Jehovakwe kä tibien kwitai bä nuäre ye mikata gare metre kwe

1. ¿Ni Ngöbö kukwei niekä Isaías käkwe kukwe meden mikani gare nitre israelita ie?

NI NGÖBÖ kukwei niekä Isaías käkwe kukwe ne niebare Ngöböbätä “Ngöbö abokän kukwe metre niekä”. “Kukwe metre” ye abokän kukwe hebreore “amén” nieta (Is. 65:16; nota). Amén ye abokän “kukwe ye metre” o “ye erere raba bare” meden gärätä. Bibliabätä bä kabre amén tä tikani yebiti Jesús aune Jehová tä kukwe niere ye käre tä mike nemen bare. Ye medenbätä, Isaiakwe kukwe niebare nitre israelita ie ye nükani gare mrebe ietre: Jehovata kukwe niere ye käre tä nuainne. Jehovakwe kukwe käbämikanina aune erere mikani nemen bare jökrä kwe yebiti bämikanina kwe.

2. ¿Jehovata kukwe käbämike kä ja känenkäre kräke ye ie ñobätä tö ngwan raba? ¿Kukwe ngwantarita meden rabai gare nie?

² ¿Nita tö ngwen kukwe käbämikata Jehovakwe kä ja känenkäre kräke ye ie? Ngöbö kukwei niekä Isaías nünanbare ye bitikäre kä nikanina 800 ta, ye ngwane Ngöböta kukwe käbämike ye ie nikwe tö ngwandre kwatibe niebare apóstol Pablokwe. Kukwe nebiti: “Ngöbö abko ñan raba ni ngökö jire chi” (Heb. 6:18). Ño tibo tä nen yekänti ñö mrene ñan nen gwairebe, ¿ñan ererea? Ye erere arato, Jehová, kukwe metre niekä ye ñan raba kukwe ngwarbe niere jire chi. Yebätä ni raba niere Jehovata kukwe käbämike kä ja känenkäre kräke ye mikai nemen bare kwe. Kukwe ja tötikara nekänti kukwe ngwantarita ne rabai gare nie: ¿Jehovata dre käbämike kä ja känenkäre kräke? ¿Niarata kukwe käbämike ye mikai nemen bare metre kwe ye ñokänti gare nie?

¿JEHOVAKWE DRE KÄBÄMIKANI?

3. a) ¿Kukwe käbämikata ye meden ütiäte krubäte ni kräke? (Apocalipsis 21:​3, 4). b) ¿Kukwe käbämikata nebätä nita ñäke nitre ie ngwane tätre dre niere?

³ Jehovata kukwe käbämike ye ütiäte krubäte ja mräkätre kristiano kä jökräbiti tibien kräke (ñäkädre Apocalipsis 21:​3, 4 yebätä). Jehovakwe gata diainkä aune “ñan ja müaidre jire chi mda amne ñan ja müaidre ja tare nikabtä”. Nita niken kukwe driere texto nebiti nitre ie, töi mikakäre jäme kukwe käbämikata kä ja känenkäre kräke yebiti. ¿Nitre ruäre tä dre niere kukwe käbämikata kä ja känenkäre kräke yebätä? “Kukwe käbämikata ye abokän kwin krubäte aisete ye erere ñaka raba nemen bare”.

4. a) ¿Kukwe meden ketebu nämäne gare Jehovai? b) ¿Kukwe meden mikani gare Jehovakwe nie ne kwe nikwe tö ngwandre?

⁴ Jehovakwe apóstol Juan töi mikani kukwe tike kukwe käbämikata kä ja känenkäre yebätä ngwane, nikwe kukwe drieibiti ye nämäne gare ie. Akwa arato nitre kwati kräke ñaka rabai nuäre tö ngwankäre “kukwe mrä” käbämikata yei nämäne gare ie (Is. 42:9; 60:2; 2 Cor. 4:​3, 4). ¿Ni raba nitre dimike ño tö ngwen kukwe kwin krubäte käbämikata Apocalipsis 21:​3, 4 ye ie? ¿Aune nita tö ngwen Jehovai aune kukwe käbämikata kwe ie ye ni raba mike ño dite? Jehovakwe ñaka kukwe ükani nibätä, ñakare aune kukwe mikani gare mrebe kwe nie tö ngwankäre. ¿Kukwe mikani gare kwe ye abokän meden?

