Jesukwe niebare kukwe kwin Ngöbökwe ye driedre kä jökräbiti tibien ye erere nitre apóstol nuainbare. Kä 47 yete, ja mräkätre kä Antioquía yekänti käkwe Pablo bätä Bernabé juani kukwe driere. Niaratre nibu ye käkwe kukwe driebare kä jutobiti kä Asia Menor yete, ñodre Derbe, Listra aune Iconio ye jökrä känti.

Pablo bätä Bernabé nämene kukwe driere ni jökrä ie, nitre ngwian bökäne, nitre bobre, nitre bati aune nitre umbre yei. Nitre kwati käkwe kukwe metre Kristobätä ye kani ngäbiti. Pablo bätä Bernabé käkwe kukwe driebare ni iti kädeka nämene Sergio Paulo gobranka juta Chipre yete ie, akwa ni iti kwrare tö namani sribi ye ketaibätä. Pablo niebare ni kwrare yei: ‘Jehová tä mä rüere’. Ye ngwane ni kwrare ye okwäte kä namani drüne. Kukwe ye jutuabare ni gobranka Sergio Paulo yei angwane ja mikani kwe kukwebätä.

Pablo bätä Bernabé nämene kukwe driere kä jökrä känti, ju ju te, jondron rürübäin nämene yekänti, ji ngrabare aune sinagogate. Bati ni iti ngüre bren nämene Listra ye mikaninta kwin kwetre. Kukwe ye jutuabare nitre ie angwane namanintre nütüre Pablo bätä Bernabé ye abokän ngöbö yebätä nitre ye tö namani niaratre mikai ngöböre jai. Pablo bätä Bernabé ñaka kukwe ye kani ngäbiti, ñakare aune niaratre niebare ietre: ‘¡Ngöbö aibe mikadre täte! Nun ne abokän ni kä nebätä arato’. Angwane nitre judío ruäre nükani käkwe nitre mada ye töi mikani ja mike Pablo rüere. Nitre ye käkwe täkäni jäbiti aune jäkäni tibienta kwetre nemen juta ye bäre, ñobätä ñan aune namanintre nütüre niara namanina ngwakare. ¡Akwa Pablo nämene nire! Bengwairebe, ja mräkätre ruäre nükani niara dimike aune nikanintre ngwenanta jutate. Ye bitikäre, Pablo nikaninta Antioquía.

Kä 49 yete, Pablo nikani kukwe driere kä madakänti. Janamene ja mräkätre tuinbiti kä Asia Menor yekänti aune yebiti nikani kukwe kwin Ngöbökwe ye driere kä Europa yekänti. Janamene Atenas, Éfeso, Filipos, Tesalónica aune kä mada mada yekänti. Nikani kukwe driere ye ngwane Silas, Lucas aune monso bati Timoteo nikani siba ben. Niaratre sribibare gwairebe konkrekasion mrä mrä ükatekäre aune mikakäre nemen dite. Pablo namani Corinto kä kwati biti ötare ja mräkätre dimikakäre. Niara nämene kukwe driere, dirire aune tärä tike konkrekasion kwati krubäte ie. Arato nämene jondron nire kwata sribere jure. Kä nikani ta ye bitikäre, Pablo nikaninta Antioquía.

Kä 52 yete, Pablo nikaninta bämäkäre kukwe driere aune nuainbare kwe Asia Menor yete. Nikani ngwitärikri nemen Filipos aune ye bitikäre nikani nemen Corinto. Kä kwati krubäte te Pablo diribare Éfeso, nitre bren mikaninta räre kwe aune nämene konkrekasion dimike. Ne madakäre, köbö kwatire kwatire niara nämene kukwe kädriere nitre jökrä kräke kä dianinkä kukwe kädriekäre kwelate yekänti. Nitre kwati krubäte käkwe niara kukwei mikani täte aune ja töi kwitani kwetre. Pablo janamene kä keta kabre känti kukwe kwin Ngöbökwe driere, mrä mada, nikani Jerusalén.

