¿Ñobätä ni rabadre ja ükökrö Ngöbö mikakäre täte?

1-3. a) ¿Gätä ye tuin käre ütiäte krubäte ni kristiano ie ye ñokänti gare nie? (Üai bämikani kena mikadre ñärärä). b) ¿Drebätä nibike ja tötike kukwe ja tötikara nekänti?

KÄ NÄMENE 17 Corinna yebiti angwane meye jänikani ngite kä mente känti mikakäre sribire ja dibiti. Kä nikani ta ye bitikäre Corinna jänikani ngite arato kä Siberia yekänti, kilómetro 1,000 ju kwe ye bäre mento. Yete mikani sribire kä jondron nire ngübakäre o jondron kwetadre nöka käi yekänti aune mikani ni klabore ye kwrere. Ruäre ngwane niara mikani sribire jubäre kä tibote aune abrigo kwin ñaka nämene ie ja mikakäre krube. Akwa yebiti ta, Corinna aune meri mada Testiko ja töi mikani kwatibe niken gätä nuain nämene mente konkrekasionte yete.

² Niaratre nibu nikani derekri aune nänbare kwetre kilómetro 25 nemen tren nämene nüke yekänti. Corinna niebare: “Ora krobu dekäkri tren rikaba, aune nunkwe nänba ora krä ti trente. Nun rikaba timo, ye bitikäre nunkwe nänba kilómetro kwäjätä rabakäre gätäbätä”. Corinna nänbare yebätä ñaka ja töi kwitani kwe. Niarakwe niebare: “Gätä yete nunkwe ja tötikaba Ni Mikaka Mokre yebätä aune nunkwe kantiko kantaiba. Ye kukwe kwin krubäte rababa bare käkwe tödeka nunkwe mikaba dite”. Kä nikani köbömä ta ye bitikäre niaratre nikaninta kä jondron nire ngübakäre o jondron kwetadre nöka käi yekänti. Niaratre janamene kä madakänti ye jondron nire ngübakäi aune jondron kwetadre nöka käi bökänkä yekwe ñaka gani jire.

³ Gätä ye tuin käre ütiäte krubäte nitre Ngöbö mikaka täte yei. Ñodre, nitre kristiano kena ye tö nämene krubäte ja ükaikrö Jehová mikakäre täte aune kukwe mikakäre gare jai niarabätä (Hechos 2:42). Erametre, gätä yebätä ni jökrä töta nemen näin. Akwa ni ruäre kräke ñaka raba nemen nuäre nänkäre gätä nuainta ye jökräbätä. Ruäre ngwane nita sribire ora kabre te, sribi tä nemen nuaindre krubäte nie o nita nemen nainte krubäte. ¿Dre käkwe ni dimikai ñaka gätä juen ja bäre?^[1] (Kukwe ja tötikara nekänti nota tä mikani mrä ngösöri mikadre ñärärä). ¿Ni raba nitre ja tötikaka nibe aune nitre mada ye töi mike ño niken gätäbätä? Kukwe ja tötikara nekänti nibike kukwe ketamä mike gare jai. Kena, ñobätä ni rikadre gätäbätä ye kwin. Ketebukäre, nita niken gätäbätä ye ñobätä tä kukwe kwin mike nemen bare ni mada kräke. Aune ketamäkäre, nita niken gätäbätä ye ñobätä tä nemen kwin Jehová kräke^[2] (kukwe ja tötikara nekänti nota tä mikani mrä ngösöri mikadre ñärärä).

ÑOBÄTÄ NI RIKADRE GÄTÄBÄTÄ YE KWIN

4. ¿Gätä ye tä ni dimike ño Jehová mike gare bäri kwin jai?

⁴ Ñobätä ñan aune gätä yebiti ni tötikata. Gätä ye tä ni dimike Jehová mike gare bäri kwin jai. ¿Nuainta ño? Ñodre, gätä nuainta nikwe yete nita ja tötike Jehová töi keta kabre kwin yebätä. Ngöbö töi keta kabre kwin yebätä ni nämä blite aune ja mräkätre bätä ja ngwaitre yei ja nemen ruin ño nämä niere kukwe nuaba nikwe ye ngwane, ¿ja rababa ruin ño nie? Erametre ni töi nämä nemen Jehová tarebätä bäri. Ne madakäre, kukwe kädrieta, kukwe bämikata aune texto Bibliabätä yebätä nita ñäke gätäte ye nita kukwe nuin kwin ye ngwane kukwe tä nemen gare bäri nie Bibliabätä (Nehemías 8:8). Aune bämän kratire kratire ñäkätä Bibliabätä ye kräke nita ja tötike kwin aune ye bitikäre ja mräkätre bätä ja ngwaitre tä blite texto yebätä kukwe nuata nikwe ye ngwane kukwe ütiäte krubäte tä nüke gare nie.