JEHOVATA KUKWE KÄBÄMIKE YE RABAI BARE METRE TÄ MIKE GARE NIE

5. ¿Bersikulo meden känti kukwe tä kwen nie tö ngwankäre Jehovata kukwe käbämike yei aune dre nieta yete?

⁵ Bersikulo nekänti kukwe ruäre raba kwen nie tö ngwankäre kukwe käbämikata Jehovakwe nie yebiti yei. Yete nieta: ‘Ngöbö näma täkänintbe kürä gobrankräbti ye käkwe nieba krörö: Jändrän jökrä tita sribereta btin, nieba kwe. Bti niebata kwe: Kukwe ne abko kukwe era metre, abtä ni jökrä rabadre tödeke bti, aisete tike täräbtä. Yebti Ngöbökwe nieba krörö tie: Jändrän jökrä nibira bare. Ti abko tärä okwä kena kädianta alfa amne tärä okwä mrä kädianta omega kwrere. Ti nämanena jändrän jökrä känenkri kena amne ti rabadi jändrän jökrä täbti mrä’ (Apoc. 21:​5, 6a).

6. ¿Ñobätä kukwe nieta Apocalipsis 21:​5, 6 tä ni dimike tö ngwen bäri kukwe käbämikata Jehovakwe yei?

⁶ ¿Ñobätä kukwe käbämikata ne tä nita tö ngwen Jehovai ye mike dite? Tärä Apocalipsisb ye tä kukwe mike gare ruäre kukwe mikata gare yebätä: “Kä kökata aune ja kä tikatabätä ye kwrere Jehovakwe kukwe kwin mikai nemen bare ni kä tibienbätä kräke”. Apocalipsis 21:​3, 4 yete Jehovakwe kukwe käbämikani yebätä nita ñäke aune bersikulo 5 aune 6 ye abokän, Jehovakwe firmabare ne kwe rabadre bare ye kwrere. Ja känenkäre mada kukwe jene jenebiti Jehovakwe kukwe käbämikani ye mikai nemen bare metre yebätä ani ja kite.

7. ¿Bersikulo 5 yekänti nire tä blita ye kömike aune ñobätä ye ütiäte krubäte?

⁷ Jehovata kukwe käbämike mikai nemen bare metre kwe tä mike gare kukwe nebiti: ‘Angwane Ngöbö näma täkänintbe kürä gobrankrä ye käkwe nieba krörö’ (Apoc. 21:5a). Kukwe ne ütiäte krubäte ñobätä ñan aune kukwe mikani tuare bätä blitata tärä Apocalipsis yekänti Jehovakwe blitabare bämä jire metre ta. Yebiti nüke gare metre nie ángel dite o Jesús ye ñan aikwe blitabare ñakare aune Jehová ara käkwe blitabare. Ye köböire nita tö ngwen ye rabai bäri dite, ñobätä ñan aune “Ngöbö abko ja kukwei kite ñakare temen” (Tito 1:2). Kukwe nieta Apocalipsis 21:​5, 6 ye ie ni rabadre tö ngwen kwatibe.

“JÄNDRÄN JÖKRÄ TITA SRIBERETA BTIN”

8. ¿Jehovata kukwe käbämike rabai bare metre mikakäre gare nie dre nieta kwe? (Isaías 46:10).

⁸ Jehovakwe kukwe ne niebare “¡Jändrän jökrä tita sribereta btin!” (Apoc. 21:5). ¿Jutuani mäi? “Jändrän jökrä tita sribereta btin” niarakwe ñan niebare: “Jändrän jökrä tikwe sribedita btin”. Erametre Jehová tä blite kukwe kwitai kwe ja känenkäre yebätä, akwa niara kräke kukwe ye metre aune nuaindi kwe. Ye medenbätä niena nuainne ye kwrere tä niere (ñäkädre Isaías 46:10 yebätä).c

9. a) ¿“Jändrän jökrä sribei mrä” nieta yebätä nita ñäke ngwane dreta nüke ni töibätä? b) ¿“Kä käin” aune “kä temen” nengwane yebätä dre rabai bare?

