KUKWE TÄRÄ KWATABÄTÄ: BIBLIA RABA NÜKE GARE NI JÖKRÄ IE
¿Ñäkädre Bibliabätä ye ütiäte?
“Biblia tä blite Ngöböbätä ye gare nitre kwati ie. Akwa ñaka kukwe mike gare jire chi nitre chino tä jondron nuainne yebätä.”(LIN, NÜNANKA CHINA)
“Tita kukwe hinduista yebätä aune tärä deme yebätä kukweta tikani ye ñaka nüke gare tie. Ye medenbätä, ¿ñokänti Biblia abokän raba nüke gare tie?” (AMIT, NÜNANKA INDIA)
“Tita Biblia ye mike tuin ütiäte jai ñobätä ñan aune rürübäinta bäri krubäte kä jökräbiti tibien ye gare tie. Akwa ti jämi tuin jire kwati.”(YUMIKO, NÜNANKA JAPÓN)
Kä jökräbiti tibien nitre tä Biblia ye mike tuin ütiäte krubäte jai akwa dre nieta kwe ye ñaka gare krubäte ietre o ñaka gare jire ietre. Metrere, nitre nünanka Asia yebätä kukwe ye tä nemen bare, akwa kä ruäre känti Biblia tärä krubäte akwa ñaka nüke gare nitre jökrä ie arato.
“¿Drekäre tikwe ñäkädre Biblia yebätä?”, mä raba nemen nütüre. Tärä deme ne tä dre driere ye rabadre gare mäi ye raba mä dimike kukwe nebätä:
Nüne kä jutobiti
Kukwe ükete kwin mä mräkäbe
Töbikakwe ye denkä ja töite
Ja mäke kwin nitre madabe
Jondron nuainne kwin ngwian yebiti
Ñodre, Biblia ye tä dre mike gare ye meri nünanka Japón kädekata Yoshiko ye tö namani gai. ¿Dre namani gare ie? Niara tä niere: “Ti ñaka tä nüne ngwarbekäre aune jondron kwin tä ti kräke ja känenkäre ye Biblia ti dimikani mike gare jai. Ja ñaka niena ruin ulire tie”. Dre nieta Bibliabätä ye Amit kädrieni kena, ye käkwe ja töi mikani mike gare jai. Niara tä niere: “Kukwebätä tikwe ñäkäba ye käkwe ti töi mikaba ñan krütare. Kukwe nieta Bibliabätä ye tä nitre kä jökräbiti tibien ye dimike”.
Biblia käkwe nitre kwati krubäte dimikanina nüne bäri kwin. ¿Mä raba ñäkebätä aune kukwe medenkänti raba mä dimike ye mike gare jai?