“Munkwe mokre jabiti” köbö Jehovakwe kräke

1. ¿Nikwe dre nuaindre rabatekäre nire köbö Jehovakwe yebätä?

“KÖBÖ Jehovakwe” nieta Bibliabätä ngwane, tä blite nitre ja mikaka niara rüere gateta kwe aune tä juta kwe mikata kwäre kwe yebätä. Kukwe ne erere Jehovakwe nuainbarera kirabe juta ruäre mikani ja ngie nuin ye ngwane (Is. 13:1, 6; Ezeq. 13:5; Sof. 1:8). “Köbö Jehovakwe” kebera nüke ye kömikai ja mikadi Babilonia kri rüere yebiti aune krütai rü Armagedón yebiti. Rabatekäre nire “köbö” yebätä ja mikadre juto gwäune. ‘Käre ja ngwandre mokre’ “ja tare nikadi kri” yebätä driebare Jesukwe yebiti mikani gare kwe nikwe nuaindre käre (Luc. 12:40; Mat. 24:21).

2. ¿Ñobätä kwin ja kitadre Tesalonicenses kena yebätä?

² Tesalonicenses kena yete Pablokwe kukwe keta kabre bämikani nitre kristiano dimikakäre. Ja mikadre juto kwetre köbö Jehovakwe kräke yekäre. Kä nämäne raire ja käne ne kwe köbö ye rükadre nämäne gare Pablo ie (2 Tes. 2:1-3). Akwa köbö ye namanina känime kwrere ja mikadre juto kwetre ye ütiäte krubäte niebare Pablokwe ietre. Pablokwe kukwe niebare yebätä ni raba ja kite arato. Kukwe niebare kwe ye abokän 1) köbö Jehovakwe jatai ño, 2) nire nire ñaka rabaite nire 3) aune ni raba dre nuainne ja mikakäre juto.

¿KÖBÖ JEHOVAKWE YE RÜKAI ÑO?

3. ¿Ñobätä köbö Jehovakwe ye rükai ni gokä ye kwrere bämikata? (Üai mikadre ñärärä).

³ “Ni gokä tä nüke deu” (1 Tes. 5:2, TNM). Ne abokän kukwe bämikani kena Pablokwe blitabare kwe köbö Jehovakwe yebätä ngwane. Nitre gokä tä nüke gore deu aune tä nuainne jötrö, ñaka gata jire. Ye kwrere köbö Jehovakwe rükai aune nitre jökrä bäsi rakai jäme ie. Köbö Jehovakwe ye rükai jötrö ngwarbe rabai tuin ni kristiano ie arato. Akwa ni ñan gaite, nitre käme yebrä gaite.

4. ¿Köbö Jehovakwe ye ñobätä ketata meribätä monso köböi därere ye kwrere?

⁴ “Monso kite därere meribätä abokänbätä tä kite ja tare nike” (1 Tes. 5:3, TNM). Merikwe monso rabai ye tä ngibiare ngäbiti ngwane däredi ñongwane ye ñaka gare ie. Akwa däredi ye gare ie, kä tärä kite ja ken ye ngwane tä kite bäri ja tare nike. Ye erere arato köbö Jehovakwe ye rükai ora nuäi aune ñongwane ye ñaka gare metre nie akwa rükai yebrä gare nie. Nitre käme ye ben kukwe ükaite jötrö ngwarbe kwe aune ñaka kwäräbedi kwetre.

5. ¿Köbö Jehovakwe ye ñobätä bämikata käta kite ngwen ye kwrere?

⁵ Käta kite ngwen. Kukwe ketamäkäre bämikani Pablokwe nekänti blitabareta kwe nitre gokä yebätä, akwa nete köbö Jehovakwe ye bämikani kwe käta kite ngwen yebätä (1 Tes. 5:4). Nitre gokä ye töita kwatibe gobätä yebätä käta kite ngwen ye ñaka raba gain. Käta kite ngwen aune ga raba yebätä ñaka töbike. Ja tare nikadi kri ngwane kukwe ne erere rabadi bare. Nitre tä kukwe käme nuainne Ngöbö okwäkänti deu nitre gokä ye erere ye rabadi gare. Ni ñaka tö ja ngwain kore, nita juto biare köbö Jehovakwe kräke ye nikwe bämikadre. ¿Nuaindre ño? Kukwe tuin käme Jehovai ye ñaka nuaindre aune ja di ngwandre näin jankunu ‘nebe moto kuin ni mda mdakrä, nüne metre aune kukwe erametre erere niere’ (Efes. 5:8-12). Bitikäre nitre ñaka rabaite nire köbö Jehovakwe yete ye Pablo tä mike gare kukwe ketebubiti.

