KUKWE JA TÖTIKARA 25
Nitre umbre ji ngwanka, ja kite Gedeonbätä
“Tikwe blitadre Gedeónbtä [...], kä ñan rabadre täte tie blitakrä btä” (HEB. 11:32).
KANTIKO 124 Käre nikwe ja ngwandre metre
KUKWE NEBÄTÄ JA TÖTIKAIa
1. 1 Pedro 5:2 erere, ¿sribi meden ütiäte tä nitre umbre ji ngwanka konkrekasionte ye kisete?
JA MRÄKÄTRE ji ngwanka konkrekasionte ye Jehovakwe kädekani oveja kwe ye ngübabitikä. Tätre nuainne kä jutobiti aune tä ja di ngwen rabakäre ji ngwanka kwin krubäte (Jer. 23:4 ñäkädre 1 Pedro. 5:2 yebätä). ¡Ja mräkätre ne kwrere tä konkrekasionte ye kwin krubäte!
2. ¿Nitre umbre ji ngwanka ruäre konkrekasionte tätre ja tuin kukwe ño ben?
2 Sribi keta kabre tä nitre umbre ji ngwanka konkrekasionte ye kisete. Ye nuainkäre tätre ja tuin kukwe keta kabre ñaka nuäre ben, ñodre tätre sribire krubäte konkrekasion ngübakäre. Ni umbre ji ngwanka kädekata Tony käi Estados Unidos yebätä ani blite. Niara töbikadre kwin käne sribi ruäre ka ngäbitikäre nükani gare ie. Tä niere: “Pandemia COVID-19 ye ngwane sribi nämä nuaindre krubäte. Ñodre, kukwe nämä ükadrete gätä kräke aune kukwe driekäre, ye jökrä ti nämä kai ngäbiti. Bäkänä, ti nämä ja di ngwen krubäte sribi nuainkäre akwa käre kukwe nämä nuaindre yebätä ti ñan jatabara ñäke Bibliabätä, ja tötike kaibe aune orasion nuainne”. Ni umbre iti ji ngwanka käi Kosobo kädekata Ilir yekwe ja tuani kukwe jene ben, nämäne nüne yekänti rü nuain nämäne krubäte. Yebätä, ñan namani nuäre niara kräke juta Ngöbökwe nämäne kukwe niere ja jie ngwankäre ye mikakäre täte. Tä niere: “Ja mräkätre nämä nüne nitre käme ngätäite ye ti rabadre dimike ribeba tie Sukursalkwe ngwane, kä jürä rababa krubäte tibätä ja ngwandre dite ye ñan nuäre. Ne madakäre kukwe bianba mikakäre täte ñan rababa tuin mika bä täte tie”. Misionero nünanka Asia kädekata Tim, ye kräke ñan nämäne nemen nuäre sribi keta kabre nämäne kisete nuainkäre. Tä niere: “ti nämä nainte krubäte kukwe jökrä yebätä”. ¿Nitre umbre raba dre nuainne tätre ja tuin kukwe ne kwrere ben ngwane?
3. ¿Ñobätä ni jökrä rabadre ja kite Gedeonbätä?
3 Gedeonbätä kukwe keta kabre raba nemen gare nitre umbre ji ngwanka ie (Heb. 6:12; 11:32). Gedeonkwe Juta Ngöbökwe ngübabare aune kriemikani (Juec. 2:16; 1 Crón. 17:6). Gedeón erere kä blo näire nita nüne ye medenbätä, Juta Ngöbökwe ngübadrebiti aune kriemikadre ye tä gare nitre umbre ji ngwanka ie (Hech. 20:28; 2 Tim. 3:1). Gedeonkwe töbikabare kwin, ja töi mikani kwe bobre, ja mikani täte aune kä ngwani nüke kwe jai yebätä kukwe keta kabre raba nemen gare nie. Gedeón kukwe kwin bämikani ye raba ni jökrä konkrekasionte dimike, sribi nuainta nitre umbrekwe ye mike ütiäte jai aune dimike ja töi kwatibebiti (Heb. 13:17).