⁹ Apocalipsis 21:5 yebätä kukwe mada mikata gare ye ani mike gare jai: “Jändrän jökrä sribedita mrä”. Kapitulo nekänti kukwe nieta ne tä ni mike töbike kukwe ketebu nuaindi Jehovakwe yebätä: kena kä kwin aune kä tibien mrä mikai kwe aune ketebu ye abokän ükaiteta kwe. Käne ani töbike kä kwin aune kä tibien mrä mikadi kwe yebätä. Apocalipsis 21:1 tä niere: “Ñobtä ñan angwane kä käinta se btä kä temen ne amne mren dätebare käne Ngöbökwe abko nikanina ta”. “Kä käinta käne” ye abokän tä gobran Satanakwe aune chokalitrekwe bämike (Mat. 4:​8, 9; 1 Juan 5:19). Bäsi käre Bibliabätä, “kä tibien” nieta ngwane nitre tä nüne kä tibienbätä yebätä blitata (Gén. 11:1; Sal. 96:1). Aisete, “kä tibien käne” nieta ye tä nitre ja ngwanka käme tä nüne kä tibienbätä ye bämike. Ye medenbätä Jehovakwe “kä kwin” aune “kä tibien”, ye ükaite chi ye ñan ai gärätä, ñakare aune, gaite täte kwe aune “kä kwin” aune “kä tibien” mrä sribedi kwe, ye abokän gobran mrä aune nitre töi metre rabai nüne kä tibienbätä meden gärätä.

10. ¿Dre ükaiteta mrä Jehovakwe?

¹⁰ ¿“Jändrän jökrä tita sribereta btin” nieta Jehovakwe ye ngwane dre madabätä blitata kwe arato? (Apoc. 21:5). Jehovakwe kä tibien aune nitre jökrä ükaiteta metre. Ngöbö kukwei niekä Isaías käkwe niebare, kä tibien ne rabai bä nuäre jardín Edén ye kwrere. Ni itire itire rabai töi metre. Jehovakwe nitre nankwente, kä drüne okwäte, olo ngidianinte ye mikaita kwin aune nitre krütanina ye gaikröta kwe (Is. 25:8; 35:​1-7).

“KUKWE NE ABKO KUKWE ERA METRE ABTÄ NI JÖKRÄ RABADRE TÖDEKE BTI”. AUNE “¡JÄNDRÄN JÖKRÄ NIBIRA BARE!”

11. ¿Jehovakwe dre nuain mananbare Juan ie, aune ñobätä?

¹¹ ¿Kukwe meden madabätä ni raba tö ngwen kukwe yei? Jehovakwe niebare Juan ie: “Kukwe ne abko kukwe era metre, abtä ni jökrä rabadre tödeke bti” (Apoc. 21:5). Jehovakwe ja kukwei tikamananbare Juanye, ye ngwane kukwe ne niebare kwe ie: “Kukwe era metre, abtä ni jökrä rabadre tödeke bti”, yebiti nüke gare nie, niara tä kukwe niere ye ie tö ngwan raba aune metre. ¡Juankwe Jehová mikani täte! Ye köböire kukwe ye tikani kwe aune ni raba ñäke kä bä nuäre käbämikata yebätä aune töbiketari kukwe kwin rabai nikwe yebätä.

12. ¿Ñobätä Jehová raba “¡Jändrän jökrä nibira bare!” ye niere?

¹² ¿Ja käne mada Jehová tä dre niere? Ja käne mada Jehová tä niere “¡Jändrän jökrä nibira bare!” (Apoc. 21:6). Jehovata kukwe käbämike kä ja känenkäre kräke ye niena bare ye kwrere tä blite. Ñobätä ñan aune, kukwe mada ñan raba ketebätä jire. ¿Jehová tä dre mada niere kukwe käbämikata kwe rabai bare metre mikakäre gare?

“TI ABKO TÄRÄ OKWÄ KENA KÄDIANTA ALFA AMNE TÄRÄ OKWÄ MRÄ KÄDIANTA OMEGA”

13. ¿Ñobätä Jehová ye abokän “Alfa aune Omega” nieta kwe?

