Jehová niebare Samuel ie: ‘Nän Jesé gwirete. Niara monsoitre ye iti rabai reire Israel mada’. Aisete Samuel nikani aune Jesé ngobo umbre ye jutuabare ie angwane töbikabare kwe: ‘Monso ne ara dianinkä raba ruin tie’. Akwa Jehovakwe niebare Samuel ie ye ñaka ai aune mikani gare kwe ie: ‘Ni mada ye ño gare metre tie, ñan bä ye aibe tuin tie’.

Jesé jatani monsotre mada ni ti ye ngwena Samuel ie. Akwa Samuel niebare: ‘Jehová ñaka niaratre ye ai denkä. ¿Monso mada tärä mäkwe?’. Jesé niebare: ‘David bäri chi aibe nebe tä oveja ngübare’. David jatani nüke gwi ye ngwane, Jehová niebare Samuel ie: ‘¡Ni ne ara!’. Angwane Samuelkwe aceite kekani David dokwäbiti. Aune ye erere David dianinkä rabakäre reire Israel.

Kä nikani ta ye bitikäre, nitre Israel rübare nitre filisteo ben. Nitre filisteo yekwe ni rükä kri krubäte nämene, ye kädeka nämene Goliat. Mantre jetebe nämene nitre Israel kötaire aune nämene kukwe ne niere ietre: ‘Ni juen iti rüre tibe. Ti ganaindi kwe angwane, nun rabai klabore mun kräke. Akwa tikwe ganaindi angwane, mun rabai klabore nun kräke’.

David etebatre ye nämene rüre siba, nitre rükä nämene nünentubu yekänti David nikani mrö ngwena ietre. Yete Goliat nämene ngrente ye kukwei juruabare ie aune niebare kwe: ‘¡Tikwe rüdi ben!’. Rei Saúl niebare ie: ‘Akwa mä tä monsore krubäte’. David niebare ie: ‘Jehovakwe ti dimikai’.

Angwane jondron rükäre Saulkwe ye biani kwe ken David ie, akwa David niebare ie: ‘Tikwe jondron ne kitadre jabätä angwane ti ñaka raba rüre’. Aisete David honda kwe ye diani kisete. Jondron ye abokän dänkwä mäkäta köbätä jä kitara ye kwrere. David nikani ñö nen yekänti, aune ñö jäi diani kwärike kwe aune mikani ngwäte kwe jai. Biti nikani betekä Goliat kokwäre. Ni kri krubäte yekwe ngratebare: ‘¡Monso chi, jakwre nete! Tibike mä mike kwetadre nukwä aune jondron nire känsenta yei’. David ñaka kä jürä ngwani jabätä aune niebare kwe: ‘Mä kite rüre ngitra aune lanza yebiti, ti abokän bike rüre Jehová kä yebiti. Mä ñaka tä rüre nunbe, ñakare aune mätä rüre Ngöbö rüere. Nitre jökrä tä nete nei rabai gare Jehová ye bäri dite ngitra o lanza ye kräke. Niarakwe mun tuainmetre nun kisete’.

Ye bitikäre, David jä mikani kwati honda kwe yete aune miniantebare ja dibiti kwe. Jehová die yebiti, jä ye betaninkä drekebe ngwarbe aune matani Goliat okote. Ni kri krubäte ye nikani ngwakare tibien. Angwane nitre filisteo ngitiani ne kwe ñaka kämikadre. ¿Mätä tö ngwen Jehovai David erere arato?

David käkwe Goliat kämikani ye bitikäre, rei Saúl niara kädekani nitre rükä jie ngwanka. Davidkwe rü keta kabre ganainbare aune käikitaka namani krubäte. Niara nämene rüre ye bitikäre nämene kiteta ye ngwane, käre meritre nämene niken niara kain ngäbiti bailare aune kantare bätä niere: ‘Saúl nitre rüe kwati kämikani, akwa David nitre kämikani bäri kwati krubäte’. Ye medenbätä, Saúl namani bätä ngwenbätä aune tö namani murie ketai.

David nämene arpa täke kwin. Bati, nämene arpa täke Saúl kräke ye ngwane, rei ye käkwe täkäbare lanzabiti. Akwa David käkwe ja mikaninte kuintubu aune lanza nikani bäre ta matabare kibätä. Ye bitikäre, bä kabre Saúl tö namani murie ketai. Mrä mada, David ngitiani aune ja ükani kwe kä ngwarbe nötare yekänti.

