Kä Egipto yekänti Jacob mräkätre nämene nüne, yebätä niaratre kädekani israelita. Jacob aune José krütani ye bitikäre, faraón mada namani gobrane. Faraón yebätä kä jürä namani, ñobätä ñan aune nitre Israel ye jatani nirien bäri kwati krubäte aune dite nitre Egipto ye kräke. Aisete, faraón käkwe nitre Israel mikani klabore jai. Namani mike ja dibiti ladrillo sribere aune namani mike sribere krubäte tirete. Nitre egipcio namani niaratre ngwen ja tare nike krubäte ye ngwane bäri nitre Israel namani nirien kwati krubäte. Ye ñaka nämene nemen debe faraón kräke, yebätä monsotre kia brare nämene därere nitre Israel yekwe ye jökrä murie keta manabare kwe, akwa monsotre kia merire nämene därere ye aibe ñaka murie ketadre niebare kwe. Nitre Israel yebätä kä jürä namani krubäte, ¿ye mä raba bämike ja töite?

Meri israelita kädeka nämene Jokébed yekwe monso chi nuäre därebare. Niara kriemikakäre, mikani kwe kutuäte aune mikani kwe mikä nämene ñö Nilo yekänti. Míriam ye abokän monso chi ye ngwai, niara namani bä no se kwrere ne kwe dre rabadre bare ye gadre kwe.

Faraón ngängän nikani jüben ñöte aune yete kutuä ye jutuabare ie. Kutuä ye teri monso chi därebe nämene ngetrekä aune namani tuin bobre ie. Míriam ngwantaribare ie: ‘¿Ti rikadre meri iti kärere ne kwe ngäbäkre chi ye mikadre kianbätä kwe mä kräke ie mä tö?’. Niara jän niebare ie aune Míriam jatani meye jeñe kwe ye ara ngwena. Faraón ngängän ye niebare Jokébed ie: ‘Monso chi ne ngwena, mäkwe ngüba ti kräke aune tikwe ütiä biain mäi’.

Monso chi ye ririabare angwane, Jokébed nikani ngwena faraón ngängän ie. Niarakwe kädekani Moisés aune ngobo jeñe kwe ye kwrere ngübabare kwe. Moisés ririabare rabakäre gobrane ye kwrere aune niara törbadre drei ye jökrä rabadre kwe. Akwa, ñaka Jehová käi kwitaninkä kwe jabiti. Moisés yei nämene gare kwin niara abokän israelita, aune ñaka ni egipcio aune ja töi mikani kwe Jehová mike täte.

Kä namani 40 Moisebiti ye ngwane, ja töi mikani kwe juta kwe ye dimike. Bati, ni egipcio nämene ni klabore israelita mete tuani kwe. Ye ngwane, Moisés ni egipcio ye metani ja dibiti aune kämikani kwe aune ni ye ngwaka ükani kwe ümante. Ye namani gare faraón ie angwane, tö namani Moisés murie ketai, akwa niara ngitiani aune nikani Madián. Yete Jehovakwe niara ngübabare.

Kä 40 te Moisés nünanbare kä Madián yete, kä ye ngwane ja mäkäninte kwe aune monsoi namani. Bati nämene oveja ngübare ngutuä Sinai ye bäre angwane jondron ñan tuabare jutuabare ie. Kri namani jutra ngitiekä tuani kwe, ¡akwa kri ye ñaka namani nukwe! Moisés krötabare kri ye ken angwane ni kukwei juruabare ie. Ni kukwei ye käkwe niebare ie: ‘¡Moisés! Mäkwe ñaka kröta bäri ken. Sandalia tikete ja ngotobätä mätä kä deme känti yebätä’. Jehovakwe ángel mikani blite Moisés ben.

Kä jürä namani Moisebätä yebätä ja ngwäre jue mikani kwe. Ni kukwei käkwe niebare ie: ‘Tita juta tikwe ye tuin ja tare nike krubäte. Tikwe mikai kwäre nitre Egipto ye kisete aune ti näin ngwena kä kwin känti. Aune mäkwe juta ye diandrekä kä yekänti ie ti tö’. ¿Moisés töbikabare ño raba ruin mäi?