¿NIRE ÑAKA RABAITE NIRE KÖBÖ JEHOVAKWE YE NÄIRE?

6. ¿Bäsi nitre jökrä tä jadükani nieta ngwane dre gärätä? (1 Tesalonicenses 5:6, 7).

⁶ “Nita kibien” (ñäkädre 1 Tesalonicenses 5:6, 7 yebätä). Nitre ñaka rabaite nire köbö Jehovakwe näire ye Pablo bämikani nitre tä kübiani kwrere. Nitre tä kübiani ngwane dreta nakainkä bäre ye ñaka gare ie. Aune kukwe tä nakainkä bäre ngwane ñaka kä ngwen ruin jabiti. Ye erere nitre kwati ta kübiani ja üairebiti (Rom. 11:8). Kukweta nakainkä käbiti tibien abokän tä mike gare nita nüne kä krüte te. Ja tare nikadi kri ye nibira ja ken akwa nitre ñaka mike ütiäte jai. Kukwe tare tä nemen bare käbiti tibien ye ngwane nitre töta nemen kukwe Ngöbökwe mikabätä gare jai. Akwa käta niken ta ngwane ñaka tä kite kukwe ye mike ütiäte jai. Ye ngwane tä nikenta ja düke ye kwrere. Jehovakwe kukwe ukaite nitre käme ben ye gare nitre ruäre ie akwa tä raire nun ietre (2 Ped. 3:3, 4). Ni tädre ngwäte nieta nie ye ütiäte krubäte ni kräke köbö kwatire kwatire.

7. ¿Nitre gaite Ngöbökwe ye ñobätä ni dröbare ye kwrere?

⁷ “Ni dröbaka”. Nitre gaite köbö Jehovakwe näire ye apóstol Pablo bämikani nitre dröbaka kwrere. Nitre tä dröbare ye ngwane käta nikwitekä biti aune tä kukwe käme den nuaindre jai. Ye erere arato kukwe nieta Ngöbökwe ye nitre kwati ñaka mike ütiäte jai aune tä kukwe käme den nuaindre jai, ye tä niken ngwena gata kokwäre. Nitre kristiano rabadre töbike kwin ja käne, tädre mröi aune ñaka dröbare niebare Apóstol Pablokwe (1 Tes. 5:6). Ni ja tötikaka Bibliabätä käkwe niebare ni mröi ye abokän “ni töi mrebe aune töbikaka kwin ja käne, tä töbike kwin käne dre dian nuaindre kwe jai yebätä”. ¿Ñobätä kukwe ne ütiäte ni kräke? Ñobätä ñan aune política yebätä blitata bäri aune kukwe tä nemen bare käbiti tibien bätä ni raba nakain nuäre kö okwäte. Köbö Jehovakwe jatai bäri ja ken ngwane ñaka rabai nuäre ni kräke töbikatarikäre kwin kukweta nemen bare ni bäre yebätä. Akwa nikwe dre niei yebätä ñaka töbikadre krubäte ñobätä ñan aune üai deme Jehovakwe yebiti ni mikai dite kwe aune ni dimikai kwe kukwe kwin den jai (Luc. 12:11, 12).

¿KÖBÖ KRI JEHOVAKWE YE KRÄKE NI RABA JA MIKE ÑO JUTO?

8. 1 Tesalonicenses 5:8 tä niere erere ¿dre ribeta jai ne kwe ni tädre mokre aune töbikakäre kwin ja käne? (Üai mikadre ñärärä).

⁸ “Ni rükä käta jändrän ribi mike ja mäträbti […] sobro balinkwatare ribi mike ja dokwäbti ja ngibiakäre” ye kitadre jabätä. Ni rükä tä ja ngwen mokre aune jondron rükäre ye tä kitani jabätä ye kwrere Pablokwe bämikani (ñäkädre 1 Tesalonicenses 5:8 yebätä). Rüta ngwane ni rükä tä juto biare rükäre. Ye erere tä nemen bare nibätä. Nita tödeke aune ja tarere yebiti nita jondron ribi ye mike ja mäträräbätä arato nita tö ngwen yebiti sobro mikata ja dokwäbiti aune nita bämike nita juto biare köbö Jehovakwe kräke. Kukwe ne nuaindre ye raba ni dimike krubäte.

9. ¿Tödeka ye tä ni kriemike ño?