Ye bitikäre, Saúl nikani nitre rükä 3,000 kwe yebe David känenentari. David aune nitre rükä kwe nämene ja ükani kä mäkäte yekänti Saúl nikani aune Saulkwe ñaka niaratre gani. Nitre rükä Davidkwe ye blitabare tiebe ben: ‘Matarebrä mä raba Saúl murie kete’. David nikani Saúl kokwäre aune dän tikaninkä chi kwebätä akwa Saulkwe ñaka gani. Akwa ye bitikäre, ja namani ruin ngite ie, ñobätä ñan aune Jehovakwe ni dianinkä reire ye niarakwe ñaka mikani ütiäte jai. Aisete ñaka nitre rükä kwe ye tuanimetre kwe Saúl murie kete. Saúl nikani mento kä mäkä yekänti angwane, David ñäkäbare ja dibiti aune niebare kwe ie: ‘Tikwe mä murie ketadre matare akwa tikwe ñaka nunie’. ¿Yebätä Saúl ja töi mikani kwin David kräke raba ruin mäi?

Ñakare. Saúl namani ja mike jankunu rüere. Bati deu, David aune nurä kwe Abisai nikani Saúl aune nitre rükä nämene nünentubu yekänti, nitre ye käkwe ñaka niaratre gani jire. Abner, ye abokän nämene Saúl kriemikaka, akwa nämene kübiani arato. Abisai niebare David ie: ‘¡Matarebrä ni raba murie kete! Ti tuenmetre Saúl murie kete’. Akwa David niebare ie: ‘Jehová tuenmetre kukwe ükete ben. Bäri kwin lanza, jarra ñö ngwä ie ye den kisete aune brän’.

Ye bitikäre, David nikani ngutuä nämene no yebiti kwin. Yete Saúl aune nitre rükä kwe nämene nünentubu ye namani tuin menteni ie. David ngratebare ja dibiti: ‘¡Abner! ¿Ñobätä mäkwe ñaka rei mäkwe kriemiri? ¿Jarra aune lanza kwe ye tä medente mike ñärärä?’. Saúl ie David kukwei nükani gare aune niebare kwe ie: ‘Mä törbadre akräke mäkwe ti murie ketadre akwa mäkwe ñaka nunie. Matare nibira gare tie mä rabai reire Israel ja känenkäre’. Angwane Saúl nikaninta ju gobrankäre kwe yete. Akwa, rei Saúl ye mräkätre ruäre kwe David nämene tare.

Saúl ngobo umbre kädeka nämene Jonatán aune niara nämene rükä baliente. Jonatán ye nämene bäri juto mü aune nämene bäri dite león ye kräke niebare Davidkwe. Bati, Jonatán nitre rükä filisteo tuani 20 ngudrebiti kwin. Aisete niebare kwe ni jondron rükäre ngwianka niara kräke yei: ‘Jehovakwe kukwe mikai gare nie ye ngwane batibe nikwe rükaikä ben. Nitre filisteo ni käräi ngudrebiti kwin angwane rabai gare nie nikwe rüdre ben’. Nitre filisteo ñäkäbare ja dibiti: ‘¡Mun jakwre rüre nunbe!’. Angwane Jonatán bätä ni jondron rükä ngwianka niara kräke ye nikani ngudrebiti kwin aune nitre rükä 20 ye ganainbare kwetre.

Jonatán ye abokän Saúl ngobo mubai yebätä, rün krütadre ye bitikäre niara rabadre reire täte. Akwa Jehovakwe David dianinkä ne kwe rabadre reire ja känenkäre ye nämene gare ie aune ñaka bätä ngwani kwebätä. Ñakare aune, Jonatán aune David ja ketabare kwin jabe. Jonatán aune David käbämikani jai niaratre ja kriemikai kwärikwäri. Niaratre nämene ja kete jabe ye bämikakäre, Jonatán dän kwe, ngitra, tukwen aune jondron mäkäkäre ja mrökarabätä ie ye biani kwe David ie.

David nämene ngitie Saúl ngänikaire ye ngwane, Jonatán janamene niara känti aune niebare kwe ie: ‘Mäkwe ja ngwan dite aune ñan kä jürä ngwan jabätä. Jehovakwe mä dianinkä ne kwe mä rabadre reire. Ye gare kwin ti rün ie arato’. ¿Ja ketamuko kwin Jonatán ye kwrere mä törba tuai jakwe?