5. ¿Gätä ye mä dimikanina ño kukwe driere aune kukwe Bibliabätä namani gare mäi ye erere nuainne?

⁵ Gätä nuainta ye tä ni tötike kukwe Bibliabätä tä nemen gare nie ye erere nuainne (1 Tesalonicenses 4:9, 10). Ñodre, Ni Mikaka Mokre yebätä ruäre ngwane nikwe ja tötikabarera kukwe keteitibätä abokän käkwe ni dimikani sribire bäri Jehová kräke, orare bäri kwin aune ja mräkä o ngwai ja mikani ngite ni rüere yebiti ngite juen ta raba ruin nie. Aune kukwe metre Bibliabätä ye nikwe driedre ño nitre madai aune nikwe niaratre tötikadre ño ye tä nemen gare nie gätä yete (Mateo 28:19, 20).

6. ¿Gätä ye tä ni dimike aune ni töi mike ño jäme?

⁶ Ñobätä ñan aune gätä ye tä ni töi mike jäme. Nitre gobrainta Satanakwe ye tä ja di ngwen tödeka nikwe mikakäre di nekä. Akwa gätä ye tä ni töi mike jäme aune tä ni dimike sribire jankunu Jehová kräke (ñäkädre Hechos 15:30-32 yebätä). Kukwe rabai bare niebare Bibliabätä abokän tä nemen bare ño yebätä nita blite bä kabre gätä yete. Ye tä ni dimike tö ngwen bäri Jehová tä kukwe käbämike nie rabai bare jökrä yei. Ne madakäre, ja mräkätre aune ja ngwaitre tä kukwe kädriere aune tä kukwe bämike yebiti tätre ni dimike, aune tä blite gätäte bätä tätre kantare Jehovai ja brukwä tätebiti yebiti tätre ni dimike arato (1 Corintios 14:26). Ja mräkätre aune ja ngwaitre yebe nikwe blitadre gätä ye känenkri aune bitikäre ye raba ni dimike arato, ñobätä ñan aune ja ketamuko tärä kwati nikwe abokän töita nibätä ye tä nemen gare nie (1 Corintios 16:17, 18).

7. ¿Ñobätä ütiäte krubäte ni tädre nemen gätäbätä?

⁷ Ñobätä ñan aune gätä yete, Ngöböta ni dimike üai deme kwe yebiti. Ngöbö üai deme yebiti Jesús tä konkrekasion jie ngwen. Niarakwe niebare “nitre gätäkä [...] [ie] Ngöbö Üai tä dre niere” ye nikwe kukwe nuadre (Apocalipsis 2:7). Üai deme ye raba ni dimike kä ngwen nüke jai ni nuateta yebe, ñaka kä jürä ngwen jabätä kukwe driekäre aune kukwe kwin den nuaindre jai. Ye medenbätä käre nikwe ja di ngwandre nemen gätäbätä ye ütiäte krubäte. Ye köböire Ngöbökwe ni dimikai üai deme kwe yebiti.

NITA NIKEN GÄTÄBÄTÄ YE ÑOBÄTÄ TÄ KUKWE KWIN MIKE NEMEN BARE NI MADA KRÄKE

8. Nita nemen gätäbätä tuata nitre madakwe, nita blite gätäte tätre kukwe nuin aune nita kantare, ¿ye tä niaratre dimike ño? (Recuadro “Gätä ye bitikäre jata nemen ruin kwin ie” mikadre ñärärä arato).

⁸ Ñobätä ñan aune gätä yete ni raba bämike ja mräkätre aune ja ngwaitre ie nita niaratre tarere. Ja mräkätre aune ja ngwaitre kwati tä kä ngwen nüke jai kukwe tare ben. Apóstol Pablo tikabare: “Nikwe töbikadre kwin ja kräke kwärikwäri” (Hebreos 10:24, 25, TNM). Kukwe yebiti, Pablo mikani gare ni rabadre ja töi mike ja dimikabätä kwärikwäri. Ni rabadre ja ükökrö ja töi mikakäre jäme kwärikwäri yebiti nuain raba. Nita niken gätäbätä ye ngwane, nita bämike ja mräkätre aune ja ngwaitre yei ni tö rabai ja ngätäite bentre, blitai bentre aune ja ruin ño ietre ye ni tö mikai gare jai. Nita blite gätäte aune nita kantare Jehovai ja brukwä tätebiti ye ngwane, nita niaratre töi mike jäme arato (Colosenses 3:16, TNM).