Moisés ngwantaribare ie: ‘¿Nirekwe ti juani ye niaratre törbai mikai jai angwane tikwe dre niei ietre?’. Ngöbökwe niebare ie: ‘Mäkwe nie ietre Jehová, Ngöbö Abrahankwe, Ngöbö Isaackwe aune Ngöbö Jacobkwe ti juani’. Moisés niebare: ‘¿Nitre ñaka ti kukwei mikai täte angwane tikwe dre nuaindi?’. Jehovakwe niara dimikai ye bämikani kwe ie kukwe keteitibiti. Niebare kwe Moisés ie rabadre mökän kwe ye kite tibien aune ye erere nuainbare kwe ye ngwane, ¡mökän ye nikwitani kulebrare! Ye bitikäre, Moisés kulebra ye kani niretubiti aune nikwitaninta mökän ye erere. Ye ngwane Jehovakwe mikani gare ie: ‘Jondron ñan tuabare ye mäkwe nuaindi angwane yebiti mäkwe bämikai ietre tikwe mä juani’.

Akwa Moisés niebare: ‘Ja ñaka törö tie blitakäre nitre ngwärekri’. Jehovakwe käbämikani ie: ‘Mäkwe dre niedi ye tikwe niei mäi, ne madakäre, tikwe mä eteba Aarón ye juain ne kwe mä dimikadre kwe’. Jehovakwe Moisés dimikai namani gare ie ye ngwane nikaninta Egipto aune muko kwe bätä monsotre kwe jänikani kwe jabe.

Nitre Israel ye nämene klabore aune nitre egipcio ye namani niaratre mike sribire ja dibiti. Jehovakwe Moisés aune Aarón juani kukwe ne mike gare faraón ie: ‘Juta tikwe tuenmetre niken ti mike täte kä ngwarbe nötare yekänti’. Faraón ye nämene bike kri yebätä niebare kwe: ‘Jehová tä kukwe niere ye ñaka ütiäte ti kräke. Ti ñaka nitre Israel tuainmetre niken’. Ye bitikäre, faraón niaratre mikani sribire bäri ja dibiti. Akwa, Jehovakwe ja töi mikani kukwe ja töi kräke driere ie. ¿Dre nuainbare kwe? Kukwe tare keta jätä mikani nemen bare kwe kä Egipto yekänti. Jehová niebare Moisés ie: ‘Faraón ñaka tä ti kukwei mike täte. Dekä niara täi ñö Nilo yekänti. Nän aune mäkwe nie ie ñö jökrä rikwitai därire, ñobätä ñan aune niara ñaka tö juta tikwe tuai niken mento’. Moisekwe Jehová kukwei mikani täte aune nikani faraón känti. Aarón ñö Nilo metani mökän kwe yebiti aune ñö ye nikwitani därire ye faraonkwe tuani. Ñö ye rä namani burere krubäte aune ñaka namani ña bä bätä gwa jökrä gatani. Akwa faraón ñaka ja töi mikani nitre ye juen kä ngwarbe nötare yekänti.

Köbö nikani köbö kükü ta ye bitikäre, Jehovakwe Moisés juaninta kukwe mike gare faraón ie: ‘Mäkwe ñaka juta tikwe tuainmetre niken angwane, kä Egipto nete gwre rabai kwati krubäte’. Faraón ñaka kukwe ye mikani täte yebätä Aarón mökän kwe ye kaninkä kwin aune juta ye jökrä te gwre namani kwati krubäte. Gwre namani ju ju te, camabiti, blato mrökäre yete. ¡Namani kä jökräbiti! Faraón niebare Moisés ie: ‘Jehovakwe kukwe tare ne diandrekä ribere ie. Aune ye bitikäre, tikwe nitre Israel tuainmetre niken’. Aisete, Jehovakwe kukwe tare ye ketaninbätä aune gwre gatani kwati krubäte ye nitre egipcio käkwe ükaninkrö jabiti. Kä rä namani kure krubäte, akwa mada bati faraón ñaka juta ye tuanimetre niken.