Kä Filipos yekänti meri bati nämene sribire ni mada kräke, meri ye nämene dre rabai bare ja känenkäre ye mike gare, ñobätä ñan aune chokali nämenebätä. Meri ye nämene ngwian ganainne krubäte ni sribi bökänkä ye kräke. Pablo bätä Silas namani Filipos ye ngwane meri ye namani näin jiebiti nekwäre sekwäre köbö kwati krubäte te. Chokali nämene niarabätä ye namani mike kukwe ne niere: ‘Nitre noko abokän tä sribire klabore Ngöbö kri kä kwinbiti kräke’. Mrä mada, Pablokwe niebare chokali ie: ‘¡Tita ribere Jesús ye käbiti mäi, kä mikekä niarabätä!’. Aune chokali ye nikani mento meri yebätä.

Nitre sribi bökänkä yei namani gare niaratre ñaka ngwian ganaindi meri ye köböire yebätä namanintre rubun. Yebätä Pablo aune Silas jänikani kwetre gobrantre, nitre kukwe ükatekä ye ngwärekri aune niebare kwetre nitre yei: ‘Kukweta ükaninte ye nitre noko ñaka tä mike täte ye köböite, ¡kukwe kri kite nemen bare juta nete!’. Nitre kukwe ükatekä ye käkwe niebare ietre, niaratre rabadre Pablo aune Silas mete biti kite ngite. Ni nitre ngite ngübabitikä ye käkwe Pablo aune Silas kitani kä bäri iko yekänti. Ne madakäre, niaratre mikani krite.

Pablo bätä Silas namani kantare Jehová käikitakakäre angwane nitre nämene kitani ngite ye nämene kukwe nuin. Batibe kä ruäre deu, dobo kri mata nükani käkwe kä nitre ngite kräke ye ngwani ngrenkä ja dibiti. Jukwe jökrä ye ngitiani aune cadena bätä krite nitre nämene ngite ye jökrä ngitiani. Ni nitre ngite ngübabitikä jatani betekä nüke kä teri aune jukwe jökrä nämene tikani jutuabare ie. Namani nütüre nitre nämene ngite ye jökrä ngitiani, yebätä ngitra diani kwe kisete ja murie ketakäre.

Ye ngwane Pablo ngratebare: ‘¡Ñaka kukwe tare nuain jabätä! ¡Nun jökrä tä nete!’. Ni nitre ngite ngübabitikä ye nikani betekä Pablo aune Silas yekänti aune namani ngukodokwäre niaratre ngwärekri. Ni yekwe ngwantaribare ietre: ‘¿Tikwe dre nuaindre ne kwe ti rabadre kwäre?’. Niaratre käkwe niebare ie: ‘Mä aune nitre jökrä tä nüne mäbe yekwe Jesús mikadre era jai’. Pablo aune Silas ye namani kukwe Jehovabätä ye dirire ietre aune ni ye bätä nitre jökrä nämene nüne ben ye ja ngökani ñöte.

Monso bati kädeka nämene Timoteo nämene konkrekasion Listra yete. Niara rün abokän griego aune meye abokän judía. Meye kädeka nämene Eunice, aune mölöi abokän Loida. Timoteo nämene chi ye ngwane Eunice aune Loida käkwe kukwe driebare Jehovabätä ie.

Pablo janamanenta bobukäre kukwe driere Listra ye ngwane namani gare ie Timoteo nämene ja mräkätre tarere erametre aune käre töi nämene ja mräkätre dimikabätä. Yebätä, Pablokwe Timoteo nübaibare niken jabe kukwe driere. Kä nikani ta angwane, Pablokwe Timoteo tötikani ne kwe rabadre dirire kwin aune rabadre kukwe kwin Ngöbökwe ye mike gare.

Üai deme nämene Pablo aune Timoteo jie ngwen kä jökrä känti. Bati deu, jondron mikani tuare köböre Pablo ie. Ni iti namani niere ie rikadre Macedonia niaratre dimike. Aisete, Pablo, Timoteo, Silas aune Lucas nikani kä yekänti kukwe driere aune konkrekasion ükete.

Juta macedonia kä Tesalónica yekänti nitre brare aune merire kwati käkwe ja mikani kristiano. Akwa, nitre judío ruäre namani bätä ngwen Pablo aune nitre nänkä ben yebätä. Nitre kwati töi blo ükaninkrö kwetre aune nitre ye käkwe ja mräkätre jäkäni nemen gobrantre ngwärekri. Nitre judío namani ngrente: ‘¡Nitre noko tä ja mike gobran Roma rüere!’. Pablo aune Timoteo namani kukwe tare te, yebätä ngitianintre deu nemen Berea.

