KAPITULO 37
¿Ti rabadre ja ngökö ñöte gwä ngwane?
Kukwe ne metre o ñakare ye mike gare:
Ni kristiano jökrä rabadre ja ngökö ñöte.
□ Metre
□ Ñakare
Ja ngökata ñöte ye tä ni ketebätä ja mika ngite yebätä.
□ Metre
□ Ñakare
Ja ngöka ñöte yebiti raba kwäre kömikata.
□ Metre
□ Ñakare
Ti ñan ja ngökö ñöte ngwane Ngöbökwe ñan kukwe ükaite tibe.
□ Metre
□ Ñakare
Ja ketamuko tikwe ja ngökanina ñöte aisete ti rabadre nuainne arato.
□ Metre
□ Ñakare
¿Kukwe tä ükaninte Bibliabätä ye ererebätä mäta ja ngwen? ¿Mäta ja di ngwen ja kete Ngöböbe? ¿Kukwe mikata täte mäkwe yebätä mäta blite ni mada ben? Kukwe yebätä mäkwe jän nini ngwane, mä jämi ja ngökö ñöte akwa mä töita nuainbätä raba ruin nunye. Akwa, ngübare ken. Mä niena juto ja ngökakäre ñöte o ñakare ye mä rabadre mike gare kwin jai. Rabadre gare mäi yekäre kukwe ngwinintari kena ye mäkwe miri gare kwin o ño ye raba mä dimike mike gare jai.
● Ni kristiano jökrä rabadre ja ngökö ñöte.
Metre. Jesukwe kukwe ye nuain mananbare nitre ja tötikaka kwe ie (Mateo 28:19, 20). Jesukwe ja ngökani ñöte aisete mä rabadre nänkä Kristo ben yekäre mäkwe ja ngökadre ñöte mä rabadrera ünä aune mä tö nuaindi yebätä ye ngwane.
● Ja ngökata ñöte ye tä ni ketebätä ja mika ngite yebätä.
Ñakare. Ja ngöka ñöte yebiti raba nemen gare nitre mada ie mäkwe ja dianinkä mento Jehová mikakäre täte. Jehovata kukwe nuainmana ye ererebätä ni tö nünain yebätä nita ja denkä mento kräke. Aune ñaka ja mikakäre kukwe blo ye rüere jerekäbe.
● Ja ngöka ñöte yebiti raba kwäre kömikata.
Metre. Biblia tä mike gare erere, ja ngöka ñöte ye ütiäte krubäte rabakäre kwäre (1 Pedro 3:21). Akwa ye ñan tä mike gare ja ngöka ñöte ye köböire mä rabai kwäre. Ñakare. Mäkwe nuain Jehová tare mäkwe yebätä aune mä tö mikai täte ja brukwä tätebiti kärekäre yebätä (Marcos 12:29, 30).
● Ti ñan ja ngökö ñöte ngwane Ngöbökwe ñan kukwe ükaite tibe
Ñakare. Santiago 4:17 tä mike gare: “Nire nire ie jändrän kuin nuen gare, akwa ñan tä nuene abko tä ja mike ngite”, ni ye ja ngökanina ñöte o jämi ja ngökö ñöte yebiti ta. Yebätä töbike kukwe nebätä: ¿Ngöbö tö mä tuai dre nuainne ye nüke gare mäi? ¿Mä niena ünä ja trä tuakäre mäta dre nuaindre yebätä? Ye erere ngwane, mä raba blite mä rün o ni kristiano niena ünä ja üairebiti yebe. Niaratre käkwe mä dimikai ne kwe mä raba ja ngökö ñöte.
● Ja ketamuko tikwe ja ngökanina ñöte aisete ti rabadre nuainne arato.
Ñakare. Mä tö ja ngökai ñöte ye betadrekä mä brukwäte (Salmo 110:3). Aune ja mikadre testiko Jehovakwe ye dre gärätä metrere aune ja niena ruin juto mäi ja mikakäre kukwe yete ye ngwane batibe mäkwe nuaindre (Eclesiastés 5:4, 5).