⁹ Jondron ribi mikata ni rükäkwe ja mäträräbätä ja brukwä kriemikakäre ye erere arato, tödeka, ja tare yebiti nita ni brukwä ja üairebiti ye kriemike kukwe ne tä ni dimike sribire jankunu Jehová kräke aune ja ngwen Jesús erere. Nire nire tä Jehová känene ye kräke niarakwe kukwe kwin mikai nemen bare ye gare metre nie tödeka nikwe yebätä (Heb. 11:6). Ne madakäre tödeka tä ni dimike ja ngwen metre ni jie ngwanka Jesús ie, kukwe tare yebiti ta. Arato tödeka nikwe tädre dite ja tuakäre kukwe tare ben yekäre, ja mräkätre rüere ja mikata aune ngwian ñaka kwetre akwa yebiti ta tä ja ngwen metre yebätä nikwe ja kitadre. Nitre töta nemen jondron tuabätä krubäte jakwe ye erere ñaka rabadre bare nibätä yekäre nikwe ja kitadre ja mräkätre tä nüne jondron braibebiti gobran Ngöbökwe mikakäre käne yebätä.b

10. ¿Jehová taredre aune nitre mada taredre ye raba ni dimike ño?

¹⁰ Ja ngwankäre ngwäte aune töbikakäre kwin ja käne, nikwe ni mada taredre (Mat. 22:37-39). Ñodre, Jehová tare nikwe ye tä ni dimike kukwe driere jankunu kukwe tare yebiti ta (2 Tim. 1:7, 8). Nitre ñaka kukwe mike täte nibe ye tare nikwe. Nita bämike kukwe metre gare nie drieta ietre yebiti ñodre: teléfono o cartabiti nuainta aune ñaka ja töi kwitai kwetre ye ni ñaka nütüre. Ñakare aune ja töi kwitai kwe aune kukwe kwin nuaindi kwe, ie tö ngwenta (Ezeq. 18:27, 28).

11. ¿Nita ja mräkätre tarere ye tä ni dimike ño? (1 Tesalonicenses 5:11).

¹¹ Ja mräkätre tare nikwe yebätä nita kukwe kwin niere ie aune dimike nirien jankunu (ñäkädre 1 Tesalonicenses 5:11 yebätä). Nitre rükä jakri tä niken rüre ngwane tätre ja dimike kwärikwäri. Akwa tärä nemen rübätä angwane raba ja nuainne tare akwa ñaka tä nuainne nierare. Ye erere arato ni ñaka kukwe tare nuainne ja mräkätrebätä nierare aune kukwe tare nuainta kwe nibätä ngwane ni ñaka ja ngie mike (1 Tes. 5:13, 15). Ja mräkätre konkrekasionte ji ngwanka ye nita mike ütiäte jai yebiti tare nikwe nita bämike (1 Tes. 5:12). Pablokwe tärä juani konkrekasion Tesalónica ie ngwane kä jämi niken kwati tä kömikani yebätä töbike. Ja mräkätre ji ngwanka konkrekasionte ie kukwe ñaka nämäne gare krubäte, aisete kukwe nämäne nainte ietre akwa mika rabadre ütiäte. Ja tare nikadi kri ye jatai nökrö bäri ja ken ngwane, nane mada sukursal aune Central mundial ñaka rabaira kukwe niere ni jie ngwankäre. Yebätä gwäune ütiäte krubäte nikwe ja mräkätre ni jie ngwanka känändre ja jie ngwankäre, mikadre ütiäte jai aune taredre ye ütiäte krubäte. Kukwe jökrä yebiti ta nikwe töbikadre kwin ja käne aune kukwe ta nainte ja mräkätre ie yebätä ñaka ja töi mikadre ñakare aune Jehová ta Kristo yebiti ja niaratre jie ngwen ye ngwandre törö jai.

12. ¿Nita tö ngwen ye tä ni töi kriemike ño?

¹² Sobro balinkwatare tä ni rükä dokwä kriemike ye erere arato ni mikadi kwäre ie nita tö ngwen ye tä ni töi kriemike. Kukwe ie ni ta tö ngwen ye tä käre ni töibätä ye medenbätä kukwe käbämikata kä tibienbätä ye ñan ütiäte tä nemen gare nie (Filip. 3:8). Nita tö ngwen ye tä ni brukwä mike jäme aune ja töi mike kwin jankunu. Wallace aune Laurinda tä sribire África yebätä kukwe ne erere namani bare. Bämän nikani krämä ta aibe, iti kän rün krütani biti iti kän meye krütani. Niaratre ñaka namaninta mräkätre kwe ben pandemia COVID-19 ye köböite. Wallace tä niere: “Nitre rükaita nire käbämikata ye tä ti töi mike jäme. Yebätä niaratre ja tuani drebe jämi krüte känenkri yebätä ti ñaka ja töi mike, ñakare aune rükaita nire aune dre nuaindi kwe yebätä tita ja töi mike. Ye köböire ti ñaka töbike krubäte, tödeka tä ti töi mike jäme aune ñaka töbike krubäte krütani tikän yebätä.

