Ngöbökwe Kukwe Biani Nuaindre ye Esdras driebare nitre ie

Nitre Israel kwati nikaninta Jerusalén ye käi nikani 70 ta, akwa ruäre abokän nämene nüne kä ketare ketare te Gobran persa nämene gobrane yekänti. Nitre israelita ye ngätäite Esdras nämene, niara abokän sacerdote nämene Kukwe Biani Nuaindre Jehovakwe ye driere. Kukwe Biani Nuaindre ye nitre Jerusalén ñaka nämene mike täte ye namani gare Esdras ie, ye medenbätä tö namani näin yete nitre dimikakäre. Artajerjes, rei käi Persia käkwe niebare ie: ‘Ngöbökwe mä mikani töbätä ne kwe Kukwe Biani Nuaindre kwe ye mäkwe driedre. Aisete nän aune nire nire törba näin mäbe ye mä rika ngwena jabe’. Nire nire tö namani näin Jerusalén ye jökrä ben Esdras ja ükaninkrö. Jehovakwe niaratre ngübadrebiti ji ngrabare ribebare kwetre ie aune biti nikanintre kä mente kokwäre.

Sö kräbokä ye bitikäre, namanintre Jerusalén. Nitre ütiäte nämene juta yete käkwe niebare Esdras ie: ‘Nitre israelita ñaka tä Jehová kukwei mike täte aune meritre juta madate tä ngöbö keta kabre ngwarbe sribebare ye mike täte yebe niaratre tä ja mäkete’. ¿Esdras käkwe dre nuainbare? Niara namani ngukodokwäre nitre jökrä ngwärekri aune orabare kwe: ‘Jehová mäkwe jondron kwin krubäte nuainbare nun kräke, akwa nunta ja mike ngite mä rüere’. Nitre yei ja namani ruin ngite, akwa namanintre jankunu kukwe ñaka kwin ye nuainne. Yebätä Esdras käkwe nitre umbre ji ngwanka aune nitre kukwe ükatekä ye dianinkä ne kwe rabadre kukwe känene kukwe ye mikakäre gare bäri kwin jai. Sö krämä te nitre ñaka tö namani Jehová mikai täte ye dianinkä jökrä mento kwetre.

Kä nikani 12 ta. Ye bitikäre, ki juta Jerusalén yebiti namani ükaninteta täte bobukäre. Esdras käkwe nitre ükaninkrö ne kwe niara rabadre ñäke Kukwe Biani Nuaindre Ngöbökwe yebätä. Kukwe Biani Nuaindre yebätä niara ñäkäbare ye ngwane, nitre nükani nünaninkä krö. Esdras käkwe Jehová käikitaninkä aune kukwe ye namani debe nitre israelita kräke ye bämikakäre niaratre kise ngökani kwin. Ye bitikäre, Esdras ñäkäbare Kukwe Biani Nuaindre yebätä aune kukwe ye mikani gare kwe. Nitre käkwe niara kukwe nuabare kwin. Niaratre käkwe Jehová tuanimetre bobukäre ye nükani gare ietre aune namanintre ja muaire. Jetebe se kwrere, Esdras namani jankunu ñäke Kukwe Biani Nuaindre yebätä. Nükani gare nitre israelita ie niaratre rabadre Fiesta Cabañas ye käi ngwen juto jabätä ye käi namanina no. Aune jötrö ngwarbe namanintre ja mike juto fiesta ye kräke.

Köbö kükü te fiesta nuainbare ye käi namani juto krubäte nitre israelita yebätä. Nura ngokwä namani kwin krubäte yebätä debe biani kwetre Jehovai. Josué nämene nire ye ngwane Fiesta Cabañas nuain nämene abokän erere nuainbareta kwetre. Fiesta krütani ye ngwane, niaratre ja ükaninkrö aune orabare kwetre: ‘Jehová nun nämene klabore akwa mäkwe nun mikani kwäre. Mäkwe mrö biani nunye kä ngwarbe nötare yekänti aune mäkwe kä bä nuäre ne biani nunye. Akwa nun abokän käkwe bä kabre ñaka mä kukwei mikani täte. Aune mäkwe nitre mä kukwei niekä kwati krubäte juani nun mike mokre akwa nunkwe ñaka niaratre kukwei mikani täte. Akwa yebiti ta, mäkwe nun ngübabare bätärekä. Mäkwe kukwe käbämikani Abrahán ie ye mäkwe ñaka käi kwitaninkä jabiti. Matare nun bike käbämike mäi nunkwe mä kukwei mikai täte’. Nitre kukwe käbämikani ye tikani kwetre aune nitre ütiäte, levita bätä sacerdote käkwe täräi mikaninkä sello yebiti.