Jehová “ja di biandi mäi”

1. ¿Dre köböire nitre Ngöbö mikaka täte kirabe nämäne nemen dite?

BÄSI käre Biblia tä nitre Ngöbö mikaka täte ye kädeke nitre ja ngwanka dite. Akwa nitre dite kädekateta Bibliabätä ye ie ja ñan namani ruin käre dite. Ñodre, ruäre ngwane rei David ye ie ja namani ruin “dite krubäte ngutuä ye kwrere”, akwa ruäre ngwane ja namani ruin di ñakare ie aune kä jürä namani krubätebätä (Sal. 30:7). Ne madakäre Jehová üai deme ye köböire Sansón nämäne nemen dite krubäte akwa, nämäne gare kwin Sansón ie Jehová ñan ja di biandre ie ngwane niara ñan rabadre dite ñakare aune “rabadre ni jökrä ye erere” (Juec. 14:​5, 6; 16:17). ¿Nitre ja ngwanka metre Jehovai ye dre köböire namani dite? Jehová nämäne dimike.

2. ¿Apóstol Pablo di ñan nämänena nemen akwa bätärabe nämäne nemen dite ye ñobätä niebare kwe? (2 Corintios 12:​9, 10).

² Apóstol Pablo nämäne Jehová die ribere jai ye nükani gare ie (ñäkädre 2 Corintios 12:​9, 10 yebätä). Nita nemen bren ye erere Pablo namani bren (Gál. 4:​13, 14). Ne madakäre, nämäne ja di ngwen kukwe kwin nuainbätä (Rom. 7:​18, 19). Ruäre ngwane nämäne ja töibikaire krubäte aune kukwe tare rabadre barebätä ye jürä nämäne nemenbätä (2 Cor. 1:​8, 9). Akwa yebiti ta niebare kwe: “Tita nebe ruen bobre, di ñakare tie, ye ngwane abko Kristo di tä nebe bäri kri tibätä, aisete käta nebe nuäre tibtä”. ¿Ye nämäne nemen bare ño? Jehová nämäne ja di bien ie ye köböire nämäne nemen dite krubäte.

3. ¿Kukwe ngwantarita meden rabai gare nie kukwe ja tötikara nebätä?

³ Jehovakwe ni mikai dite käbämikata kwe (1 Ped. 5:10). Akwa yekäre ni ñaka rabadre kwekebe. Ani bämike mrö yebiti. Mrö tä blatote nie ngwane ni ñaka tä nemen jerekäbe okwä ben jabätä. Ñakare aune, nikwe kwetadi. Ye köböire bänä juruai nie aune ni rabai dite. Nita mröre ye köböire nita nemen dite ye erere arato Jehová raba ni mike dite akwa yekäre ni ñan rabadre kwekebe. ¿Jehovata ni dimike ño aune yekäre dre nuaindre? Yekäre Jehovakwe, Jonás, María Jesús meye aune apóstol Pablo dimikani ño, erere tä nuainne kä nengwane ye rabadi gare nie.

ORASION AUNE JA TÖTIKA KAIBE TÄ JA DI BIEN NIE

4. ¿Nikwe dre nuaindre ne kwe Jehovakwe ja di kwe ye biandre nie?

⁴ Jehovakwe ja di kwe ye biandre nie yekäre nikwe oradre. Niara tä orasion nikwe ye kukwe nuin aune tä “ja di kri” kwe ye bien nie (2 Cor. 4:7). Ñäkädre aune töbikadretari kukwe kwe yebätä ye kwin krubäte (Sal. 86:11). Kukwe nieta kwe nie Bibliabätä “ye abokän dite krubäte” (Heb. 4:12). Aisete mäkwe oradi Jehovai, ñäkäi kukwe kwebätä ye köböire niarakwe ja di biain mäi kä ngwankäre nüke jai sribikäre kä jutobiti aune sribi ñan raba nemen bare mäi ruin mäi ye nuainkäre. Jehovakwe niara kukwei niekä Jonás dimikani ño ye ani mike gare jai.

5. ¿Ñobätä Jonás nämäne ja di ribere?