TÖBIKADRE DEBE NÄRE AUNE JA TÖI MIKADRE BOBRE
4. ¿Gedeón nämäne töbike debe näre aune ja töi mikani bobre kwe ye bämikani ño kwe?
4 Gedeón töbikabare debe näre aune ja töi mikani bobre.b Nitre rükä dite madianita ye kisete Jehovakwe nitre israelita mikai kwäre mikani gare kwe ángel itibiti Gedeón ie. Töi bobrebiti Gedeón niebare: “Nitre Manasekwe ye bäri ütiäte nitre tikri ye kräke aune ti mräkätre ti rünkri ye ngätäite ti abokän ñaka ütiäte” (Juec. 6:15). Sribi ye nuainkäre ja ñan nükani törö ie. Akwa niara raba sribi ye nuainne ye namani gare kwin Jehovai aune Jehová diebiti namani bare kwin ie.
5. ¿Kukwe meden känti ñaka raba nemen nuäre ni umbre ji ngwanka kräke ja töi mikakäre bobre aune ñaka bikakäre kri?
5 Nitre umbre ji ngwanka tä ja di ngwen krubäte ja töi mikakäre bobre aune ñan ja käikitakakäre (Miq. 6:8; Hech. 20:18, 19). Niaratre ñaka ja käikitekä kukwe nuain gare ietre aune kukweta nemen bare ietre yebätä. Ne madakäre, kukweta nainte o kukwe nuainta blo kwetre ngwane, ye ñan aibätä jata nemen ruin ngwarbe ietre. Kukwe mada raba niaratreta ja töi mike bobre aune ja di ngwen ñaka bike kri ye nuinte. Ñodre, ni iti umbre ji ngwanka konkrekasionte sribi jökrä kadre ngäbiti akwa ñan raba nemen bare jökrä ie gadre kwe. Ruäre ngwane käikitaka raba sribi nuainta kwe yebätä, o sribi ruäre nuainta jene kwe yebätä ñäkä raba nemen bätä. ¿Kukwe namani bare Gedeonbätä ye raba nitre umbre ji ngwanka dimike ño kukwe ne erere bätä?
Nitre umbre ñan bike kri tä ja di kärere Gedeón erere ñodre, kukwe drie karritobiti ükatekäre (Párrafo 6 mikadre ñärärä)
6. ¿Gedeón erere nitre umbre ji ngwanka raba töbike ño debe näre jabätä? (Üai mikadre ñärärä).
6 Ja di kärädre. Ni iti tä töbike debe näre jabätä ñan raba sribi jökrä nuainne gare ie. Gedeón töbikabare debe näre jabätä yebätä ja di käräbare kwe nitre madai (Juec. 6:27, 35; 7:24). Ni umbre ji ngwanka töbike kwin käne tä ye erere nuainne. Tony bätä blitani párrafo 2 tä mike gare: “Ti nukwani ño ye ererebätä sribi jökrä tita kain ngäbiti ñan raba nemen bare tie yebiti ta ye medenbätä tikwe ja tötike ja mräkäbe bämä ngrabare yete ja töi mikaba blite töbikadre debe näre jabätä yebätä, ti nämä ja ngwen ño niedre kwe tie tikwe ribeba ie. Video tä jw.org kädekata Jesús erere ni mada tötikadre sribikäre aune tö ngwandre ie ye tikwe tuabata”. Tony ja töi mikani ja di ribere nitre madai, ye köböire dre namani bare niara tä niere: “Kukweta ükaninte bäri kwin konkrekasionte aune käta nemente bäri tie ja ketakäre kwin Jehovabe”.
7. ¿Nitre umbre ji ngwanka konkrekasionte ye raba ja ngwen ño Gedeón erere ñäkätabätä ngwane? (Santiago 3:13).