Kukwe ütiäte krubäte dianta nuaindre jai
Ja ngökata ñöte ye köböire mä ñan rabaira nüne käne erere aune ye näin mä ngwena kukwe kwin krubäte kokwäre. Akwa kukwe ütiäte krubäte rabai mä kötärä arato. ¿Ye kukwe meden? Ye abokän mäkwe ja diainkä mento Jehová kräke ngwane, mäkwe dre dre käbämikai ie orasionte ye jökrä mä rabadre mike nemen bare.
¿Mä kebera ja ngökö ñöte? Erere ngwane, kukwe kwin tä mäi kä ngwankäre juto jabätä. Sribidre ja brukwä tätebiti Jehová kräke aune mäta nüne niara aibe kräke mä rabadre bämike köbö kwatire kwatire ie, ¿ye kräke kukwe mada kwin tärä? (Mateo 22:36, 37.)
TEXTO BIBLIABÄTÄ NE KRÄKE
“Munkwe ja ngrabare bian nire, deme aune rabadre tuin kwin Ngöböi; ye erere ngwane, munkwe sribi deme nuain ja töi biani muen töbikakäre kwin yebiti” (Romanos 12:1).
MÄ RABA NE NUAINNE
Ja mräkätre konkrekasionte meden raba mä dimike nirien ja üairebiti ye mäkwe ngwantari mä rün ie (Hechos 16:1-3).
¿NE GARE MÄI?
Ja ngöka ñöte yebiti ja “täräi” mikata ye kukwe keteiti ütiäte nuainta rabakäre kwäre (Ezequiel 9:4-6).
¡KÖMIKE!
Kukwe drieta Bibliakwe abokän rabadre gare kwin tie ja ngökakäre ñöte: ․․․․․
¿Ti tö kukwe meden ngwentari ti rün aune ti meye ie kukwe nebätä? ․․․․․
¿MÄ TÖITA ÑO?
● ¿Ja ngöka ñöte ye ñobätä kukwe bäri ütiäte dianta nuaindre jai?
● ¿Ñobätä monsotre ruäre tä ja ngökö ñöte jämi juto ye känenkri?
● ¿Ñobätä monsotre ruäre tä kä juen krubäte ta ja ngökakäre ñöte?
[Comentario]
“Ti ja ngökanina ñöte ye tita ngwen törö jai ye tä ti dimike kukwe kwin nuainne aune ñaka ja mike kukwe kri te” (Noemí).
[Üai aune recuadro]
Kukwe ne ngwantarita bäri ja ngöka ñöte yebätä
¿Ja ngökata ñöte yebiti dre bä mikata? Mäta ja ngökö täte ñöte ye ngwane mätä krüte, ye abokän mä nämäne ja töi nuainne ye mäta tuenmetre ye kwrere nie raba. Aune mäta kite gökökäta ñöte kwin ngwane mäta nüketa nire, ye abokän mäta ja töi mike Jehová töi nuainne.
¿Ja diankata Jehová kräke ye dre gärätä? Ye abokän mä ñan tärä nemen ja töi nuainne ñakare aune mäta ja nire bien Jehovai (Mateo 16:24). Ye medenbätä mä jämi ja ngökö ñöte ye känenkri mä rabadre orasion nuainne Jehovai, känti mäkwe niara aibe töi nuaindi käre ye mä rabadre käbämike ie.
¿Ti jämi ja ngökö ñöte ye känenkri ti tädre dre nuainne? Kukwe nieta Bibliakwe ye ererebätä mä tädre nüne aune kukwe mikata täte mäkwe yebätä mä tädre blite ni madabe. Arato mäkwe ja ketadre kwin Ngöböbe, yekäre mä rabadre ja tötike aune orare. Mä tö sribidi Jehová kräke yebätä mä rabadre sribire kräke aune ñan ni mada tä nuain mana mäi, ye mäkwe ngwandre tö jai ye ütiäte krubäte.