⁵ Jonás nämäne ja di ribere. Jehovakwe sribi ütiäte mikani kisete. Akwa, kä jürä namanibätä yebätä ngitiani rute kä mada kokwäre. Yebätä, niara aune nitre nänkä rute ye namanina rikakäre ngwarbe ñü kri muriebe minimini namani mate ja dibiti yete. Nitre nänkä rute käkwe Jonás kitani timo ye ngwane, kä namani ruinbiti gwa kri teri känti kä iko aune kä jürä ngwan raba jabätä yete. ¿Ja namani ruin ño Jonás ie? ¿Yete mrä kä tuai kwe namani ruin ie? ¿Jehová ñan namanina tarere nütübare kwe? Kukwe jökrä yebätä namani ja töibikaire krubäte raba ruin nie.

6. ¿Jonás nämäne gwa kri ye teri ngwane drekwe dimikani? (Jonás 2:​1, 2, 7).

⁶ ¿Jonás nämäne gwa teri ye ngwane dre nuainbare kwe kä ngwankäre nüke jai? Orabare kwe Jehovai (ñäkädre Jonás 2:​1, 2, 7 yebätä). Jonás ñaka ja mikani täte, akwa ja töi bobrebiti orabare kwe ye Jehovakwe kukwe nuai nämäne gare ie ñobätä ñan aune ja namani ruin ngite ie aune ja töi kwitani kwe. Arato, töbikataribare kwe Ngöbö kukwei yebätä. ¿Ñobätä gare nie? Ñobätä ñan aune, kukwe tikani kwe kapitulo 2 yekänti, orasion nuainbare kwe yete kukwe ruäre tä tikani tärä Salmos känti ye niebare kwe (Jonás 2:​2, 5 bätä Salmo 69:1; 86:7 ye mikadre ñärärä). Kukwe ye nämäne gare kwin Jonás ie ye nüke gare nie. Töbikataribare kwe kukwe yebätä aune ja tuabare kwe kukwe tare ben ye ngwane nämäne tö ngwen Jehovai ye käkwe dimikai ye nükani gare ie. Biti, nükaninta jate kä nötarebiti ngwane, namani juto biarebe kukwe biani ie ye mikakäre täte (Jon. 2:10–3:4).

7, 8. ¿Ja mräkä iti ja tuani kukwe tare ben ngwane drekwe dimikani?

⁷ Kukwe namani bare Jonabätä ye raba ni dimike ja tuakäre kukwe tare ben. Ja mräkä kädekata Zhiming.b nünanka Taiwán ye tä bren aune mräkätre kwe tä ja mike niara rüere. Akwa ¿dre köböire tä kä ngwen nüke jai? Niara tä orare aune ja tötika kaibe ye nuainne. Niara tä niere: “Kukwe tare tä nemen nakainkä ye ngwane tita nemen töbike krubäte yebätä ti töi ñaka tä nemen jäme”. Akwa Zhiming ñaka tä ja di ngwen nekä. Niara tä niere: “Käne tita orare Jehovai. Tita kansion kukwe nuin audifononte aune tita kantare tiebe. Ja tärä nemen ruin kwin tie ngwane. Tita ja tötika kömike”.

⁸ Zhiming tä ja tötike kaibe ye tä dimike ja tuakäre kukwe keta kabre ben. Ñodre, bati operación tare nuainbare ie ye ngwane glóbulos rojos ñaka nämäne krubäte bätä yebätä däri mikadre kwatate niebare ie enfermera yekwe. Akwa niara operadre ye känenkri deu, meri iti operabare niara erere mikani gare täräkwatabätä yebätä ñäkäbare kwe. Meri yekwe globulos rojos nämäne bäri chi yebiti ta niarakwe ñaka däri kani ngäbiti akwa namaninta kwin. Kukwe bätä ñäkäbare Zhimingkwe ye käkwe niara mikani dite ja ngwankäre metre.

9. ¿Kukwe tare ben mäta ja tuin, tä mä ngwen di nekä ngwane mä raba dre nuainne? (Üai mikadre ñärärä).