7 Ñäkä mäbätä ngwane mäkwe ja töi mika jäme. Nitre umbre bätä ñäkäta ye raba niaratre nuinte. Akwa, niaratre raba ja kiteta Gedeonbätä. Gedeón ie kukwe nämäne nainte ye nämäne gare ie, nitre Efraimita käkwe ñäkäbare niarabätä ngwane, ja töi mikani jäme kwe (Juec. 8:1-3). Ñaka namani rubun ñakare aune ja töi mikani bobre kwe, niaratre kukwe nuani kwe aune töi jämebiti blitabare kwe bentre. Gedeón erere nitre umbre tä töbike kwin käne yebätä ñäkäta ngwane, tätre ni ye kukwe nuin aune töi kwinbiti tä ñäke niaratre käre (ñäkädre Santiago 3:13 yebätä). Ye köböire konkrekasion täi nüne keteitibe jabe.
8. ¿Nitre umbre ji ngwanka käikitakata ngwane, rabadre ja töi mike ño? Mä raba mike gare.
8 Kukwe jökrä tä nemen bare yebätä Jehová käikitadrekä. Gedeonkwe nitre rükä Madianita ganainbare ye ngwane nitre namani niara käikitekä. Akwa niarakwe nitre jökrä juta yete töi mikani Jehová käikitekä (Juec. 8:22, 23). ¿Nitre umbre ji ngwanka konkrekasionte ye raba ja kite ño Gedeonbätä? Kukwe nuainta kwetre o kukwe tä nemen bare ietre yebätä käre rabadre Jehová käikitekä (1 Cor. 4:6,7). Ñodre, ni umbre iti tä kukwe kädriere kwin yebätä käikitakata ngwane, kukwe jökrä ye abokän Ngöbö Kukwei aune juta Ngöbökwe tä dirire yebätä ni jökrä ie kukwe raba nemen gare krubäte raba niere. Nitre umbre tä dirire yebätä Jehová käikitakata o niaratre käikitakata ye rabadre ngwentari jai ye kwin krubäte. Ja mräkä kädekata Timothy yebätä ani kukwe mike gare jai. Niara kädekani ni umbrere ye ngwane, kukwe kädrieta ni jökrä kräke gätäte ye niara tö nämäne nuainbätä krubäte. Niara tä niere: “Ti nämä kukwe kädriere ye ngwane, ti nämä kwe ükete kwin jai aune ti nämä niere bängrabe jatäri. Ye medenbätä, ja mräkätre nämä ti käikitekä aune nämä kukwe kwin niere tie aune Jehová bätä niara kukwei ye ñan ai mika nämä ütiäte jai”. Kä nikani ta yete niara rabadre kukwe ükete jai kukwe kädriekäre ñan nitre töi mikakäre jabätä nükani gare ie (Prov. 27:21). Ye köböire dre namani bare mikata gare kwe: “Nengwane tita kukwe kädriere ye tä ja mräkätre dimike ja tuakäre kukwe tare ben o dimike nökrö bäri Jehová ken nieta kwetre ye tä kä mike bäri juto tibätä ti nämä kukwe kädriere käne aune ti käi kitaka nämä ye kräke”.
JA MIKATA TÄTE AUNE ÑAKA KÄ JÜRÄ NGWANTA JABÄTÄ NUATETA NGWANE
Gedeón ja mikani täte yebätä nitre rüka jänikani braibe kwe rubätä: Nitre rüka 300 nämäne mokre bämikani kwetre ye aibe ben namani (Párrafo 9 mikadre ñärärä)
9. ¿Gedeón ñaka nämäne kä jürä ngwen jabätä aune nämäne ja mike täte ye nuaninte ño? (Üai kena täräkwatabätä mikadre ñärärä).
9 Gedeón kädekani kukwe ükatekä ye ngwane, niara nämäne ja mike täte aune ñaka kä jürä ngwen jabätä ye nuaninte. Kukwe ñan nuäre nuain mananbare ie, rabadre ngöbö ngwarbe Baal rün nämäne mike täte ye dikente (Juec. 6:25, 26). Ja känenkäre mada, Gedeonkwe nitre rükä ükaninkrö kwati krubäte akwa bobu jire Jehovakwe niebare ie, rabadre ükekrö braibe (Juec. 7:2-7). Ja käne mada, niaratre rabadre niaratre rüere ye gainte deu niebare Jehovakwe ie (Juec. 7:9-11).