Ye bitikäre, Jehová niebare Moisés ie: ‘Aaronkwe dobro ye metadre mökän kwe yebiti. Nuaindi kwe angwane dobro münü ye rikwitai ngima münü ye kwrere’. Aune ye erere namani bare, ngima münü ye namani kä jökräbiti tibien abokän namani nitre därie jäke. Nitre egipcio ye ruäre namani niere faraón ie: ‘¡Kukwe tare ne kite Ngöbö köböite!’. Akwa, yebiti ta faraón ñaka nitre Israel tuanimetre niken.

Moisés aune Aarón nikani faraón känti kukwe Ngöbökwe ne mikakäre gare ie: ‘Mäkwe ñaka juta tikwe tuainmetre niken angwane tikwe munkä krikri mikai juta ye jökrä te’. Küben ye abokän munkä krikri tä nitre därie duin. Nitre egipcio bobre aune jondron bökäne ye gwirete munkä ye namani kwati krubäte. Juta jökrä yete küben ye namani krubäte. Akwa, kä Gosén känti nitre Israel nämene nüne yete munkä ñaka namani jire. Kukwe tare ketabokäkäre aune kukwe mada tare namani bare ja känenkäre ye nitre egipcio aibe ngwani ja tare nike, akwa kukwe tare ye ñaka namani bare nitre Israel yebätä. Faraón ribebare ja dibiti Moisés ie: ‘Munkä ne diankamana mento Jehová ie aune ye bitikäre, tikwe juta mäkwe tuainmetre niken’. Akwa, Jehovakwe kukwe tare ye ketaninbätä angwane, faraón kukwe niebare ye ñaka mikani täte kwe. ¿Kukwe ye namani ja töi kräke faraón ie raba ruin mäi?

Ye bitikäre, Jehová niebare: ‘Faraón ñaka juta tikwe tuainmetre niken angwane, jondron nire jökrä tä nitre egipcio yekwe rabai bren aune gatai’. Jehová kukwe niebare ye namani bare jetebe se kwrere, akwa kukwe tare ye ñaka namani bare jondron nire nitre Israelkwe yebätä. Akwa yebiti ta, faraón ñaka ja töi kwitani, ñobätä ñan aune niara nämene ja dokwä mike ribi. Jehovakwe niebare Moisés ie niara rikadreta faraón känti aune ngübrün kitadre kwinta kwe. Ngübrün ye nikwitani dobro münü ye kwrere aune näkäni nitre egipcio jökrä yebiti. Dobro münü ye käkwe nitre aune jondron nire kwetre ye mikani träine ngrabare ye namani tare krubäte ietre. Akwa mada bati faraón niebare nitre Israel ie ñaka niaratre tuainmetre niken kwe.

Jehovakwe Moisés juaninta faraón känti ne kwe kukwe ne niedre kwe ie: ‘¿Mä ñaka tö juta tikwe ye tuainmetre niken? Ye erere angwane jetebe tikwe ñü järe mikai näkäin tibien’. Jetebe se kwrere, Jehovakwe ñü järe, unsuli aune ñukwä jutra mikani näkäin. Ye kukwe bäri tare namani bare Egipto. Ye käkwe kri aune kä juani ngwarbe akwa kä Gosén yekänti kä nämene kwin. Angwane faraón niebare: ‘Ribere Jehovai ne kwe kukwe tare ye ketadrebätä kwe aune mun raba niken’. Akwa ñü aune ñü järe ye nikani ta angwane faraón kukwe niebare ye ñaka mikani täte kwe.

Aisete Moisés niebare: ‘Tröda krikri bike kri namaninte nire ñü bitikäre ye kä kwete’. Tröda kwati krubäte käkwe kri aune nüra nire ye kä kwetani jökrä. Faraón ribebare ja dibiti Moisés ie: ‘Ribere Jehovai ne kwe rabadre tröda ne denkä nete’. Akwa Jehovakwe tröda dianinkä ye bitikäre, faraón namani jankunu ja dokwä mike ribi.

Ye bitikäre Jehová niebare Moisés ie: ‘Ja kise ngököte kunkwäre’. Ye bätäräbe kä namani drüne krubäte. Köbömä jire nitre egipcio yei kä ñaka jutuabare jire. Nitre Israel ye aibe gwirete kä nämene ngwen.