⁹ Mäta ja tuin kukwe tare ben aune mäta nemen ulire o töbike krubäte ye ngwane, ¿ñan tä nemen nuäre mä kräke orakäre? ¿O mä ñaka töta nemen ja tötikabätä? Ye ngwane drebe mätä ja tuin ye nüke gare kwin Jehovai ye mäkwe ngwan törö jai. Arato, mä ñaka tä orasion nuainne kwin tä nemen ruin mäi ye ngwane Jehovata mä kukwe nuin aune mäta dre ribere jai ye bian kwe mäi yei mäkwe tö ngwan kwatibe (Efes. 3:20). Kukwe tare ben mäta ja tuin ye tä mä ngwen ja tare nike o mä mike töbike krubäte yebätä ñan tä nemen nuäre mä kräke ñäkäk äre aune ja tötikakäre, akwa kukwe kwin mä raba nuainne ye abokän Biblia aune täräkwata bianta juta Ngöbökwe, mikani audiore ye mä raba kukwe nuin. Arato kansion aune video tä mikani jw.org ye mä raba tuin. Mäkwe oradi ye bitikäre kukwe keta kabre ja üaire bianta Jehovakwe yebätä mäkwe kukwe känändi ngwane “Jehová, ti dimike” mäta niere ie ye kwrere mäkwe bämikai.

JA MRÄKÄTRE TÄ NI MIKE DITE

10. ¿Ja mräkätre tä ni mike ño dite?

¹⁰ Ja mräkätre yebiti Jehová raba ni dimike. Nita ja tuin kukwe tare ben o nita ja di ngwen sribi keteiti o kukwe keteiti mikakäre nemen bare ngwane, ja mräkätre yebiti tä “kä mike nuäre kri” nibätä (Col. 4:​10, 11). “Kukwe tare” näire nita ja ketamuko ribere bäri jai (Prov. 17:17). Nita nemen di nekä ye ngwane, ja mräkätre tä ni dimike, ni töi mike jäme aune ni dimike kukwe ja üairebiti. María, Jesús meye dimikani ño aune namani ño dite ye ani mike gare jai.

11. ¿Ñobätä María nämäne ja di ribere?

¹¹ María nämäne ja di ribere krubäte Jehová töi mikakäre nemen bare. Niara namani ja töibikaire krubäte, rabai murore mikani gare ie ángel Gabrielkwe ye ngwane. Sribi ütiäte krubäte mikani kisete ye ángel Gabrielkwe mikani gare ie. Niara namani murore akwa ñaka nämäne ja mäkäninte. Nämäne kaibe akwa rabadre Mesías ngübare aune monso ngüba ñan nämäne gare ie. Bätäkwäre, niara ñaka nemen ni brarebe jire chi yebätä nämäne murore ye niara rabadre mike gare José ie (Luc. 1:​26-33).

12. Lucas 1:​39-45 tä niere erere, ¿María nämäne ja di ribere ye namani ño kwe?

¹² ¿Kukwe keteiti ütiäte aune kri mikani María kisete ye rabadre bare ie yekäre drekwe dimikani? Niarakwe ja di käräbare nitre madai. Ñodre, ángel Gabriel rabadre kukwe mike gare bäri ie Jehovakwe kukwe mikani nuaindre ie yebätä ribebare kwe ie (Luc. 1:34). Ja käne mada, María dikakabare mente tibien nemen “kä kä tokwäre” Judá yekänti basakäre Elisabet ie, ¡ye namani kwin krubäte! Ñobätä ñan aune yete Elisabet kukwe kwin niebare ie aune üai deme köböire profecía mikani gare kwe María ie monso därei kwe yebätä (ñäkädre Lucas 1:​39-45 yebätä). Maríakwe niebare Elisabet ie mada “Ngöbökwe sribi kri nuenbare ja di kribti” ti kräke (Luc. 1:​46-51). Jehovakwe María dimikani ángel Gabriel yebiti aune Elisabet köböire.

13. ¿Dasurí ja di ribebare ja mräkätre ie ngwane dre namani bare?