¹³ Juankwe kukwe tuani bämä jire ye ngwane, Jehovakwe blitabare ben (Apoc. 1:8; 21:​5, 6; 22:13). Jehovakwe blitabare ye jökrä ngwane, “Ti abko Alfa aune Omega” niebare kwe. Alfa ye abokän tärä okwä kena kukwe griegore, aune omega, ye abokän mrä kukwe griegore yebätä. Niarakwe ja kädekani “Alfa aune Omega”, yebiti mikani gare kwe, niara tä kukwe keteiti kömike ngwane, tä mike krüte.

14. a) Ñongwane Jehovakwe “Alfa” niebare aune ñongwane “Omega” niedi kwe mä raba mike gare. b) ¿Jehovakwe dre mikani gare metre Génesis 2:​1-3 yekänti?

¹⁴ Jehovakwe Adán bätä Eva sribebare ye ngwane, niara töi nämäne ño kä tibien kräke aune nitre kräke ye niebare kwe ie. Kukwe kwin niebare krörö kwe ja di biankäre ietre: “Ngäbäkre ngibia kwati munkwe, ie ti tö. Ye arabe raba nirien kwati ja täritäri abko, raba niken nüne kä jökräbti temen” (Gén. 1:28). Jehová töi namani ño mikani gare kwe yebiti niarakwe “Alfa” niebare ye kwerere. Köbö rükai ngwane nitre ja ngwanka metre, niara mikaka täte Adankri ye rabadre nüne kä jökräbiti tibien aune kä tibien kwitadre kwe bä nuäre. Ye rabai bare ngwane, Jehovakwe, “Omega” niedi ye erere. Niarakwe “kä kwin aune kä tibien bätä jondron jökrä tä kä tibienbatä ye sribebare täte” ngwane, niara tö kukwe nuaindi ye rabai bare metre mikani gare kwe. ¿Mikani gare ño kwe? köbö keta kükükäre ye kädekani deme kwe. (Ñäkädre Génesis 2:​1-3 yebätä)d. ¿Ye dre gärätä? Yebiti niara töi namani ño nitre kä tibienbätä aune kä tibien kräke ye rabai bare metre meden gärätä; kukwe jökrä ye rabai bare köbö keta kükükäre jataira niken ta ye ngwane.

15. ¿Ñobätä Jehovakwe ja töi mikani kukwe nuainne ye ñan rabai bare ie ye kwrere bä namani?

¹⁵ Adán bätä Eva ja mikani ngite Jehová rüere ye ngwane, gata aune ngite ye ngie nikani ni jökräbiti (Rom. 5:12). Ye medenbätä, ¿Jehová töi nämäne ni ja ngwanka metre tuai nüne kä jökräbiti tibien ye erere ñan rabadre bare ie? ¿Satana kukwe nuainbare ye köböite Jehovakwe ñaka “Omega” niedre jire? Ye kwrere bä raba nemen. Kukwe ñan namani nuaindre krubäte Jehovai Satana namani nütüre. Ñodre, Jehovakwe Adán bätä Eva gadrete aune nitre mada sribedre kwe käkwe ja ngwandre metre ie, nütü namani kwe. Akwa, Jehovakwe ye erere nuaindre ngwane, Jehová abokän ni ngökö niedre Satanakwe. ¿Ñobätä? Ñobätä ñan aune, Génesis 1:28 yete, Jehovakwe niebare Adán bätä Eva ie: Ngäbäkre munkwe ye rabai nüne kä jökräbiti tibien.

16. ¿Jehová ye abokän ñaka kukwe nuainne kwin niei Satanakwe ye ñobätä Satanas namani nütüre?

¹⁶ ¿Dre mada nükani Satana töibätä nie raba? Jehovakwe Adán bätä Eva tuadremetre monso ngübare akwa, niaratre ñaka rabadre jire chi töi metre (Ecl. 7:20; Rom. 3:23). Ye erere, rabadre bare akräke, Jehová ñaka kukwe nuainne kwin jire chi niedre Satanakwebätä. ¿Ñobätä? Ñobätä ñan aune, Adán bätä Eva monsoitre ja ngwanka metre yekwe nünandre kä jökräbiti tibien käbämikani Jehovakwe ye erere ñaka rabadre bare.