Faraón niebare Moisés ie: ‘Mä aune juta mäkwe raba niken, akwa jondron nire munkwe ye aibe munkwe mikate nete’. Moisés niebare ie: ‘Nun rabadre niken jondron nire ye ngwena ne kwe nun rabadre kukwe Ngöbö nunkwe ie’. Faraón namani rubun krubäte aune ngratebare kwe: ‘¡Nän mento nete! Tikwe mä tuaita angwane, tikwe mä murie ketai’.

Moisés ñaka faraón tuaita käbämikani kwe ie. Akwa jämi nikenta ye känenkri niebare kwe ie: ‘Kä ruäre deu monsotre mubai ye jökrä murie ketai kä Egipto nekänti, faraón ngobo aune nitre klabore ye ngobo mubai arato’.

Jehová niebare nitre Israel ie: ‘Munkwe mrö ne sribe. Oveja o cabra ngäbä abokänbiti kä kwati ye munkwe kämika aune jukwe ye kräbäre munkwe därie jüante. Munkwe ngri ye kukwa ñükwäte aune kweta ban ñaka mritani jondron mada yebe. Mun tädre juto biare nänkäre, ja ngwäkitani aune sandalia kitani ja ngotobätä. Köbö deu nete tikwe mun mikai kwäre’. Nitre Israel yebätä kä namani juto krubäte, ¿ñan ererea?

Kä ruäre deu, ángel Jehovakwe janamene ju kwatire kwatire te kä Egipto yete. Jukwe meden kräbäre däri ñaka nämene mikani yekänti monso mubai murie ketani. Akwa, ju meden känti däri nämene jüaninte yete ángel ñaka monso murie ketani jire. Nitre ja mräkäre kä Egipto yekänti, nitre bobre aune nitre jondron bökäne, ye jökrä kän monso mubai murie ketani. Akwa, nitre Israel ye monsoitre ñaka murie ketani jire iti.

Faraón ngobo mubai ye murie ketani arato. Ye namani tare krubäte faraón ie yebätä niebare kwe Moisés aune Aarón ie: ‘¡Mun nän mento nete! ¡Kämikekä nete aune mun nän Ngöbö munkwe mike täte! ¡Jondron nire munkwe ye ngwena aune kämikekä!’.

Köbö yete deu sö nämene ngwen täte. Nitre Israel ja mräkäre aune nitre mada mada ji ngwanka ja ükaninte aune nikanintre mento kä Egipto yebätä. Nitre brare nämene 600,000, ne madakäre meritre aune monsotre kia brare aune merire nämene kwati krubäte. Nitre ñaka israelita ye nikani niaratre ben Jehová mikakäre täte arato. ¡Mrä mada nitre Israel namani kwäre!

Jehovakwe niaratre mikani kwäre, ye ngwankäre törö jai niaratre rabadre mrö ye arabe sribere jankunu kä kwatire kwatire te. Kädekani kwetre Pascua.

Nitre Israel kämikaninkä Egipto ye namani gare faraón ie angwane, nitre tuanimetre niken kwe ye ñaka namani debe kräke. Nitre rükä kwe yei ribebare kwe: ‘Karo rükäre tikwe ye jökrä mike juto aune brän niaratre jiebiti. Nikwe ñaka niaratre tuanemetre niken näre’. Angwane, niara aune nitre rükä kwe ye nikani nitre Israel ye jiebiti.

Jehová nämene juta kwe jie ngwen, rare nämene nuainne muta yebiti aune deu nämene nuainne ñukwä trä yebiti. Nikani niaratre ngwena mar Rojo yekänti aune rabadre nünentubu yete niebare kwe ietre.

Ye bitikäre, nitre Israel ie faraón aune nitre rükä kwe ye nämene näin niaratre jiebiti jutuabare ietre. Nitre Israel ye jiete mren aune nitre rükä egipcio namani. Niaratre namani nikenkä aune namanintre niere Moisés ie: ‘¡Nun murie ketabike! ¿Ñokäre mäkwe nun dianinkä kä Egipto yekänti?’. Akwa Moisés niebare ietre: ‘Mun ñan kä jürä ngwan jabätä. Jehová ni mikai kwäre ño ye mun raba ngübare’. Moisés nämene tö ngwen krubäte Jehovai, ¿ñan ererea?