Bä kabre Jonatán ja nire kwe ye mikani kukwe kri te ja ketamuko kwe ye dimikakäre. Niara rün Saúl nämene reire ye tö nämene David murie ketai ye nämene gare ie, aisete niebare kwe rün ie: ‘Mäkwe David murie ketai angwane mäkwe ja mikai ngite krubäte. Niara ñaka kukwe blo nuainne jire’. Saúl namani rubun krubäte Jonatán kräke. Kä nikani ruäre ta ye bitikäre, Saúl aune Jonatán murie ketani gwairebe rüte.

Jonatán murie ketani ye bitikäre, David janamene Mefibóset tuin, niara ye abokän Jonatán ngobo. Kwani ie ye ngwane niebare kwe ie: ‘Tikwe mä ngübadi kärekäre ñobätä ñan aune mä rün nämä ja kete kwin tibe. Ju gobrankäre tie yete mäkwe nünain aune mäkwe mrödi tibe mesabätä’. David ñaka ja ketamuko kwe Jonatán ye käi kwitaninkä jabiti jire.

Saúl murie ketani ye ngwane, David namani reire niara täte mada. Kä nämene 30 niarabiti. Kä nikani kwati krubäte ta aune bati deu, nämene ju gobrankäre yete, angwane nikrabare kwe aune meri bä nuäre krubäte jutuabare ie. Meri ye kädeka nämene Bat-Seba aune nämene ja mäkäninte ni rükä kädeka nämene Urías ben niebare David ie. David ni juani Bat-Seba tuin ne kwe jänjatadre ju gobrankäre yete aune namanintre jabe aune Bat-Seba namani murore. David dre nuainbare ye tö namani ükai. Aisete niebare kwe ni rükä jie ngwanka yei rabadre Urías mike käne rü yete aune biti niaratre rikadre mentokwäre aune tuanemetre kaibe kwetre. Urías murie ketani rü yete aune David ja mäkäninte Bat-Seba ben.

Akwa kukwe blo namani bare ye jökrä jutuabare Jehovai. ¿Jehovakwe dre nuainbare mada? Ni niara kukwei niekä Natán juani blite kwe David ben. Natán niebare ie: ‘Ni jondron bökäne krubäte yekwe oveja nämene krubäte, akwa ni iti bobre yekwe oveja nämene kratibe abokän nämene tarere krubäte. Ni jondron bökäne krubäte yekwe oveja kratibe ye dianinkä ni bobre yekän’. David namani rubun krubäte aune niebare kwe: ‘¡Ni jondron bökäne krubäte ye murie ketadre!’. Angwane Natán niebare ie: ‘¡Mä abokän ni jondron bökäne krubäte ye erere!’. David namani ulire krubäte aune niebare kwe Natán ie: ‘Tikwe ja mikani ngite Jehová rüere’. David ja mikani ngite ye käkwe kukwe kri mikani niara aune mräkätre kwe ye kisete. Jehovakwe David mikani ja ngie nuin, akwa niara tuanimetre nire kwe, ñobätä ñan aune niarakwe kukwe metre niebare aune ja töi mikani bobre kwe.

David tö namani templo sribedi Jehová kräke. Akwa, Jehovakwe David ngobo Salomón ye dianinkä, ne kwe rabadre templo sribere. Aisete, dre dre ribedi jai Salomonkwe sribi ye kräke ye Davidkwe ükaninkrö kräke aune niebare kwe: ‘Templo Jehovakwe ye rabadre bä nuäre krubäte. Salomón tä bati krubäte, akwa tikwe niara dimikai jondron jökrä ükete’. Ngwian nämene ere krubäte Davidkwe ye biani kwe templo sribekäre. Nitre ie sribi nämene gare kwin ye känänbare kwe, arato oro, jondron ngwiane ükaninkrö kwe aune tabla kä Tiro bätä Sidón yekänti ye jatani ngwena. Kä namanina braibe David käne aune krütadre ye ngwane, templo ye sribedre ño nämene ükaninte täräbätä biani kwe Salomón ie aune niebare kwe ie: ‘Jehovakwe kukwe ne biani tie ne kwe tikwe tikadre aune tikwe biandre mäi. Niarakwe mä dimikai. Ñan kä jürä ngwan jabätä. Mäkwe ja ngwan dite aune sribi ye mäkwe nuain’.