Burrobiti Jesús namani Jerusalén ngwane, kani ngäbiti kä jutobiti

¿Profecía Bibliabätä tä mike gare Jesús ye Mesías?

Biblia tä kukwe mike gare

Jän. Jesús nämäne kä tibienbätä ngwane, profecía keta kabre “Mesías ni Ji Ngwanka”, ye rabai “Ni jökrä diantarikäre” yebätä kukwe mikani nemen bare kwe (Daniel 9:25; 1 Juan 4:14). Jesús murie ketani ye bitikäre profecía mesiabätä mikani nemen bare jankunu kwe (Salmo 110:1; Hechos 2:34-36).

**¿Kukwe Mesías ye dre gärätä?**

Kukwe hebreo Maschíaj (Mesías) aune bäsi erere griego Kjristós (Kristo) abokän “dianinkä” meden gärätä. Ye medenbätä, Jesukristo ye “Jesús ni dianinkä” o “Jesús Mesías” meden gärätä.

Mekera ni iti dianka nämäne sribi ütiäte nuainkäre ngwane, aceite keka nämäne dokwäbiti (Levítico 8:12; 1 Samuel 16:13). Ngöbökwe Jesús dianinkä rabakäre mesías aune sribi ütiäte mikani kisete (Hechos 2:36). Akwa ñaka aceite kekani dokwäbiti, ñakare aune Ngöbökwe dianinkä üai demebiti (Mateo 3:16).

¿Ni mada raba profecía mesiabätä ye mike nemen bare?

Ñakare. Ni kisetä o huella digital ye tä ni itibe mike gare, ye erere arato profecía Bibliabätä ye tä mesías o Kristo itibe mike gare. Akwa Bibliata ni mike mokre kukwe nebiti: “Kristo o profeta ngwarbe rükadi abokän käkwe kukwe ñan tuabare nuaindi nitre ngökakäre aune nitre dianinkä ye raba näkwite arato” (Mateo 24:24).

¿Mesías mada raba nüke jä känenkäre?

Ñakare. Mesías ye jatai David mräkätre yekri mikani gare Bibliakwe, David namani reire juta Israel yete (Salmo 89:3, 4). Registro David mräkätre jatärikwe ye nianinte. Kä 70 ngwane, nitre romano käkwe juta Jerusalén diani jai ngwane, registro ganinte raba ruin nie.a Akwa registro ye nämene Jesús näire aune Jesús jatani David mäkätrekri, ye Jesús rüe ie kukwe ñan kwani ükakäre jire (Mateo 22:41-46).

¿Profecía ketabe Bibliabätä tä blite mesiabätä?

Profecía nuäi tä blite Mesiabätä ye metrere ñan gare.Profecía ruäre Bibliabätä, tä blite Mesiabätä ye täin ñaka ja erebe. Ñodre, Isaías 53:2-7 yete profecía keta kabre Mesiabätä ye kädekateta. Kukwe jökrä nieta yete ye nitre ruäre kräke profecía keteitibe, mada abokän kräke kukwe keteiti keteiti ye profecía jene jene.