¹³ María erere, ja mräkätre Jehová mikaka täte metre ye raba mä dimike ja ngwankäre dite. Ani töbike Dasurí nünanka Bolivia yebätä. Niara rünbätä bren tare krubäte kwani yebätä mikani camabiti hospitalte. Dasurí tö namani rün ngübai kwin (1 Tim. 5:4). Kukwe ñan nuäre nämäne kisete yebätä nämäne ja di ribere. Niara tä niere: “Ruäre ngwane ti di ñaka nämä nemena ja tuakäre jankunu kukwe yebe”. Akwa kenanbe niarakwe ñaka ja di käräbare. ¿Ñobätä? Dasurí tä mike gare: “Ti ñan tö nämä nemen ja mräkätre nikai sribi mikakäre bäri kisete, ‘Jehovakwe ti dimikai’ ti nämä niere jai. Akwa biti mada ti nämä kämikekä ja mräkätrebätä ye ngwane ti nämä ja tuin kaibe kukwe yebe rükaba gare tie” (Prov. 18:1). Dasurí ja töi mikani ja driere ja ketamuko ruäre kwe ye ie. Niara tä niere: “Ja mräkätre ti dimikani krubäte ye ti ñan raba täin jökrä jerekäbe kukwere. Nämä niken mrö ngwena hospitalte tie aune nämäntre ñäke Bibliabätä tie. ¡Ni ñaka tä kaibe jire chi gare nie ye tä ni töi mike jäme! Ja mräkätre tä juta Ngöbökwe te ye tä nibe, tätre juto biare ni dimikakäre, muakäre nibe aune ni tuakäre känti nita ribere jai ye ngwane”.

14. ¿Nitre umbre ji ngwanka konkrekasionte tä ni dimike ye ñobätä ni rabadre kai ngäbiti?

¹⁴ Jehová arato tä ni dimike ja mräkätre umbre konkrekasionte yebiti. Niaratre ye abokän regalo kwin krubäte biani Jehovakwe nie, ñobätä ñan aune niaratre tä ni dimike aune ni töi mike jäme (Is. 32:​1, 2). Aisete kukwe ruäre tä mä mike töbike ngwane, mäkwe ja drie ietre. Aune, kukwe ruärebiti mä dimikai kwe, ye mäkwe ka ngäbiti. Jehovata ni dimike niaratre yebiti.

TÖ NGWANTA YE TÄ NI MIKE DITE

15. ¿Ni kristiano jökrä tä tö ngwen kukwe kwin meden ie?

¹⁵ Kukwe käbämikata Bibliabätä ye tä ni mike dite (Rom. 4:​3, 18-20). Ni kristiano jökrä tä tö ngwen nüna kärekäre ie, kä kwinbiti o kä bä nuäre te kä tibienbätä ye kwin krubäte. Kukwe ie nita tö ngwen ye tä ni mike dite ja tuakäre kukwe tare ben, kukwe kwin Gobran Ngöbökwe driekäre aune sribi tä ni kisete konkrekasionte ye nuainkäre (1 Tes. 1:3). Apóstol Pablo nämäne tö ngwen ye käkwe niara dimikani ño ye ani mike gare jai.

16. ¿Ñobätä apóstol Pablo ja di ribebare?

¹⁶ Pablokwe ja di ribebare. Niarakwe tärä tikani nitre corintios ie ngwane, niara abokän siä sribebare dobrobiti ye kwrere niebare kwe. Niara ngwani ja tare nike krubäte, ja mikani niara rüere aune ganainbare niebare kwe. Dre nuaindre kwe ñan namani gare ie aune bäsi niara murie ketani (2 Cor. 4:​8-10). Kukwe jökrä ye tikani kwe dikakabare kwe bämäkäre ye ngwane. Niarakwe ja tuai kukwe bäri tare ben ñaka nämäne gare ie raba ruin nie. Ja känenkäre mada, nitre kwati ie niara nakani, käkwe nuainbare tare, bäsi murie neketani mrente aune kitani ngite.

17. ¿Apostol Pablo nämäne ja tuin kukwe tare ben ngwane drekwe dimikani nieta 2 Corintios 4:​16-18 yebätä?