10. ¿Nitre umbre tä ja mike täte ye nuate raba ño?
10 Nitre umbre ji ngwanka tädre juto biare ja mikakäre täte (Sant. 3:17). Ni umbre ja mikaka täte ye tä kukwe Ngöbökwe aune juta Ngöbökwe tä kukwe niere mike täte kä jutobiti, yebiti tä kukwe kwin bämike ni mada käne. Ruäre ngwane ñan tä nemen nuäre kräketre kukwe mikata gare ye mikakäre täte. Ñodre: kukwe mrä mrä mikata gare ngwane, mikadre täte ye bäri kwin o ño ye tätre kite ngwentari jai o kukwe ruäre ribe raba ie känti raba ja mike kukwe kri te. ¿Nitre umbre ji ngwanka raba ja ngwen ño Gedeón erere kukwe ne erere känti?
11. ¿Dre raba nitre umbre ji ngwanka dimike ja mike täte?
11 Kukwe mikata gare ye kukwe nuadre aune mikadre täte. Altar ngöbö ngwarbe mikakäre täte Gedeón rünkwe ye dikandrete ño kwe ye Ngöbökwe mikani gare ie. Medente niarakwe altar sribedre Jehová mikakäre täte aune jondrön nire meden kukwadre kwe ye mikani gare kwe ie arato. Kukwe mikani gare Gedeón ie yebätä ñaka töbikabare krubäte kwe ñakare aune bengwairebe mikani täte kwe. Juta Ngöbökwe tä kukwe bien mikakäre täte nitre umbre ie carta, anuncios aune kukwe ükaninte mikakäre tätebiti ne kwe ni tädre kwin ja üairebiti aune ja ngrabarebiti. Juta Ngöbökwe tä kukwe bien ye nitre umbre tä ja di ngwen mikakäre täte jökrä yebätä tare nikwe. Tä kukwe jökrä mike täte yebätä kukwe kwin tä nemen bare konkrekasionte (Sal. 119:112).
12. Juta Jehovakwe tä kukwe ükete jene ngwane, ¿ni umbre ji ngwanka raba kukwe nieta Hebreos 13:17 ye mike ño täte?
12 Kukwe mrä mikata gare ye ni tädre juto mikakäre täte. Nitre rükä bäri brai 1% kräke aibe ben Gedeón rabadre nemen ribebare Jehovakwe ie ye ngwandre törö jai (Juec. 7:8). Kukwe ne erere nütübare kwe ni raba niere: “¿kukwe ribeta ne tikwe mikadre täte? ¿Kukwe jökrä rabai bare kwin? Kukwe ngwanintari kwe jai nebiti ta ja mikani täte kwe. Nitre umbre tä ja ngwen ño Gedeón erere. Juta Ngöbökwe tä kukwe kwite jene mikata täte kwetre yebiti tä bämike (ñäkädre Hebreos 3:17 yebätä). Ñodre kä 2014 yete ja käne Nitre Braibe Konkrekasion Jökrä Ngübabitikä yekwe kukwe ükaninte jene, ju ja ükarakrö aune ju gätä krikri nuainkäre ye ütiä biankäre (2 Co 8:12-14). Mekera ngwian bian nämäne konkrekasion keteiti ie ju ja ükarakrö sribekäre, biti konkrekasion ye nämäne ngwian ye bienta. Akwa nengwane konkrekasion kä jökräbiti tibien tä ngwian bien yebiti ju gätä nuainkäre sribeta medente ribeta yekänti. Konkrekasion tä ngwian bien nuäi ye ñan ai ribeta. Ni iti umbre ji ngwanka konkrekasionte kädekata José ie kukwe ükaninte mrä ne namani gare ngwane, nütübare kwe juta mada känti kukwe ükaninte ne rabai kwin, akwa nete ja ükarakrö ñaka sribere jire chi. Yebiti ta kukwe ükaninte ye niarakwe dimikani aune ñobätä dimikani kwe ye niara tä niere. “Kukwe nieta Proverbios 3:5,6 yebätä tikwe töbikaba, ti rabadre tö ngwen Jehovai, ¡kukwe rababa bare ye kwin krubäte! Ju ja ükarakrö sribeta bäri akwa ye ñan ngörä, nun rabadre ja dimike siba rababa gare nunye. Ne kwe kukwe kwin rabadre bare”.