Nitre kä Berea yekänti tö namani kukwe kwin Ngöbökwe ye kukwe nuai aune nitre griego bätä judío kwati krubäte käkwe ja mikani kristiano. Akwa, nitre judío ruäre nämene Tesalónica nükani yete ja mikakäre Pablo rüere, yebätä Pablo nikani mada Atenas. Timoteo aune Silas namani Berea ja mräkätre dimikakäre. Kä nikani ta angwane, Pablokwe Timoteo juaninta Tesalónica ja mräkätre dimike kä ngwankäre nüke jai kukwe tare nämene nakainkä bätätre yebätä. Ye bitikäre, Pablokwe Timoteo juani konkrekasion mada mada tuinbiti aune dimike.

Pablokwe niebare Timoteo ie: ‘Nire nire tö sribidi Jehová kräke ye rüe rakaikä’. Timoteo nämene kukwe mike täte yebätä rüe nakaninkä aune kitani ngite arato. Akwa, kä nämene jutobätä, ñobätä ñan aune yebiti nämene bämike Jehovai nämene ja ngwen metre ie.

Pablo niebare nitre Filipos ie: ‘Tikwe Timoteo juain munkänti. Nändre ño jankunu ji metre yebiti aune kukwe driedre ño ye niarakwe driedi munye’. Pablo nämene tö ngwen Timoteo ie. Niaratre sribibare gwairebe Ngöbö kräke kä kwati krubäte te aune ja ketabare kwin kwetre.

Bämäkäre Pablo nikani kukwe driere ye mikani krüte kwe Jerusalén. Yete niara kani ngite. Bati deu, niara nämene ngite ye ngwane, Jesús blitabare ben köböre: ‘Mä jänäin Roma aune mäkwe kukwe driei juta yete’. Angwane Pablo nämene Jerusalén jänikani kä Cesarea yekänti. Yete niara nämene ngite kä kubu te. Bati, Pablo nämene gobran Festo kukwe ükatekä ye ngwärekri angwane ribebare kwe: ‘César kukwe ükadrete ti kräke Roma ie ti tö’. Festo niebare ie: ‘César kukwe ükadrete mä kräke ie mä tö angwane, tibike mä juen César känti’. Aisete ru nikani Roma kokwäre yete Pablo juani. Ja mräkätre nibu kristiano nämene näin niara mukore, Lucas aune Aristarco.

Niaratre nämene mrenbiti ye ngwane, murie ribi ñübe minimini namani köbö kwati krubäte te. Nitre jökrä namani nütüre niaratre krütai. Akwa Pablo niebare ietre: ‘Ángel iti nieba köböre tie: ‘Mä ñaka kä jürä ngwan jabätä. Mä rabai Roma aune nitre jökrä tä näin rute ye rabaite nire’. Aisete, ¡mun ñan kä jürä ngwan jabätä! Ni ñaka krütai’.

Niaratre ja di nuani murie ribi ñübe minimini yebe köbö 14 te, ye bitikäre mrä mada kä tibien ye jutuabare ietre. Ye abokän ngutuä Malta. Ru ye neketaninkä aune ngetrani kia kia, akwa nitre 276 nämene näin rute ye namaninte nire mren kräbiti. Nitre ruäre käkwe jübakabare, mada abokän käkwe ja ketaninte kri kunkwä yebätä nememe jate. Nitre nünanka Malta ye niaratre ngübabare kwin aune ñukwä jutra mikani kwe ietre ne kwe niaratre rabadre ja mike krube.

Sö nikani krämä ta ye bitikäre, nitre rükä ye nikani Pablo ngwena ru madate nemen Roma. Niara namani ye ngwane ja mräkätre janamene kain ngäbiti. Niaratre jutuabare Pablo ie angwane debe biani kwe Ngöböi aune ja namani ruinta dite ie. Pablo nämene kitani ngite akwa niara tuanimetre ju den jai ütiä biankäre nünana aune ni iti rükä nämene niara ngübarebiti. Yete niara nämene kä kubu te. Nitre nämene niken basare ie aune kukwe kwin Gobran Ngöbökwe yebätä ye niara nämene driere ietre bätä nämene dirire Jesubätä nitre ie. Pablo tärä tikani konkrekasion Asia Menor aune Judea ie arato. Erametre Jehovakwe Pablo mikani kukwe kwin ye mike gare juta jene jene ie.