¹⁷ ¿Drekwe Pablo dimikani kä ngwen nüke jai? Tödekara kwe ye käkwe niara dimikani (ñäkädre 2 Corintios 4:​16-18 yebätä). Pablo jatanina niken ngwarbe jakän akwa kukwe ie nämäne tö ngwen ye nämäne dite känime, niebare kwe nitre Corinto ie. Niara töi nämäne kwatibe ja nire käre rabai kwe ja känenkäre yebätä. Niarakwe nünain kä kwinbiti yei nämäne tö ngwen kwatibe. Nämäne ja töi mike jondron bäri ütiäte kri Ngöbökwe rabadi kärekäre kwe yebätä, ye namani kwin niara kräke. Yebätä nämäne juto biare ja tuakäre kukwe tare keta kabre yebe. Pablo töbikataribare kukwe ie nämäne tö ngwen yebätä, yekwe dimikani. Ye köböire köbö kwatire kwatire jatani “bäri btin” niebare kwe.

18. ¿Tödekara ye tä Tíjomir aune mräkätre kwe ye dimike ño?

¹⁸ Tödekara käkwe ja mräkä iti nünanka Bulgaria kädekata Tíjomir dimikani krubäte. Niara eteba köre, ye kroro ketani carrokwe. Yekwe niara brukwä ötaninte krubäte. ¿Drekwe niara aune mräkätre kwe dimikani ja tuin kukwe tare krubäte yebe? Ni gaikröta yebätä töbikabare kwetre. Niara tä mike gare: “Ñodre, medente nunkwe Zdravko kai ngäbiti, drete bukai, nire nire nunkwe käräi ka ngäbitikäre, kukwe meden namani bare mrä nunkwe mikadi gare ie, yebätä nunta blite”. Tíjomir tä niere: “Tödekara nikwe kä ja känenkäre kräke yebätä töbikadre, ye tä ti mräkätre dimike kä ngwen nüke jai aune ti eteba gaikröta ngübare ngäbiti kisete”.

19. ¿Kukwe ie mäta tö ngwen ye mikakäre bäri dite mä raba dre nuainne? (Üai mikadre ñärärä).

¹⁹ ¿Mä raba dre nuainne tödeka jakwe mikakäre bäri dite? Mäta tö ngwen nüna kä tibienbätä ie ngwane, Biblia tä blite kä bä nuärebätä yebätä mäkwe ñäkä aune mäkwe ja töi mika yete (Is. 25:8; 32:​16-18). Töbike nikwe nünain kä bä nuäre te ja känenkäre yebätä. ¿Mäta ja bämike yete? ¿Nire tuin mäi? ¿Ja ruin ño mäi? ¿Nire kukwe ruin mäi? Kä bä nuäre üai bämikata täräkwatabätä ye käkwe mä mikai töbike kukwe keta kabrebätä. Mä raba video musikabe ye kukwe nuin, ñodre Kitera nüke, Nünainta bäri kwin aune Bämike ja töite. Mäta käre töbike kä mrä bä nuäre yebätä ngwane, kukwe tare “ye jötrö amne ñakare tare” rabai tuin mäi (2 Cor. 4:17). Tödekara bianta Jehovakwe mäi ye mä mikai dite.

20. ¿Kukwe tare näire ja rabai ruin di nekä nie ngwane dre köböire ni rabaita dite?

²⁰ Ngöbö köböire ni rabai “dite” ni di ñaka rabaira rabai ruin nie ye ngwane (Sal. 108:13). Nita dre ribere jai ja ngwankäre dite ye jökrä Jehovakwe bianina nie. Yebätä ñaka raba nuäre mä kräke sribi mikani mä kisete ye nuainkäre, kä ngwankäre nüke jai o sribikäre kä jutobiti Jehová kräke ngwane, mäkwe ora ja brukwä tätebiti, aune ja tötika Bibliabätä Jehovakwe mä jie ngwandre yekäre. Ne madakäre, ja mräkätre tä ni dimike ye nikwe kadre ngäbiti, kukwe ie nita tö ngwen ye nikwe mikadre bäri dite. Angwane “Ngöbö di kri bä nuäre, yebti” ni mikai kwe dite angwane ni raba “nünenkä dite jabtä bätärekä abkokäre. Erere arato, kä tädre bäri nuäre” nibätä (Col. 1:11).