevo Mundo sribebare niaratre kukweibiti yebätä. Ni brare umbre nünanka kä Bulgaria yekänti ye käkwe niebare niara ñäkäbarera kä kwati krubäte te Bibliabätä, akwa kukwe kwitani nuäre aune nemen mate ni brukwäte ye ererebätä niara jämi ñäke jire niebare kwe. Meri Testiko nünanka Albania käkwe niebare Biblia kwitani kukwe albanes yebiti ye nuäre krubäte. Aune niebare kwe arato: “¡Jehová tä blite nibe ni kukweibiti ye ütiäte krubäte!”.
15 Juta keta kabre känti, nitre jökrä bäsi kwe Biblia ñaka raba nemen, ñobätä ñan aune Biblia ye ütiä kabre krubäte o ñaka nuäre kwandre. Ñodre, kä Ruanda yekänti, nitre kwati nämene ja tötike nitre Testiko ben akwa ñaka nämene nirien kukwe ja üarebiti ñobätä ñan aune Biblia ñaka nämene kwetre. Iglesia juta yete ye nämene Biblia rürübäine kabre krubäte aune ñaka nämene nuäre rükadre gare. Akwa Biblia Traducción del Nuevo Mundo kwitani niaratre kukweibiti ye ngwane nitre ja mräkäre monsoi nibokä ye käkwe debe biani Jehovai aune ni klabore yei. Käne ñaka nämene nemen nuäre niaratre kräke Biblia kökakäre jene jene jai, akwa nengwane niaratre jökrä kwe Biblia tä jeñe. Niaratre tä debe bien Jehovai Biblia yebätä ye bämikakäre ie tätre gwairebe ñäkebätä köbö kwatire kwatire te.
16, 17. a) ¿Jehová tö dre tuai nemen ni jökrä kwe? b) ¿Ni tö dre nuain?
16 Biblia Traducción del Nuevo Mundo tuaninteta mrä ye ja känenkäre kwitai bäri kukwe keta kabre jene jenebiti. Biblia kwitadre kukwe jene jenebiti yei Satana ñaka tö, akwa Jehová tö ni niara mikaka täte ye jökrä tuai ñäke kukwe mikata gare kwe merebe aune nuäre rükadre gare yebätä (ñäkädre Isaías 30:21 yebätä).i Gwäune, “kukwe Jehovakwe ye rabai gare kä jökräbiti tibien” (Isaías 11:9).
17 Jehová tä jondron jökrä kwin bien nie yebiti nikwe sribidre kwin, ñodre Biblia kwitani tä niara kä ye mike ütiäte ye erere. Niara tä dre niere nie Biblia yebiti ye nikwe kukwe nuadre köbö kwatire kwatire. Aune niarakwe käre orasion nikwe ye kukwe nuai. Nita blite käre ben angwane, niara rabai gare bäri kwin nie aune ni rabai tarere bäri (Juan 17:3).
“¡Jehová tä blite nibe ni kukweibiti ye ütiäte krubäte!”
a Biblia mrä Traducción del Nuevo Mundo inglere kä 2013 yebätä apéndice A1 ye mikadre ñärärä arato.
b Nehemías 8:8, 12: “Aune namanintre ñäke jankunu ja dibiti, täräbätä Ngöbö metre Kukwei nämene yebätä, namanintre mike gare metre aune dre gärä nämene ye namanintre mike gare; angwane kukwebätä ñäkä nämene ye niaratre käkwe nitre dimikani mike nüke gare jai... Yebätä nitre jökrä nikani mröre, tomana ñain, jondron kwetadre juen döräidre aune kä namani juto krubäte bätätre, ñobätä ñan aune kukwe mikani gare ye nükani gare kwin ietre”.
c Ezequiel 38:23: “Aune erametre tikwe ja mikai ütiäte kri bätä tikwe ja kä ye mikai deme aune nitre jökrä kä nebätä okwäbiti tikwe ja mikai gare; bätä ti abokän Jehová rabai gare ietre”.
d Rollos del mar Muerto ye tikabare kä 1,000 biti bäri nikani ta yete, bäri kirabe texto tikani hebreore abokänbiti Biblia Traducción del Nuevo Mundo sribebare ye kräke.
e 1 Samuel 2:25, 6:3, 10:26 aune 23:14, 16, bätä Jueces 19:18 yete Ngöbö kä ye tikani arato.
f Nitre ie kukwe gare krubäte ye ruäre tätre kukwe ye erere mike gare, akwa niaratre ye jökrä ñaka tä kain ngäbiti ja erebe.
g Biblia con referencias, página 1559, kädekata “El nombre divino en las Escrituras Hebreas” yebätä apéndice 1A ye mikadre ñärärä.
h Malaquías 3:16: “Kä ye ngwane nitre nämene Jehová jürä ngwen jabätä ye namani blite jabe kwärikwäri, itire itire namani blite ja ketamuko kwetre yebe, aune Jehová namani niaratre kukwe nuin kwin jankunu. Aune tärä nitre ngwankäre törö jai yebätä kukwe tikabare niara okwäbiti nitre nämene Jehová jürä ngwen jabätä kräke aune nitre nämene töbiketari niara kä yebätä kräke”.
i Isaías 30:21: “Kukwe ne niedi mä jiebiti abokän mäkwe kukwe nuadi: ‘Ji ne ara. Näinbitiʼ, nane mä rikadre kise ngeberekri o mä rikadre kise ruinkri”.