¿Kä rabadre kwäbe tibiti aune ti ja ngökadre ñöte? Kä kwäbe mäbiti ye ñan ai bäri ütiäte. Akwa, mä rabadre ünä aune kä rabadre mäbiti känti ja diankata ye dre gärätä ye rükadre gare kwin mäi yebrä ütiäte.
¿Ti tö ja ngökai ñöte akwa tikwe kä ngübadre niedre ti rünkwe tie ngwane tikwe dre nuaindre? Tä ja kitadre mäi kukwe ja jie ngwankäre Bibliabätä mikakäre täte kwin niedre kwetre mäi ngwane, mäkwe niaratre kukwei mika täte aune mäkwe ja di ngwan ja kete kwin Jehovabe (1 Samuel 2:26).
[Recuadro]
¿Mä tö ja ngökai ñöte?
Kukwe ngwantarita jatäri ne käkwe mä dimikai mike gare jai. ¡Mä jämi kukwe mike gare ye känenkri mäkwe ñäkä texto yebätä!
¿Mäta tö ngwen Jehovai? ¿Ye mäta bämike ño? (Salmo 71:5). ․․․․․
¿Kukwe kwin aune kukwe blo ye nüke gare kwin mäi? ․․․․․
¿Kä ño ngwane mäkwe bämikanina? (Hebreos 5:14). ․․․․․
¿Käta niken nuäi ta ngwane mäta orare? ․․․․․
¿Mäta kukwe metre ta niere orasionte? ¿Mä kukwe niere yebiti mätä Jehová tarere tä nemen gare? (Salmo 17:6). ․․․․․
¿Kukwe meden mä tö nuaindi bäri kwin orasion yete? ․․․․․
¿Käta niken nuäi tä ngwane mäta ja tötike Bibliabätä? (Josué 1:8). ․․․․․
¿Mäta ja tötike kaibe ngwane kukwe ñobätä mäta ja tötike? ․․․․․
¿Mäta ja tötike kaibe yete mä tö dre mikai nuaindre jai? ․․․․․
¿Kukwe drie mäkwe ye kwin? (Ñodre: ¿Kukwe ñan nguseta drieta Bibliakwe ye drie gare mäi? ¿Nitre tö kukwe mikai gare jai ye mätä tuinbiti ta? ¿Mätä ja di ngwen ni iti tötike Bibliabätä?)
□ Jän □ Ñakare
¿Mä rün ñaka tä niken kukwe driere akwa mäta niken? (Hechos 5:42)
□ Jän □ Ñakare
¿Kukwe meden mä tö mikai nuaindre jai kukwe drie känti? (2 Timoteo 2:15). ․․․․․
¿Mäta kwen gätä jökräbätä o käre mäta juen ja bäre? (Hebreos 10:25). ․․․․․
¿Mäta comentario bien? ․․․․․
Mä rün ñaka nän gätäbätä ñäkäire mäi ngwane, ¿niaratre ñaka raba niken ngwane mäta niken?
□ Jän □ Ñakare
¿Käta juto mäbätä Ngöbö töi nuainbätä? (Salmo 40:8.)
□ Jän □ Ñakare
Kukwe keteiti känti nitre mada namani kukwe nuain mana ja dibiti mäi ngwane, ¿mäkwe ñaka nuainbare ye törö mäi? (Romanos 12:2). ․․․․․
¿Mä tö dre nuaindi Ngöbö tarekäre käre? (Judas 20, 21). ․․․․․
Ja ketamuko o mä rün käkwe Jehová tuadremetre ngwane, ¿mäkwe Jehová mikadre täte jankunu? (Mateo 10:36, 37).
□ Jän □ Ñakare
[Üai]
Ja ngökata ñöte ye keta raba ja mäkäteta yebe: aisete ñaka nuaindre okwä kware