9, 10. a) Ñobätä ütiäte ni rikadre gätäbätä ye Jesús kukwe niebare Juan 10:16 yekänti tä ni dimike mike nüke gare ño jai ye mä raba mike gare. b) ¿Nita nemen gätäbätä ye tä ja mräkätre aune ja ngwaitre tä kaibe kukwebätä ye dimike ño?

⁹ Ñobätä ñan aune nita nemen gätäbätä ye ngwane, nita konkrekasion dimike nemen keteitibe (ñäkädre Juan 10:16 yebätä). Jesús niebare niara abokän ni oveja ngübaka ye kwrere aune nitre nänkä niara jiebiti ye abokän oveja tä ki kwatibe teri ye kwrere. Käre oveja ye tä keteitibe ki kwatibe teri aune tä näin ni ngübaka ye jiebiti. Oveja tädre krobu ngutuäbiti, kä kiare ngutuä ñäite yete oveja tädre krobu aune oveja krati tädre kä madakänti ye ngwane, ni ñaka raba niere oveja krärike ye tädre ki kwatibe teri, ¿ñan ererea? Ye erere arato, “obeja [...] ki kwatibe teri” ye kwrere ni törbai aune ni “ngibiaka [...] itibe” jiebiti ni tö näin angwane, nikwe nändre käre gätäbätä rabakäre keteitibe ja mräkätre aune ja ngwaitre ben.

¹⁰ Gätä ye tä ni dimike nemen keteitibe aune ni ja mräkäre kwe ja tare ye erere tä ni töi mike (Salmo 133:1). Ja mräkätre aune ja ngwaitre ruäre ye rün aune meye o mräkätre tä ja mike rüere ja mikani kwetre Testiko yebätä. Akwa Jesukwe käbämikani nitre raba niaratre tarere aune ngübare ye biain kwe ietre mräkätre ye kwrere (Marcos 10:29, 30). Ni ñaka gätä juen jire ja bäre angwane, ja mräkätre aune ja ngwaitre yei ni raba nemen tuin ja rüne aune ja meyere o ja mräkä aune ja ngwai ye erere bätä töi raba nemen jäme. Nikwe töbikai kukwe yebätä angwane, nikwe ja di ngwain ñaka gätä juen jire ja bäre.

NITA NIKEN GÄTÄBÄTÄ YE ÑOBÄTÄ TÄ NEMEN KWIN JEHOVÁ KRÄKE

11. ¿Gätä ye tä ni dimike ño dre tä biandre nie Jehovai ye erere bien ie?

¹¹ Ñobätä ñan aune dre tä biandre nie Jehovai ye erere nita bien ie. Jehová ni sribebare, yebätä nikwe debe biandre ie, mikadre ütiäte jai aune käikitadrekä (ñäkädre Apocalipsis 7:12 yebätä). Gätä nuainta yete batire batire nita orare ie, kantare ie aune nita blite niarabätä ye ngwane nita kukwe ye nuainne. Bämän kratire kratire nita Jehová mike täte ye ütiäte krubäte.

12. Ni rikadre gätäbätä ribeta Jehovakwe nie ye nita mike täte angwane, ¿jata nemen ruin ño ie?

¹² Jehová ni sribebare yebätä, nikwe niara kukwei mikadre täte arato. Nikwe ja ükadrekrö käre tä niere nie, metrere kä krütai nibira no yebätä. Kukwe ribeta nuaindre ye nita nuainne angwane kätä nemen juto krubäte Jehovabätä (1 Juan 3:21, 22). Nita ja di ngwen nemen gätäbätä ye gare ie aune tä mike ütiäte jai (Hebreos 6:10).

13, 14. ¿Nita ja ükökrö ye tä ni dimike ño nökrö Jehová aune Jesús ken?

¹³ Ñobätä ñan aune nita ja ükökrö ye ngwane, nita bämike Jehovai ni tö rökrai bäri niara aune Jesús ken. Gätäte nita ja tötike Bibliabätä aune Jehová tä dre ribere nie ye tä nemen gare nie (Isaías 30:20, 21). Nitre ruäre ñaka Jehová mike täte tä nüke gätäbätä yei tä nüke gare niara tä ni jie ngwen (1 Corintios 14:23-25). Jehová tä gätä jie ngwen üai deme kwe yebiti yebätä kukwe tä nemen gare nie ye kite niarakri. Aisete nita nemen gätäbätä ye ngwane, ni raba Ngöbö kukwe nuin aune ni tare krubäte kwe ye raba nemen gare nie. Ye köböire nita nökrö bäri Ngöbö ken.