Ye bitikäre, Jehovakwe niebare nitre Israel ie niaratre rabadre niken. Köbö yete deu, Jehovakwe muta ye mikaninkä mentokwäre aune mikani kwe nitre egipcio aune nitre Israel ye ngätäite. Nitre egipcio nämene yekänti kä namani drüne, akwa nitre Israel yebiti kä namani ngwen.

Ye bitikäre, Jehová niebare Moisés ie rabadre kise ngököte mren yebiti ta. Angwane murie dite mikani mate kwe dibire ta. Mren ye namani ñäkäninbiti ketebu aune te ruäre ji namani. Nitre israelita kwati krubäte nikani kä nötare yete ta aune mren ye namani ñäkäninbiti ketebu jire.

Faraón aune nitre rükä kwe ye nikani nitre Israel ye jiebiti mren namani nötare yete ta. Akwa, Jehovakwe nitre egipcio töi mikani ja rüere kwärikwäri. LLanta karokwe ye namani ngedenkä. Angwane nitre rükä käkwe niebare ja dibiti: ‘¡Ani ngitie! Jehová tä rüre juta kwe dokwäre!’.

Jehová niebare Moisés ie: ‘Kise ngököte mren yebiti ta’. Mren nämene neketanikä ki kwrere, ye batibe niabare nitre rükä egipcio yebiti. Faraón aune nitre rükä kwe ye jökrä murie neketani. Ñaka namaninte jire iti nire.

Mren kwäräkri, nitre jökrä käkwe Ngöbö käikitaninkä kansion yebiti: ‘Tikwe kantai Jehovai, ñobätä ñan aune niara käikitadrekä. Mädä aune nitre nänkäbiti ye jökrä kiti kwe mrente’. Nitre nämene kantare ye ngwane, meritre namani bailare aune pandereta ngö mike. Niaratre jökräbätä kä namani juto krubäte, ñobätä ñan aune niaratre namani kwäre.

Sö nikani krobu ta nitre Israel kämikaninkä Egipto ye bitikäre, namanintre ngutuä Sinaí yekänti aune namani nünentubu yete. Angwane Jehovakwe ribebare Moisés ie niara rabadre niken ngutuä yebiti kwin aune niebare kwe ie: ‘Tikwe nitre Israel mikani kwäre. Niaratre ti kukwei mikai täte aune kukwe keta kabre biain nuaindre tikwe ye mikai täte kwetre angwane, niaratre rabai juta jeñe tikwe’. Moisés nämene ngutuäbiti nükaninta ye ngwane Jehová kukwe niebare ie ye mikani gare kwe nitre Israel yei. ¿Niaratre dre niebare? Niebare kwetre: ‘Jehovakwe dre dre ribedi nuaindre nunye ye jökrä nunkwe nuaindi’.

Ye bitikäre, Moisés nikaninta bobukäre ngutuäbiti kwin. Yete Jehová niebare ie: ‘Köbö rikai köbömä ta yete tikwe blitai juta yebe. Mäkwe nie nitre ie niaratre ñaka rabadre niken ngutuä Sinaí yekänti’. Moisés nükaninta ye ngwane niebare kwe nitre Israel ie niaratre rabadre ja mike juto Jehová kukwei nuakäre.

Köbö köbömä ye bitikäre, mräträ namani ngitiekä aune muta namani iko krubäte ngutuäbiti ye nitre Israel käkwe tuani. Arato unsuli ngö namani krubäte aune nibi krotu ngö namani. Ye bitikäre, Jehová namani ñukwä jutra yete ngutuä yebiti kwin. Nitre Israel yebätä kä jürä namani krubäte. Ngutuä ye jökrä namani ngübüre aune namani ngrenkä krubäte. Nibi krotu ngö ye namani ruin bäri kri. Angwane Jehovakwe niebare: ‘Ti Jehová. Munkwe ñaka ngöbö mada mada mika täte’.

Moisés nikaninta mada bati ngutuä yebiti aune Jehovakwe kukwe keta kabre biani nuaindre juta ye kräke niarai. Kukwe keta kabre biani kwe nuaindre, yekänti juta ye käkwe niara mikadre täte ño aune ja ngwandre ño kwetre ye nämene mike gare. Moisés kukwe ye tikani aune biti ñäkäbare kwebätä nitre Israel ie. Niaratre käbämikani: ‘Jehovata dre dre ribere nunye ye jökrä nunkwe nuaindi’. Niaratre kukwe käbämikani Ngöböi, akwa ¿ye erere nuainbare kwetre?