Profecía mesiabätä ruäre namani bare Jesubätä

Kukwe	Profecía	Namani bare
Abrahán mräkätre jatäri	Génesis 22:17, 18	Mateo 1:1
Isaac mräkätre jatäri, Abrahán ngobo	Génesis 17:19	Mateo 1:2
Tribu israelita Judakwe	Génesis 49:10	Mateo 1:1, 3
David mräkätre metre yekri	Isaías 9:7	Mateo 1:1
Meri deme kaibe monsoi	Isaías 7:14	Mateo 1:18, 22, 23
Därebare Belén	Miqueas 5:2	Mateo 2:1, 5, 6
Kädianta Emmanuelb	Isaías 7:14	Mateo 1:21-23
Därebare kä bobre känti	Isaías 53:2	Lucas 2:7
Därebare ye bitikäre monsotre kia murie ketani	Jeremías 31:15	Mateo 2:16-18
Nämene Egipto käräbareta	Oseas 11:1	Mateo 2:13-15
Niara Nazareno namani garec	Isaías 11:1	Mateo 2:23
Ni iti kukwe mikani gare känenkri	Malaquías 3:1	Mateo 11:7-10
Kä 29 yete dianinkä üai demebiti mesiared	Daniel 9:25	Mateo 3:13-17
Monso jakwe Ngöbökwe mikani gare	Salmo 2:7	Hechos 13:33, 34
Ju Ngöbökwe mikani ütiäte kwe jai	Salmo 69:9	Juan 2:13-17
Kukwe kwin Ngöbökwe ye driebare kwe	Isaías 61:1	Lucas 4:16-21
Kukwe driebare kwe juta Galilea ye käkwe käträ tikaninkä nitre okwäte	Isaías 9:1, 2	Mateo 4:13-16
Moisés erere, kukwe ñan tuabare nuainbare kwe	Deuteronomio 18:15	Hechos 2:22
Moisés erere, blitabare kwe Ngöbö kräke	Deuteronomio 18:18, 19	Juan 12:49
Nitre kwati nämäne bren ye mikaninta kwin kwe	Isaías 53:4	Mateo 8:16, 17
Ñaka nitre töi mikani jabätä kwe	Isaías 42:2	Mateo 12:17, 19
Nitre bren ye mikani tuin bobre kwe jai	Isaías 42:3	Mateo 12:9-20; Marcos 6:34
Kukwe metre Ngöbökwe driebare kwe	Isaías 42:1, 4	Mateo 12:17-20
Ni mäträkä kwin	Isaías 9:6, 7	Juan 6:68
Jehová kä mikani gare kwe	Salmo 22:22	Juan 17:6
Diribare kwe aune erere nuainbare kwe	Salmo 78:2	Mateo 13:34, 35
Ji dokwäte	Daniel 9:25	Mateo 23:10
Nitre kwati ñaka mikani era jai	Isaías 53:1	Juan 12:37, 38
Jäbätä nitre ngoto ritaikä	Isaías 8:14, 15	Mateo 21:42-44
Ñan kani ngäbiti	Salmo 118:22, 23	Hechos 4:10, 11
Bätä ngwani ngwarbebätä	Salmo 69:4	Juan 15:24, 25
Burrobiti namani Jerusalén ngwane, kani ngäbiti kä jutobiti	Zacarías 9:9	Mateo 21:4-9
Monsotrekwe käikitaninkä	Salmo 8:2	Mateo 21:15, 16
Jatani Jehová käbiti	Salmo 118:26	Juan 12:12, 13
Ja ketamuko iti trö kwitani ie	Salmo 41:9	Juan 13:18
Ngwian mününe 30 närebätä kitani ngisee	Zacarías 11:12, 13	Mateo 26:14-16; 27:3-10
Ja ketamuko kwe käkwe kämikaninkäbätä	Zacarías 13:7	Mateo 26:31, 56
Testiko ngwarbe käkwe ñäkäbare rüere	Salmo 35:11	Mateo 26:59-61
Nitre ñäkäkä rüere ngwärekri ñan blitabare kwe	Isaías 53:7	Mateo 27:12-14
Käli kitanibätä	Isaías 50:6	Mateo 26:67; 27:27, 30
Metani dokwäte	Miqueas 5:1	Marcos 15:19
Kwata metani	Isaías 50:6	Juan 19:1
Nuain nämene tare ngwane, ñaka ja ngie mikani kwe	Isaías 50:6	Juan 18:22, 23
Gobrantre käkwe ja mikani rüere	Salmo 2:2	Lucas 23:10-12
Kise aune ngoto metani kribätä	Salmo 22:16	Mateo 27:35; Juan 20:25
Dän kwe ye rabadre nirekwe yekäre suerte kitani	Salmo 22:18	Juan 19:23, 24
Ni ja mikaka ngite erere mikani tuin jai	Isaías 53:12	Mateo 27:38
Ñäkäbare tare ie aune ñan mikani ütiäte jai	Salmo 22:7, 8	Mateo 27:39-43
Nämene juto biare ja tare nikakäre nitre ngite kräke	Isaías 53:5, 6	1 Pedro 2:23-25
Ngöbökwe kämikaninkäbätä namani tuin	Salmo 22:1	Marcos 15:34
Vinagre hielbe biani ñadre ie	Salmo 69:21	Mateo 27:34
Krütadre känenkri tomana namani ie	Salmo 22:15	Juan 19:28, 29
Ja nire kwe mikaninta kwe Ngöbö kisete	Salmo 31:5	Lucas 23:46
Ja nire biani kwe	Isaías 53:12	Marcos 15:37
Ni kökanintari kwe ngite diankakäre	Isaías 53:12	Mateo 20:28
Kroko ñaka ötaninbätä jire	Salmo 34:20	Juan 19:31-33, 36
Lanza kriani teta	Zacarías 12:10	Juan 19:33-35, 37
Doboi mikani ni jondron bäkäne erere	Isaías 53:9	Mateo 27:57-60
Ganinkröta	Salmo 16:10	Hechos 2:29-31
Ni ja mikaka rüere ye täte mada mikani	Salmo 109:8	Hechos 1:15-20
Täkänintubu Ngöbö kise ruinkri	Salmo 110:1	Hechos 2:34-36

a Cyclopedia de McClintock aune Strong tä niere: “Registro tribukwe aune nitre ja mräkäre judiokwe ye juani ngwarbe Jerusalén diani jai ngwane aune ñaka känenkri raba ruin nie”.

b Kukwe hebreobiti Emmanuel nieta, ye abokän “Ngöböta nibe” meden gärätä, Jesukwe sribi nuain Mesías erere mikata gare kwin. Nämene kä tibienbätä aune sribi nuainbare kwe, yebiti nireta Ngöbö mike täte yebe Ngöböta bä namani (Lucas 2:27-32; 7:12-16).

c Kukwe Nazareno ye kite kukwe hebreo nétser yekri, abokän “bükün” meden gärätä.

d Mesías rükai kä 29 ye ngwane mikata gare ño cronología bibliabätä ye mä törba mikai gare jai ngwane kukwe kädekata “Mesías rükai ye Daniel ni Ngöbö kukwei niekä käkwe mikani gare” ye mäkwe mikadre ñärärä.

e Profecía ne tä tärä Zacarías yebätä, akwa Mateo ni tärä tikaka tä niere “blitabare ni Ngöbö kukwei niekä Jeremías yebiti” (Mateo 27:9). Sección de las Escrituras yete kukwe kädekata “los profetas” yete ruäre ngwane tärä Jeremías ye mika nämäne käne raba ruin nie (Lucas 24:44). Sección jökrä ye mikakäre gare Mateokwe tärä “Jeremías” kädekaninte raba ruin nie aune yete tärä Zacarías nämäne arato.