Kukwe drie ñäkäita yekänti ni raba kukwe driere arato. (Párrafo 13 mikadre ñärärä)
13. a) ¿Dre ie Gedeón nämäne tö ngwen kwatibe? b) ¿Nitre umbre ji ngwanka raba dre nuainne ja ngwankäre Gedeón erere? (Üai mikadre ñärärä).
13 Ñaka kä jürä ngwandre jabätä Jehová töi nuainkäre. Kä jürä namani Gedeonbätä aune kukwe tare raba nemen barebätä yebiti ta Jehová mikani täte kwe (Juec. 9:17). Gedeón tö ngwani kwatibe Jehovai. Kukwe drie ñäkäita känti nitre umbre ji ngwanka tä nüne ye tä ja ngwen dite Gedeón erere. Tätre kukwe ükete gätä kräke, kukwe driekäre, niaratre kita raba ngite, jäkä raba gobran ngwärekri, kitaka raba sribibätä aune nuain raba tare yebiti ta. Ja tare nikadi kri ye ngwane, nitre umbre ñaka rabadre kä jürä ngwen jabätä kukwe mikai gare ye mikakäre täte, raba ja mike kukwe kri te yebiti ta. Ñodre, kukwe mikadi gare kwe nitre kukwe ngwarbe mikaka täte ie, bämikata ñü järe kwrere ye mikakäre gare o kukwe mikai gare ni rabadrete kwäre Gog kä Gog käkwe ja mikai ni rüere yebätä ngwanec (Ezeq. 38:18; Apoc. 16:21).
ÑAN TÄ NEMEN NUÄRE KÄ NGWANKÄRE NÜKE JAI NGWANE
14. ¿Gedeón nämäne kä ngwen nüke jai ye nuaninte ño?
14 Gedeón nämäne ji ngwen yebätä ja di ngwani krubäte kwe. Nitre madianita ngitiani ye ngwane, niara nikani deu jiebiti kä kiare Jezreel nemen ñö Jordán yekänti. Ji ye dube aune kri tukwäre (Juec. 7:22). ¿Dre nuainbare kwetre mada? ¿Namanintre kwekebe? ¡Ñakare! Gedeón aune nitre rükä 300 nämäne nainte krubäte akwa ja di ngwani kwe niken ñö Jordán yete ta, nänkäre nitre madianita ye jiebiti. Nakanintari ie ngwane ganainbare kwäräbe kwe (Juec. 8:4-12).
15. ¿Nitre umbre tä ja ngwen dite ye nuate raba ño?
15 Nitre umbre tä konkrekasion aune mräkätre kwe ngibiare ye raba kite nainte ngrabare aune töite. ¿Jata nemen ruin kore nitre umbre ie ngwane, raba ja ngwen ño Gedeón erere?
Nire tä ja di ribere ye nitre umbre tä dimike kä jutobiti (Párrafo 16 aune 17 mikadre ñärärä)
16, 17. a) ¿Dre käkwe Gedeón dimikani kä ngwen nüke jai? b) ¿Dre tädre gare metre nitre umbre ji ngwanka ie? (Isaías 40:28-31; üai mikadre ñärärä).