Jehová niebare Moisés ie: ‘Jakwre tikänti ngutuäbiti nete. Kukwe keta kabre tibike bien nuaindre ye tibike tike jäbätä aune tikwe biain mäi’. Moisés nikani ngutuäbiti aune namani yete köbö 40 te rare aune dibire. Jehovakwe Kukwe Keta Jätä Biani ye tikani kwe jä kwatare kububätä aune biani kwe Moisés ie.

Kä nikani braibe ta angwane, nitre Israel namani nütüre Moisés niaratre tuanimetre. Ye medenbätä, niebare kwetre Aarón ie: ‘¡Ni iti käkwe nun jie ngwandre ie nun tö. Ngöbö sribere nun kräke!’. Aarón niebare ietre: ‘Oro tärä munkwe angwane mun jata ngwena tie’. Angwane, niarakwe oro ye dükaninte ne kwe rabadre nibi ngäbä ye kwrere. Nitre niebare: ‘¡Nibi ngäbä ne ngöbö nikwe, käkwe ni dianinkä kä Egipto yekänti!’. Niaratre fiesta nuainbare aune nibi ngäbä sribebare orore ye mikani ngöböre kwetre jai. ¿Ye namani blo ya? Jän, ñobätä ñan aune juta ye käkwe käbämikani niaratre Jehová aibe mikai täte. Akwa, kukwe käbämikani kwetre ye ñaka namani mike täte.

Dre nämene nemen bare ye jutuabare Jehovai aune niebare kwe Moisés ie: ‘Nänta nitre Israel känti, ñobätä ñan aune niaratre ñaka tä ti mike täte. Tätre ngöbö ngwarbe mike täte’. Moisés nämene ngutuäbiti kwin jataninta motokwäre jä kwatare kubu nämene kisete yebe.

Moisés jatani nökrö bäri nitre nämene nünentubu ye ken angwane, nitre nämene kantare ye kukwei juruabare ie. Nükani yete angwane, nitre nämene bailare aune nibi ngäbä ye mike ngöböre jai. Moisés namani rubun krubäte, yebätä jä kwatare kubu ye kitani tibien kwe aune nötaninbätä jökrä. Jötrö ngwarbe jondron sribebare ye juani ngwarbe kwe aune ngwantaribare kwe Aarón ie: ‘¿Juta ne käkwe dre nuainbare mäbätä abokän köböite mäkwe kukwe blo ne nuainbare?’. Aarón niebare ie: ‘Mä ñaka raba rubun, niaratre tä ja ngwen ño ye gare mäi. Niaratre törbaba ngöbö ie, aisete tikwe oro kitaba ñukwäte aune nibi ngäbä ne rababa’. Aarón ñaka ye nuaindre näre. Moisés nikaninta mada bati ngutuäbiti aune Jehovakwe ngite juandre ta nitre yebiti ye ribebare kwe ie.

Nitre Israel meden tö nämene Jehová mikai täte yebiti ngite juani ta kwe. Niaratre Jehová aune Moisés kukwei mikadre täte ye ütiäte krubäte, ¿ñan ererea?

Moisés nämene ngutuä Sinaí yekänti angwane, Jehová niebare ie niara rabadre tabernáculo sribere. Tabernáculo ye abokän ju ütiäte krubäte känti nitre Israel rabadre Ngöbö mike täte. Ne madakäre, tabernáculo ye rabadre nuäre ngwandre kwäräkwärä niaratre kräke.

Jehová niebare: ‘Tabernáculo ye sribekäre nitre raba dre dre bien ye erere biandre kwetre mäkwe ribe ietre’. Nitre Israel nikani oro, jondron ngwiane, cobre, jä bä nuäre aune jondron ütiäte bä nuäre krubäte ye ngwena. Arato lana, lino, jondron nire kwata aune jondron mada keta kabre biani kwetre. Niaratre ja töi mikani mantiame krubäte, jondron keta kabre biani kwetre, yebätä Moisés niebare ietre: ‘Jondron nibira ere krubäte. Mun ñan jata jondron mada ngwena’.