¹⁴ Jesús ye tä konkrekasion kristiano jie ngwen. Niarakwe niebare: “Ni tädre nibu ya o nimä ja ükaninkrö gätäre ti käbti ye abko ti tädi siba ketetibe bentre” (Mateo 18:20). Biblia tä driere nie arato konkrekasion jene jene ye “ngätäite [...] [Jesús tä] dikekä” (Apocalipsis 1:20–2:1). Ye tä mike gare niara tä jie ngwen. Ye medenbätä, nita niken gätäbätä ye ngwane, nita nökrö bäri Jesús ken. Erametre Jehová aune Jesús tä nibe bätä nita gätäte ye ngwane tä ni dimike. ¿Mätä ja di ngwen krubäte rökrakäre Jehová aune Jesús ken ye ngwane jata nemen ruin ño Jehovai raba ruin mäi?

15. ¿Nita niken gätäbätä ye ngwane nita dre bämike Jehová ie?

¹⁵ Ñobätä ñan aune nita niken gätäbätä ye ngwane, nita bämike Jehovai ni tö niara kukwei mikai täte. Niara ñaka tä ni mike ja dibiti niken gätäbätä (Isaías 43:23). Jefe nikwe sribi nuain manandre krubäte nie aune ye köböite ni ñaka raba nemen gätä jökräbätä, ¿ye ngwane nikwe dre nuaindi? Nikwe ja ükadrekrö ye ngwane, ni mikai ngwian bien, ni kitai ngite o ni mikai ja tare nike bäri niedre gobrankwe nie, ¿ye ngwane nikwe dre nuaindi? ¿Kukwe madabätä ni törbadre gätä juain ja bäre ye ngwane nikwe dre nuaindi? Ye erere rabadre bare nibätä angwane nikwe ja töi mikadre kukwe keteiti den nuaindre jai (Hechos 5:29). Nikwe ja töi mikai Jehová mike täte aune ni rikai gätäbätä angwane, nikwe bämikai ie niara tare nikwe aune nikwe dre nuaindre ye niara aibe raba niere nie ye nüke gare nie (Romanos 6:17). Ye käkwe kä mikai juto Jehovabätä (Proverbios 27:11).

NIKWE NÄNDRE KÄRE GÄTÄBÄTÄ

16, 17. a) Gätä ye nämene ütiäte krubäte nitre kristiano siklo kena kräke, ¿ye ñokänti gare nie? b) ¿Gätä ye nämene tuin ño George Gangas ie?

¹⁶ Fiesta Pentecostés kä 33 ye bitikäre, “nitre Jesu kukwei ngwiankakwe, yebtä niaratre namani ja kite köbö kwatirekwatire amne namanintre jändrän jakwe dräire jabti kwärikwäri” (Hechos 2:42). Ye abokän, niaratre namani jankunu ja ükökrö Jehová mikakäre täte. Aune gobran romano aune nitre judío ji ngwanka kukwebätä ja mikani niaratre rüere akwa niaratre namani ja ükökrö jankunu. Ñaka namani nuäre, akwa niaratre ja di ngwani ja ükökrö jankunu.

¹⁷ Kä nengwane, ni Jehová mikaka täte tä debe bien krubäte nita ja ükökrö yebätä. Ani töbike George Gangas yebätä, niara sribibare kä 22 biti bäri Nitre Braibe Konkrekasion Jökrä Ngübabitikä ye kwrere. Niara niebare ja ükadrekrö ja mräkätre aune ja ngwaitre ben ye nämene dimike krubäte aune “kukwe ye nämene kä mike bäri juto niarabätä”. Kä nämene ie ye ngwane, käre nämene nemen Ju Ja Ükarakrö yete käne aune nämene nikenta mrä. Niara nämene blite ja mräkätre aune ja ngwaitre ben ye nämene kä mike jutobätä yebätä niebare kwe: “Tita nemen niaratre ngätäite ye ngwane jata nemen ruin tie ti mräkätre ben gwi ye kwrere, kukwe ja üaire yebiti”. Aune niebare kwe arato niara töi nämene krubäte ja ükakröbätä ja mräkätre aune ja ngwaitre yebe.

18. a) ¿Ja ükakrö ye tuin ño mäi? b) ¿Mä töita kwatibe dre nuainbätä?

¹⁸ Aune mä, ¿ja ruin mäi ja mräkä George Gangas ye erere? Ye erere angwane, mäkwe ja di ngwan ja ükökrö jankunu ja mräkätre aune ja ngwaitre yebe, ruäre ngwane ñaka nuäre akwa mäkwe nuain. Rei David ie ja namani ruin ño ye erere ja ruin mäi ye mäkwe bämika Jehovai, niarakwe niebare kä Ngöbö mikakäre täte ye nämene tare kwe (Salmo 26:8).