Kukwe keteitibiti nikwe tödeka nikwe mikadre bäri dite ye abokän nikwe töbikadretari ni kökanintari yebätä. Kukwe käbämikani Jehovakwe ye mikai nemen bare kwe ni kökanintari yebiti bämikani kwe. Dre nuainbare ni kökatarikäre aune ñobätä Jehová nuainbare yebätä töbikadretari ye ütiäte krubäte. Ne köböire, tödeka nikwe jatai nirien jankunu aune kä ne kwitai bä nuäre, känti nikwe nünain kärekäre ye ie tö ngwain. ¿Ñobätä nita ne niere? Ni kökatarikäre Jehovakwe dre nuainbare yebätä ani töbike. Jehová nämäne juto monso mubai nämäne ja kete kwin ben ye juen kä tibienbätä därere ni kä tibienbätä erere akwa töi metre. Jesús nämäne kä tibienbätä ngwane, ja tare nikabare krubäte kwe aune murie ketani tare krubäte. Nikwe nünandre jötrö ngwarbe ye ñan aikäre monso kwe ye tuanimetre ja tare nike kwe (Juan 3:​16, TNM; 1 Ped. 1:​18, 19, TNM). Nikwe nünandre kärekäre kä bä nuäre yete yekäre Jehovakwe kukwe ñan nuäre nuainbare ni kökatarikäre. w23.04 27 párr. 8-9

¿Jehová tö nitre krütanina ye gaikröta? Jän niara tö nuaindi. Nitre ruäre Biblia tikaka ye töi mikani kwe kukwe käbämikata kwe ye tike Bibliabätä (Is. 26:19; Apoc. 20:​11-13). Jehovata kukwe käbämike ye ngwane, tä mike nemen bare (Jos. 23:14). Jehová töita nitre krütanina ye gakröbätä. ¿Ñobätä nita niere? Kukwe niebare Jobkwe yebätä ani töbike. Niara krütadre ngwane, Jehová töi rabai gakröbätä ye nämäne gare metre ie (Job 14:​14, 15, nota). Ye erere kä nengwane nitre Jehová mikaka täte krütani ye niara töita gakröbätä, tädre kwin aune kä tädre jutobätä ie niara tö. Aune nitre ie Jehová ñaka namani gare krütani, ¿yebätä töita ño? Ni Rün ni tarekä tö niaratre tuaita nire arato (Hech. 24:15). Nitre ye rabadre ja ketamuko kwe aune nünandre kwe kärekäre kä tibienbätä ie niara tö (Juan 3:​16, TNM). w23.04 9 párr. 5-6

¿Mä raba dre nuainne tödeka jakwe mikakäre bäri dite? Mäta tö ngwen nüna kä tibienbätä ie ngwane, Biblia tä blite kä bä nuärebätä yebätä mäkwe ñäkä aune mäkwe ja töi mika yete (Is. 25:8; 32:​16-18). Töbike nikwe nünain kä bä nuäre te ja känenkäre yebätä. Mäta käre töbike kä mrä bä nuäre yebätä ngwane, kukwe tare “ye jötrö amne ñakare tare” rabai tuin mäi (2 Cor. 4:17). Tödekara bianta Jehovakwe mäi ye mä mikai dite. Nita dre ribere jai ja ngwankäre dite ye jökrä Jehovakwe bianina nie. Yebätä ñaka raba nuäre mä kräke sribi mikani mä kisete ye nuainkäre, kä ngwankäre nüke jai o sribikäre kä jutobiti Jehová kräke ngwane, mäkwe ora ja brukwä tätebiti, aune ja tötika Bibliabätä Jehovakwe mä jie ngwandre yekäre. Ne madakäre, ja mräkätre tä ni dimike ye nikwe kadre ngäbiti, kukwe ie nita tö ngwen ye nikwe mikadre bäri dite. Angwane “Ngöbö di kri bä nuäre, yebti” ni mikai kwe dite angwane ni raba “nünenkä dite jabtä bätärekä abkokäre. Erere arato, kä tädre bäri nuäre” nibätä (Col. 1:11). w23.10 17 párr. 19-20