17. ¿Satana, Adán bätä Eva ja mikani Jehová rüere yebätä Jehovakwe dre nuainbare aune kukwe jökrä ye ükaite ño Jehovakwe? (Üai mikadre ñärärä).

¹⁷ Adán aune Eva käkwe ja mikani Ngöbö rüere ye ükaninte ño Jehovakwe yebiti Satana kada ketani kwe (Sal. 92:5). Jehovakwe Adán bätä Eva tuanimetre monso ngübare yebiti niara ñaka ni ngökö jire mikani gare kwe, ñakare aune kukwe nieta kwe ye käre tä mike nemen bare. Arato kukwe nuainta kwe ye jökrä tä nuainne kwin. ¿Ñobätä? Niarakwe “meri bükün” juani ne kwe Adán bätä Eva monsoi ja ngwanka metre ye kökadretari kwe, yebiti Jehová töi namani ño ye tä känime (Gén. 3:15; 22:18). Jehovakwe ni kökaitari ye Satanakwe ñaka bämikani jire ja töite. ¿Ñobätä? Ñobätä ñan aune, ni kökanintari ye abokän ja tare erametre bämikani Jehovakwe (Mat. 20:28; Juan 3:16). Ne madakäre, Satana ye abokän ni käbäre krubäte yebätä ja tare ye abokän dre ñan gare ie. Ni kökanintari ye köböire, ¿dre rabai bare? Kä mil näin ta ye bitikäre, nitre Adán aune Eva monsoi ja ngwanka metre yekwe nünandi kä tibien kwitai bä nuäre yete, ye ngwane Jehovakwe ja töi mikani ño kena ye rabai bare aune “Omega” niedi kwe.

NITA TÖ NGWEN KÄ BÄ NUÄRE IE YE MIKA RABA ÑO BÄRI DITE

18. ¿Kukwe ketamä meden Jehovata mike gare nie abokän köböire ni raba tö ngwen ie? (Recuadro “Kukwe ketamä Jehova tä mike gare nie tö ngwankäre ie” ye mikadre ñärärä).

¹⁸ Kukwe ja tötikara nekänti kukwe ruäre nibi gare nie kä bä nuäre käbämikata ye rabai bare metre yebätä. ¿Kukwe käbämikata Jehovakwe ye abokän metre ni raba mike gare ño nitre ie? Kukwe kenabätä gare nie ye abokän, Jehová ara tä kukwe ye käbämike. Aune texto Apocalipsis tä niere: “Ngöbö näma täkänintbe kürä gobrankräbti ye käkwe nieba krörö: ‘¡Jändrän jökrä tita sribereta btin!’”. Ne madakäre niara tö aune die tärä bätä töbätä ye medenbätä raba nemen bare ie. Ketebukäre, Jehovata kukwe käbämike ye rabai bare metre gare ie ye medenbätä niena nemen bare ye kwrere tä blite. Aisete tä kukwe ne niere: “Kukwe era metre, abtä ni jökrä rabadre tödeke bti”. Aune tä niere arato: “¡Jändrän jökrä nibira bare!”. Ketamäkäre, Jehovata jondron keteiti kömike ngwane tä mike krüte. Ye medenbätä niara tä “Alfa aune Omega” niere. Satana ye abokän ni ngökö aune ñaka kukwe nuainne kwin jire chi bämikai Jehovakwe.

19. Kä tibien kwitai bä nuäre ye nitre ñan tä nemen mike era jai ngwane, ¿mä raba dimike ño?

¹⁹ Mäta blite nitre ben kukwe käbämikata Jehovakwe ja känenkäre kräke yebätä ngwane, mäta tödeka jakwe ye mike bäri dite mäkwe ngwandre törö jai. Ye medenbätä, mäta ñäke texto bä nuäre krubäte Apocalipsis 21:4 yebätä nitre ie ngwane, kukwe ne niedre kwe “Kukwe ye abokän kwin krubäte yebätä ñan raba nemen bare jire”, ¿mä raba dre nuainne? Kukwe keteiti mä raba nuainne ye abokän kukwe nieta bersikulo 5 aune 6 yebätä blite ben aune mike gare ietre. Jehovata kukwe käbämike ye mikai nemen bare kwe aune firma mikaninabätä kwe ye kwrere nie raba (Is. 65:16).