Nitre brare aune meritre kwati krubäte ie sribi nuain nämene gare ye käkwe tabernáculo ye sribebare. Jehovakwe niaratre mikani töbätä ne kwe sribi ye rabadre bare kwin ietre. Niaratre ruäre nämene kö dätere, kö kite dänte. Nitre mada nämene sribire oro yebätä, tikekä, jä ye ükökrö jabiti aune tabla ötö kiakia ye sribere.

Jehovakwe tabernáculo sribe manabare ye erere nitre nuainbare. Cortina bä nuäre sribebare kwetre abokän namani tabernáculo ñäketubu ketebu jatäri täri, Kä Deme aune Kä Bäri Deme. Kaja Deme sribebare kri acacia aune oro yebiti ye nämene mikani Kä Bäri Deme yekänti. Kä Deme yekänti ñotra krä sribebare orore, mesa aune kä jondron rä mane kukwara nämene mikani. Jubäre jondron cobrere nämene mikani ñö ngwäre aune kä jondron kukwakäre kri nämene mikani. Nitre Israel ie kaja deme ye nämene jutuen angwane, niaratre Jehová mikai täte käbämikani kwetre ye nämene nüketa törö ietre. ¿Kukwe ükateta jabe ye dre gärätä gare mäi? Ye abokän kukwe ütiäte käbämikata jai.

Jehovakwe Aarón aune ngäbriänkätre kwe ye dianinkä ne kwe rabadre sacerdotere aune rabadre sribire tabernáculo yete. Niaratre rabadre tabernáculo ye ngübare aune jondron kukwe Jehovai kä yekänti. Sacerdote bäri kri Aarón ye aibe rabadre niken Kä Bäri Deme yekänti. Kä kwatire kwatire te niara nämene niken Kä Bäri Deme yekänti jondron nire kukwe ngite kwe ütiäre, mräkätre aune juta Israel ye jökrä ütiäre.

Nitre Israel kämikaninkä Egipto ye käi nikani kwati ta ye bitikäre tabernáculo namani bare ietre. Tabernáculo yete niaratre namani Jehová mike täte.

Tabernáculo yebiti Jehovakwe muta mikani yebiti bämikani kwe namani tuin kwin ie aune käi namani jutobätä. Muta ye nämene nemen kwekebe tabernáculo yebiti angwane nitre Israel nämene nemen kwekebe arato. Akwa muta ye nämene nakainkä kwin ye ngwane, niaratre rabadre niken kä madabiti ye nämene nemen gare ietre. Niaratre nämene tabernáculo ye denkä aune muta nämene niken medenkwäre ye jiebiti nämene nikentre.

Nitre Israel kämikaninkä ngutuä Sinaí yekänti. Nänbare kwetre kä ngwarbe nötare kä Parán yete nemen kä kädeka nämene Cadés yekänti. Yete Jehová niebare Moisés ie: ‘Nitre brare juen 12, nitre mräkätre jie ngwanka ye itire itire juen ne kwe rikadre kä Canaán ye tuinbiti kä ye abokän tikwe biandi nitre Israel ie’. Aisete Moisés nitre brare 12 dianinkä aune niebare kwe ietre: ‘Mun nän Canaán aune kä ye kwin nura nökara o ñakare ye munkwe mika ñärärä. Nitre nünanka yete ye dite o ñakare aune tätre nüne jondron nire kwata sribebare jure yete o tätre nüne juta krikri yete ye munkwe mika gare kwin jai arato’. Nitre kä tuabitikä 12 ye nikani Canaán, nitre ye ngätäite Josué aune Caleb nikani.

Köbö nikani 40 ta ye bitikäre nitre kä tuabitikä nükaninta. Niaratre nükani higo, granada aune uva ngwena aune kukwe ne mikani gare kwetre: ‘Kä Canaán ye kwin krubäte, nitre nünanka yete ye dite krubäte aune juta tä ketaninkä ki mente kwin yebiti’. Caleb niebare: ‘¡Ni raba niaratre ganainne! Brän gwäune’. ¿Ñobätä Caleb kukwe ye niebare gare mäi? Ñobätä ñan aune niara aune Josué nämene tö ngwen Jehovai. Akwa nitre kä tuabitikä ni jätä yekwe niebare: ‘Ni ñaka raba niken. Nitre ye abokän nemen diore kwin. Niaratre yebätä ni abokän tröda ye kwrere’.

