“¿Jondron biandre yebätä Biblia tä dre niere?”
Biblia tä kukwe ye mike gare
Jondron nikwe ye biandre ja töi jeñebiti aune töi kwinbiti ye erere Biblia tä ni töi mike nuainne. Nita nuainne ye erere ngwane, ni ie jondron bianta ye kräke kukwe kwin tä nemen bare aune arato kukwe kwin tä nemen bare nibätä (Proverbios 11:25; Lucas 6:38). Jesukwe niebare: “Nita jändrän bien ni mdaye, btä käta neme bäri nuäre nibtä ni jändrän kaka ngäbti ye ngwä” (Hechos 20:35).
¿Ñongwane jondron bian raba?
Jondron bianta ja töi jeñebiti ye köböire kukwe kwin tä nemen bare. Bibliabätä nieta: “Munkwe ngwian biandre nuäi nuäi btä munta töbike, ye erere munkwe bian, akwa munkwe ñan biandre ja moto ulire bti amne ñan ni mdata biamna, ñobtä ñan angwane kä nuäre nibtä ngwian bien, ni ye abko Ngöböta tarere” (2 Corintios 9:7).
Nikwe jondron biandre ja brukwä ngöibiti ye ie Ngöbö tö (Santiago 1:27). Ni meden tä kukwe ribere jai ye nita dimike ngwane nita sribire Ngöbö kräke. Aune ütiä tä biandre nie Ngöbökwe kukwe nuainta nikwebätä ye erere ja ruin ie (Proverbios 19:17). Ngöbökwe kukwe kwin nuaindi ni kräke nieta Bibliabätä (Lucas 14:12-14).
¿Ñongwane ñaka jondron biandre?
Nita töbike ja aibebätä ngwane. Ñodre:
Ja käikitakakäre ni mada okwäbiti (Mateo 6:2).
Jondron täri (Lucas 14:12-14).
Jondron kökakäre ja mikai kwäre jondron bianta yebiti (Salmo 49:6, 7).
Kukwe nuainta abokän Ngöbö ñaka kai ngäbiti ye kräke nita jondron bien. Ñodre, ni ja gain ngwianbiti, ni dröbare o droga duaka ye ie ngwian biandre ye ñaka kwin (1 Corintios 6:9, 10; 2 Corintios 7:1). Arato, ni krene ie ngwian biandre ye ñaka kwin (2 Tesalonicenses 3:10).
Sribi mikani ni kisete Ngöbökwe ye ñan tä nemen bare nie ngwane. Nire mikani ji dokwäte Ngöbökwe ye rabadre mräkä kwe ngübare (1 Timoteo 5:8). Nitre mada ngübadre aune ni mräkätre käi kwitadrekä jabiti ye ñaka kwin. Ne madakäre, nire ñan nämäne mräkä kwe ngübare, “jondron kwe ye abokän Ngöbö kräke” nämäne niere, ye Jesús ñan nämäne kain ngäbiti (Marcos 7:9-13).