13. ¿Nikwe dre nuaindre ne kwe Jehovakwe üai deme biandre nie?

¹³ “Sribi Ngöbö üaikwe ñan dokwä täkä nunkwe” (1 Tes. 5:19). Ñukwä jutra ngire ye kwrere üai deme tä sribire nibätä Pablokwe bämikani. Üai deme ye köböire käta nemen juto nibätä, ni töta nemen kukwe kwin ye nuainne aune nuaindi ja di ngöibiti Jehová kräke (Rom. 12:11). ¿Dre nuaindre ne kwe Jehovakwe üai deme biandre nie? Kärädre ie, ja tötikadre Bibliabätä aune juta jie ngwanta kwe yebe ni tädre keteitibe. Nikwe kukwe ye erere nuaindi ngwane töi kwin keta kabre Jehovakwe ye rabai nikwe (Gál. 5:22, 23).

14. ¿Jehovakwe üai deme biandre jankunu nie ie ni tö ngwane drebätä ja ngübadrebiti? (Üai mikadre ñärärä).

¹⁴ Jehová tä üai deme kwe ye bien nie akwa nikwe ngübadre. Ni ñaka tö kukwe blo nuain ne kwe üai deme ye riadrete nikän. Jehovakwe üai deme biandre nie yekäre nikwe ja ngwandre kwin aune ja töi mikadre kwin. Kukwe käme ye tuainmetre nirien ja töite aune nuaindi ngwane, üai deme ye raba nete nikän (1 Tes. 4:7, 8). ¿Dre mada ngwandre törö jai? Pablokwe niebare: “Ñaka profecia ye mikadre tuin ngwarbe jai” (1 Tes. 5:20). “Profecías” nieta ye abokän kukwe Ngöbökwe mikata gare üai deme köböire. Ñodre kukwe mikata gare köbö Jehovakwe aune nibira no yebätä. Ni kräke köbö Jehovakwe ye ñan mente o ni ñaka Armagedón tuai ye ni ñan nütüre. Ñakare aune gare nie köbö ye nebera no ye abokän käre tä ni töite nita bämike. Ye medenbätä nita ja ngwen ño aune Ngöbö mikata täte ño nikwe ye ütiäte krubäte ni kräke köbö kwatire kwatire (2 Ped. 3:11, 12).

‘NGÖBÖ KUKWEI MIKA ÑÄRÄRÄ KWIN MUNKWE’

15. ¿Dre nuaindre ne kwe ñaka ni ngökadre? (1 Tesalonicenses 5:21).

¹⁵ Kä nebera no ne kwe nitre ja mikaka Ngöbö rüere ye käkwe “¡kä jäme aune kukwe blo ñaka!” ye niedi (1 Tes. 5:3, TNM). Chokali kukwei nie rabai kä jökräbiti tibien abokän nitre kwati ngökai (Apoc. 16:13, 14). ¿Nikwe ja tuainmetre ngökadre? ‘Ngöbö kukwei mika gare kwin jai’ nieta, ne mikai täte ngwane ñaka ni ngökai (ñäkädre 1 Tesalonicenses 5:21 yebätä). Kukwe griegore kwitata ‘kukwe mikadre gare kwin jai’ ye abokän hierro kwin o ñakare tuateta ye kwrere. Nita dre kukwei nuin o drebätä nita ñäke ye mikadre gare kwin jai. Kukwe ne namani ütiäte krubäte nitre tesalonicenses kräke. Ni kräke rabadre bäri ütiäte ñobätä ñan aune ja tare nikadi kri ye nebera no. Kukwe jökrä mikadre era jai näre, töbikadre kwin drebätä ñäkäta aune dre kukwe nuata yebätä. Kukwe mikata gare juta Ngöbökwe aune Bibliabätä ye mikadre gare kwin jai. Ye köböire kukwe ngwarbe nieta Satanakwe ni ngökakäre yei ni ñaka rakai (Prov. 14:15; 1 Tim. 4:1).

16. ¿Tödekara meden kwin krubäte tä nikwe aune ni raba dre nuainne nengwane?

¹⁶ Ni Jehová mikaka täte ye rabaite nire ja tare nikadi kri ye ngwane ye gare nie akwa dre rabai bare ni itire itirebätä jetebe ye ñaka gare nie (Sant. 4:14). Ni rabaite nire ja tare nikai kri ye näire o ni krütai känenkri akwa Jehovakwe ja nire käre biain nie nikwe ja ngwen metre ie ngwane. Nitre dianinkä ye täi Kristo ben kä kwinbiti aune oveja mada ye täi kä bä nuäre te kä tibienbätä. Akwa nengwane tö ngwandre kwatibe aune ja mikadre juto köbö Jehovakwe ye kräke.