Nitre Israel di nianinkä, namanintre blite ngwarbe aune namanintre niere: ‘Ani ni mada denkä ni jie ngwankäre aune bränta Egipto. ¿Drekäre ni rikadre Canaán? ¿Ne kwe ni kämikadre?’. Josué aune Caleb niebare: ‘Bäri kwin ani Jehová kukwei mike täte. Niarakwe ni kriemikai. Ñan kä jürä ngwan jabätä’. Akwa nitre Israel ñaka niaratre kukwei mikani täte. Ñakare aune tö namani Josué aune Caleb murie ketai.

¿Jehovakwe dre nuainbare? Niebare kwe Moisés ie: ‘Tikwe jondron kwin keta kabre nuainbarera nitre Israel kräke akwa niaratre ñaka ti kukwei mike täte. Aisete tibike niaratre tuenmetre kä 40 te kä ngwarbe nötare nete nememe niaratre krütadre ye ngwane. Niaratre monsoi aune Josué bätä Caleb ye aibe käkwe nünain kä käbämikani tikwe nitre Israel ie yete’.

Kä nikani ta ye bitikäre, nitre Israel nämene kä ngwarbe nötare yete ngwane, Coré, Datán, Abiram aune nitre mada 250 ja mikani Moisés rüere. Niebare kwetre: ‘¡Nun nibira nainte mun käne! ¿Ñobätä mä aibe rabadre nun jie ngwen? ¿Aune ñobätä Aarón aibe rabadre sacerdote bäri kri? Jehová ñan tä mä aune Aarón aibe ben, ñakare aune tä nun jökrä ben arato’. Kukwe niebare kwetre ye ñaka namani kwin Jehová kräke. Nitre ye nämene ja mike niara rüere namani tuin ie.

Coré aune nitre ja mikaka niarakri yei Moisés kukwe ne niebare: ‘Jetebe mun jata tabernáculo nekänti aune mun jata jondron rä mane ye ngwena jondron ngwä ye kwati kukwara. Jehovakwe nire dianinkä ye mikai gare kwe nie’.

Jetebe se kwrere, Coré aune nitre 250 käkwe ja ükaninkrö tabernáculo yekänti Moisés ben. Yete niaratre namani jondron rä mane ye kukwe ni sacerdote ye kwrere. Angwane Jehová niebare Moisés aune Aarón ie: ‘Kämikekä Coré aune nitre ja mikaka niarakri yebätä’.

Coré janamene Moisés känti tabernáculo yete, akwa Datán, Abiram aune mräkätre kwe ye ñaka ja töi mikani niken. Jehová niebare nitre Israel ie: ‘Coré, Datán aune Abiram jondron nire kwata sribebare jure jai yebätä kämikekä’. Nitre Israel kämikaninkä jötrö ngwarbe. Datán, Abiram aune mräkätre kwe ye namani nünaninkä jondron nire kwata sribebare jure kwetre jai ye ken. Batibe, kä tibien ngetrani aune nitre töi käme ye jökrä ñaninkä kwe. Aune tabernáculo yekänti, ñukwä jutra kä kwinbiti jatani aune Coré bätä nitre 250 ye ganinte kwe.

Ye bitikäre, Jehová niebare Moisés ie: ‘Nitre tä dianinkä mräkätre kwe jie ngwankäre ye itire itire jatadre mökän kwe ngwena. Niaratre itire itire ji ngwanka ye mäkwe kä tika mökän kwetre yebätä. Akwa ni Leví mräkätre jie ngwanka ye mökänbätä, mäkwe Aarón kä tika. Mökän ye jökrä mäkwe mika tabernáculo yete. Nire diainkä tikwe ye abokän mökän kwe blü rabaikä’.

Jetebe se kwrere, Moisés mökän jökrä ye dianinkä aune mikani tuare kwe nitre itire itire ji ngwanka mräkätre käne yei. Mökän Aaronkwe ye blü namani aune almendra ngwä tain nämenebätä. Kukwe yebiti Jehovakwe mikani gare metre niarakwe Aarón dianinkä ne kwe rabadre sacerdote bäri kri.