16 Jehovakwe ja di bien mäi yei tö ngwen. Gedeonkwe tö ngwani aune Jehovakwe ñaka tuanimetre kaibe (Juec. 6:14, 34). Bati, rei nibu madianita nämäne ngitie kameobiti ye kanintari ngotore Gedeónkwe aune nitre rükä kwekwe (Juec. 8:12, 21). Jehová diebiti nitre israelita ja ngwanka dite yekwe nitre madianita kanintari aune ganainbare. Jehová ye Ngöbö ñaka nainte aune di nekä ye ie nitre umbre tö ngwandre aune Jehová ja di biain ietre (ñäkädre Isaías 40:28-31 yebätä).d
17 Kukwe namani bare Matthewbätä ani mike gare jai. Niara sribikä Comité Enlace Hospital yebe, ¿dre niara dimikani kä ngwen nüke jai? Tä niere: “Kukwe nieta Filipenses 4:13 ye erere namani bare metre tibätä aune ti di ñan tä nemena ngwane, Jehovata ti dimike aune tita ja di ribere ye tä bien tie. Tita orare ja brukwä tätebiti Jehovai ja di biandre kwe tie aune ti dimikadre kwe ja mräkätre dimikakäre tita niere ie, ye ngwane, tä ja di bien tie kä ngwankäre nüke jai”. Gedeón erere nitre umbre ji ngwanka ñaka nemen kwekebe jire, tätre oveja Jehovakwe ngübare aune kukwe raba nemen niaratre jiete yebiti ta, akwa niaratre rabadre ja töi mike bobre kukwe jökrä ñan raba nemen bare ietre ye ngwandre törö kwetre jai. Kukwe jökräbätä Jehovakwe nitre umbre ji ngwanka kukwe nuai aune dimikai näin ja käne yei tä tö ngwen (Sal. 116:1; Filip. 2:13).
18. Nibira gare nie erere, ¿nitre umbre raba ja ngwen ño Gedeón erere?
18 Nibira gare nie erere, Gedeón kukwe kwin bämikani ye erere nitre umbre ji ngwanka raba nuainne. Sribi bianta bäri ie käikitakata aune kädrieta ngwane, rabadre ja töi mike bobre töbike debe näre jabätä. Kä krüte nengwane rabadre kukwe mike täte aune ñaka kä jürä ngwen jabätä. Kukwe ñokwäbiti ta Jehovakwe dimikai kä ngwen nüke jai yei tö ngwandre kwetre. Ja mräkätre tä ni ngübarebiti, tä sribire ja dibiti ye ütiäte krubäte ni kräke aune tare nikwe (Filip. 2:29).
KANTIKO 120 Ni töi rabadre bobre Jesús erere
a Jehovakwe Gedeón dianinkä ne kwe rabadre juta Israel jie ngwen aune kriemike kukwe tare namani bare ye ngwane. Ji ngwani kwe kä 40 näre te, kukwe tare yebiti ta. Gedeón erere nitre umbre ji ngwanka raba ja ngwen ño ye rabai gare nie kukwe ja tötikara nekänti.
b Töbikadre debe näre aune ja töi mikadre bobre kukwe ketebu ye bäsi ja erebe nire ta tödeke debe näre ye abokän ñan blite krubäte jabätä aune dre dre raba nuainne ye gare kwin ie (Filip. 2:3). Bäsi käre nire tä töbike debe näre ye tä ja töi mike bobre.
c Sribi Ngöbökwe ñäkäidre nie akwa yebiti ta nikwe Jehová mikadre täte jankunu tä Ni Mikaka Mokre julio 2019 página 10 aune 11 párrafo 10 nemen 13 mikadre ñärärä.
d Isaías 40:28-31: “¿Akräke ñan gare mäi? ¿Mä ñan kukwe nuin? Jehová kä tibien jökrä Sribekä, niara Ngöbö nünanka kärekäre. Niara ñaka nemen nainte aune ñaka di nekä. Töi ño ye ñaka raba nüke gare täte. Nitre tä nainte ye mikata dite kwe aune nitre tä di nekä yei tä ja di bien krubäte. Monsotre tä nemen nainte aune di nekä, bätä monsotre tä ngoto ritete aune niken tibien, akwa nire nire tä tö ngwen Jehovai ye rabaita dite. Mü ngwike ye kwrerebiti rabai nakainkä. Rabai nen aune ñaka rabai dräre; rabai dikekä aune ñaka rabai nainte”.